പ്രിയ സാല്‍ഗോക്കര്‍.... ഇത് ഗോവയുടെ മാത്രം നഷ്ടമല്ല...

ബംഗാള്‍ ത്രിമൂര്‍ത്തികളെ പോലെ സാല്‍ഗോക്കറിനെ മാറ്റിനിര്‍ത്തി ഒരു ചരിത്രമില്ല ഇന്ത്യന്‍ ഫുട്ബോളിന്. അമ്പത്തിയാറില്‍ തുടക്കമിട്ടെങ്കിലും അമ്പത്തിരണ്ടിലെ ഒളിമ്പിക്സ് കളിച്ച ചരിത്രമുള്ള ബെംഗളൂകാരനായ തുലുക്കനം ഷണ്‍മുഖം എന്ന പോലീസുകാരന്‍ പരിശീലകനായി എത്തിയ എണ്‍പതുകളും തൊണ്ണൂറുമായിരുന്നു സാല്‍ഗോക്കറിന്റെ അറുപത്തിയേഴ് വര്‍ഷത്തിനിടയ്ക്കുളള സുവര്‍ണകാലം. നാഷണല്‍ ഫുട്ബോള്‍ ലീഗ്, ഐ ലീഗ്, ഫെഡറേഷന്‍ കപ്പ്, സൂപ്പര്‍ കപ്പ്, ഡ്യൂറണ്ട് കപ്പ്, റോവേഴ്സ് കപ്പ്, സേട്ട് നാഗ്ജി ടൂര്‍ണമെന്റ്, ബന്ദോദ്കര്‍ ട്രോഫി നെഹ്റു ക്ലബ് കപ്പ്, സ്റ്റഫോഡ് ചാലഞ്ച് കപ്പ്... അങ്ങനെ കിരീടങ്ങള്‍ ഒന്നൊന്നായി അവരുടെ അലമാരയിലെത്തിയത് ഇക്കാലത്താണ്. കൊല്‍ക്കത്തയില്‍ ഈസ്റ്റ് ബംഗാള്‍ ആരാധകരേ പേടിച്ച് ക്ലബ് പ്രസിഡന്റ് ശിവാനന്ദ് സാല്‍ഗോക്കര്‍ക്ക് സബ്സ്റ്റിറ്റിയൂട്ട് ബെഞ്ചില്‍ പോയി അഭയം തേടേണ്ടി വന്ന കാലമുണ്ടായിട്ടുണ്ട്. ഇതേ കൊല്‍ക്കത്തയില്‍, ഇതേ ഈസ്റ്റ് ബംഗാളിനെ ബ്രൂണോ കുടീന്യോ എന്ന പവര്‍ ഹൗസിന്റെ കരുത്തില്‍ വീഴ്ത്തി ഫെഡറേഷന്‍ കപ്പ് കിരീടം ചൂടിയ അവിശ്വസനീമായ ചരിത്രവുമുണ്ട്. അതായിരുന്നു കുതിപ്പിന്റെ തുടക്കം. പിന്നെ കാത്തിരുന്നത് ഒരു സുവര്‍ണയുഗമാണ്. ഈയൊരു കാലഘട്ടത്തിനാണ് ഇപ്പോള്‍ ഞെട്ടലോടെ തിരശ്ശീല വീഴുന്നത്.

സാല്‍ഗോക്കറില്‍ തുടങ്ങുന്നതല്ല ഗോവന്‍ ഫുട്ബോളിന്റെ അസ്തമയകാലം. കാലങ്ങളോളം സാല്‍ഗോക്കറിന്റെ ബദ്ധവൈരികളായ വാസ്‌കോയും ഡെംപോയും സേസയും ചര്‍ച്ചിലുമെല്ലാം ഇന്ത്യന്‍ ഫുട്ബോളിന്റെ മുഖ്യധാരയില്‍ നിന്ന് നിഷ്‌ക്രമിച്ചിട്ട് കാലങ്ങളായി. ഇതില്‍ ആര്‍ക്കൊക്കെ സാല്‍ഗോക്കറിന്റെ പാത പിന്തുടരേണ്ടിവരുമെന്ന് ഇനി കണ്ടറിയണം. ഐ.എസ്.എല്‍ കളിക്കുന്ന എഫ്.സി.ഗോവയാണ് പഴയ പ്രതാപകാലത്തിന്റെ ഏക ശേഷിപ്പ്. ഇതേ എഫ്.സി. ഗോവയുടെ ഉടമസ്ഥാവകാശം സാല്‍ഗോക്കറിന്റെ ദത്താരാജ് സാല്‍ഗോക്കറും ഡെംപോയുടെ ശ്രീനിവാസ് ഡെംപോയും വേദനയോടെ ഒഴിഞ്ഞത് മറ്റൊരു കാര്യം.

