അടുത്തവര്ഷം മുതല് സിബിഎസ്ഇ പത്താം ക്ലാസ് പൊതുപരീക്ഷകള് രണ്ടുതവണ നടത്താന് തീരുമാനിച്ചിരിക്കുകയാണ്. ഒരു അധ്യയനവര്ഷം ഫെബ്രുവരിയിലും മേയിലുമായി രണ്ടുതവണ പൊതുപരീക്ഷ നടത്താനാണ് തീരുമാനം.
വിദ്യാര്ഥികള് ഫെബ്രുവരിയിലെ പരീക്ഷ നിര്ബന്ധമായും എഴുതേണ്ടതാണ്. ശേഷം പ്രകടനം മെച്ചപ്പെടുത്താന് ആഗ്രഹിക്കുന്ന വിദ്യാര്ത്ഥികള്ക്ക് മേയിലെ പരീക്ഷയെഴുതാം. മേയിലെ പരീക്ഷ ഓപ്ഷണലാണ്. ഈ പരീക്ഷ എഴുതണമെന്ന് നിര്ബന്ധമില്ല.
സയന്സ്, സോഷ്യല് സയന്സ്, ഗണിതം, ഭാഷ വിഷയങ്ങളില് ഏതെങ്കിലും മൂന്നെണ്ണത്തിലാണ് മേയില് ഇംപ്രൂവ്മെന്റ് പരീക്ഷയെഴുതാനാവുക. ഫെബ്രുവരിയിലെ പരീക്ഷാഫലം ഏപ്രിലിലും മേയിലെ പരീക്ഷാഫലം ജൂണിലും പ്രസിദ്ധീകരിക്കും. ശൈത്യകാല മേഖലകളിലെ സ്കൂളുകളില് പഠിക്കുന്നവര്ക്ക് ഇതില് ഏതുഘട്ടത്തില് വേണമെങ്കിലും പരീക്ഷയെഴുതാം.
ഇതുവരെയുണ്ടായിരുന്നതുപോലെ ഇനി സപ്ലിമെന്ററി പരീക്ഷകള് പ്രത്യേകം നടത്തില്ല. ഇംപ്രൂവ്മെന്റിന് അപേക്ഷിക്കുന്നവര്ക്ക് മേയിലെ പരീക്ഷയെഴുതാം. നിലവില് രണ്ട് വിഷയങ്ങളിലാണ് ഇംപ്രൂവ്മെന്റ് പരീക്ഷയെഴുതാനായിരുന്നത്. ആ പരീക്ഷ ജൂലായില് നടത്തി ഓഗസ്റ്റിലാണ് ഫലം പുറത്തുവിട്ടിരുന്നത്.
അധ്യയനവര്ഷത്തില് ഒറ്റത്തവണ മാത്രം ഇന്റേണല് അസസ്മെന്റ് നടത്തുക എന്നതാണ് സിബിഎസ്ഇയുടെ മറ്റൊരു തീരുമാനം.
കേന്ദ്രസര്ക്കാര് 2020-ല് കൊണ്ടുവന്ന പുതിയ വിദ്യാഭ്യാസ നയത്തിന്റെ ഭാഗമായിട്ടാണ് പുതിയ പരിഷ്കാരം. ഇതിനായുള്ള കരടുചട്ടങ്ങള് 2024 ഫെബ്രുവരിയില് സിബിഎസ്ഇ പുറത്തിറക്കിയിരുന്നു. പൊതുജനാഭിപ്രായം തേടിയശേഷമാണ് ഇപ്പോള് ഈ നയത്തിന് അംഗീകാരം നല്കിയത്.
ഫെബ്രുവരിയിലെ പരീക്ഷ നിര്ബന്ധമാക്കിയിരിക്കുന്നത് വിദ്യാര്ഥികള് പരീക്ഷയെ ഗൗരവമായി കാണുന്നെന്ന് ഉറപ്പാക്കാനാണെന്ന് സിബിഎസ്ഇ ചെയര്മാന് രാഹുല് സിങ് മാധ്യമങ്ങളോട് പറഞ്ഞിരുന്നു.
വിദ്യാര്ഥികള്ക്ക് സമ്മര്ദമൊഴിവാക്കി സൗകര്യപ്രദമായി പരീക്ഷയെഴുതാന് പുതിയ മാറ്റം സഹായിക്കുമെന്ന് സിബിഎസ്ഇ തീരുമാനത്തെ പുകഴ്ത്തി കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാനു അന്ന് എക്സില് പോസ്റ്റുചെയ്തു. വര്ഷത്തില് രണ്ടുപരീക്ഷയെന്നത് ആഗോള വിദ്യാഭ്യാസ സമ്പ്രദായങ്ങളോടു ചേര്ന്നുപോകുന്ന വിദ്യാര്ഥികേന്ദ്രികൃതമായ സമീപനമാണെന്നും മന്ത്രി അഭിപ്രായപ്പെട്ടിരുന്നു.
പൊതുവായ വ്യവസ്ഥകളും സ്കീമും
- ആദ്യ ബോര്ഡ് പരീക്ഷയില് എല്ലാ വിദ്യാര്ത്ഥികളും നിര്ബന്ധമായും പങ്കെടുക്കണം.
- വിജയിക്കുകയും യോഗ്യത നേടുകയും ചെയ്യുന്ന വിദ്യാര്ത്ഥികള്ക്ക് ശാസ്ത്രം, ഗണിതം, സാമൂഹ്യശാസ്ത്രം, ഭാഷകള് എന്നിവയില് നിന്നുള്ള മൂന്ന് വിഷയങ്ങള് വരെ പ്രകടനം മെച്ചപ്പെടുത്തുന്നതിനായി രണ്ടാം പരീക്ഷയില് പങ്കെടുക്കാം.
- ആദ്യ പരീക്ഷയില് മൂന്നോ അതിലധികമോ വിഷയങ്ങളില് പങ്കെടുക്കാത്ത വിദ്യാര്ത്ഥികളെ Essential repeat വിഭാഗത്തില് ഉള്പ്പെടുത്തും. അവര്ക്ക് അടുത്ത ഫെബ്രുവരിയില് നടക്കുന്ന പ്രധാന പരീക്ഷകളില് മാത്രമേ വീണ്ടും പങ്കെടുക്കാന് കഴിയൂ.
- ആദ്യ പരീക്ഷയ്ക്ക് ശേഷം (Compartment) വിഭാഗത്തില് ഉള്പ്പെട്ട വിദ്യാര്ത്ഥികള്ക്ക് കോമ്പ്ളിമെന്ററി വിഭാഗത്തില് രണ്ടാം പരീക്ഷ എഴുതാം.
- 10-ാം ക്ലാസ് പാസായ ശേഷം അധിക വിഷയങ്ങള് അനുവദിക്കില്ല
പ്രത്യേക വ്യവസ്ഥകള്
കായിക താരങ്ങള്ക്ക് അവരുടെ കായിക ഇവന്റ് ആദ്യ പരീക്ഷയുമായി ഒരേ സമയം വന്നാല് രണ്ടാം പരീക്ഷയില് പങ്കെടുക്കാം.ശൈത്യകാല സ്കൂളുകളിലെ വിദ്യാര്ത്ഥികള്ക്ക് ഒന്നുകില് ആദ്യ പരീക്ഷയോ അല്ലെങ്കില് രണ്ടാം പരീക്ഷയോ തിരഞ്ഞെടുക്കാം.പ്രത്യേക പരിഗണന ആവശ്യമുള്ള കുട്ടികള്ക്ക് (CWSN) ലഭ്യമായ സൗകര്യങ്ങള് രണ്ടാം പരീക്ഷയിലും ബാധകമായിരിക്കും.
ഇന്റേണല് അസസ്മെന്റ്
ഇന്റേണല് അസസ്മെന്റ് ഒരു തവണ, പ്രധാന പരീക്ഷയ്ക്ക് മുമ്പ് നടത്തും.
പരീക്ഷാ ഷെഡ്യൂള്
- ആദ്യ (പ്രധാന) പരീക്ഷ: ഇപ്പോഴത്തെ ഷെഡ്യൂള് അനുസരിച്ച് ഫെബ്രുവരി പകുതിയോടെ.
- രണ്ടാം പരീക്ഷ: മെയ് മാസത്തില്.
