അഹമ്മദാബാദ്: ലോകത്തെ ഏറ്റവും വലിയ ക്രിക്കറ്റ് സ്‌റ്റേഡിയമായ അഹമ്മദാബാദിലെ നരേന്ദ്ര മോദി സ്‌റ്റേഡിയത്തിന് ബോംബ് ഭീഷണി. യൂത്ത് ടെസ്റ്റിന്റെ ഭാഗമായി ഇന്ത്യ അണ്ടർ-19 ടീമും ഓസ്‌ട്രേലിയൻ അണ്ടർ-19 ടീമും തമ്മിലുള്ള പരിശീലന മത്സരത്തിനിടെയാണ് ബോംബ് ഭീഷണിയുടെ സന്ദേശം ലഭിച്ചത്. ഇ മെയിൽ വഴിയായിരുന്നു ബോംബ് ഭീഷണി. തുടർന്ന് പോലീസും ബോംബ് ഡിസ്‌പോസൽ സ്‌ക്വാഡും ഫയർഫോഴ്‌സും സ്‌റ്റേഡിയത്തിൽ പരിശോധന നടത്തി.

To advertise here,

ഒക്ടോബർ നാല് മുതൽ സ്‌റ്റേഡിയത്തിലെ ഗ്രൗണ്ട് എയിൽ ഇന്ത്യ-ഓസ്‌ട്രേലിയ അണ്ടർ-19 ചതുർദിന മത്സരം നടക്കുന്നുണ്ടായിരുന്നു. ബുധനാഴ്ച രാവിലെ 11.15-ഓടെയാണ് ഇ-മെയിൽ സന്ദേശം ശ്രദ്ധയിൽപെടുന്നത്. തുടർന്ന് സ്‌റ്റേഡിയത്തിൽ നിന്ന് ഇരുടീമുകളേയും സുരക്ഷിതമായി മാറ്റി.

നവംബർ 21-ന് സ്‌റ്റേഡിയത്തിൽ നടക്കുന്ന പഞ്ചാബി ഗായകൻ ദിൽജിത് ദോസാഞ്ചിന്റെ സംഗീത പരിപാടിക്കും ബോംബ് ഭീഷണിയുണ്ട്. വ്യാജ സന്ദേശത്തിന്റെ ഉറവിടം കണ്ടെത്താൻ ഗുജറാത്ത് പോലീസും സൈബർ സെല്ലും അന്വേഷണം ഊർജ്ജിതമാക്കിയിട്ടുണ്ട്.