മുൻ പ്രധാനമന്ത്രി രാജീവ് ഗാന്ധിയുടെ 82-ാം ജന്മവാർഷികത്തിൽ ആദരാഞ്ജലി അർപ്പിക്കാൻ പ്രതിശ്രുതവധു അവിവ ബെയ്ഗിനൊപ്പം വീർ ഭൂമിയിലെത്തി കോൺഗ്രസ് നേതാവ് പ്രിയങ്ക ഗാന്ധി വദ്രയുടെയും വ്യവസായി റോബർട്ട് വദ്രയുടെയും മകനായ റൈഹാൻ വദ്ര. ഇതാദ്യമായാണ് അവർ വീർ ഭൂമിയിൽ എത്തുന്നത്. കഴിഞ്ഞ ജനുവരിയിലാണ് റൈഹാനുമായി അവിവയുടെ വിവാഹനിശ്ചയം കഴിഞ്ഞത്.

To advertise here,

ഡൽഹി സ്വദേശിയായ അവിവ വ്യവസായിയായ ഇമ്രാൻ ബെയ്ഗിന്റെ മകളാണ്. മാതാവ് നന്ദിത ബെയ്ഗ് ഇന്റീരിയർ ഡിസൈനറാണ്. ഏഴ് വർഷക്കാലമായി ഇരുവരും പ്രണയത്തിലായിരുന്നുവെന്നാണ് വിവാഹ നിശ്ചയത്തിന്റെ സമയത്ത് പുറത്തുവന്ന റിപ്പോർട്ടുകൾ. റൈഹാനും അവിവയും ഒരേ സ്‌കൂളിലാണ് പഠിച്ചത്.

പ്രിയങ്ക ഗാന്ധിയും നന്ദിതയും പഴയ സുഹൃത്തുക്കളാണ്. വർഷങ്ങളായി അടുത്ത ബന്ധം പുലർത്തുന്നവരാണ് ഇരു കുടുംബങ്ങളും. കോൺഗ്രസ് ആസ്ഥാനമായ ഇന്ദിര ഭവന്റെ ഇന്റീരിയർ ഡിസൈനിംഗിൽ നന്ദിത പ്രിയങ്കയെ സഹായിച്ചിരുന്നു.

രാജീവ് ഗാന്ധിയും രാഹുൽ ഗാന്ധിയുമെല്ലാം പഠിച്ച ഡെറാഡൂണിലെ ഡൂൺ സ്‌കൂളിലാണ് റൈഹാൻ വദ്രയും പഠിച്ചത്. പിന്നീട് പൊളിറ്റിക്‌സിൽ ഉന്നത പഠനത്തിനായി ലണ്ടനിലെ സ്‌കൂൾ ഓഫ് ഓറിയന്റൽ ആന്റ് ആഫ്രിക്കൻ സ്റ്റഡീസിലേക്ക് മാറി. നല്ലൊരു ഫോട്ടോഗ്രാഫറാണ് റൈഹാൻ. വൈൽഡ്‌ലൈഫ്, സ്ട്രീറ്റ് ഫോട്ടോഗ്രഫി ഉൾപ്പടെയുള്ള മേഖലയിലും റൈഹാൻ കഴിവുതെളിയിച്ചിട്ടുണ്ട്.