എഐയെ കൂടുതല്‍ സ്വകാര്യവും സുതാര്യവുമാക്കാനുള്ള മത്സരത്തില്‍ ഗൂഗിളിന്റെ ഒരു വലിയ ചുവടുവെപ്പാണിത്.
സ്വകാര്യതയില്‍ ഒട്ടും വിട്ടുവീഴ്ച ചെയ്യാതെ നൂതനമായ എഐ പ്രോസസിംഗ് സാധ്യമാക്കാന്‍ ഗൂഗിള്‍. എഐ മോഡലുകളെ കൂടുതല്‍ മികച്ചതാക്കാന്‍ രൂപകല്‍പ്പന ചെയ്ത 'പ്രൈവറ്റ് എഐ കമ്പ്യൂട്ട്' എന്ന പുതിയ ക്ലൗഡ് പ്ലാറ്റ്‌ഫോം കമ്പനി അവതരിപ്പിച്ചു.
ഉപയോക്താക്കള്‍ പങ്കുവെക്കുകയോ വിശകലനം നടത്തുകയോ ചെയ്യുന്ന കാര്യങ്ങള്‍ ഗൂഗിളിന് പോലും ആക്സസ് ചെയ്യാന്‍ കഴിയാത്ത രീതിയിലാണ് ഈ സിസ്റ്റം രൂപകല്‍പ്പന ചെയ്തിരിക്കുന്നതെന്നാണ് കമ്പനി പറയുന്നത്. ഗൂഗിളിന്റെ എഞ്ചിനീയര്‍മാര്‍ക്കോ പരസ്യം നല്‍കുന്നവര്‍ക്കോ ഉള്‍പ്പെടെ ഒരു ബാഹ്യ ഏജന്‍സിക്കും ഉപയോക്താക്കളുടെ ഡാറ്റയിലേക്ക് എത്തിനോക്കാന്‍ കഴിയില്ല എന്നാണ് അവകാശവാദം.
ഉപകരണത്തിലെ സുരക്ഷയും ക്ലൗഡ് തലത്തിലുള്ള സുരക്ഷാപഴുതുകളും തമ്മിലുള്ള വിടവ് ഈ സാങ്കേതികവിദ്യ നികത്തുന്നുവെന്ന് കമ്പനി പറയുന്നു. ആപ്പിള്‍ പോലുള്ള കമ്പനികള്‍ സ്വന്തം ക്ലൗഡ് സിസ്റ്റങ്ങളുമായി സമാനമായ സംരംഭങ്ങള്‍ പ്രോത്സാഹിപ്പിക്കുന്ന സാഹചര്യത്തിലാണ് ഗൂഗിളിന്റെ നീക്കം. എഐയെ കൂടുതല്‍ സ്വകാര്യവും സുതാര്യവുമാക്കാനുള്ള മത്സരത്തില്‍ ഗൂഗിളിന്റെ ഒരു വലിയ ചുവടുവെപ്പാണിത്.
എന്തൊക്കെയാണ് പ്രത്യേകതകള്‍
ഉള്ളടക്കം സംഗ്രഹിക്കുക, സന്ദര്‍ഭോചിതമായ നിര്‍ദ്ദേശങ്ങള്‍ നല്‍കുക, സ്മാര്‍ട്ട് ഫീച്ചറുകള്‍ നിയന്ത്രിക്കുക തുടങ്ങിയ ഉയര്‍ന്ന കമ്പ്യൂട്ടേഷന്‍ ആവശ്യമുള്ള ജോലികള്‍ക്കായി ഗൂഗിളിന്റെ ജെമിനി എഐ മോഡലുകള്‍ ഈ പ്ലാറ്റ്‌ഫോമില്‍ ഉപയോഗിക്കാം. തന്ത്രപ്രധാനമായ ഡാറ്റ സ്വകാര്യമായി സൂക്ഷിക്കുമെന്നും ഇത് ഉറപ്പാക്കും എന്നതാണ് പ്രത്യേകത. ഉപയോക്താക്കള്‍ ഇതിലൂടെ പങ്കുവെക്കുകയോ പ്രോസസ്സ് ചെയ്യുകയോ ചെയ്യുന്ന കാര്യങ്ങള്‍ ഗൂഗിളിന് പോലും ആക്സസ് ചെയ്യാന്‍ കഴിയില്ലെന്ന രീതിയിലാണ് ഈ സിസ്റ്റം രൂപകല്‍പ്പന ചെയ്തിരിക്കുന്നതെന്ന് കമ്പനി പറയുന്നു.