അന്നല്ല, അഞ്ച് വര്‍ഷം മുന്‍പ് തന്നെ തുടങ്ങിയിരുന്നു ഗോവന്‍ ഫുട്ബോളിലെ തീയും പുകയും. 2017-ല്‍ സാല്‍ഗോക്കറും സ്പോര്‍ട്ടിങ് ഗോവയും ചേര്‍ന്ന് ഐ ലീഗ് ബഹിഷ്‌കരിക്കാനെടുത്ത തീരുമാനം വലിയ ഞെട്ടലാണ് ഇന്ത്യന്‍ ഫുട്ബോളിലുണ്ടാക്കിയത്. ഐ.എസ്.എല്ലിനുവേണ്ടി ആഭ്യന്തര ഫുട്ബോളിന്റെ ഘടന മാറ്റാനുള്ള അഖിലേന്ത്യാ ഫുട്ബോള്‍ ഫെഡറേഷന്റെ തീരുമാനത്തിനെതിരേയാണ് ഇരുകൂട്ടരും രംഗത്തുവന്നത്. ഈ തീരുമാനം തങ്ങളുടെ അന്ത്യം കുറിക്കാന്‍ പോവുകയാണെന്ന് പോര്‍ച്ചുഗീസ് അധിനിവേശകാലം മുതല്‍ കളിച്ചുവരുന്ന സാല്‍ഗോക്കര്‍ മുന്‍കൂട്ടി കണ്ടിരുന്നു. ഒരു ക്ലബിന്റെയല്ല, ഒരു കാലത്തിന്റെ അന്ത്യമായിരിക്കും അതെന്ന് നല്ല ഫുട്ബോളിനെ പ്രണയിക്കുന്നവര്‍ അന്നേ പ്രവചിച്ചു. സാല്‍ഗോക്കറിന്റെ പ്രതാപകാലമായിരുന്നില്ല അത്. ഒന്നാം ഡിവിഷനില്‍ നിന്നും രണ്ടാം ഡിവിഷനിലേയ്ക്ക് തരംതാഴ്ത്തപ്പെടുകയും തിരിച്ചുകയറുകയുമെല്ലാം ചെയ്തുകൊണ്ടിരുന്ന കാലമായിരുന്നു അത്. കരീം ബെഞ്ചരിഫയുടെ വരവോടെയാണ് ആയുസ്സും ഊര്‍ജവും വീണ്ടെടുത്തത്. ആ തിരിച്ചുവരവിനാണ് ഇപ്പോള്‍ പാതിവഴിയില്‍ ഫൈനല്‍ വിസില്‍ മുഴങ്ങിയിരിക്കുന്നത്.

പ്രൊഫഷണല്‍ ഫുട്ബോള്‍ രംഗത്ത് നിന്ന് പിന്‍വലിയുകയാണെങ്കിലും ഖനികളും ആശുപത്രികളും റിസോര്‍ട്ടുകളും ആശുപത്രികളും കപ്പലുകളും കോളേജുകളുമെല്ലാമുള്ള സാല്‍ഗോക്കര്‍ ഗ്രൂപ്പ് ഫുട്ബോളിനെ പൂര്‍ണമായി കൈയൊഴിയുന്നില്ല എന്നൊരു ആശ്വാസമുണ്ട്. യൂത്ത് ഫുട്ബോളില്‍ തങ്ങള്‍ സജീവമായിരിക്കുമെന്ന് ക്ലബ് ഉടമകള്‍ വാഗ്ദാനം ചെയ്യുന്നുണ്ട്. വര്‍ഷങ്ങളായി യൂത്ത് ഡെവലപ്മെന്റ് പരിപാടികളില്‍ സജീവമാണ് അവര്‍. ഇനി ഈയൊരു പ്രതീക്ഷ മാത്രമാണ് കെടാതെ ശേഷിക്കുന്നത്. അനാവശ്യമായി ലീഗില്‍ കാശെറിയുന്നതിലും നല്ലത് നാളത്തെ തലമുറയ്ക്കുവേണ്ടി കാശ് ചെലവിടുന്നതാണെന്ന് പണ്ട് ഐ. ലീംില്‍ നിന്ന് പിന്‍വാങ്ങുമ്പോള്‍ ശിവാനന്ദ് സാല്‍ഗോക്കര്‍ പറഞ്ഞിരുന്നു. അതാണ് പ്രഥമ പ്രധാനമന്ത്രി ജവഹര്‍ലാല്‍ നെഹ്റുവിനെ പോലും അതിശയിപ്പിച്ച ടീമിന്റെ അടിസ്ഥാന പ്രമാണമെന്നും അന്ന് സാല്‍ഗോക്കര്‍ പറഞ്ഞു. പ്രത്യാശയുടെ കൈത്തിരി അണയുന്നില്ലെന്ന് സാരം. അങ്ങനെ ഒറ്റ ദിവസം കൊണ്ട് അവസാന വിസിലൂതാന്‍ കഴിയുന്നതല്ല ഗോവയുടെ, പ്രത്യേകിച്ച് സാല്‍ഗോക്കറിന്റെ ചരിത്രവും പാരമ്പര്യവും. ബ്രഹ്‌മാനന്ദമാരും ബ്രൂണോ കുടീന്യോമാരും ഇനിയും വരേണ്ടവുണ്ട് ഗോവയില്‍ നിന്ന്...