നേപ്പാളും ബംഗ്ളാദേശും മുന്നേറുമ്പോൾ ഇന്ത്യയോട് ജാതി ചെയ്യുന്നത് | വഴിപോക്കൻ

ദാരിദ്ര്യമാണ് ഇന്ത്യയിലെ ഏറ്റവും വലിയ ജാതി എന്നാണ് പ്രധാനമന്ത്രി മോദി അടുത്തിടെ പറഞ്ഞത്. കേൾക്കുമ്പോൾ ഇതൊരു ഗംഭീര പ്രസ്താവനയാണെന്ന് തോന്നും. എന്നാൽ, ദാരിദ്ര്യം സൃഷ്ടിക്കുന്നതിൽ ജാതിക്കുള്ള പങ്ക് മനസ്സിലാക്കുമ്പോഴാണ് ഈ പ്രസ്താവനയിലെ ചെമ്പ് പുറത്തുവരിക. വിവിധ മേഖലകളിലെ തൊഴിലുകൾക്ക് ഏറ്റവും കൂടുതൽ വൈദഗ്ധ്യം സമ്പാദിക്കുന്നത് ജാതിപരമായി മുന്നിൽ നിൽക്കുന്നവരാണ്. ശാരീരിക അദ്ധ്വാനം ആവശ്യമുള്ള തൊഴിലുകൾക്ക് വേതനം കുറച്ചുകൊടുത്തുകൊണ്ടാണ് വരേണ്യവർഗക്കാർ പിന്നാക്ക വിഭാഗങ്ങളെ ദാരിദ്ര്യത്തിലും പട്ടിണിയിലും തളച്ചിടുന്നത്. ഒരു ഫാക്ടറിയിൽ ശരിക്കുള്ള പണി ചെയ്യുന്നവർ താഴെ തട്ടിലുള്ള തൊഴിലാളികളായിരിക്കും. പക്ഷേ, അവർക്കായിരിക്കും ശമ്പളവും മറ്റാനുകൂല്യങ്ങളും ഏറ്റവും കുറവ്. 

കേരളത്തിൽനിന്നു വിദേശത്ത് പോയി പഠിക്കുന്ന വിദ്യാർത്ഥികളിൽ എത്രപേർ ദളിത് സമുദായത്തിൽ നിന്നുള്ളവരാണെന്നുള്ള കണക്കെടുത്താൽ എങ്ങിനെയാണ് വരേണ്യ വിഭാഗക്കാർ വിദ്യാഭ്യാസ മേഖലയിൽ അവരുടെ അധീശത്വം തുടരുന്നതെന്ന് വ്യക്തമാവും. വായ്പ കിട്ടണമെങ്കിൽ  ബാങ്കുകൾക്ക് ഈട് നൽകണം. സ്വന്തമായി ഭൂമിയില്ലാത്തവർ എന്താണ് ഈടായി നൽകുക? ജീവനുള്ള അവകാശം പോലെ സ്വത്തിനുള്ള അവകാശവും മൗലികാവകാശമാക്കിക്കൊണ്ട് ഭരണഘടന ഭേദഗതി ചെയ്യണമെന്ന ആവശ്യം ഉയരുന്നത് ഈ പശ്ചാത്തലത്തിലാണ്.