പ്രവര്‍ത്തനം സുരക്ഷിത ക്ലൗഡ് എന്‍വയോണ്‍മെന്റില്‍
ഗൂഗിളിന്റെ കസ്റ്റം ടെന്‍സര്‍ പ്രോസസിംഗ് യൂണിറ്റുകളില്‍ (TPUs) നിര്‍മ്മിച്ച ഒരു സുരക്ഷിത ക്ലൗഡ് എന്‍വയോണ്‍മെന്റിലാണ് പ്രൈവറ്റ് എഐ കമ്പ്യൂട്ട് പ്രവര്‍ത്തിക്കുന്നതെന്ന് ഗൂഗിളിന്റെ എഐ ഇന്നൊവേഷന്‍ ആന്‍ഡ് റിസര്‍ച്ച് വൈസ് പ്രസിഡന്റ് ജയ് യഗ്‌നിക് പറയുന്നു. എന്‍ക്രിപ്ഷനും റിമോട്ട് അറ്റസ്റ്റേഷനും ഉപയോഗിച്ച് ഉപയോക്താക്കളുടെ ഉപകരണങ്ങള്‍ സുരക്ഷിത എന്‍വയോണ്‍മെന്റിലേക്ക് കണക്റ്റുചെയ്ത് ഡാറ്റ സുരക്ഷിതമായി പ്രോസസ് ചെയ്യുന്നു. ഗൂഗിളിന്റെ എഞ്ചിനീയര്‍മാര്‍ക്കോ പരസ്യം നല്‍കുന്നവര്‍ക്കോ ഉള്‍പ്പെടെ ഒരു ബാഹ്യ ഏജന്‍സിക്കും ഉപയോക്താക്കളുടെ ഡാറ്റയിലേക്ക് എത്തിനോക്കാന്‍ കഴിയില്ലെന്ന് ഉറപ്പാക്കിക്കൊണ്ട്, 'ടൈറ്റാനിയം ഇന്റലിജന്‍സ് എന്‍ക്ലേവ്‌സ്' (TIE) എന്ന് ഗൂഗിള്‍ വിളിക്കുന്ന സംവിധാനം ഈ സാങ്കേതികവിദ്യയ്ക്ക് കൂടുതല്‍ സുരക്ഷ നല്‍കുന്നു.
വര്‍ഷങ്ങളായി, വിവര്‍ത്തനം, ഓഡിയോ സംഗ്രഹം, വോയിസ് അസിസ്റ്റന്റുകള്‍ തുടങ്ങിയ ഗൂഗിളിന്റെ പല എഐ-അധിഷ്ഠിത ഫീച്ചറുകളും പിക്‌സല്‍ ഫോണുകള്‍, ക്രോംബുക്കുകള്‍ തുടങ്ങിയ ഉപകരണങ്ങളില്‍ നേരിട്ടാണ് പ്രോസസ്സ് ചെയ്തിരുന്നത്. ഈ സമീപനം സ്വകാര്യതയ്ക്ക് മുന്‍ഗണന നല്‍കിയെങ്കിലും, കമ്പ്യൂട്ടേഷണല്‍ പവര്‍ പരിമിതമായിരുന്നു എന്നത് ഒരു പോരായ്മയായിരുന്നു. എഐ മോഡലുകള്‍ കൂടുതല്‍ നൂതനമാകുമ്പോള്‍ എല്ലാം ഉപകരണത്തില്‍ തന്നെ പ്രവര്‍ത്തിപ്പിക്കുന്നത് പ്രായോഗികമല്ലെന്ന് ഗൂഗിള്‍ പറയുന്നു. കഠിനമായ ജോലികള്‍ ഒരു സുരക്ഷിത ക്ലൗഡിലേക്ക് മാറ്റുന്നതിലൂടെ പ്രൈവറ്റ് എഐ കമ്പ്യൂട്ട് ഈ പ്രശ്‌നം പരിഹരിക്കുന്നു.
ഗൂഗിളിന്റെ ഉപകരണങ്ങളുടെയും ആപ്പുകളുടെയും ഇക്കോസിസ്റ്റത്തിന് ഈ നീക്കം പുതിയ സാധ്യതകള്‍ തുറക്കുന്നു. ഉദാഹരണത്തിന്, പിക്‌സല്‍ 10 പോലുള്ള ഭാവിയിലെ പിക്‌സല്‍ ഫോണുകള്‍, ജിമെയില്‍, കലണ്ടര്‍ തുടങ്ങിയ ആപ്പുകളില്‍ നിന്ന് പ്രസക്തമായ വിവരങ്ങള്‍ എടുത്ത് സന്ദര്‍ഭോചിതമായ നിര്‍ദ്ദേശങ്ങള്‍ നല്‍കുന്ന 'മാജിക് ക്യൂ' എന്ന ടൂള്‍ മെച്ചപ്പെടുത്താന്‍ പ്രൈവറ്റ് എഐ കമ്പ്യൂട്ട് ഉപയോഗിക്കും. റെക്കോര്‍ഡര്‍ ആപ്പും തത്സമയ ട്രാന്‍സ്‌ക്രിപ്ഷനും സംഗ്രഹത്തിനും വേണ്ടി കൂടുതല്‍ ഭാഷകളെ പിന്തുണയ്ക്കാന്‍ ഒരുങ്ങുന്നു. ഇതൊരു തുടക്കം മാത്രമാണെന്ന് ഗൂഗിള്‍ പറയുന്നു. കൂടുതല്‍ എഐ-അധിഷ്ഠിത അനുഭവങ്ങള്‍ വരാനിരിക്കുന്നു എന്ന സൂചനയും ഗൂഗിള്‍ നല്‍കുന്നുണ്ട്.
Content Highlights: Google`s new Private AI Compute platform brings powerful AI to devices without compromising user privacy. Explore how it works and its benefits.
Published: 12 Nov 2025, 11:39 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented