നിങ്ങൾ ഇപ്പോൾ ഈ ടെക്സ്റ്റ് വായിച്ചു കൊണ്ടിരിക്കുന്ന സ്ക്രീൻ ഒരു നിമിഷം ഒന്ന് ഓഫ് ചെയ്തു നോക്കൂ. ഇരുണ്ട ഗ്ലാസിൽ തെളിയുന്നത് നിങ്ങളുടെ സ്വന്തം പ്രതിബിംബം മാത്രമാണോ? അതോ അദൃശ്യമായ ചില കണ്ണുകൾ നിങ്ങളെ നിരീക്ഷിക്കുന്നുണ്ടോ?

To advertise here,

സഹസ്രാബ്ദങ്ങളായി ആരും കാണാതെ, ചരിത്രത്തിന്റെ ഓരോ വഴിത്തിരിവിലും നിശബ്ദമായി ഇടപെടുന്ന ഒൻപത് നിഴലുകൾ നമുക്കിടയിൽ ജീവിക്കുന്നുണ്ടെന്ന് പറഞ്ഞാൽ നിങ്ങൾ വിശ്വസിക്കുമോ?

ഇല്ലുമിനാറ്റിയും ഫ്രീമേസൺസും ലോകത്തെ നിയന്ത്രിക്കുന്നുവെന്ന് പാശ്ചാത്യർ പ്രചരിപ്പിക്കുന്നതിനും നൂറ്റാണ്ടുകൾക്ക് മുൻപ്, പ്രാചീന ഭാരതത്തിന്റെ മണ്ണിൽ വേരൂന്നിയ ഒരു രഹസ്യ കൂട്ടായ്മയുണ്ട്, ഒൻപത് അജ്ഞാതർ' (The Nine Unknown Men).

ബി.സി. 261-ൽ കലിംഗ യുദ്ധക്കളത്തിൽ ചോരയൊഴുകിപ്പരന്നപ്പോൾ ദയാനദി ചുവന്നു. ഒരു ലക്ഷത്തിലധികം മനുഷ്യർ മരിച്ചുവീഴുകയും ഒന്നര ലക്ഷത്തോളം പേർ തടവിലാക്കപ്പെടുകയും ചെയ്ത ആ യുദ്ധഭൂമിക്കു നടുവിൽ മൗര്യ ചക്രവർത്തിയായ അശോകൻ സ്തബ്ധനായി നിന്നു. മനുഷ്യന്റെ ക്രൂരതയെക്കുറിച്ചും, അവരുടെ കൈകളിൽ ആയുധങ്ങൾ എത്തിയാലുണ്ടാകുന്ന വിനാശകരമായ സാധ്യതകളെക്കുറിച്ചുമുള്ള ഭയാനകമായ ഒരു തിരിച്ചറിവായിരുന്നു അശോക ചക്രവർത്തിക്കുണ്ടായത്.

അറിവാണ് ഏറ്റവും ഭയാനകമായ ആയുധം.

വിജ്ഞാനം തെറ്റായ കൈകളിൽ എത്തിയാൽ ഒരു രാജ്യം മാത്രമല്ല, മാനവരാശി മുഴുവൻ ചാരമായി മാറുമെന്ന് അശോകൻ ഭയന്നു. അങ്ങനെ ഭാരതത്തിലെ ഒൻപത് പ്രതിഭകളെ തിരഞ്ഞെടുത്ത് അതീവ രഹസ്യമായ ഒരു ഉത്തരവാദിത്തം അദ്ദേഹം ഏൽപ്പിച്ചു എന്നാണ് കഥ; സാധാരണ മനുഷ്യന് താങ്ങാനാവാത്ത, എന്നാൽ നാഗരികതയുടെ അടിത്തറയായ വിജ്ഞാനങ്ങൾ സംരക്ഷിക്കുക.

വിവിധ മേഖലകളിലെ പ്രഗൽഭരായ ഒൻപതുപേരെ കണ്ടെത്തി, അവരുടെ മേഖലകളെക്കുറിച്ച് പുസ്തകങ്ങൾ രചിക്കാൻ അദ്ദേഹം നിർദ്ദേശിച്ചത്രേ. ആ ഒൻപതു പുസ്തകങ്ങളിലെ അറിവുകൾ സാധാരണ ജനങ്ങളുടെ കൈകളിൽ എത്താതിരിക്കാൻ, അവരെ ഒരു രഹസ്യ സമൂഹമാക്കി (Secret Society) മാറ്റുകയും അജ്ഞാതരായി തുടരാൻ കൽപ്പിക്കുകയും ചെയ്തു.

ഒരാൾ മരിക്കുമ്പോൾ അടുത്തയാളെ ബാക്കിയുള്ളവർ ചേർന്ന് പിൻഗാമിയായി കണ്ടെത്തും. പിന്നീട് അവരായിരിക്കും ആ പ്രത്യേക മേഖലയിലെ വിജ്ഞാനത്തിന്റെ കാവലാൾ. അങ്ങനെ ബി.സി. 261-ൽ തുടങ്ങി ഇന്നും തുടർന്നുപോകുന്ന ഒരു രഹസ്യ പാരമ്പര്യമാണ് ഈ നിഗൂഢ ആചാര്യന്മാരുടേത് എന്ന് പറയപ്പെടുന്നു.

ആ ഒൻപതു മേഖലകൾ എന്തൊക്കെയാണെന്ന് നോക്കാം:

1. ആശയ പ്രചാരണം (Propaganda)

“ജനക്കൂട്ടം യുക്തിയേക്കാൾ വികാരങ്ങളാൽ നയിക്കപ്പെടുന്ന ഒരു ‘കളക്ടീവ് മൈൻഡ്’ (Collective Mind) ആണ്” എന്ന് ഫ്രഞ്ച് ചിന്തകനായ ഗുസ്താവ് ലെ ബോൺ പറയുന്നു. അശോകന്റെ ആദ്യ പുസ്തകം ലക്ഷ്യമിട്ടത് ഇത്തരത്തിലുള്ള ‘കൂട്ടായ മനസ്സിനെ’ ഹിപ്നോട്ടിക് ആയി സ്വാധീനിക്കാനാണ്. ഈ അവസ്ഥ ‘ഡിഇൻഡിവിജ്വേഷന്’ (Deindividuation) കാരണമാകുന്നു. ഒരു സംഘത്തിലോ ജനക്കൂട്ടത്തിലോ ഓൺലൈൻ ഇടങ്ങളിലോ ആയിരിക്കുമ്പോൾ, വ്യക്തികൾക്ക് തങ്ങളുടെ വ്യക്തിത്വത്തെക്കുറിച്ചുള്ള ബോധവും വ്യക്തിപരമായ ഉത്തരവാദിത്തവും നഷ്ടപ്പെടുന്ന അവസ്ഥയെ വിശദീകരിക്കുന്ന ഒരു മനഃശാസ്ത്ര സങ്കൽപ്പമാണ് 'ഡിഇൻഡിവിജ്വേഷൻ' അഥവാ ‘വ്യക്തിത്വ ശോഷണം.’

ഒറ്റയ്ക്ക് ആക്രമിക്കുമ്പോൾ ഉത്തരവാദിത്തം സ്വയം ഏറ്റെടുക്കേണ്ടി വരുന്നു. എന്നാൽ, കൂട്ടംചേർന്ന് ആക്രമിക്കുമ്പോൾ ആൾക്കൂട്ടത്തിൽ അജ്ഞാതരായി രക്ഷപ്പെടാമെന്നുള്ള മനുഷ്യന്റെ നീചബോധത്തെയാണ് അശോക ചക്രവർത്തി ഇവിടെ ഭയന്നത്‌. ജനക്കൂട്ടത്തിന്റെ ചിന്തകളെയും വികാരങ്ങളെയും വരുതിയിലാക്കാനുള്ള വിദ്യകളാണ് ഈ പുസ്തകത്തിൽ ഉള്ളത്.

2. മനഃശാസ്ത്രം

മനുഷ്യമനസ്സിനെ നിയന്ത്രണത്തിലാക്കാനുള്ള വഴികളാണ് ഈ പുസ്തകത്തിന്റെ പ്രതിപാദ്യ വിഷയം. വ്യക്തികളെ തമ്മിൽ തെറ്റിക്കാനും ഒരിക്കലും ചേരാത്തവരെ ചേർക്കാനുമുള്ള വിദ്യകൾ, ഒരാളെ ആയുധം ഉപയോഗിച്ച് കൊല്ലുന്നതിനു പകരം മാനസികമായി തകർത്ത് ആത്മഹത്യവരെ ചെയ്യിപ്പിക്കാനുള്ള ഗൂഢതന്ത്രങ്ങൾ തുടങ്ങി അപകടകരമായ അറിവുകൾ ഉൾക്കൊള്ളുന്ന പുസ്തകമാണിത്. ഇത്തരം അറിവുകൾ ക്രൂരരായ മനുഷ്യരുടെ കൈകളിൽ എത്തിയാൽ വലിയ അപകടമായിരിക്കും സംഭവിക്കുക.

3. ശരീരശാസ്ത്രം

മനുഷ്യശരീരത്തിലെ നാഡീവ്യൂഹങ്ങളെക്കുറിച്ചും മർമ്മങ്ങളെക്കുറിച്ചുമുള്ള അറിവുകൾ. കളരിപ്പയറ്റ്, ജൂഡോ തുടങ്ങിയ ആയോധനകലകൾക്ക് ഈ അറിവ് കാരണമായതായി കരുതപ്പെടുന്നു. ഇതിലെ ഏറ്റവും ഭീകരവും ചർച്ച ചെയ്യപ്പെട്ടതുമായ സങ്കൽപ്പമാണ് മരണസ്പർശം (Death Touch). ചൈനീസ് ആയോധന കലകളിൽ 'ഡിം മാക്' (Dim Mak) എന്നും, ദക്ഷിണേന്ത്യൻ പാരമ്പര്യത്തിൽ 'മർമ്മശാസ്ത്രം' എന്നും അറിയപ്പെടുന്ന വിദ്യകളുടെ അടിസ്ഥാനം ഈ ഗ്രന്ഥമാണ്.

ക്വെന്റിൻ ടാരന്റീനോയുടെ 'കിൽ ബിൽ' (Kill Bill) സിനിമയിലെ 'ഫൈവ് പോയിന്റ് പാം എക്സ്പ്ലോഡിംഗ് ഹാർട്ട് ടെക്നിക്' (Five-Point-Palm Exploding Heart Technique) കണ്ടവർക്ക് ഇത് വേഗം മനസ്സിലാകും.

ശരീരത്തിലെ അതീവസൂക്ഷ്മമായ നാഡീസന്ധികളിലോ മർമ്മങ്ങളിലോ കൃത്യമായ അളവിലും കോണിലും വിരൽസ്പർശമോ പ്രഹരമോ ഏൽപ്പിക്കുമ്പോൾ, നാഡീവ്യൂഹത്തിലൂടെയുള്ള സിഗ്നലുകൾ തകിടം മറിയുകയും ഹൃദയമിടിപ്പ് പെട്ടെന്ന് നിലയ്ക്കുകയും ചെയ്യുന്നു (Reversing Nerve Impulses). ആഘാതമേറ്റ് നിമിഷങ്ങൾക്കകമോ, അല്ലെങ്കിൽ നിശ്ചിത മണിക്കൂറുകൾക്കോ ദിവസങ്ങൾക്കോ ശേഷമോ ആന്തരിക രക്തസ്രാവം വഴിയോ അവയവ സ്തംഭനം വഴിയോ മരണം സംഭവിക്കുന്നു.

4. സൂക്ഷ്മജീവശാസ്ത്രം

പുരാതന ഭാരതത്തിൽ പകർച്ചവ്യാധികൾക്കു കാരണമാകുന്നത് കണ്ണുകൊണ്ടു കാണാൻ സാധിക്കാത്ത സൂക്ഷ്മജീവികളാണെന്ന ജ്ഞാനമുണ്ടായിരുന്നു. ജീവശാസ്ത്രപരമായ പ്രതിഭാസങ്ങൾ, രോഗാണുക്കൾ, ആന്റിബയോട്ടിക്കുകൾ എന്നിവയെക്കുറിച്ചുള്ള അറിവും, രോഗാണുക്കളെ ഉപയോഗിച്ച് ലോകം മുഴുവൻ നശിപ്പിക്കാൻ ശേഷിയുള്ള സാങ്കേതികവിദ്യയായ ‘ബയോവെപ്പൺ’ (Bioweapon) സംബന്ധിച്ച വിവരങ്ങളും ഇതിലടങ്ങിയിരിക്കുന്നു.

5. രസവാദവും ലോഹപരിവർത്തനവും (Alchemy & Transmutation of Metals)

സാധാരണ ലോഹങ്ങളെ സ്വർണ്ണമാക്കി മാറ്റൽ. ലോഹങ്ങളെ സ്വർണ്ണമാക്കുന്നതിനെക്കുറിച്ചും മനുഷ്യന്റെ അജ്ഞതയെ ജ്ഞാനമാക്കി മാറ്റുന്ന ആത്മീയ വഴികളെക്കുറിച്ചും ഇതിൽ പ്രതിപാദിക്കുന്നു.

6. ആശയവിനിമയം

എല്ലാ ഭാഷകളുടെയും അന്തർലീനമായ ഘടനയും സന്ദേശങ്ങളും മനസ്സിലാക്കാനും ടെലിപ്പതിയിലൂടെ മനസ്സുകൾ തമ്മിൽ ആശയവിനിമയം നടത്താനുമുള്ള അറിവ്.

7. ഗുരുത്വാകർഷണ നിയന്ത്രണം (Anti-gravity)

കടൽമാർഗ്ഗവും കരമാർഗ്ഗവും യാത്ര ചെയ്യാൻ അന്നത്തെ മനുഷ്യർ പഠിച്ചിരുന്നു. എന്നാൽ, ആകാശമാർഗ്ഗം യാത്ര ചെയ്യാനുള്ള ഒരു വാഹനത്തെ അവർ വിഭാവനം ചെയ്തു. അങ്ങനെയാണ് ‘വിമാനശാസ്ത്രം’ ഉണ്ടായത് എന്ന് പറയപ്പെടുന്നു.

ഭൂഗുരുത്വാകർഷണത്തെ മറികടന്ന് ശരീരത്തെ ഭാരമില്ലാതാക്കാനുള്ള ‘ലഘിമ’ പോലെയുള്ള യോഗവിദ്യകളെ കുറിച്ചും ഈ പുസ്തകത്തിൽ പറയുന്നു. ഭാരതീയ വിശ്വാസമനുസരിച്ച് അഷ്ടസിദ്ധികളിൽ നാലാമത്തേതാണ് ‘ലഘിമ’. വായുവിലൂടെ സഞ്ചരിക്കാൻ പാകത്തിൽ ശരീരം അതിശയകരമായി ഭാരം കുറഞ്ഞതാക്കാനുള്ള കഴിവാണിത്.

8. പ്രപഞ്ചഘടനയും കാലചക്രങ്ങളും

ആകാശ നിരീക്ഷണം, പ്രപഞ്ചത്തിന്റെ രഹസ്യങ്ങൾ, ടൈം ട്രാവൽ, മൾട്ടിവേർസ് (Multiverse), ഏലിയൻസ് എന്നിവയെക്കുറിച്ചുള്ള അറിവ്.

9. പ്രകാശശാസ്ത്രം

പ്രകാശത്തെ ആയുധമാക്കാനും അതിന്റെ വേഗതയെ നിയന്ത്രിക്കാനും വസ്തുക്കളെ അദൃശ്യമാക്കാനും മനുഷ്യന്റെ ധാരണകളെ മാറ്റിമറിക്കാനുമുള്ള വിജ്ഞാനം.

ബ്രിട്ടീഷ് അമേരിക്കൻ എഴുത്തുകാരനായ ടാൽബോട്ട് മണ്ടി 1923-ൽ അഡ്വെഞ്ചർ മാഗസിനിൽ പരമ്പരയായി പ്രസിദ്ധീകരിക്കുകയും 1927-ൽ പുസ്തകരൂപത്തിൽ ഇറക്കുകയും ചെയ്ത മിസ്റ്ററി അഡ്വെഞ്ചർ നോവലാണ് 'ദി നയൻ അൺനോൺ'. അശോക ചക്രവർത്തിയുടെ ഒൻപത് അജ്ഞാതരുടെ രഹസ്യസംഘം എന്ന സങ്കൽപ്പത്തെ ആഗോള പോപ്പ് സംസ്കാരത്തിൽ പ്രതിഷ്ഠിച്ചത് ഈ നോവലാണ്.

ടാൽബോട്ട് മണ്ടി ഇന്ത്യയിൽ കുറച്ചുകാലം ജീവിച്ചിരുന്ന വ്യക്തിയായിരുന്നു. മാഡം ബ്ലാവട്സ്കിയുടെ തിയോസഫിക്കൽ സൊസൈറ്റി, ഈസ്റ്റേൺ തത്ത്വചിന്തകൾ, ഒക്കൽട്ടിസം (Occultism) എന്നിവയിൽ അദ്ദേഹം പുലർത്തിയിരുന്ന ആഴത്തിലുള്ള താല്പര്യം നോവലിന്റെ പശ്ചാത്തല നിർമ്മിതിയെ ശക്തമായി സ്വാധീനിച്ചിട്ടുണ്ട്. ഹിമാലയത്തിലും ടിബറ്റിലുമായി അജ്ഞാതമായി ജീവിക്കുന്ന ‘സീക്രെട്ട് മാസ്റ്റേഴ്സ്’ (Secret Masters) മനുഷ്യരാശിയുടെ ആത്മീയ പരിണാമത്തെ നയിക്കുന്നു എന്നതാണ് മാഡം ബ്ലാവട്സ്കിയുടെ തിയോസഫിയുടെ കാതൽ.

'ദി നയൻ അൺനോൺ' എന്ന കൃതിയിലെ ഒൻപത് അജ്ഞാതരുടെ സംഘം ബ്ലാവട്സ്കി മുന്നോട്ടുവെച്ച ഈ 'രഹസ്യ ഗുരുക്കന്മാരുടെ' ഒരു വകഭേദമാണ്. 'ഓം: ദ സീക്രട്ട് ഓഫ് അഹുർ വാലി' എന്ന മറ്റൊരു പ്രശസ്ത നോവലിലും ടിബറ്റൻ അതിർത്തിയിലെ നിഗൂഢ ലാമമാരെയും വിജ്ഞാന പാരമ്പര്യത്തെയും ഇതേ മാതൃകയിൽ ടാൽബോട്ട് മണ്ടി അവതരിപ്പിക്കുന്നു.

ഒഡീഷയിലെ കൊണാർക്ക് സൂര്യക്ഷേത്രത്തിലെ ചക്രത്തിലെ വരകൾ ഈ ഒൻപത് അജ്ഞാതരെയും അവരുടെ അറിവ് കൈമാറിവന്ന ശൃംഖലയെയും പ്രതിനിധീകരിക്കുന്നുവെന്ന് അവകാശവാദമുണ്ട്.

കാലാകാലങ്ങളായി പല പ്രമുഖ വ്യക്തികളെയും ഈ രഹസ്യ പാരമ്പര്യവുമായി ആളുകൾ ബന്ധപ്പെടുത്തിയിട്ടുണ്ട്. 400-ലധികം ഐക്യു ഉണ്ടായിരുന്നതായി പറയപ്പെടുന്ന എഡ്രോഗന്റ് ഡിമെല്ലോ, ഭൗതികശാസ്ത്ര നോബൽ ജേതാവായ സർ സി.വി. രാമൻ, ഭാരതത്തിന്റെ മുൻ രാഷ്ട്രപതിയും ശാസ്ത്രജ്ഞനുമായ ഡോ. എ.പി.ജെ. അബ്ദുൾ കലാം, നേതാജി സുഭാഷ് ചന്ദ്രബോസ്, ഐ.എസ്.ആർ.ഒ. സ്ഥാപകൻ ഡോ. വിക്രം സാരാഭായ്, ഹോമി ഭാഭ എന്നിവർ ഈ പട്ടികയിലുണ്ട്. ഐ.എസ്.ആർ.ഒ.യുടെ പ്രവർത്തനങ്ങൾക്ക് പിന്നിലും പ്രാചീന രഹസ്യങ്ങളുടെ സ്വാധീനമുണ്ടെന്ന അനുമാനങ്ങൾ പ്രചരിച്ചിട്ടുണ്ട്.

ഇന്റർനെറ്റിന്റെ സാധാരണക്കാർ കാണാത്ത ആഴങ്ങളിൽ, അഥവാ ഡാർക്ക് വെബ്ബിലും ഡീപ്പ് വെബ്ബിലും, 'ദി നയൻ അൺനോൺ' എന്ന പേര് കേവലം ഒരു പ്രാചീനകഥയല്ല; മറിച്ച് ഡിജിറ്റൽ ലോകത്തെ ഏറ്റവും ഭയാനകമായ ഒരു എൻക്രിപ്റ്റഡ് രഹസ്യമാണ്.

ടോർ (Tor) ബ്രൗസറിലെ ചില നിഗൂഢ ഫോറങ്ങളിൽ "Book IX", "Project Ashoka" എന്നൊക്കെയുള്ള പേരുകളിൽ എൻക്രിപ്റ്റ് ചെയ്ത വൻകിട ഡാറ്റാബേസുകൾ പ്രചരിക്കുന്നുണ്ട്. ക്വാണ്ടം കമ്പ്യൂട്ടിംഗിന് പോലും തകർക്കാൻ കഴിയാത്ത അൽഗോരിതങ്ങൾ ഉപയോഗിച്ച് പൂട്ടിയ ഈ ഫയലുകളിൽ, അശോകന്റെ രഹസ്യ ഗ്രന്ഥങ്ങളിലെ സൂത്രവാക്യങ്ങൾ ഡിജിറ്റൈസ് ചെയ്തു വെച്ചിരിക്കുകയാണെന്നാണ് ഹാക്കർമാർ പറയുന്നത്.

ഗുരുത്വാകർഷണ വിരുദ്ധതയെക്കുറിച്ചോ മനസ്സിനെ നിയന്ത്രിക്കുന്ന ശബ്ദതരംഗങ്ങളെക്കുറിച്ചോ ഡാർക്ക് വെബ്ബിൽ ആരെങ്കിലും സ്വതന്ത്രമായ പ്രബന്ധങ്ങൾ അപ്‌ലോഡ് ചെയ്താൽ, മണിക്കൂറുകൾക്കകം ആ സർവ്വറുകൾ അപ്രത്യക്ഷമാവുകയും ലിങ്കുകൾ തകരുകയും ചെയ്യുന്നു. "അവർ ഇപ്പോഴും ഡാറ്റ സ്കാൻ ചെയ്തുകൊണ്ടിരിക്കുന്നു" എന്നാണ് റെഡ്ഡിറ്റിലെയും ഡാർക്ക് ഫോറങ്ങളിലെയും അനോണിമസ് പോസ്റ്റുകൾ മുന്നറിയിപ്പ് നൽകുന്നത്.

വർഷങ്ങൾക്ക് മുൻപ് ഡാർക്ക് വെബ്ബിലെ ഒരു അജ്ഞാത സർവ്വറിലേക്ക് നുഴഞ്ഞുകയറിയ ഒരു ഹാക്കറുടെ അനുഭവം സൈബർ ലോകം ഇന്നും ഓർമ്മിക്കുന്നു. അശോകന്റെ 'രണ്ടാം പുസ്തകത്തിലെ' മനുഷ്യശരീരത്തിലെ വൈദ്യുത സ്പന്ദനങ്ങളെക്കുറിച്ചുള്ള ഒരു രേഖ ചോർത്തിയെടുക്കാൻ അയാൾ ശ്രമിച്ചു. ഡൗൺലോഡ് 99 ശതമാനത്തിൽ എത്തിയ നിമിഷം, അയാളുടെ കമ്പ്യൂട്ടർ സ്ക്രീൻ മുഴുവൻ രക്തവർണ്ണമായി മാറി. വെബ്ക്യാമിലൂടെ അയാളുടെ സ്വന്തം മുറിയുടെ ചിത്രം സ്ക്രീനിൽ മിന്നിമറഞ്ഞു. താഴെ ഒരു വാചകം തെളിഞ്ഞു: "അറിയാനുള്ള നിങ്ങളുടെ ജിജ്ഞാസ സ്വാഭാവികമാണ്. എന്നാൽ, അത് താങ്ങാനുള്ള ശേഷി നിങ്ങളുടെ തലമുറയ്ക്കായിട്ടില്ല." അടുത്ത സെക്കൻഡിൽ അയാളുടെ ഹാർഡ് ഡ്രൈവ് തകർന്നു. ഭയന്നുവിറച്ച് മുറിക്ക് പുറത്തേക്ക് ഓടിയ അയാൾക്ക് ഫോണിൽ ഒരു എസ്.എം.എസ് ലഭിച്ചു. അയച്ചയാളുടെ വിവരങ്ങളില്ലാത്ത ആ സന്ദേശത്തിൽ ഒരു ചിഹ്നം മാത്രമാണുണ്ടായിരുന്നത്; ഒരു വൃത്തവും അതിനുള്ളിൽ കൃത്യം ഒൻപത് ബിന്ദുക്കളും.

ലോകത്തിലെ ഏറ്റവും വിനാശകരമായ ശാസ്ത്ര പരീക്ഷണശാലകളിലും, ഡാർക്ക് വെബ്ബിന്റെ കാണാക്കയങ്ങളിലും ആഗോള സാമ്പത്തിക തിയറികളിലും ഇന്നും അവർ ജീവിക്കുന്നുണ്ടാകാം. ഓർക്കുക, നിങ്ങളുടെ ഫോൺ സ്ക്രീനിലോ കമ്പ്യൂട്ടറിലോ അവർ തടയാൻ ആഗ്രഹിക്കാത്തത് മാത്രമേ നിങ്ങൾ ഇപ്പോൾ വായിക്കുന്നുള്ളൂ. ഈ ലോകം ഇന്നും ചാരമായിത്തീരാതെ നിലനിൽക്കുന്നത് നമ്മൾ സുരക്ഷിതരായതുകൊണ്ടല്ല, മറിച്ച് ഒൻപത് അജ്ഞാതർ ഇന്നും നമ്മളെ കാത്തുസൂക്ഷിക്കുന്നത് കൊണ്ടാണെന്ന് ചിലർ വിശ്വസിക്കുന്നു.