ജാതി ഇന്ത്യയോട് ചെയ്യുന്നതെന്താണെന്ന് എത്രയോ വ്യക്തവും സമഗ്രവുമായാണ് 1936-ൽ ബിആർ അംബദ്കർ 'ജാതിയുടെ ഉന്മൂലനം' എന്ന പ്രബന്ധത്തിൽ എഴുതിയത്. ലാഹോർ ആസ്ഥാനമായി പ്രവർത്തിച്ചിരുന്ന ജട്- പട്- തൊടക്ക് മണ്ഡൽ എന്ന ജാതി വിരുദ്ധ പ്രസ്ഥാനത്തിന്റെ വാർഷിക യോഗത്തിൽ ആ വർഷം അദ്ധ്യക്ഷത വഹിക്കേണ്ടിയിരുന്നത് അംബദ്കറാണ്. അദ്ധ്യക്ഷ പ്രസംഗം നേരത്തെ തന്നെ തയ്യാറാക്കി അംബദ്കർ സംഘടനയുടെ ഭാരവാഹികൾക്ക് അയച്ചുകൊടുത്തു. ഹിന്ദു മതത്തിനെതിരെ നിശിതവിമർശമാണ് പ്രസംഗത്തിൽ അംബദ്കർ ഉന്നയിച്ചത്. ഈ വിമർശം ഒഴിവാക്കണമെന്ന് ഭാരവാഹികൾ അംബദ്കറോട് ആവശ്യപ്പെട്ടു. ഒരു കോമ പോലും മാറ്റില്ലെന്നായിരുന്നു അംബ്ദകറുടെ മറുപടി. ഒടുവിൽ  യോഗം തന്നെ മാറ്റിവെയ്ക്കപ്പെട്ടു. അംബ്ദകർ സ്വന്തം നിലയ്ക്ക് തന്റെ പ്രസംഗം അച്ചടിച്ച് പ്രസിദ്ധീകരിക്കുകയും ചെയ്തു. അംബ്ദകറുടെ നിലപാടുകളെ വിമർശിച്ച ഗാന്ധിജി പറഞ്ഞത് അംബദ്കറുടെ പ്രസംഗം തിരുത്തണമെന്നാവശ്യപ്പെട്ട ഭാരവാഹികളുടെ നടപടികൾ ശരിയല്ലെന്നാണ്. പറയാനുള്ള കാര്യങ്ങൾ പറയാനുള്ള അംബ്ദ്കറുടെ സ്വാതന്ത്ര്യത്തിനൊപ്പമാണ് താനെന്നാണ് ഗാന്ധിജി പറഞ്ഞത്.

ഇതിനുള്ള നീക്കം ബ്രാഹ്‌മണരുടെ ഭാഗത്തുനിന്ന് പ്രതീക്ഷിക്കരുതെന്ന് അംബദ്കർ പറയുന്നുണ്ട്. ബ്രാഹ്‌മണരുടെ കാലുകൾ ഉറപ്പിക്കപ്പെട്ടിരിക്കുന്നത് ദളിതരുടെ മേലാണ്. ദളിതർ ഇളകിയാൽ ബ്രാഹ്‌മണ്യം തകരും. അതുകൊണ്ട് തന്നെ ഇത്തരമൊരു ഇളക്കലിന് ബ്രാഹ്‌മണർ തയ്യാറാവില്ല. ''പോപ്പിന് വിപ്ലവകാരിയാവാനാവിന്നെന്ന് പറയുന്നത് പോലെയാണിത്. വിപ്ലവകാരിയായ ഒരാൾ പോപ്പാവില്ല. പോപ്പാവുന്ന ഒരാൾക്ക് വിപ്ലവകാരായുമാവാനാവില്ല. ജാതി തകർക്കുന്നതിന് ഒരു ബ്രാഹ്‌മണൻ മുന്നിട്ടിറങ്ങുമെന്ന്  കരുതുന്നത് നീലക്കണ്ണുകളുള്ള കുട്ടികളെ കൊല്ലണമെന്ന നിയമം ബ്രിട്ടീഷ് പാർലമെന്റ് പാസ്സാക്കുമെന്ന് കരുതുന്നത് പോലെയാണ്.''

ജാതിയുടെ ഉന്മൂലനത്തിന്  അംബദ്കർ മുന്നോട്ടുവെയ്ക്കുന്ന ഒരു വഴി മിശ്രവിവാഹമാണ്. രക്തം രക്തത്തോട് കലരുമ്പോഴാണ് ജാതിയുടെ വേരുകൾ  അറുത്തുമാറ്റപ്പെടുക്കയെന്ന് അംബദ്കർ പറയുന്നു. രണ്ട് ജാതിയിൽപ്പെടുന്നവർ വിവാഹിതരാവുമ്പോൾ അവരെ സംരക്ഷിക്കേണ്ടത് സമൂഹമാണെന്ന് സൂരജ് യെങ്ഡെപറയുന്നുണ്ട്. ''അവരെ സംരക്ഷിക്കൂ, അവരെ പിന്തുണയ്ക്കൂ'' എന്നാണ് സൂരജ് പറയുന്നത്. പണമില്ലെങ്കിലും വലിയ വീടില്ലെങ്കിലും ബ്രാഹ്‌മണനായി ജനിച്ചു എന്ന ആനുകൂല്യം താൻ എപ്പോഴും അനുഭവിക്കുന്നുണ്ടെന്ന് സംഗീതജ്ഞൻ ടി.എം. കൃഷ്ണ സമ്മതിക്കുന്നതും ഇതേ പരിസരത്തിലാണ് കാണേണ്ടത്.

