ആ കൊലപാതകിയെ ദൃക്സാക്ഷി തിരിച്ചറിഞ്ഞു; കച്ചിവണ്ടിയിലെ കച്ചി പോലെ മുടിയുള്ളയാള്‍; ഒടുവിൽ ജയിലിലേക്ക്

നേര് എന്ന സിനിമയില്‍ കണ്ണ് കാണാത്ത കുട്ടിയാണല്ലോ ബലാത്സംഗത്തിന് ഇരയാകുന്നത്. പ്രതിയെ കണ്ടെത്താന്‍ ബുദ്ധിമുട്ടുന്നതും തുടര്‍ന്നുള്ള സംഭവവികാസങ്ങളും ആണ് ആ സിനിമയുടെ ഇതിവൃത്തം. പണ്ടൊരിക്കല്‍ നമ്മള്‍ സംസാരിച്ചപ്പോള്‍ താങ്കള്‍ സമാനമായ ഒരു കേസ് പങ്കുവെച്ചതോര്‍ക്കുന്നു. റേപ് ചെയ്ത പ്രതിയെ കാണാത്ത പെണ്‍കുട്ടി നല്‍കിയ വിവരണം അനുസരിച്ച് രേഖാചിത്രം വരച്ച് പ്രതിയെ കണ്ടെത്തിയെന്ന് അന്നു താങ്കൾ പറഞ്ഞിരുന്നു. അതേക്കുറിച്ച് പറയാമോ.
 
തിരുവനന്തപുരത്ത് നടന്ന കേസാണ്. അവിടെ ഒരു പെണ്‍കുട്ടിയെ പിറകില്‍ നിന്ന് ഒരാള്‍ വന്ന് വായും മൂക്കും പൊത്തിപ്പിടിച്ചുകൊണ്ടു പോയി ഒരു ഇരുട്ടുമുറിയിലിട്ട് റേപ് ചെയ്യുകയായിരുന്നു. പിറകില്‍ നിന്ന് പിടിച്ചപ്പോഴുള്ള അയാളുടെ കൈ മാത്രമേ കുട്ടിക്ക് കാണാനായിട്ടുണ്ടായിരുന്നുള്ളൂ. അത് നീലനിറമായിരുന്നു.

അതായത് ആകെ കിട്ടിയ ക്ലൂ അയാളിട്ട ഷര്‍ട്ടിന്റെ നിറം നീലയായിരുന്നു എന്നതാണോ.

ഇടിഞ്ഞു പൊളിഞ്ഞ ക്വാര്‍ട്ടേഴ്‌സിന്റെ സമീപത്ത് നിന്ന് പെണ്‍കുട്ടി തുണി നനയ്ക്കുമ്പോഴാണ് അക്രമി പിന്നില്‍ക്കൂടെ വന്ന് വാ പൊത്തിപ്പിടിച്ച് കൊണ്ടുപോവുന്നത്. ഒരു ഇരുട്ടുമുറിയില്‍ ഇട്ടാണ് പീഡിപ്പിക്കുന്നത്. ആ കുട്ടി ആകെപ്പാടെ കണ്ടത് ഈ ഷര്‍ട്ടിന്റെ തുമ്പ് മാത്രമാണ്. അയാള്‍ ഇട്ട ഷര്‍ട്ടിന്റെ നിറം നീല ആയിരുന്നു എന്നുള്ളതായിരുന്നു ആ പെണ്‍കുട്ടി ആകെ ശ്രദ്ധിച്ചതും ഓര്‍ത്തതും. ആരും ചോദിക്കാത്ത ചോദ്യമാണ്. അന്ന് ആ കേസില്‍ എന്നെ അവിടെ രക്ഷിച്ചത്. 'ഈ ഷര്‍ട്ട് ഇട്ട ആളെ മോള് മുന്‍പ് കണ്ടിട്ടുണ്ടോ' എന്ന ഒറ്റ ചോദ്യം അന്വേഷണ ഉദ്യോഗസ്ഥരെ പ്രതിയിലേക്ക് വേഗമെത്തിച്ചു. അന്ന് തന്നെ "അച്ഛന്‍ ഇവിടുണ്ടോ" എന്നെ് ചോദിച്ച് ഒരാള്‍ വന്നിരുന്നു എന്ന് പെണ്‍കുട്ടി പറഞ്ഞു.  ഇതേ നീല കളര്‍ ഷര്‍ട്ടായിരുന്നു അയാളിട്ടത്. അങ്ങനെ പെണ്‍കുട്ടി പറഞ്ഞ വിവരണമനുസരിച്ച് ആളെ വരക്കുകയും പ്രതിയെ കണ്ടെത്തുകയുമായിരുന്നു. പിന്നെ ആ കേസ് തെളിയിക്കപ്പെട്ടു.

കേരളം മുഴുവനുള്ള കേസുകള്‍ക്ക് രേഖാചിത്ര കലാകാരനായിട്ട് രേഖാചിത്രം വരയ്ക്കുന്ന ആളായിട്ട് താങ്കളെ വിളിക്കാം എന്ന് പറഞ്ഞ് ലോക്നാഥ്  ബെഹ്റ  ഒരു ഉത്തരവ് പുറപ്പെടിച്ചിരുന്നില്ലേ. അതിന്  ഇടയാക്കിയ  സാഹചര്യം വിശദീകരിക്കാമോ.

പോലീസിലെ തന്നെ സുഹൃത്തുക്കളാണ് ഞാനിത്തരത്തില്‍ രേഖാചിത്രം വരയ്ക്കുന്ന കാര്യം അദ്ദേഹത്തിന്റെ ശ്രദ്ധയില്‍പ്പെടുത്തുന്നത്. ഞാന്‍ ഇതുവരെ ഇത്രയധികം ചിത്രങ്ങള്‍ വരച്ചതില്‍ നിന്ന് ആര്‍ജിച്ച ചില അറിവുകളുണ്ട്. അത് അടുത്ത തലമുറയ്ക്ക് കൊടുത്തിട്ട് പോകണമെന്നാണ് എന്റെ ആഗ്രഹം. ഈ കല നിന്നുപോകരുത് കാരണം ഇതിനകത്ത് കുറെ ശാസ്ത്രീയമായ പാഠങ്ങളുണ്ട്. ഞാന്‍ രേഖാചിത്രം വരച്ച് തെളിയിച്ച പല കേസുകളെ കുറിച്ചുള്ള വിവരങ്ങളും ആ ചിത്രങ്ങളുമെല്ലാം വെച്ച് ഞാന്‍ അദ്ദേഹത്തിന് ഒരു അപേക്ഷ കൊടുത്തിരുന്നു. ആ അപേക്ഷയുടെ ഫലമായിട്ടാണ് എനിക്ക് അന്ന് കേരളത്തിലങ്ങോളമിങ്ങോളം നടന്ന് വരയ്ക്കാന്‍ വേണ്ടി അദ്ദേഹം വഴിയൊരുക്കിത്തന്നത്. 

അങ്ങനെ എത്ര കാലം പോയി വരച്ചു.

മൂന്നാല് വര്‍ഷം. 

പിന്നെ എന്താ അത് നിന്ന് പോയത്.

ചില ആരോഗ്യ പ്രശ്‌നങ്ങള്‍ ഉണ്ടായി. സിസ്റ്റത്തില്‍ നിന്നുള്ള പ്രോത്സാഹനവും ഇല്ല. ഈ കാര്യങ്ങള്‍ക്കൊക്കെ വലിയ സാമ്പത്തികച്ചെലവാണ്. ഈ സോഫ്​റ്റ്​വെയർ വാങ്ങാനും ടാബ്ലെറ്റിനുമൊക്കെ വലിയ തുക തന്നെ ഞാന്‍ ചെലവാക്കിയിരുന്നു. എനിക്കൊരപകടം പറ്റുക കൂടി ചെയ്തതോടെ പലയിടങ്ങളില്‍ പോയി വരയ്ക്കുന്നത് കുറഞ്ഞു.

അജ്ഞാതനായിട്ടുള്ള ആളുകളെ കണ്ടുപിടിക്കാന്‍ ആണല്ലോ പൊതുവെ സ്ഥിരമായിട്ട് നമ്മള്‍ രേഖാചിത്രം വരയ്‌ക്കേണ്ടി വരുന്നത്. നിലവില്‍ ഫോട്ടോയുള്ള ആളുടെ രേഖാചിത്രം വരയ്ക്കേണ്ട ആവശ്യമില്ലല്ലോ.

അജ്ഞാത പ്രതികളെയല്ലാതെ രേഖാചിത്രം വരയ്ക്കേണ്ട സാഹചര്യങ്ങളും ഉണ്ടാവാറുണ്ട്. ചില മൃതദേഹങ്ങളൊക്കെ അഴുകിയ അവസ്ഥയില്‍ കിട്ടും. വെള്ളത്തില്‍ കിടന്ന് മുഖമൊന്നും വ്യക്തമായി മനസ്സിലാവാത്ത വിധം അഴുകിയിട്ടുണ്ടാകും. അതുപോലെ ചില കൊലപാതകക്കേസുകളില്‍ മുഖമാകെ ആസിഡൊഴിച്ച് വികൃതമാക്കിക്കളയും. അത്തരം കേസുകളിലൊക്കെ മൃതദേഹം ആരുടെതെന്ന് തിരിച്ചറിയാന്‍ വേണ്ടി വരച്ചെടുക്കാറുണ്ട്.

മിസ്സിങ് കേസുകളുള്ള ഇടങ്ങളിലേക്കൊക്കെ ഈ വരച്ച ചിത്രം അയച്ചു കൊടുക്കും. ഒരിക്കൽ ഇങ്ങനെ അയച്ച ചിത്രം കണ്ട്   ഇതെന്റെ സഹോദരനാണെന്ന് പറഞ്ഞ് ഒരു സ്ത്രീ അന്വേഷിച്ചു വന്നിരുന്നു. ബോഡി കണ്ട് ഒരിക്കലും തിരിച്ചറിയാന്‍ പറ്റാത്ത വിധം അഴുകിയിരുന്നു. പക്ഷേ, വീട്ടുകാർക്ക് അയാളെ കൊണ്ടുപോകാനായി. അനാഥശവമായി അടക്കേണ്ടി വന്നില്ല.

എങ്ങനെയാണ് ഈ പ്രക്രിയ.

മൃതദേഹത്തിന്റെ ഫോട്ടോ എടുത്തശേഷം മൊത്തം വരച്ചെടുക്കുകയാണ് ചെയ്യാറ്. എന്നിട്ട് മിസ്സിങ് ആളുകളുള്ള സ്‌റ്രേഷനുകളിലേക്ക് ഫോട്ടോ അയച്ച് ആ ഫോട്ടോ ബന്ധുക്കൾക്ക് കാണിച്ചു കൊടുക്കുകയാണ് പതിവു രീതി. ബന്ധുക്കള്‍ക്ക് ഒരിക്കലും മൃതദേഹത്തിന്റെ പടമല്ല പകരം ഈ റീക്രിയേറ്റ് ചെയ്ത പടപാണ് കാണിച്ചു കൊടുക്കുക.

ആസിഡൊഴിച്ച് വികൃതമായതെങ്ങനെയാണ് വരച്ചെടുക്കാന്‍ കഴിയുന്നത്.

നഷ്ടപ്പെട്ടതൊലിയുടെയും ഇറച്ചിയുടെയും ഭാഗം നമ്മള്‍ ഫോട്ടയില്‍ പുനഃസൃഷ്ടിക്കും. മരണമടഞ്ഞ സര്‍ജന്‍ ഉമാദത്തന്‍ സര്‍ സൂപ്പര്‍ ഇംപോസ് ഒക്കെ ചെയ്യാറുണ്ട്. തലയോട്ടിയുടെ ഫോട്ടോ എടുത്ത് അത് എന്‍ലാര്‍ജ് ചെയ്ത് രണ്ടിന്റെയും പോയിന്റുകള്‍ പരിശോധിച്ച് ശരിയാണോ എന്ന് നോക്കുന്നതാണ് സൂപ്പര്‍ ഇംപോസിഷന്‍. തലയോട്ടിയില്‍ ക്ലേ ഒട്ടിച്ച് മാംസംപോലെ ഉണ്ടാക്കി എടുക്കുന്ന രീതിയുമുണ്ട്. ഇപ്പോള്‍ മരിച്ചയാളുടെ മുഖത്തിന്‍രെ ഏകദേശ രൂപം ലഭിക്കും.

തുടരും