ന്യൂഡല്‍ഹി:  260 പേരുടെ മരണത്തിനിടയാക്കിയ അഹമ്മദാബാദ് വിമാന ദുരന്തത്തിന്റെ കാരണം ബോയിങ് വിമാനത്തിലെ ഫ്യുവല്‍ സ്വിച്ചുകള്‍ ഓഫായിരുന്നതിനാലാണെന്നാണ് പ്രാഥമിക അന്വേഷണ റിപ്പോര്‍ട്ടില്‍ കണ്ടെത്തിയത്.  വിമാനത്തിന്റെ എന്‍ജിനിലേക്കുള്ള ഇന്ധനത്തിന്റെ ഒഴുക്കിനെ നിയന്ത്രിക്കുന്ന സ്വിച്ചുകളാണിവ. അപകട സമയത്ത് വിമാനത്തിന്റെ രണ്ട് എന്‍ജിനുകളും ഓഫായിരുന്നുവെന്നും അന്വേഷണ റിപ്പോര്‍ട്ടില്‍ പറയുന്നു. 

To advertise here,

വിമാനങ്ങളിലെ ഫ്യൂവല്‍ സ്വിച്ചുകള്‍ നിര്‍ണായകമാണ്. അങ്ങനെ അബദ്ധത്തില്‍ കൈതട്ടിയാല്‍ ഓഫായി പോകുന്ന തരം സ്വിച്ചല്ല ഇവ.  എന്താണ് ഫ്യൂവല്‍ സ്വിച്ചുകള്‍, അവയുടെ പ്രവര്‍ത്തനം എങ്ങനെയെന്ന് പരിശോധിക്കാം.

മുമ്പ് പറഞ്ഞതുപോലെ, വിമാനത്തിന്റെ എന്‍ജിനുകളിലേക്ക് ഇന്ധനം എത്തുന്നത് നിയന്ത്രിക്കുന്നത് ഫ്യൂവല്‍ സ്വിച്ചുകളിലൂടെയാണ്. വിമാന എന്‍ജിനുകള്‍ പ്രവര്‍ത്തിപ്പിക്കണമെങ്കില്‍ ഇവ ആദ്യം ഓണ്‍ ചെയ്യണം. എന്‍ജിന്‍ പ്രവര്‍ത്തനം നിര്‍ത്തണമെങ്കില്‍ ഇവ ഓഫ് ചെയ്യുകയും വേണം. വിമാനം പറന്നുയര്‍ന്ന് യാത്ര തുടരുന്നതിനിടെ അടിയന്തര സാഹചര്യം വന്ന് എന്‍ജിന്‍ നിലച്ചാല്‍ ഇവ ഓഫ് ചെയ്ത് പെട്ടെന്ന് തന്നെ ഓണ്‍ ചെയ്യും. ഇങ്ങനെ എന്‍ജിന്‍ റീ സ്റ്റാര്‍ട്ട് ചെയ്യാറുണ്ട്. 

അത്രയും പ്രധാനപ്പെട്ട ഒന്നായതിനാല്‍ അറിയാതെ കൈ തട്ടി സ്ഥാനം മാറുന്ന രീതിയിലല്ല ഫ്യൂവല്‍ സ്വിച്ചുകളുടെ രൂപകല്‍പ്പന. എന്നാല്‍ ഇവ ഓഫാകുന്ന പക്ഷം പെട്ടെന്ന് തന്നെ എന്‍ജിന്‍ പ്രവര്‍ത്തനം നിലയ്ക്കും.  വിമാനത്തിലെ മറ്റ് സംവിധാനങ്ങളില്‍ നിന്ന് സ്വന്ത്രമായാണ് ഫ്യൂവല്‍ സ്വിച്ച് പ്രവര്‍ത്തിക്കുന്നതെന്നാണ് യുഎസ് വ്യോമയാന വിദഗ്ദന്‍ ജോണ്‍ കോക്‌സ് വിശദീകരിക്കുന്നത്. സാമാന്യ ബുദ്ധിയുള്ള ഒരു പൈലറ്റും അനാവശ്യമായി ഈ സ്വിച്ചുകള്‍ കട്ട് ഓഫ് ചെയ്യുകയില്ല. പ്രത്യേകിച്ച് വിമാനം ടേക്ക് ഓഫ് ചെയ്യുന്ന വേളയില്‍ ഒരിക്കലും ചെയ്യില്ല- ജോണ്‍ കോക്‌സ് വിശദീകരിച്ചു. 

