KL9. 1989 മയില്‍വാഹനം; അവശേഷിച്ചത് ഗുരുവായൂരില്‍ നിന്ന് വാങ്ങിയ കരിവളകളും കളിപ്പാട്ടങ്ങളും മാത്രം

തൃശൂര്‍ പൂരത്തിന്റെ വെടിക്കെട്ട് അപകടം നടന്ന സ്ഥലത്ത് നിന്നുള്ള ദൃശ്യം | Photo: Mathrubhumi Archives

സര്‍വീസിലിരിക്കെ തുടര്‍ച്ചയായ അഞ്ചുവര്‍ഷം തൃശൂര്‍ പൂരത്തിന് ഡ്യൂട്ടിയുണ്ടായിരുന്നു. അതിലൊന്ന് അവസാനിച്ചത് ഒരു ദുരന്തത്തോടെയാണ്. 2006ലാണെന്നാണ് ഓര്‍മ, സാമ്പിള്‍ വെടിക്കെട്ട് നടന്നുകൊണ്ടിരിക്കുകയാണ്. ഒരു വിഭാഗത്തിന്റെ വെടിക്കെട്ട് കൂട്ടപ്പൊരിച്ചല്‍ നടക്കുന്നു. ആകാശത്ത് വര്‍ണവിസ്മയങ്ങള്‍ തീര്‍ത്ത് ഗുണ്ടുകള്‍ ഉയര്‍ന്നുപൊങ്ങുന്നു. ജനം ആര്‍പ്പുവിളിയിലാണ്. പെട്ടെന്ന് വെടിക്കെട്ട് നിന്നു. ആര്‍പ്പുവിളികള്‍ കൂക്കുവിളികളായി. തൊട്ടുപിന്നാലെ ഒരു ആംബുലന്‍സ് സൈറണ്‍ മുഴക്കി കടന്നുപോയി. ഏതാനും നിമിഷങ്ങള്‍ക്കുള്ളില്‍ അതേ ആംബുലന്‍സ് തിരിച്ചുവന്നു. റൗണ്ടില്‍ നല്ല തിരക്കായതിനാല്‍ ആമ്പുലന്‍സ് പതുക്കെയാണ് വരുന്നത്. ഉള്ളിലേക്ക് നോക്കിയപ്പോള്‍ ചാക്കില്‍ പൊതിഞ്ഞ എന്തോ ഒരു വസ്തുവുണ്ട്. കുറച്ചു നിമിഷങ്ങള്‍ക്ക് ശേഷം മൈക്ക് സെറ്റില്‍ ഒരു അറിയിപ്പു വന്നു. 'അവിചാരിതമായ ചില കാരണങ്ങളാല്‍ വെടിക്കെട്ട് നിര്‍ത്തിവെച്ചിരിക്കുന്നു'.. അനൗണ്‍സ്മെന്റ് കേട്ടതോടെ ജനങ്ങള്‍ പിരിഞ്ഞുപോവാനാരംഭിച്ചു. പിന്നേയും കുറച്ചുനേരം കഴിഞ്ഞപ്പോഴാണ് യഥാര്‍ഥ വിവരമറിഞ്ഞത്. വെടിക്കെട്ട് നടക്കുന്നതിനിടെ അപകടമുണ്ടാവുകയും വെടിക്കെട്ടുകാരന്‍ മരണപ്പെട്ടുപോവുകയും ചെയ്തിരിക്കുന്നു. ആ ശരീരമായിരുന്നു ആംബുലന്‍സില്‍ ചാക്കില്‍കെട്ടി കൊണ്ടുപോയത്.

Also Read രാമസ്വാമിയുടെ ചോരയിലാണ് ആ കെ.എസ്.ആർ.ടി.സി കെട്ടിടം പണിതുയര്‍ത്തിയത്, മറക്കില്ല ആ കാഴ്ച 
..........
1996 ഫെബ്രുവരി മാസത്തിലെ അവസാന ആഴ്ചയാണ് സംഭവം. കുളങ്ങളും കിണറുകളും വറ്റി തുടങ്ങി പാലക്കാട് വരള്‍ച്ചയിലേക്ക് കൂപ്പുകുത്താന്‍ തുടങ്ങിയിരിക്കുന്ന ദിവസങ്ങളാണ്. വൈകുന്നേരം ഏഴരയോടെ ഭക്ഷണം കഴിച്ച് സ്റ്റേഷന് മുമ്പിലെ പൈപ്പില്‍ നിന്നും കൈ കഴുകുന്ന സമയത്ത് അതാ സ്റ്റേഷന് മുന്നില്‍ ഒരു കറുത്ത അംബാസഡര്‍ കാര്‍ വന്നുനിന്നു. അതില്‍നിന്നും ഒരാള്‍ വെപ്രാളത്തോടെ ഇറങ്ങിവന്ന് കൂനത്തറയില്‍ ഒരു ബസ്സ് കുളത്തില്‍ വീണതായി അറിയിച്ചു. അന്ന് സ്റ്റേഷനില്‍ ആംബുലന്‍സോ എമര്‍ജന്‍സി ടെണ്ടറോ ഇല്ലായിരുന്നു. ഫയര്‍ എഞ്ചിനുമായി സംഭവസ്ഥലത്തേക്ക് കുതിച്ചു. കുളപ്പുള്ളിയില്‍ നിന്നും ഒറ്റപ്പാലം റോഡിലേക്ക് കടന്നപ്പഴേ കാര്യത്തിന്റെ ഗൗരവം ഏകദേശം മനസിലായി. എതിര്‍വശത്തു നിന്നും വാഹനങ്ങളൊന്നും വരുന്നില്ല. സൈറണ്‍ മുഴക്കി കുറച്ചു കൂടി മുന്നോട്ട് പോയപ്പോള്‍ ഒരു വശത്ത് നിരയായി വാഹനങ്ങള്‍ നിര്‍ത്തിയിട്ടിരിക്കുന്നു. കൂട്ടത്തില്‍ ആംബുലന്‍സുകളുമുണ്ട്. റോഡില്‍ നിന്ന് നോക്കിയപ്പോഴേ കണ്ടു, കുറച്ചകെ ഒരു ബസ് കുളത്തിലേക്ക് മുന്‍വശം കുത്തിവീണിരിക്കുന്നു.

ഗുരുവായൂരില്‍ നിന്നും പാലക്കാട്ടേക്ക് നിറയെ യാത്രക്കാരുമായി പോകുന്ന 'മയില്‍ വാഹനം' എന്ന ബസ്സാണ് അപകടത്തില്‍പെട്ടിരിക്കുന്നത്. (നമ്പര്‍ ഇപ്പോഴും ഞാന്‍ വ്യക്തമായി ഓര്‍ക്കുന്നു ' KL9. 1989) പിറകിലെ ഫുട്ബോര്‍ഡ് വരെ കുളത്തിലെ വെള്ളത്തില്‍ മുങ്ങിയിരിക്കുകയാണ്. പിന്‍വശത്തെ ഗ്ലാസ് തകര്‍ത്താണ് യാത്രക്കാരെ പുറത്തേക്ക് വലിച്ചെടുക്കുന്നത്. പുറത്തെത്തിച്ചവരെ അപ്പോള്‍ തന്നെ ജീപ്പില്‍ കയറ്റി ഒറ്റപ്പാലത്തെ വള്ളുവനാട് ആശുപത്രിയിലേക്ക് കൊണ്ടുപോവുകയാണ്. ഇരുട്ടിത്തുടങ്ങിയതിനാല്‍ വെളിച്ചക്കുറവ് രക്ഷാപ്രവര്‍ത്തനത്തെ നല്ലപോലെ ബാധിച്ചിരുന്നു. ആകെയുള്ളത് വാഹനത്തിന്റെ ഹെഡ്​ലൈറ്റിന്റെ പ്രകാശമാണ്. എങ്കിലും അമ്പതോളം പേരെ ആശുപത്രിയിലെത്തിക്കാന്‍ കഴിഞ്ഞു. ബസിന്റെ മുന്‍വശത്തെ ഗ്ലാസ് പൊട്ടി കുറെയാളുകള്‍ കുളത്തിനുള്ളിലെ കിണറ്റില്‍ അകപ്പെട്ടിരുന്നു. ബസ് ഡ്രൈവും രണ്ട് കുട്ടികളും ഉള്‍പ്പെടെ എട്ട് പേര്‍ മരിച്ചുപോയി. പാലക്കാട്ട് നിന്ന് റിക്കവറി വാന്‍ വന്നെങ്കിലും ബസ് ഉയര്‍ത്താനായില്ല.

