സൂര്യകിരീടത്തില്‍ ആത്മാംശമുള്ളതു പോലെ തോന്നും, സ്വന്തം രചനകളില്‍ കണ്ണു നനയിച്ച പാട്ടെന്ന് ഗിരീഷ്

എം.ജി.ശ്രീകുമാറും മോഹൻലാലും

'ഒരു ട്യൂണ്‍ ശരിയായിട്ടുണ്ട്,  കേള്‍ക്കണം - രാധാകൃഷ്ണന്‍ പറഞ്ഞു. ചെഞ്ചുരുട്ടി രാഗത്തിലാണ്. രാഗമൊക്കെ സംഗീതസംവിധായകന്റെ ആശയം തന്നെ. പൊതുവെ മലയാളത്തില്‍ ചെഞ്ചുരുട്ടിയിലുള്ള പാട്ടുകള്‍ അധികമില്ല. കഥകളിയിലൊക്കെ ഉപയോഗിച്ചുകേട്ടിട്ടുണ്ട്. സിനിമയിലെ സിറ്റുവേഷന് അതിണങ്ങുമെന്ന് തോന്നിയിരിക്കണം രാധാകൃഷ്ണന്. ഹാര്‍മോണിയത്തില്‍ അദ്ദേഹം വായിച്ചു കേള്‍പ്പിച്ച നേര്‍ത്ത വിഷാദസ്പര്‍ശമുള്ള ഈണത്തില്‍ 'ദേവാസുര''ത്തിന്റെ ആത്മാവ് മുഴുവന്‍ അലിഞ്ഞു ചേര്‍ന്നിരുന്നുവെന്ന് ശശി. 'സത്യം പറഞ്ഞാല്‍ ആ ട്യൂണ്‍ കേട്ടതോടെ എന്റെ ക്ഷീണം പമ്പ കടന്നു. വരികള്‍ എഴുതാന്‍ ഉടനെ ഗിരീഷിനെ വിളിച്ചു വരുത്തി.

'പാട്ടിന്റെ തുടക്കത്തിലെ വാക്ക് ആയിരുന്നു ഗിരീഷിന്റെ പ്രശ്‌നം. അഞ്ചാറു തവണ ഗിരീഷ് ആദ്യ വരി മാറ്റിയെഴുതിക്കണ്ടത് അന്നാദ്യമായാണ്. ഒടുവില്‍ സൂര്യകിരീടം എന്ന വാക്ക് കിട്ടിയപ്പോള്‍ എന്തൊരു ആഹ്‌ളാദവും ആശ്വാസവുമായിരുന്നു ഞങ്ങള്‍ക്കെല്ലാം. മനസ്സ് നിറഞ്ഞ നിമിഷമായിരുന്നു അത്.'' എല്ലാവര്‍ക്കും വേണ്ടി അന്ന് രാത്രി മുഴുവന്‍ എംജിആറിന്റെ ഹാര്‍മോണിയത്തില്‍ നിന്ന് നേര്‍ത്ത നൊമ്പരത്തോടെ ചെഞ്ചുരുട്ടി ഒഴുകിക്കൊണ്ടേയിരുന്നു.

ഭക്തിഗാനങ്ങളിലാണ് ചെഞ്ചുരുട്ടി രാഗത്തിന്റെ സാദ്ധ്യതകള്‍ അതിനു മുന്‍പ് മലയാളത്തിലെ സംഗീത സംവിധായകര്‍ അപൂര്‍വ്വമായെങ്കിലും പരീക്ഷിച്ചിട്ടുള്ളത്. 'കുമാരസംഭവ''ത്തില്‍ ദേവരാജന്‍ മാസ്റ്റര്‍ ചിട്ടപ്പെടുത്തിയ 'എല്ലാം ശിവമയം ശിവശക്തിമയം'' ഓര്‍ക്കുക. ചെഞ്ചുരുട്ടിയുടെ സ്പര്‍ശമുള്ള ചലച്ചിത്രേതര ഭക്തിഗാനങ്ങള്‍ വേറെയുമുണ്ട്: ഗുരുവായൂരമ്പലം ശ്രീവൈകുണ്ഠം (പുഷ്പാഞ്ജലി - പികെ കേശവന്‍ നമ്പൂതിരി), കായാമ്പൂക്കള്‍ (വനമാല - പികെ കേശവന്‍ നമ്പൂതിരി),  നിന്നെ കണ്ടു കൊതിതീര്‍ന്നൊരു (അയ്യപ്പന്‍ പാട്ടുകള്‍ - ദക്ഷിണാമൂര്‍ത്തി) എന്നിവ ഉദാഹരണം. എന്നാല്‍ സൂര്യകിരീടത്തിന് പൂര്‍വ്വമാതൃകകള്‍ ഇല്ലേയില്ല.  

ഗായകന്‍ ജി ശ്രീറാം പങ്കുവെക്കുന്ന ഈ ഓര്‍മ്മ കൂടി കേള്‍ക്കുക:  'ചെഞ്ചുരുട്ടി രാഗത്തില്‍ ഇതേ  ഈണവുമായി സാമ്യമുള്ള മറ്റൊരു ഗാനം  അതിനും വര്‍ഷങ്ങള്‍ക്ക് മുന്‍പ്  എംജി രാധാകൃഷ്ണന്‍ ചേട്ടന്‍ ചിട്ടപ്പെടുത്തിയിട്ടുണ്ട് - ഒരു നൃത്ത നാടകത്തിനു വേണ്ടി. രാജതന്ത്രങ്ങളില്‍ കാര്യം അരമനനാരിമാര്‍ക്കില്ല നീയറിഞ്ഞീടുക എന്നായിരുന്നു ആ പാട്ടിന്റെ തുടക്കം. നാടകത്തില്‍ രാവണന്റെ കഥാപാത്രം പാടുന്ന ആ പാട്ടിന് ശബ്ദം നല്‍കിയത് ഞാന്‍. എന്നാല്‍ ആ ഗാനത്തിന്റെ ഭാവം തീര്‍ത്തും വ്യത്യസ്തമായിരുന്നു.  ഒരിക്കല്‍ ഞാന്‍ ശ്രദ്ധയില്‍ പെടുത്തിയപ്പോഴാണ് പഴയ പാട്ടിന്റെ കാര്യം രാധാകൃഷ്ണന്‍ ചേട്ടന് ഓര്‍മ്മവന്നത് തന്നെ.''

ഗിരീഷിന്റെ വിയോഗവാര്‍ത്തയറിഞ്ഞു വിളിച്ചപ്പോള്‍ ക്ഷീണിതമായ ശബ്ദത്തില്‍ രാധാകൃഷ്ണന്‍ ചേട്ടന്‍ ഫോണിലൂടെ പാടിക്കേള്‍പ്പിക്കാന്‍ ശ്രമിച്ച വരികളില്‍ തീവ്രവേദനയുടെ, നഷ്ടബോധത്തിന്റെ നിഴലാട്ടമുണ്ടായിരുന്നു: 'അഗ്‌നിയായ് കരള്‍ നീറവേ മോക്ഷമാര്‍ഗം നീട്ടുമോ ഇഹപരശാപം തീരാനമ്മേ ഇനിയൊരു ജന്മം വീണ്ടും തരുമോ' എന്ന വരി പ്രയാസപ്പെട്ട് പാടി നിര്‍ത്തിയശേഷം ആത്മഗതമെന്നോണം അദ്ദേഹം പറഞ്ഞു: 'അവന്‍ പോയി. മോക്ഷം കിട്ടി അവന്. പാവം ...'

നാല് മാസം കൂടി കഴിഞ്ഞു ഒരു ജൂലായ് രണ്ടിന് രാധാകൃഷ്ണന്‍ ചേട്ടനും യാത്രയായി; വീണുടഞ്ഞിട്ടും തിളക്കം നഷ്ടപ്പെടാത്ത ഒരു സൂര്യകിരീടം നമുക്കായി ബാക്കിവെച്ചുകൊണ്ട്.