വിമാനത്തിലെ രണ്ട് എന്‍ജിനുകള്‍ക്കും രണ്ട് ഫ്യൂവല്‍ സ്വിച്ചുകളാണ് ഉള്ളത്. കോക്പിറ്റില്‍ വിമാനത്തിന്റെ ത്രസ്റ്റ് നിയന്ത്രിക്കുന്ന ത്രോട്ടില്‍ ലിവറിന്റെ സമീപത്തായാണ് ഈ സ്വിച്ചുകള്‍ സ്ഥാപിച്ചിട്ടുള്ളത്. അതിന്റെ സ്ഥാനം മാറ്റിയാല്‍ ചെറിയ ഇളക്കങ്ങള്‍ മൂലമോ അറിയാതെ കൈ തട്ടിയോ സ്ഥാനം മാറാതിരിക്കാന്‍ സംവിധാനമുണ്ട്. ഇത് പ്രവര്‍ത്തിപ്പിക്കണമെങ്കില്‍ പൈലറ്റ് ഈ സ്വിച്ച് മുകളിലേക്ക് വലിച്ച് മുന്നോട്ടൊ പിന്നോട്ടോ മാറ്റണം. മുന്നോട്ട് മാറ്റുമ്പോള്‍ റണ്‍ പൊസിഷനിലും പിന്നോട്ട് മാറ്റുമ്പോള്‍ കട്ട് ഓഫ് പൊസിഷനിലും എത്തും. കട്ട് ഓഫ് പൊസിഷനില്‍ എത്തി സ്വിച്ച് റിലീസ് ചെയ്താല്‍ എന്‍ജിന്‍ പ്രവര്‍ത്തനം പെട്ടെന്ന് നിലയ്ക്കും. 

അഹമ്മദാബാദില്‍ തകര്‍ന്നുവീണ ബോയിങ് 787 വിമാനത്തിന്റെ കോക്പിറ്റില്‍ ത്രോട്ടില്‍ ലിവറിന് താഴെയായാണ് ഫ്യൂവല്‍ സ്വിച്ചുകളുള്ളത്. വിമാനത്തിലെ കോക്പിറ്റ് വോയ്‌സ് റെക്കോര്‍ഡറില്‍ നിന്നുള്ള വിവരങ്ങള്‍ പ്രകാരം വിമാനം പറന്നുയര്‍ന്ന് സെക്കന്‍ഡുകള്‍ക്കകം ഈ സ്വിച്ചുകള്‍ ഓഫായി. റണ്‍ പൊസിഷനില്‍ നിന്ന് കട്ട് ഓഫ് പൊസിഷനിലേക്ക് മാറി.  ഒരുസെക്കന്‍ഡിന്റെ ഇടവേളയിലാണ് സ്വിച്ചുകള്‍ ഓഫ് ആയത്.  ഇതോടെ എന്‍ജിനിലേക്കുള്ള ഇന്ധന പ്രവാഹം നിലയ്ക്കുകയും എന്‍ജിന്‍ പ്രവര്‍ത്തനം നിലയ്ക്കുകയും ചെയ്തു. ആവശ്യത്തിന് ത്രസ്റ്റ് ലഭിക്കാതെ വിമാനം താഴേക്ക് പതിക്കാനും തുടങ്ങി.

സ്വിച്ച് ഓഫ് ആയിരിക്കുന്നത് ശ്രദ്ധയില്‍ പെട്ട പൈലറ്റുമാരിലൊരാള്‍ എന്തിനാണ് ഇത് കട്ട് ഓഫ് ആക്കിയതെന്ന് സഹപൈലറ്റിനോട് ചോദിക്കുന്നുണ്ട്. അത് താനല്ല ചെയ്തതെന്ന് അയാള്‍ മറുപടി നല്‍കുന്നുമുണ്ട്. ഈ സംഭാഷണം വോയ്‌സ് റെക്കോര്‍ഡറില്‍ രേഖപ്പെടുത്തിയിരുന്നു.  ഈ സംഭാഷണത്തിനിടെ പൈലറ്റുമാരിലൊരാള്‍ സ്വിച്ചുകള്‍ റണ്‍ പൊസിഷനിലേക്ക് കൊണ്ടുവന്നു. എന്നാല്‍ എന്‍ജിന്‍ റീ സ്റ്റാര്‍ട്ട് ആകാനുള്ള സമയത്തിനിടെ ത്രസ്റ്റ് നഷ്ടപ്പെട്ട വിമാനം തകര്‍ന്നുവീണിരുന്നു. 

വിമാനം പറന്നുയര്‍ന്ന് സെക്കന്‍ഡുകള്‍ക്കുള്ളില്‍ തന്നെ ഈ സ്വിച്ചുകള്‍ കട്ട് ഓഫ് ആയി എന്നത് അസാധാരണമായ സംഭവമായാണ് വിമാന ദുരന്തം അന്വേഷിക്കുന്ന എയര്‍ക്രാഫ്റ്റ് ആക്‌സിഡന്റ് ഇന്‍വെസ്റ്റിഗേഷന്‍ ബ്യൂറോയുടെ റിപ്പോര്‍ട്ടില്‍ പറയുന്നത്. സ്വിച്ചുകള്‍ ഓഫായതിന് പിന്നിലെ കാരണം കണ്ടെത്താന്‍ വിശദമായ അന്വേഷണം വേണമെന്നാണ് പ്രാഥമിക അന്വേഷണ റിപ്പോര്‍ട്ടില്‍ പറയുന്നത്.