നിരവധി പമ്പുകള്‍ സെറ്റുകളെത്തിച്ച് വെള്ളം വറ്റിക്കാന്‍ തുടങ്ങി. അതിനിടെ ബസ്സിന്റെ ഓയില്‍ ടാങ്കില്‍ നന്ന് ചോര്‍ന്ന ഡീസലും എഞ്ചിന്‍ ഓയിലും കുളത്തിലെ വെള്ളത്തില്‍ കലര്‍ന്നിരുന്നു. ആ വെള്ളത്തിലിറങ്ങിയാണ് ഞങ്ങളുടെ രക്ഷാപ്രവര്‍ത്തനം. ഇത് തെറിച്ച് കണ്ണ് നീറി തുറക്കാന്‍ കഴിയുന്നില്ല. ഒപ്പം ഉടഞ്ഞ ചില്ലു കഷണങ്ങളും ഇരുമ്പ് തകിടുകളും രക്ഷാപ്രവര്‍ത്തനത്തെ പ്രതികൂലമായി ബാധിച്ചു. സഹപ്രവര്‍ത്തകനായിരുന്ന എബ്രഹാം സാറിന്റെ ശരീരത്തില്‍ മുറിവേല്‍ക്കാത്ത ഭാഗങ്ങള്‍ ഇല്ല എന്ന സ്ഥിതിയായിരുന്നു. അപ്പോഴേക്കും അപകടം നടന്ന് മണിക്കൂറുകള്‍ പിന്നിട്ടിരുന്നു. അവസാനത്തെ പിഞ്ചുകുഞ്ഞിന്റെ ശരീരം കുളത്തിനു മുന്നിലെ കിണറ്റില്‍ നിന്നും പുറത്തെടുക്കുമ്പോള്‍ സമയം പാതി രാത്രി പന്ത്രണ്ട് മണി കഴിഞ്ഞിരുന്നു.  ബസില്‍ നിന്നും പുറത്തെടുത്ത വസ്തുക്കളുടെ കൂട്ടത്തില്‍ ഗുരുവായൂരില്‍ നിന്നും വാങ്ങിയ കളിപ്പാട്ടങ്ങളും, കരിവളകളും ഉണ്ടായിരുന്നു..

ചില സംഭവസ്ഥലങ്ങളിലെത്തുമ്പോള്‍ ഒരു സിനിമ കാണുന്നത് പോലെ തോന്നിപ്പോവാറുണ്ട്. അത്യന്തം നാടകീയമായ, ഞങ്ങളെല്ലാവരും അതില്‍ അഭിനയിക്കുകയാണെന്ന തോന്നലുകള്‍ പലപ്പോഴും ഉണ്ടായിട്ടുണ്ട്. അതിലൊന്നാണ് ഒരുദിവസം കോഴിക്കോട്ട് നടന്നത്. തങ്ങള്‍സ് റോഡിലെ ഒരു വാടകവീട്ടില്‍ പയ്യോളിക്കാരനായ ഒരു യുവാവ് ആത്മഹത്യാഭീഷണി മുഴക്കി നില്‍ക്കുന്നതായാണ് ഞങ്ങള്‍ക്ക് മെസേജ് ലഭിച്ചത്. പോയി നോക്കുമ്പോള്‍ വെളുത്ത് സുന്ദരനായ ഒരു 35 വയസ്സുകാരന്‍ യുവാവ് മണ്ണെണ്ണ ഒഴിച്ച് ആത്മഹത്യ ചെയ്യുമെന്ന ഭീഷണിയാണ്. ഓടിട്ട ചെറിയ വീടിന്റെ ജനല്‍ കുത്തിത്തുറന്ന് യുവാവിനോട് സംസാരിക്കാന്‍ തുടങ്ങി. കട്ടിയുള്ള ബ്ലാങ്കറ്റില്‍ മണ്ണെണ്ണ ഒഴിച്ച് അതില്‍ ഇരിക്കുകയാണവന്‍. ഇടതു കൈയില്‍ ഒരു സിഗര്‍ ലൈറ്റും സമീപത്തായി മണ്ണെണ്ണ നിറച്ച രണ്ട് കുപ്പികളും പെട്രോള്‍ നിറച്ച രണ്ട് കുപ്പികളും ഒരു ഗ്യാസ് സിലിണ്ടറും ഉണ്ടായിരുന്നു. ഇടയ്ക്കിടെ ഗ്ലാസ് സിലിണ്ടര്‍ തുറന്ന് വിടുന്നുണ്ട്. അന്തരീക്ഷത്തിലെങ്ങും എയര്‍-ഫ്യുവല്‍ മിക്‌സ്ചറിന്റെ രൂക്ഷഗന്ധം. വലിയ ദുരന്തമാണ് തൊട്ടുമുന്നിലുളളത്. ഒരൊറ്റ തീപ്പൊരി മതി എല്ലാം കത്തിച്ചാമ്പലാവാന്‍. സിഗര്‍ ലൈറ്റില്‍ ഒന്നമര്‍ത്തിയാല്‍ അകത്തിരിക്കുന്നവനും പുറത്തുനില്‍ക്കുന്നവരുമെല്ലാം തീരും. 

യുവാവ് ഇരിക്കുന്നതിന്റെ തൊട്ടുപിന്നില്‍ ഒരു വാതിലുണ്ട്. അതിന് വലിയ ബലമില്ലെന്ന് മനസ്സിലാക്കി ഞങ്ങള്‍ ചിലത് മനസ്സിലുറപ്പിച്ചു. ചാര്‍ജ് ചെയ്ത ഹോസുമായി സഹപ്രവര്‍ത്തകരായ ശിഹാബുദ്ദീനും, സനൂജും (സനൂജ് പിന്നീട് എസ് ഐ.ആയി പോലീസില്‍ പോയി, മൂന്ന് വര്‍ഷം മുമ്പ് സ്റ്റേഷനില്‍ വെച്ച് മരണപ്പെട്ടു) വാതില്‍ ചവിട്ടി പൊളിക്കാന്‍ തയ്യാറായി പി.കെ. പ്രമോദും, മുഹമ്മദ് സാനിജും പിന്‍വാതിലിനരികില്‍ നിന്നു. മുന്‍വശത്തെ വാതില്‍ ചവിട്ടിപ്പൊളിക്കാന്‍ തയ്യാറായി അരുണ്‍ ഭാസ്‌ക്കര്‍ സാറും നിന്നു. എന്തൊക്കെ സംസാരിച്ചിട്ടും യുവാവ് കീഴടങ്ങാന്‍ തയ്യാറാവുന്നുണ്ടായിരുന്നില്ല. പക്ഷേ, എങ്ങനെയെങ്കിലും അപകടം വഴിതിരിച്ചുവിടുകയും വേണം. ഞാന്‍ യുവാവിനോട് സംസാരിച്ച് അയാളുടെ ശ്രദ്ധ എന്നിലേക്കാക്കി. അപ്പോഴെല്ലാം 'നിങ്ങള്‍ക്കെന്നെ ഒന്നും ചെയ്യാനാവില്ല. ഞാന്‍ മരിക്കാന്‍ പോവുകയാണെന്ന് അയാള്‍ വിളിച്ചു പറഞ്ഞുകൊണ്ടിരിക്കുന്നുണ്ടായിരുന്നു. അയാളോട് പലതും സംസാരിച്ചുകൊണ്ടേയിരിക്കെ ഞാനെന്റെ ഇടതുകൈ കൊണ്ട് ഹോം ഗാര്‍ഡ് അനില്‍ കുമാറിന് സിഗ്നല്‍ കൊടുത്തു. സംസാരം നിര്‍ത്തിയില്ല, സിഗ്നല്‍ കിട്ടിയ ഉടനെ പ്രമോദും സാനിജും വാതില്‍ ചവിട്ടിപ്പൊളിച്ച് യുവാവിന്റെ മേലേക്ക് ചാടിവീണു. മുന്‍വശത്തെ വാതില്‍ ചവിട്ടിപൊളിച്ച് അരുണ്‍ ഭാസ്‌ക്കര്‍ സാറും, പിന്നില്‍ ചാര്‍ജ് ചെയ്ത ഹോസുമായി സനൂജും ശിഹാബുദ്ദീനും അകത്തേക്കെത്തി. പിന്നെ കാര്യങ്ങള്‍ ഞങ്ങളുടെ നിയന്ത്രണത്തിലായിയിരുന്നു. മുറിയിലെ ഇന്ധനമെല്ലാം നീക്കം ചെയ്തു. യുവാവിനെ പോലീസ് വാഹനത്തില്‍ കയറ്റി ബീച്ച് ആശുപത്രിയിലേക്കയച്ചു.  കൂടെ ഒരു ഫയര്‍മാനും ഉണ്ടായിരുന്നു.

വലിയൊരു ദുരന്തമായേക്കാവുന്ന ഒരു സംഭവം ശുഭമായി കലാശിച്ച സംതൃപ്തിയോടെ ഞങ്ങള്‍ തിരിച്ചുവന്നു. കുറച്ച് മണിക്കൂറുകള്‍ക്ക് ശേഷം ബീച്ച് ആശുപത്രിയിലേക്ക് പോയ ഫയര്‍മാനെ തിരിച്ച് ഓഫീസിലിറക്കാന്‍ പോലീസ് വണ്ടിയെത്തി. അതിലുണ്ടായിരുന്നു നമ്മുടെ ആ സുന്ദരന്‍ യുവാവ്. ചെറുപുഞ്ചിരിയോടെ, ചമ്മലോടെ എനിക്കൊരു ഷേക്ക്ഹാന്‍ഡും തന്നാണ് അയാള്‍ തിരിച്ചുപോയത്. 

ഏകോപനം : അശ്വതി അനില്‍