യോഗ്യതാ മാനദണ്ഡം
ആദ്യ പരീക്ഷയ്ക്ക്:
- പുതിയ 10-ാം ക്ലാസ് വിദ്യാര്ത്ഥികള്
- രണ്ടാം ചാന്സ് കോമ്പ്ളിമെന്ററി കാന്ഡിഡേറ്റുകള്
- അവശ്യമായി ആവര്ത്തിക്കേണ്ട വിദ്യാര്ത്ഥികള് (Essential repeat)
- പ്രകടനം മെച്ചപ്പെടുത്താനുള്ള പരീക്ഷാ കാന്ഡിഡേറ്റുകള്
രണ്ടാം പരീക്ഷയ്ക്ക്
- മൂന്ന് പ്രധാന വിഷയങ്ങള് വരെ പ്രകടനം മെച്ചപ്പെടുത്താന് തിരഞ്ഞെടുക്കുന്ന വിദ്യാര്ത്ഥികള്
- ഒന്നാം അല്ലെങ്കില് മൂന്നാം ചാന്സ് കോമ്പ്ളിമെന്ററി കാന്ഡിഡേറ്റുകള്
- കോമ്പ്ളിമെന്ററി പ്രകടനം മെച്ചപ്പെടുത്തലും (Compartment plus improvement)
- വിഷയം മാറ്റി പകരം വെച്ച് പാസായവര്, പ്രകടനം മെച്ചപ്പെടുത്താന് തിരഞ്ഞെടുക്കുന്നവര്.
സിലബസും പരീക്ഷാ സ്കീമും
രണ്ട് ബോര്ഡ് പരീക്ഷകളും പൂര്ണ്ണമായും വാര്ഷിക സിലബസിനെ അടിസ്ഥാനമാക്കിയുള്ളതായിരിക്കും.പഠനത്തിന്റെയും പരീക്ഷകളുടെയും സ്കീം മാറ്റമില്ലാതെ തുടരും.
എല്ഒസി (LOC - List of Candidates) നിയമങ്ങള്
എല്ഒസി പൂരിപ്പിച്ച് ആദ്യ പരീക്ഷയില് പങ്കെടുക്കുന്നത് നിര്ബന്ധമാണ്.രണ്ടാം പരീക്ഷയ്ക്ക് പ്രത്യേക എല്ഒസി ആവശ്യമാണ്, എന്നാല് ഈ ഘട്ടത്തില് പുതിയ കാന്ഡിഡേറ്റുകളെ ചേര്ക്കാന് കഴിയില്ല.വ്യക്തമായി അനുവദിച്ചിട്ടില്ലെങ്കില്, ആദ്യ പരീക്ഷയ്ക്കും രണ്ടാം പരീക്ഷയ്ക്കും ഇടയില് വിഷയമാറ്റം അനുവദിക്കില്ല.
ഫലവും സര്ട്ടിഫിക്കറ്റുകളും
- ആദ്യ പരീക്ഷാ ഫലങ്ങള്: ഏപ്രിലില് പ്രതീക്ഷിക്കുന്നു.
- രണ്ടാം പരീക്ഷാ ഫലങ്ങള്: ജൂണില് പ്രതീക്ഷിക്കുന്നു.
- ആദ്യ പരീക്ഷയിലെ പ്രകടനം ഡിജിലോക്കറില് ലഭ്യമാകും, വിദ്യാര്ത്ഥി രണ്ടാം പരീക്ഷ എഴുതാന് തിരഞ്ഞെടുക്കുന്നില്ലെങ്കില് 11-ാം ക്ലാസ് പ്രവേശനത്തിന് ഇത് ഉപയോഗിക്കാം. അന്തിമ പാസിംഗ് ഡോക്യുമെന്റുകള് രണ്ടാം പരീക്ഷാ ഫലങ്ങള്ക്ക് ശേഷം നല്കും. മെറിറ്റ് സര്ട്ടിഫിക്കറ്റുകള് രണ്ടാം പരീക്ഷയ്ക്ക് ശേഷം മാത്രമേ നല്കുകയുള്ളൂ.
വിശദവിവരങ്ങള് സിബിഎസ്ഇയുടെ ഔദ്യോഗിക വെബ്സൈറ്റ് സന്ദര്ശിക്കാം
Content Highlights: CBSE 10th Exams Twice a Year: New 2025 Rules
Published: 08 Jul 2025, 11:19 am IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented