അവസരങ്ങളുടെ പാലാഴിയാണ് ക്ഷീരമേഖല, പക്ഷേ, കറന്നെടുക്കാൻ അറിയണം

ലോകം കണ്ട ഏറ്റവും പ്രമുഖനായ ഡയറി എഞ്ചിനീയര്‍ മലയാളിയാണ് ഡോ. വർഗീസ് കുര്യന്‍. അദ്ദേഹത്തിന്റെ പ്രവര്‍ത്തനങ്ങള്‍ ക്ഷിരോത്പാദന മേഖലയില്‍ ഉണ്ടാക്കിയ വിപ്ലവം എക്കാലവും ഓര്‍ത്തിരിക്കുന്ന ചരിത്രമാണ്. അദ്ദേഹം പൊരുതിയ ഈ മേഖല അനന്തമായി തൊഴില്‍ സാധ്യത നല്‍കുന്നതാണ്. ഡയറി സയന്‍സ് /ഡയറി ടെക്‌നോളജി കോഴ്‌സ് പഠിച്ചിറങ്ങുന്നവരെ കാത്ത് തൊഴില്‍ സാധ്യതകളുടെ ക്ഷീരപഥമാണ്. എന്നാല്‍ ഈ മേഖലയുടെ സാധ്യതകളെ പറ്റി അത്ര ചര്‍ച്ചകള്‍ വന്നിട്ടില്ല എന്നതാണ് സത്യം. ഈ മേഖലയിലെ തൊഴില്‍ സാധ്യതകള്‍ എവിടെ പഠിക്കാം എന്നതിനെ കുറിച്ച് വിശദമായി അറിയാം.

ക്ഷീരവ്യവസായത്തിന്റെ ദ്രുതഗതിയിലുളള വളര്‍ച്ചയ്ക്കൊപ്പം ഉയര്‍ന്നുവന്ന കരിയര്‍  മേഖലയാണ് ഡയറി ടെക്നോളജി.  മത്സരാധിഷ്ഠിതമായ ക്ഷീരവ്യവസായ രംഗത്ത് ശുദ്ധമായ പാല്‍ പായ്ക്ക് ചെയ്ത് വിതരണം ചെയ്യലും വിവിധ ക്ഷീരോത്പന്നങ്ങളുടെ വിപണനവും പ്രാധാന്യമര്‍ഹിക്കുന്നു.  ബാക്ടീരിയോളജി, ഫിസിക്സ്, കെമിസ്ട്രി എന്നീ ശാസ്ത്ര മേഖലകളിലും സാമ്പത്തിക മേഖലയിലും അറിവുളള ആളായിരിക്കണം ഒരു ഡയറി ടെക്നോളജിസ്റ്റ്.  വി. കുര്യന്റെ നേതൃത്വത്തില്‍ നടത്തിയ ക്ഷീരവിപ്ലവം സൃഷ്ടിച്ച തരംഗത്തില്‍ രാജ്യത്ത് ധാരാളം ഡയറി ഫാമുകളും മാര്‍ക്കറ്റിങ് സ്ഥാപനങ്ങളും ഉയര്‍ന്നു വന്നതുകൊണ്ട് ഈ മേഖലയില്‍ ധാരാളം തൊഴിലവസരങ്ങളുണ്ട്.  മാത്രവുമല്ല ഏതു രാജ്യത്തിന്റെയും സാമ്പത്തികനിലയുടെ സൂചകങ്ങളിലൊന്നാണ് പാലിന്റെ പ്രതിശീര്‍ഷ ഉപയോഗം. സഹകരണസ്ഥാപനങ്ങള്‍, സര്‍ക്കാര്‍ സ്വകാര്യമേഖലാ സംരംഭങ്ങള്‍ എന്നിവയിലും തൊഴിലവസരങ്ങളുണ്ട്.

പഠന സൗകര്യങ്ങള്‍

ഡയറി ടെക്നോളജിയില്‍ ബി.എസ് സി, എം.എസ് സി, ബി. ടെക്., എം. ടെക്. കോഴ്സുകള്‍ ഇന്ത്യയിലെ വിവിധ സ്ഥാപനങ്ങള്‍ നടത്തുന്നു. 10+2 (ഫിസിക്സ്, കെമിസ്ട്രി, മാത്​സ്) യോഗ്യതയുളളവര്‍ക്ക് ബി. എസ് സി, ബി. ടെക്. കോഴ്സുകള്‍ക്കും ബി. എസ് സി/ബി. ടെക് യോഗ്യതയുളളവര്‍ക്ക് എം. എസ് സി, / എം. ടെക്. കോഴ്സുകള്‍ക്കും അപേക്ഷിക്കാം.

കേരളത്തില്‍: വയനാട്ടിലെ പൂക്കോട് ആസ്ഥാനമായുള്ള കേരള വെറ്ററിനറി ആന്‍ഡ് ആനിമല്‍ സയന്‍സസ് സര്‍വകലാശാലയുടെ കീഴില്‍ മണ്ണുത്തി, പൂക്കോട്, കോലാഹലമേട് (ഇടുക്കി), ചെറ്റച്ചല്‍ (തിരുവനന്തപുരം) എന്നിവിടങ്ങളില്‍ ബിടെക് ഡയറി ടെക്‌നോളജി പഠിക്കാനുതകുന്ന ഡയറി സയന്‍സ്  കോളേജുകളുണ്ട്. കേരളത്തിലെ പ്രവേശന പരീക്ഷാ കമ്മീഷണര്‍ നടത്തുന്ന പ്രവേശന പരീക്ഷ (KEAM) വഴിയാണ് 80% സീറ്റുകളിലേയ്ക്കുള്ള പ്രവേശനം. 15% ഐ. സി. എ. ആര്‍. സീറ്റുകളിലേയ്ക്കുള്ള പ്രവേശനം AIEEA  ഡഏ വഴിയായിരിക്കും. 5% സീറ്റുകള്‍ മേഘാലയയിലെ പിന്നാക്ക ട്രൈബല്‍ വിഭാഗത്തില്‍ നിന്നുള്ള വിദ്യാര്‍ഥികള്‍ക്കായി നീക്കി വച്ചിരിക്കുന്നു. ഫിസിക്‌സ്, കെമിസ്ട്രി, മാത്സ് എന്നിവ പ്ലസ് ടുവിന് പഠിച്ചിരിക്കണം. വര്‍ഗീസ് കുര്യന്‍ ഇന്‍സ്റ്റിറ്റ്യൂട്ട് ഓഫ് ഡെയറി സയന്‍സ് ആന്‍ഡ് ഫുഡ് ടെക്‌നോളജി, മണ്ണുത്തി, തൃശൂര്‍; കോളേജ് ഓഫ് ഡയറി സയന്‍സ് ആന്‍ഡ് ടെക്‌നോളജി, പൂക്കോട്, വയനാട്; കോളേജ് ഓഫ് ഡയറി സയന്‍സ് ആന്‍ഡ് ടെക്‌നോളജി, വാഗമണ്‍, ഇടുക്കി; കോളേജ് ഓഫ് ഡയറി സയന്‍സ് ആന്‍ഡ് ടെക്‌നോളജി, കൈമനം, തിരുവനന്തപുരം എന്നിവയാണ് കേരളത്തിലെ കോളേജുകള്‍. കൂടുതല്‍ വിവരങ്ങള്‍ക്ക് https://www.kvasu.ac.in/btech-dairy-technology

തൊഴില്‍ സാധ്യതകള്‍

നാഷണല്‍ ഡയറി ഡെവലപ്മെന്റ് ബോര്‍ഡിന്റെ 1965ലെ സ്ഥാപനവും 1970ലെ ഓപ്പറേഷന്‍ ഫ്ളഡിന്റെ പ്രോത്സാഹനവും അതിലൂടെയുള്ള വിവിധ പദ്ധതികളും ഇന്ത്യയിലെ ക്ഷീരവ്യവസായത്തിന് വലിയ കുതിപ്പ് നല്‍കി. കഴിഞ്ഞ രണ്ട് ദശാബ്ദങ്ങളിലെ ക്ഷീരവ്യവസായത്തിന്റെ വിസ്മയകരമായ വളര്‍ച്ച, ക്ഷീര ഉപകരണങ്ങളുടെ തദ്ദേശീയ ഉല്‍പ്പാദനത്തിനും ഗുണനിലവാര നിലവാരം ഉയര്‍ത്തുന്നതിനും വിവിധതരം പാല്‍ ഉല്‍പന്നങ്ങളുടെ ഉല്‍പാദനത്തിനും വിവിധ ആവശ്യങ്ങള്‍ സൃഷ്ടിച്ചു. ഇത് ക്ഷീര ഉപകരണ നിര്‍മ്മാണ വ്യവസായത്തിന്റെയും സാങ്കേതിക കണ്‍സള്‍ട്ടന്‍സി ഓര്‍ഗനൈസേഷനുകളുടെയും പുരോഗമനപരമായ വികസനത്തിന് കാരണമാവുകയും ഗവേഷണത്തിനും അധ്യാപനത്തിനും പ്രചോദനം നല്‍കുകയും ചെയ്തു. ഡയറി സംസ്‌കരണത്തിന്റെയും അനുബന്ധ വ്യവസായങ്ങളുടെയും അത്തരം ശ്രദ്ധേയമായ വിപുലീകരണം ഡയറി ടെക്‌നോളജിസ്റ്റുകള്‍ക്കും എഞ്ചിനീയര്‍മാര്‍ക്കും വിശാലമായ തൊഴില്‍ അവസരങ്ങള്‍ തുറന്നു നല്‍കി.

വിവിധതരം പാലുല്‍പ്പന്നങ്ങള്‍ നിര്‍മിക്കുന്ന 400-ലധികം ഡയറി പ്ലാന്റുകള്‍ ഇപ്പോള്‍ രാജ്യത്തുണ്ട്. പ്ലാന്റുകള്‍ കാര്യക്ഷമമായി പ്രവര്‍ത്തിപ്പിക്കുന്നതിന് അവര്‍ക്ക് നല്ല യോഗ്യതയും നല്ല പരിശീലനം ലഭിച്ച ഉദ്യോഗസ്ഥരും ആവശ്യമാണ്. ക്ഷീര സംസ്‌കരണ വ്യവസായത്തിന്റെ വളര്‍ച്ച, ഡയറി ഉപകരണങ്ങളുടെ സ്വദേശിവല്‍ക്കരണത്തെ പ്രോത്സാഹിപ്പിച്ചു. ക്ഷീര വ്യവസായത്തിന്റെ മിക്ക ആവശ്യങ്ങളും ഇപ്പോള്‍ തദ്ദേശീയമായി നിറവേറ്റപ്പെടുന്നു. നിലവില്‍ 170-ലധികം ക്ഷീര ഉപകരണ നിര്‍മാതാക്കളുണ്ട്. ക്ഷീര വ്യവസായത്തിന് രണ്ട് വ്യത്യസ്ത തരം ജോലികളുണ്ട്: (1) ഉപകരണങ്ങളുടെ രൂപകല്‍പ്പനയും നിര്‍മ്മാണവും പ്ലാന്റ് രൂപകല്‍പ്പനയും (2) പ്രോജക്റ്റ് എക്‌സിക്യൂഷന്‍. എഞ്ചിനീയറിംഗില്‍ അഭിരുചിയുള്ള ഒരു ഡയറി ടെക്‌നോളജിസ്റ്റിന് ഈ ജോലികള്‍ ചെയ്യാന്‍ കഴിയും.

ഡയറി ടെക്നോളജിസ്റ്റുകള്‍ക്ക് കണ്‍സള്‍ട്ടന്‍സി ജോലികളും ഏറ്റെടുക്കാം. അധ്യാപനത്തിനും ഗവേഷണത്തിനുമുള്ള അവസരങ്ങള്‍ കൂടാതെ ഡയറി ടെക്‌നോളജിസ്റ്റുകള്‍ക്ക് ചെറുകിട പാല്‍ പ്ലാന്റുകള്‍, ക്രീമറി, ഐസ്‌ക്രീം യൂണിറ്റുകള്‍ തുടങ്ങിയ സ്വന്തം സംരംഭങ്ങള്‍ ആരംഭിക്കാന്‍ കഴിയും.

ഇന്ത്യയിലെ  കേരള സര്‍ക്കാരിന്റെ ക്ഷീര വികസന വകുപ്പ്, ഭക്ഷ്യസുരക്ഷ വകുപ്പ്, ക്ഷീര സഹകരണ മേഖലയിലെ വിവിധ സ്ഥാപനങ്ങള്‍, അമൂല്‍, മില്‍മ, സ്വകാര്യ ഡെയറികള്‍, പൊതു  സ്വകാര്യ മേഖലയിലെ ബാങ്കുകള്‍, ഭക്ഷ്യ സംസ്‌കരണ ശാലകള്‍ എന്നിവയില്‍ അവസരങ്ങളുണ്ട്. കൂടാതെ ഇന്ത്യയിലും വിദേശത്തുമുള്ള ക്ഷീര  ഭക്ഷ്യ സംസ്‌കരണ മേഖലയിലെ സഹകരണ  സ്വകാര്യ കമ്പനികളിലും മറ്റു ഭക്ഷ്യസ്ഥാപനങ്ങളിലും ജോലി ലഭിക്കും.

• ഡയറി ടെക്‌നോളജിസ്റ്റ്:

ഫിസിക്സ്, കെമിസ്ട്രി, ഇക്കണോമിക്സ്, എഞ്ചിനീയറിംഗ്, ബാക്ടീരിയോളജി എന്നിവയുടെ തത്വങ്ങള്‍ ഉപയോഗിച്ച് പാലുല്‍പ്പന്നങ്ങളുടെ ഉത്പാദനം, സംരക്ഷണം, ഉപയോഗം എന്നിവയുടെ പുതിയതും കൂടുതല്‍ ഫലപ്രദവുമായ രീതികള്‍ വികസിപ്പിക്കുന്നതിന് ഡയറി ടെക്നോളജിസ്റ്റിന് കഴിയും.

• മൈക്രോബയോളജിസ്റ്റ്:

ഒരു മൈക്രോബയോളജിസ്റ്റ് ബാക്ടീരിയ, ഫംഗസ്, വൈറസ് തുടങ്ങിയ സൂക്ഷ്മാണുക്കളെ വിശകലനപരവും ശാസ്ത്രീയവുമായ വിവിധ സാങ്കേതിക വിദ്യകള്‍ ഉപയോഗിച്ച് രോഗത്തിനും പാരിസ്ഥിതിക നാശത്തിനും കാരണമാകുന്ന ജീവികളെ  നിരീക്ഷിക്കുകയും പഠിക്കുകയും ചെയ്യുന്നു.

• ഡയറി ന്യൂട്രീഷനിസ്റ്റ്:

കന്നുകാലികളുടെ ഭക്ഷണ പരിപാലനവുമായി നേരിട്ട് ബന്ധപ്പെട്ടിരിക്കുന്ന ജോലിയാണിത്. കന്നുകാലികളുടെ മൊത്തത്തിലുള്ള ആരോഗ്യം നിലനിര്‍ത്തിക്കൊണ്ട് പരമാവധി ഉത്പാദനം ഉറപ്പാക്കുകയാണ് ഡയറി ന്യൂട്രീഷനിസ്റ്റിന്റെ പ്രധാന ജോലി.

• ക്ഷീര ശാസ്ത്രജ്ഞന്‍:

പാല്‍ ഉല്‍പ്പാദനം വര്‍ദ്ധിപ്പിക്കുന്നതിനും പാല്‍ സംസ്‌കരണം കാര്യക്ഷമമാക്കുന്നതിനും സഹായിക്കുന്ന ഒരു കാര്‍ഷിക ശാസ്ത്രജ്ഞനാണ് ക്ഷീര ശാസ്ത്രജ്ഞന്‍. പാല്‍ ഉല്‍പ്പാദിപ്പിക്കുന്നതിനും ഉപയോഗിക്കുന്നതിനുമുള്ള കൂടുതല്‍ കാര്യക്ഷമമായ മാര്‍ഗങ്ങളിലൂടെ മൃഗങ്ങളുടെ ക്ഷേമവും ഉല്‍പാദനക്ഷമതയും മെച്ചപ്പെടുത്തുന്നതിനും ക്ഷീര ശാസ്ത്രജ്ഞന്‍ സഹായിക്കുന്നു.

• ഡയറി പ്രൊഡക്ഷന്‍ മാനേജര്‍:

ഫാമിന്റെ സാമ്പത്തികവും ആരോഗ്യകരവുമായ പ്രവര്‍ത്തനങ്ങളില്‍ ഡയറി മാനേജരെ സഹായിക്കുന്നത് ഡയറി പ്രൊഡക്ഷന്‍ മാനേജരാണ്. കൂടാതെ ഹ്രസ്വവും ദീര്‍ഘവുമായ ബിസിനസ് പ്ലാനുകള്‍ നടപ്പിലാക്കുകയും ഫാമിന്റെ പ്രവര്‍ത്തനങ്ങള്‍ ഒപ്റ്റിമൈസ് ചെയ്യുന്നത് ഉറപ്പാക്കുകയും ചെയ്യുന്നു.

• ഡയറി മാനേജര്‍:

ഡയറി ഫാമിലേയ്ക്ക് ആവശ്യമായ തീറ്റ തയ്യാറാക്കല്‍, കറവ ഉപകരണങ്ങളുടെ ഉപയോഗം, കന്നുകാലികളുടെ പരിപാലനം തുടങ്ങി പാലുല്‍പ്പാദനത്തിന്റെ എല്ലാ മേഖലകളിലും ഉള്‍പ്പെട്ടിരിക്കുന്ന തൊഴിലാളികളുടെ മേല്‍നോട്ടത്തിലാണ് ഒരു ഡയറി മാനേജര്‍ കൂടുതലും ഉള്‍പ്പെട്ടിരിക്കുന്നത്.

• ലോജിസ്റ്റിക്‌സ് ആന്‍ഡ് ഡിസ്ട്രിബ്യൂഷന്‍ മാനേജര്‍:

സാധനങ്ങളുടെ സംഭരണവും വിതരണവും സംഘടിപ്പിക്കുക എന്നതാണ്. ശരിയായ ഉല്‍പ്പന്നങ്ങള്‍ ശരിയായ സ്ഥലത്ത് ശരിയായ സമയത്ത് വിതരണം ചെയ്യുന്നുവെന്ന് ലോജിസ്റ്റിക്‌സ് ആന്‍ഡ് ഡിസ്ട്രിബ്യൂഷന്‍ മാനേജര്‍ ഉറപ്പാക്കുന്നു.

• ഫാം മാനേജര്‍:

ജലസേചനം, വിളവെടുപ്പ്, ഗ്രേഡിംഗ്, പേ റോള്‍, റെക്കോര്‍ഡ് കീപ്പിംഗ് തുടങ്ങിയ തൊഴിലാളികളുടെ പ്രവര്‍ത്തനങ്ങള്‍ക്ക് നേതൃത്വം നല്‍കുന്നതിനും ഏകോപിപ്പിക്കുന്നതിനും ഫാം മാനേജര്‍ ആവശ്യമാണ്. ഫാം മാനേജരാണ് കര്‍ഷകരുമായി ഇടപഴകുന്നത്. ക്വാളിറ്റി കണ്‍ട്രോള്‍ ഓഫീസര്‍: പാലുല്‍പ്പന്നങ്ങള്‍ക്ക് ആവശ്യമായ ഗുണനിലവാരവും കാര്യക്ഷമതയും പാലിക്കുന്നുണ്ടെന്ന് ഉറപ്പാക്കുന്നു.

ഉന്നതപഠനത്തിന്

ഐ. സി. എ. ആര്‍. നിയന്ത്രണത്തില്‍ ധാരാളം സ്ഥാപനങ്ങളില്‍ പി. ജി., പിഎച്ച്. ഡി. പ്രോഗ്രാമുകള്‍ക്കും സൗകര്യമുണ്ട്. കൂടുതല്‍ വിവരങ്ങള്‍ക്കും ഇന്ത്യയിലെ മറ്റ് പഠന കേന്ദ്രങ്ങളെക്കുറിച്ചും  ഡയറി സയന്‍സ് / ഡയറി ടെക്‌നോളജി കോഴ്‌സുകളെ കുറിച്ച് അറിയുന്നതിനും https://www.icar.gov.in/animal-science/institutes-universities-under-animal-science-division സന്ദര്‍ശിക്കുക. ഐ. സി. എ. ആര്‍. നിയന്ത്രണത്തിലല്ലാത്ത വിദ്യാഭ്യാസ സ്ഥാപനങ്ങളും ഡയറി സയന്‍സ് / ഡയറി ടെക്‌നോളജി പ്രോഗ്രാമുകള്‍ നടത്തുന്നുണ്ട്.