ഇന്ത്യ നേരിടുന്ന വൈരുദ്ധ്യം

ഇന്ത്യയിൽ ചെറിയൊരു വിഭാഗം സൂപ്പർ റിച്ച് ആവുന്നതിന് പിന്നിൽ ജാതിയുടെ പങ്ക് നിസ്തുലവും നിർണ്ണായകവുമാണ്. ഭരണകൂടത്തിന്റെ മുകളിൽ പിന്നാക്ക വിഭാഗക്കാർ എത്തുമ്പോഴും സമ്പദ്ഘടനയിൽ വരേണ്യ വർഗ്ഗത്തിന്റെ അധീശത്വം തുടരുന്നുവെന്ന വൈരുദ്ധ്യവും സമകാലിക ഭാരതത്തിലുണ്ട്. എക്സിക്യൂട്ടിവിന്റെ തലവനായ പ്രധാനമന്ത്രി നരേന്ദ്ര മോദി പിന്നാക്ക വിഭാഗക്കാരനാണ്. രാഷ്ട്രത്തിന്റെ തലപ്പത്തുള്ള പ്രസിഡന്റ് ദ്രൗപദി മുർമു ആദിവാസി വിഭാഗത്തിൽ നിന്നാണ് വരുന്നത്. പക്ഷേ, ഭരണകൂടത്തിന്റെ സുപ്രധാന ഭാഗമെന്ന് വിശേഷിപ്പിക്കപ്പെടുന്ന പ്രധാനമന്ത്രിയുടെ ഓഫീസിൽ (പി.എം.ഒ.) ഇപ്പോഴും വരേണ്യവിഭാഗത്തിന്റെ മേധാവിത്വം തുടരുന്നു. പ്രധാനമന്ത്രി മോദിയുടെ പ്രിൻസിപ്പൽ സെക്രട്ടറിയും 1972 ബാച്ച് ഐ.എ.എസ്. ഓഫീസറുമായ പ്രമോദ് കുമാർ മിശ്ര എന്ന പി.കെ. മിശ്രയിൽനിന്നു തുടങ്ങുന്ന വരേണ്യതയാണിത്. ഇന്ത്യ നേരിടുന്ന എല്ലാ പ്രശ്നങ്ങൾക്കും ഒറ്റമൂലി 'ഹിന്ദുത്വ' ആണെന്ന ബി.ജെ.പിയുടെ രാഷ്ട്രീയ നിലപാടിനോട് എന്തെങ്കിലും വിയോജിപ്പ് എപ്പോഴെങ്കിലും പി.എം.ഒയിൽ നിന്നുയർന്നിട്ടുള്ളതായി അറിവില്ല.

ഹിന്ദുത്വയും കോർപറേറ്റുകളും കൈകോർത്ത് നീങ്ങുന്ന ഇന്ത്യയാണ് ബി.ജെ.പിയുടെ രാഷ്ട്രീയ ദർശനത്തിന്റെ അടയാളമെന്ന് പ്രഭാത് പട്നായിക്ക് വിമർശിക്കുന്നത് വെറുതെയല്ല. 2019-ൽ കോർപറേറ്റ് നികുതി 30 ശതമാനത്തിൽനിന്നു 22 ശതമാനമായി വെട്ടിക്കുറച്ച മോദി സർക്കാരിന്റെ നടപടി പ്രത്യയശാസ്ത്രപരം കൂടിയായിരുന്നുവെന്ന് പറയേണ്ടി വരും.  ഒക്സ്ഫാം ഇന്റർനാഷനൽ റിപ്പോർട്ട് ചെയ്യുന്നത് ഇന്ത്യൻ ജനതയുടെ വരേണ്യ വിഭാഗക്കാരായ 10 ശതമാനത്തിന്റെ കയ്യിലാണ് ഇന്ത്യയുടെ സമ്പത്തിന്റെ 77 ശതമാനവും ഉള്ളതെന്നാണ്. 119 ശതകോടീശ്വരന്മാരാണ് ഇന്ത്യയിലുള്ളത്. കഴിഞ്ഞ പത്ത് കൊല്ലത്തിൽ ഇവരുടെ സ്വത്തിലുണ്ടായ വർദ്ധന പത്ത് മടങ്ങാണ്. യൂണിയൻ ബജറ്റിനേക്കാൾ അധികമാണ് ഇവരുടെ മൊത്തം ആസ്തി. ഗ്രാമീണ ഇന്ത്യയിൽ മിനിമം കൂലിക്ക് തൊഴിലെടുക്കുന്ന ഒരാൾക്ക് ഇന്ത്യയിലെ ഒരു മുൻനിര കോർപറേറ്റ് സി.ഇ.ഒയ്ക്ക്  ഒരു വർഷം കിട്ടുന്ന ശമ്പളം കിട്ടണമെങ്കിൽ ആ മനുഷ്യൻ 941 കൊല്ലം പണിയെടുക്കേണ്ടി വരും.

ഇതാണ് ഇന്ത്യ ഇന്ന് നേരിടുന്ന അസമത്വം. ഈ അസമത്വത്തിന്റെ അടിത്തറ ജാതിയിലാണെന്നാണ് 2023-ൽ നിന്നുകൊണ്ട് സ്വാമിനാഥൻ അയ്യർ പറയുന്നത്. നാൾക്കു നാൾ തൊഴിലില്ലായ്മ കൂടിക്കൊണ്ടിരിക്കെ ഇന്ത്യൻ ജനത കൂടുതൽ കൂടുതലായി അസമത്വത്തിലേക്കും ദാരിദ്ര്യത്തിലേക്കും നീങ്ങാനുള്ള സാദ്ധ്യതയാണ് മുന്നിൽ തെളിയുന്നത്. കോർപറേറ്റ് നികുതി വർദ്ധിപ്പിച്ചുകൊണ്ടും വെൽത്ത് ടാക്സ് പുനഃസ്ഥാപിച്ചുകൊണ്ടും മാത്രമേ ഇതിനെ നേരിടാനാവുകയുള്ളു. അമിതമായി പണം സമാഹരിക്കുന്നവർ അതിൽനിന്നൊരു ഭാഗം സമൂഹത്തിലെ അസമത്വം ഇല്ലാതാക്കാനായി പങ്ക്വെയ്ക്കണം. സ്വമേധയാ ഇതിന് ഇക്കൂട്ടർ തയ്യാറാവില്ല. അപ്പോൾ പിന്നെ നിയമ നിർമ്മാണം മാത്രമാണ് പോംവഴി. സ്വകാര്യ മേഖലയിൽ സംവരണം എന്ന ആശയം തിരഞ്ഞെടുപ്പ് പ്രകടനപത്രികയിൽ ഉൾപ്പെടുത്താൻ പ്രതിപക്ഷ കക്ഷികളുടെ മുന്നണിയായ 'ഇന്ത്യ' തയ്യാറായാൽ അത് അതിൽ തന്നെ വിപ്ലവകരമായിരിക്കും എന്നതിൽ സംശയമില്ല.

വഴിയിൽ കേട്ടത്:   ഉത്തരകാശിയിൽ ടണൽ നിർമ്മാണത്തിനിടയിൽ ഭൂമിക്കടിയിൽ കുടുങ്ങിയ 41 പേരെ രക്ഷപ്പെടുത്തി. എല്ലാ വിധത്തിലും അഭിനന്ദനമർഹിക്കുന്ന ദൗത്യം. പക്ഷേ, ഇതിനിടയിൽ വിട്ടുപോകാതെ ചോദിക്കേണ്ട ചോദ്യം, ആരാണ് ഈ ദുരന്തത്തിന് ഉത്തരവാദി എന്നതാണ്. പരിസ്ഥിതി ദുർബ്ബലമായ ഈ ഭാഗത്ത് റോഡിന് 5.5 മീറ്ററിൽ കൂടുതൽ വീതിയുണ്ടാവരുതെന്ന വിദഗ്ധ സമിതി നിർദ്ദേശം കാറ്റിൽ പറത്തുന്നതിന് നിർബ്ബന്ധം പിടിച്ച കേന്ദ്ര സർക്കാരിന് ഈ ദുരന്തത്തിൽനിന്ന് കൈകഴുകി മാറി നിൽക്കാനാവുമോ?