നിഗൂഢതയുടെ തീരാഗര്‍ത്തങ്ങള്‍, ഭരണാധികാരിയുടെ ഇച്ഛാശക്തിയില്‍ ചരിത്രം തിരുത്തിയ ഗ്രാന്‍ഡ് കാന്യന്‍

കൂടുതൽ പ്രീമിയം ലേഖനങ്ങൾ വായിക്കാൻ വാട്സ് ആപ്പ് ഗ്രൂപ്പിൽ ചേരുക

• ശാസ്ത്രജ്ഞരുടെ ഔട്ട്ഡോര്‍ ലബോറട്ടറി

പല നിറത്തില്‍ തട്ടുകളായിട്ടുള്ള പർവ്വതങ്ങളും മലയിടുക്കും ചേർന്നതാണ് ഗ്രാന്‍ഡ് കാന്യന്‍. അതിനിടയിലൂടെ സ്വച്ഛന്തമായി ഒഴുകുന്ന കൊളറാഡോ നദി. ഗ്രാന്‍ഡ് കാന്യന്‍ ഇങ്ങനെ ലോക വിസ്മയമായി നിലകൊള്ളാന്‍ തുടങ്ങിയിട്ട് കാലമേറെയായെങ്കിലും ഇതുമായി ബന്ധപ്പെട്ട പല പഠനങ്ങളും ഇപ്പോഴും തുടരുന്നുണ്ട്. ഇവിടെ മാത്രം കാണപ്പെടുന്ന കാലാവസ്ഥ, മണ്ണ്, പാറകള്‍, സൂക്ഷ്മജീവികൾ, വന്യമൃഗങ്ങള്‍ എന്നിവയെല്ലാമായി ബന്ധപ്പെട്ട് പലതരം റിപ്പോര്‍ട്ടുകളും പുറത്തുവരാറുണ്ട്. അതുകൊണ്ടു തന്നെ ശാസ്ത്രജ്ഞരുടെ തുറന്ന ലബറോട്ടറി  എന്ന വിളിപ്പേരും ഗ്രാന്‍ഡ്കാന്യനുണ്ട്. ഏകദേശം 1500 ഓളം സസ്യജാലങ്ങള്‍, 300 പക്ഷി വിഭാഗങ്ങള്‍, 89 തരം സസ്തനികൾ എന്നിവയെല്ലാം ഈ വിസ്മയവുമായി ബന്ധപ്പെട്ട് അധിവസിച്ചുപോരുന്നുണ്ട്. ഇതിനെയെല്ലാം ഒരുമിച്ച് ചേര്‍ത്ത് നിര്‍ത്തുന്ന സംരക്ഷണ പ്രവര്‍ത്തനങ്ങളാണ് ഇന്നും നടക്കുന്നത്. അതുകൊണ്ടു തന്നെ പ്രകൃതി സംരക്ഷണത്തിന്റെ മാതൃകയായും ഗ്രാന്‍ഡ് കാന്യനിനെ കരുതിപ്പോരുന്നു. പരമ്പരാഗത ആദിവാസി വിഭാഗങ്ങള്‍ പ്രാര്‍ഥനയ്ക്കായും മതമപരമായ മറ്റ് ചടങ്ങുകള്‍ക്കായും ഇന്നും ഗ്രാന്‍ഡ് കാന്യനിന്റെ വിവിധ ഭാഗങ്ങളെ ഉപയോഗിക്കുന്നുണ്ട്. അതുകൊണ്ടു തന്നെ പരിശുദ്ധമായ സ്ഥലമെന്ന നിലയ്ക്കാണ് ഇവര്‍ക്കിടയില്‍ ഗ്രാന്‍ഡ് കാന്യനിന് സ്ഥാനമുള്ളതും.

ഗ്രാന്‍ഡ് കാന്യനിന്റ ഉത്ഭവത്തെകുറിച്ച് ഭൗമശാസ്ത്രജ്ഞര്‍ക്കിടയില്‍ പലതരത്തിലുള്ള അഭിപ്രായവ്യത്യാസങ്ങള്‍ നിലനില്‍ക്കുന്നുണ്ട്. 1.7 കോടി വര്‍ഷങ്ങളുടെ പഴക്കമുണ്ടെന്ന് ചില പഠനങ്ങള്‍ പറയുന്നു. അന്നുമുതല്‍ തുടര്‍ച്ചയായി നിരന്തരം നടന്നുകൊണ്ടിരിക്കുന്ന ഭൗമപ്രക്രിയയിലൂടെയാണ് ഗ്രാന്‍ഡ് കാന്യണ് നാം ഇന്നു കാണുന്ന രൂപം കൈവന്നിരിക്കുന്നത്. ആയിരക്കണക്കിന് വര്‍ഷങ്ങളോളം തദ്ദേശീയർ ഈ പ്രദേശത്ത് അധിവസിച്ചിരുന്നുവെന്നും പറയപ്പെടുന്നുണ്ട്. അമേരിക്കയുടെ തെക്ക് പടിഞ്ഞാറ് ഭാഗത്തുള്ള പരമ്പരാഗത പ്യൂബ്ലോ ജനത ഗ്രാന്‍ഡ് കാന്യനിനെ പവിത്രഭൂമിയായാണ് കരുതിയിരുന്നത്. ഇവിടേക്ക് തീര്‍ഥാടന യാത്രകളും മറ്റും നടത്തിയിരുന്നു. വളരെയധികം വര്‍ഷങ്ങളോളം അജ്ഞാതമായിരുന്ന ഈ പ്രദേശം ആദ്യമായി കണ്ടെത്തിയത് സ്പെയിനില്‍നിന്നുള്ള ഗ്രേസിയ ലോപ്പസ് ഡെ കരാഡെനാസാണ്. 1540 ലായിരുന്നു അദ്ദേഹം ഇവിടെയെത്തിയത്.

• കാഴ്ചയില്‍ സുന്ദരം പക്ഷെ അപകടം പതിയിരിക്കും

പാറക്കെട്ടുകളാലും മലയിടുക്കുകളാലും സമ്പന്നമായ സുന്ദരഭൂമിയാണെങ്കിലും അധികൃതര്‍ നല്‍കുന്ന മാര്‍ഗനിര്‍ദേശങ്ങള്‍ പാലിച്ചില്ലെങ്കില്‍ മരണമുറപ്പെന്ന് പറയാം. അതുകൊണ്ടു തന്നെ കാഴ്ചകള്‍ ആസ്വദിക്കാന്‍ പാര്‍ക്ക് അധികൃതര്‍ ഒരുക്കിയ പ്രത്യേകം വഴികളിലൂടെയേ പറ്റൂ. നിമിഷ നേരം കൊണ്ട് മാറുന്ന കാലാവസ്ഥയും അപകടക്കെണിയാണ്.

മഞ്ഞുകാലത്ത് ഐസ് കട്ടകള്‍ വീണ് നിറഞ്ഞിരിക്കുന്ന വഴികളിലൂടെ വേണം സന്ദര്‍ശനം. സൂക്ഷിച്ചില്ലെങ്കില്‍ താഴ്ചയിലേക്ക് പതിക്കുമെന്നുറപ്പ്. ഏതെങ്കിലും തരത്തിലുള്ള അപകടങ്ങളുണ്ടായാല്‍ അടിയന്തര ചികിത്സയ്ക്ക് പോലും മണിക്കൂറുകള്‍ സഞ്ചരിക്കേണ്ടി വരും. എങ്കിലും ഓരോ വര്‍ഷവും ലക്ഷക്കണക്കിന് ആളുകളാണ് ഈ പ്രകൃതി വിസ്മയം കാണാനായി എത്തുന്നത്. അമേരിക്കയില്‍ ഏറ്റവും കൂടുതല്‍ ആളുകളെത്തുന്ന വിനോദ സഞ്ചാര കേന്ദ്രങ്ങളിലൊന്നും ഗ്രാന്‍ഡ് കാന്യനാണ്. അങ്ങനെയിത് പ്രദേശവാസികളുടെ പ്രധാന വരുമാന മാര്‍ഗവും തൊഴിലിടവുമായി മാറുകയും ചെയ്തു.

ഡീഹൈഡ്രേഷന്‍, അതിശക്തമായ ചൂട്, മാര്‍ഗനിര്‍ദേശങ്ങള്‍ കൃത്യമായി പാലിക്കാതെയുള്ള സന്ദര്‍ശനം, സാഹസിക പ്രവര്‍ത്തനങ്ങള്‍ എന്നിവയെല്ലാം ഇവിടെയുള്ള മരണനിരക്ക് വര്‍ധിക്കാന്‍ കാരണമായിട്ടുണ്ടെന്നാണ് പാര്‍ക്ക് അധികൃതര്‍ ചൂണ്ടിക്കാട്ടുന്നത്. മാത്രമല്ല അമിത ഉയരം ചിലരില്‍ ഹൃദായാഘാതം പോലുമുണ്ടാക്കിയേക്കാം. അതുകൊണ്ടുതന്നെ  ആവശ്യത്തിന് കുടിവെള്ളവും ഭക്ഷണവും കരുതാതെയും സ്വന്തം ആരോഗ്യത്തില്‍ ബോധവാന്‍മാരാകാതെയുമുള്ള സന്ദര്‍ശനം പരമാവധി ഒഴിവാക്കണമെന്നാണ് അധികൃതര്‍ക്ക് മുന്നറിയിപ്പ് നല്‍കാനുള്ളത്.