മാതൃഭൂമി ബുക്സ് പ്രസിദ്ധീകരിച്ച ഏറ്റവും പുതിയ പുസ്തകമാണ് 'മറ്റൊരു (മഹാ)ഭാരതം'. മാതൃഭൂമി ന്യൂസ് ഡല്ഹി ബ്യൂറോയിലെ സീനിയര് റിപ്പോര്ട്ടറായ അനൂപ് ദാസ് തയ്യാറാക്കിയ പ്രസ്തുത പുസ്തകത്തിന്റെ രചനയെക്കുറിച്ച് അദ്ദേഹം എഴുതുന്നു...
കൊയിലാണ്ടി പോസ്റ്റ് ഡോട്കോം എന്നൊരു ഓണ്ലൈന് പോര്ട്ടലുണ്ടായിരുന്നു എന്റെ നാടായ കൊയിലാണ്ടിയില്. അവിടെ റിപ്പോര്ട്ടറും പരസ്യം പിടിക്കുന്നയാളും വാര്ത്ത അപ്ലോഡ് ചെയ്യുന്നയാളുമെല്ലാമായാണ് 2013-ല് പത്രപ്രവര്ത്തനം തുടങ്ങിയത്. പ്രാദേശികമായി വളര്ന്നു വരുന്ന ന്യൂസ് പോര്ട്ടലുകള്ക്ക് ശ്രദ്ധ ലഭിച്ചു തുടങ്ങിയിരുന്ന കാലമായിരുന്നു അത്. തിയേറ്ററുകാരുടെ നികുതി വെട്ടിപ്പും മുതലാളിമാരുടെ കൈയേറ്റവും ലഹരിക്കടത്തിന്റെ ആഴങ്ങളിലേയ്ക്ക് പോയ റിപ്പോര്ട്ടുമെല്ലാമായി കൊയിലാണ്ടിയില് ശ്രദ്ധിക്കപ്പെട്ട വാര്ത്താ പോര്ട്ടല്. പത്രപ്രവര്ത്തന വഴിയില് അന്ന് മുതല്, മാതൃഭൂമി ന്യൂസിന്റെ ഡല്ഹി റിപ്പോര്ട്ടറായി പണിയെടുക്കുന്ന ഈ കാലം വരെ സ്വരുക്കൂട്ടിവെച്ച സമ്പാദ്യമാണ് 'മറ്റൊരു (മഹാ)ഭാരതം' എന്ന പുസ്തകം.
Also Read
പത്രപ്രവര്ത്തകനാകണമെന്നായിരുന്നു ചെറിയ പ്രായം മുതലുള്ള ആഗ്രഹം. ഡിഗ്രി കഴിഞ്ഞ കാലത്ത് പക്ഷേ ആ സ്വപ്നത്തിലേയ്ക്ക് നടക്കാന് പ്രതിസന്ധികള് കുറേയുണ്ടായിരുന്നു. പരീക്ഷ എഴുതാതെയും എഴുതിയുമെല്ലാം തോറ്റ പേപ്പറുകളുടെ എണ്ണം 12. ആ 12 പേപ്പറും എഴുതി ജയിച്ചാലേ ജേണലിസം പഠിക്കാനുള്ള വഴി തുറക്കൂ. അതേ സമയത്താണ് അച്ഛന്റെ പെട്ടന്നുള്ള മരണം. ആ വലിയ സങ്കടവും കുടുംബം നോക്കണമെന്ന ഉത്തരവാദിത്വവും ഒരുമിച്ചാണ് വന്നത്.
പഠനവും പത്രപ്രവര്ത്തനവുമെല്ലാം ഉപേക്ഷിച്ച് കണ്സ്യൂമര്ഫെഡിന് കീഴിലെ സഞ്ചരിക്കുന്ന ത്രിവേണി വാഹനത്തിലെ സഹായിയായി ദിവസക്കൂലിയ്ക്ക് ജോലിയ്ക്ക് പോയിത്തുടങ്ങി. 300 രൂപ ദിവസക്കൂലിയും വാങ്ങി രാവിലെ പണിയ്ക്ക് പോയി രാത്രി തിരികെയെത്തി കിടന്നുറങ്ങി പിറ്റേന്നും പണിയ്ക്ക് പോയി ദിവസങ്ങള് കഴിഞ്ഞുപൊയ്ക്കൊണ്ടിരുന്നു. പത്രപ്രവര്ത്തന സ്വപ്നം മങ്ങി മങ്ങി നേര്ത്ത് പോയിത്തുടങ്ങിയിരുന്നു.
പക്ഷേ, ആ സ്വപ്നത്തേയും എന്റെ ജീവിതത്തേയുമെല്ലാമറിയുന്ന രണ്ട് മനുഷ്യര് 'മറ്റൊരു (മഹാ)ഭാരത'ത്തിന്റെ എഴുത്തുകാരനാക്കി എന്നെ പോറ്റി വളര്ത്തി. എന്.വി. ബാലകൃഷ്ണേട്ടനും കെ. ശാന്ത ടീച്ചറും. ജോലി രാജിവെപ്പിച്ചു, വീട്ടു ചിലവ് നടന്നുപോകാന് കൊയിലാണ്ടി പോസ്റ്റിലെ റിപ്പോര്ട്ടറും നഗരസഭയിലെ യൂത്ത് കോ-ഓര്ഡിനേറ്ററുമെല്ലാമായി സംവിധാനമൊരുക്കി.
തോറ്റ 12 വിഷയങ്ങള് ജയിക്കാനായി കോട്ടില് ശശിമാഷിനടുത്ത് ട്യൂഷന് വിട്ടു. അങ്ങനെ പരീക്ഷയെഴുതി ജയിച്ചാണ് കോഴിക്കോട് പ്രസ്ക്ലബില് ജേണലിസം പണിക്കാന് പോയത്. എന്.വിയും ടീച്ചറും എനിക്ക് നേരെ നീട്ടിയ സ്നേഹത്തിന്റെ കരങ്ങളാണ് ഈ പുസ്തകത്തിന്റെ പോലും അടിത്തറ. അതുകൊണ്ട് തന്നെ പുസ്തകം ഞാന് ഈ രണ്ട് മനുഷ്യര്ക്കും മാത്രമായി സമര്പ്പിച്ചു.
Content Highlights: Write up on 'Mattoru maha bharatham' book
Published: 01 Feb 2025, 11:11 am IST
ABOUT THE AUTHOR
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented