സുൽത്താൻബത്തേരി: വയനാട് ജില്ലയിൽ അഞ്ചുകുട്ടികൾക്കുകൂടി ഷിഗെല്ല സ്ഥിരീകരിച്ചു. അഞ്ച്, ഏഴ്, എട്ട്, ഒമ്പത്, 11 വയസ്സുള്ള പെൺകുട്ടികൾക്കാണ് പുതുതായി രോഗം സ്ഥിരീകരിച്ചത്. ഏഴാംതീയതി പരിശോധനയ്ക്ക് അയച്ച സാംപിളുകളുടെ ഫലമാണ് പോസിറ്റീവായത്. ഇതോടെ രോഗം സ്ഥിരീകരിച്ച കുട്ടികളുടെ എണ്ണം എട്ടായി. കുട്ടികളുടെ ആരോഗ്യനില തൃപ്തികരമാണെന്ന് ആരോഗ്യവകുപ്പ് അധികൃതർ അറിയിച്ചു. ഇതുവരെ 502 പേരിലാണ് രോഗലക്ഷണങ്ങൾ കണ്ടെത്തിയത്. ബുധനാഴ്ച നാലുപേരെ കൂടി ആശുപത്രിയിൽ പ്രവേശിപ്പിച്ചു. നിലവിൽ 44 പേരാണ് വിവിധ ആശുപത്രികളിൽ ചികിത്സയിൽ കഴിയുന്നത്. ഇതുവരെ 164 പേരെയാണ് ഇതുവരെ ആശുപത്രികളിൽ പ്രവേശിപ്പിച്ചത്.

To advertise here,

ഷിഗെല്ല നിയന്ത്രണവിധേയം; സമ്പർക്കത്തിലൂടെ പകരുന്നുണ്ടോ എന്ന് സംശയം -മന്ത്രി

കോഴിക്കോട്: ഷിഗെല്ല നിലവിൽ നിയന്ത്രണവിധേയമാണെന്നും ആശങ്കപ്പെടേണ്ട സാഹചര്യമില്ലെന്നും ആരോഗ്യമന്ത്രി കെ. മുരളീധരൻ. അസുഖം സമ്പർക്കത്തിലൂടെ പകരുന്നുണ്ടോയെന്ന് സംശയമുണ്ട്. റിപ്പോർട്ട് ലഭിച്ചാലേ ഇതിൽ വ്യക്തതവരൂ. കോഴിക്കോട് ബീച്ച് ആശുപത്രിയിൽ മാധ്യമങ്ങളെ കാണുകയായിരുന്നു അദ്ദേഹം. സ്‌കൂളിലെ കുഴൽക്കിണറിലെ വെള്ളത്തിലൂടെയാണ് രോഗം പകരുന്നതെന്ന സംശയം ഉന്നയിച്ചതിനെത്തുടർന്ന് വെള്ളം പരിശോധനയ്ക്ക് അയച്ചിട്ടുണ്ടെന്നും അദ്ദേഹം പറഞ്ഞു.

നെന്മേനി പഞ്ചായത്തിൽ ആൾക്കൂട്ട നിയന്ത്രണം

സുൽത്താൻബത്തേരി: ഷിഗെല്ല രോഗബാധ പ്രതിരോധത്തിന്റെ ഭാഗമായി കൂടുതൽ ശക്തമായ നടപടികളിലേക്ക് അധികൃതർ. രോഗബാധ കണ്ടെത്തിയ കോളിയാടി എ.യു.പി. സ്‌കൂൾ ഉൾപ്പെടുന്ന നെന്മേനി പഞ്ചായത്തിൽ ഒരാഴ്ചത്തേക്ക് ആൾക്കൂട്ടങ്ങൾക്ക് നിയന്ത്രണമേർപ്പെടുത്തി. പഞ്ചായത്ത് പരിധിയിലെ മുഴുവൻപ്രദേശങ്ങളിലും ബുധനാഴ്ചമുതൽ നിയന്ത്രണമേർപ്പെടുത്തി കളക്ടർ ഡി.ആർ. മേഘശ്രീയാണ് ഉത്തരവിട്ടത്. താത്കാലിക ചന്തകൾ, റാലികൾ എന്നിവ പരമാവധി ഒഴിവാക്കണം. പൊതു, സ്വകാര്യ സ്ഥലങ്ങളിൽ ആളുകൾ കൂട്ടംകൂടി നിൽക്കുന്നതും പരമാവധി ഒഴിവാക്കണം. വിവാഹം, മരണാനന്തരച്ചടങ്ങുകൾ എന്നിവയിൽ ആളുകളുടെ എണ്ണം നിയന്ത്രിക്കുകയും സുരക്ഷാമാനദണ്ഡങ്ങളുടെ ഭാഗമായി മാസ്‌ക്, സാനിറ്റൈസർ എന്നിവ ഉപയോഗിക്കുകയും വേണം. തിളപ്പിച്ചാറിയ വെള്ളംമാത്രമേ കുടിക്കാൻ ഉപയോഗിക്കാവൂ. രോഗലക്ഷണങ്ങൾ പ്രകടമാവുന്ന ആരും സ്വയംചികിത്സയ്ക്ക് മുതിരരുത്. നിർബന്ധമായും അടുത്തുള്ള സർക്കാർ ആശുപത്രിയിലെത്തി വിദഗ്ധചികിത്സ തേടണം.

നിലവിൽ രോഗലക്ഷണങ്ങളുള്ളവരുടെ സമ്പർക്കപ്പട്ടിക താലൂക്ക് ആരോഗ്യകേന്ദ്രത്തിൽ തയാറാക്കി അവരെ നിരീക്ഷിക്കും. വൃത്തിഹീനമായ സാഹചര്യങ്ങളിൽ പ്രവർത്തിക്കുന്ന ഹോട്ടലുകൾ, തട്ടുകടകൾ എന്നിവയിൽ കർശന പരിശോധന നടത്തി നിയമപരമായ നടപടികൾ സ്വീകരിക്കാനും കുടിവെള്ള സ്രോതസ്സുകൾ ക്ലോറിനേറ്റ് ചെയ്യാനും ഭക്ഷ്യസുരക്ഷാവകുപ്പിനും ഹെൽത്ത് ഇൻസ്‌പെക്ടർമാർക്കും നിർദേശം നൽകിയിട്ടുണ്ട്. ഉന്നതികളിലെ പരിസരശുചിത്വം ഉൾപ്പെടെയുള്ളവയിൽ ട്രൈബൽ വകുപ്പ് നടപടി സ്വീകരിക്കും. നിർദേശങ്ങൾ ലംഘിക്കുന്നവർക്കെതിരേ കേരള പബ്ലിക് ഹെൽത്ത് ആക്ട്, ഭാരതീയ ന്യായ് സംഹിത തുടങ്ങിയവ പ്രകാരം നടപടിയുണ്ടാകുമെന്നും കളക്ടർ അറിയിച്ചു.

12 വിദ്യാലയങ്ങൾക്ക് അവധി

സുൽത്താൻബത്തേരി: ഷിഗെല്ല രോഗബാധയെത്തുടർന്നുള്ള മുൻകരുതൽ നടപടികളുടെ ഭാഗമായി 12 വിദ്യാലയങ്ങൾക്ക് മൂന്നുദിവസത്തേക്ക് അവധി നൽകി. ഹൈറിസ്‌ക് കോണ്ടാക്ടുള്ള വിദ്യാലയങ്ങൾക്ക് ബുധനാഴ്ച മുതലാണ് ഡി.ഇ.ഒ. അവധി നൽകിയത്. ബത്തേരി സെയ്ന്റ് മേരീസ് കോളേജ് ഹയർസെക്കൻഡറി സ്‌കൂൾ, മൂലങ്കാവ് ഗവ. ഹയർസെക്കൻഡറി സ്‌കൂൾ, ബത്തേരി സെയ്ന്റ് ജോസഫ്സ് സ്‌കൂൾ, ബീനാച്ചി ഗവ. ഹൈസ്‌കൂൾ, കുന്താണി ഗവ. എൽ.പി. സ്‌കൂൾ, ബത്തേരി ഐഡിയൽ സ്‌കൂൾ, ബത്തേരി ടെക്നിക്കൽ സ്‌കൂൾ, ജി.എൽ.പി.എസ്. മാളിക, മലങ്കര ലിറ്റിൽ കിങ്ഡം, വടകര അനംതാനെ എൻജിനിയറിങ് കോളേജ് എന്നിവയ്ക്കാണ് അവധി.

ഫീൽഡ്തല പ്രവർത്തനം സജീവം

മാനന്തവാടി: ജില്ലയിൽ അഞ്ചുകുട്ടികൾക്കുകൂടി ഷിഗെല്ല സ്ഥിരീകരിച്ച സാഹചര്യത്തിൽ ഫീൽഡ്തല രോഗനിരീക്ഷണപ്രവർത്തനം സജീവമാക്കി.

ഇതിന്റെ ഭാഗമായി 1719 വീടുകളിൽ ആരോഗ്യപ്രവർത്തകർ സന്ദർശനം നടത്തി. 969 കിണറുകൾ ക്ലോറിനേറ്റുചെയ്തു. 727 ഒ.ആർ.എസ്. പാക്കറ്റുകൾ വിതരണംചെയ്തു. സ്ഥിതിഗതികൾ നേരിട്ട് വിലയിരുത്തുന്നതിനായി ആരോഗ്യവകുപ്പ് പൊതുജനാരോഗ്യവിഭാഗം അഡീഷണൽ ഡയറക്ടർ ഡോ. കെ.പി. റീത്തയുടെ നേതൃത്വത്തിലുള്ള സംസ്ഥാനതല വിദഗ്ധസംഘം കോളിയാടിയും പരിസരപ്രദേശവും സന്ദർശിച്ചു. രോഗവ്യാപനം തടയാനുമുള്ള നിർദേശങ്ങളും നൽകി.

ആരോഗ്യവകുപ്പിന്റെയും തദ്ദേശസ്വയംഭരണസ്ഥാപനങ്ങളുടെയും നേതൃത്വത്തിൽ രോഗപ്രതിരോധ-നിയന്ത്രണ പ്രവർത്തനങ്ങളും നേരിട്ടുള്ള ബോധവത്കരണ പ്രവർത്തനങ്ങളും പ്രദേശത്ത് ഊർജിതമാക്കിയിട്ടുണ്ട്.

ആരോഗ്യവകുപ്പ് പുറപ്പെടുവിച്ചിട്ടുള്ള ജാഗ്രതാനിർദേശങ്ങളും പ്രതിരോധമാർഗങ്ങളും പൊതുജനങ്ങൾ കർശനമായി പാലിക്കണമെന്നും വ്യക്തി, ഭക്ഷണ, പരിസര ശുചിത്വ കാര്യങ്ങളിൽ വിട്ടുവീഴ്ച വരുത്തരുതെന്നും ഡി.എം.ഒ. ഡോ. കെ.ടി. രേഖ പറഞ്ഞു. രോഗലക്ഷണങ്ങൾ കണ്ടാൽ ഉടൻ അടുത്തുള്ള ആരോഗ്യകേന്ദ്രങ്ങളിൽ ചികിത്സതേടണമെന്നും ഡി.എം.ഒ. നിർദേശിച്ചു.