വെസ്റ്റിൻഡീസിനെതിരായ ആദ്യ ഏകദിനത്തിൽ സെഞ്ചുറി നേടിയ വിരാട് കോലിയെ അഭിനന്ദിച്ച് മുൻതാരം ആർ.അശ്വിൻ. 'കോലി ഇംഗ്ലണ്ടിൽ ഇംഗ്ലണ്ടിനായി കളിക്കുന്നത് പോലെയാണ് തോന്നിയതെന്ന്' അശ്വിൻ തന്റെ യുട്യൂബ് വീഡിയോയിൽ പറഞ്ഞു. ബാറ്റർമാരെ തുണയ്ക്കുന്ന ഇംഗ്ലീഷ് പിച്ചുകളിലെ ബാറ്റിങ്ങിന് അനുകൂലമായ സാഹചര്യങ്ങളെക്കുറിച്ചുള്ള തമാശരൂപേണയുള്ള പരാമർശമായിരുന്നു അത്.

To advertise here,

'അദ്ദേഹം ഇംഗ്ലണ്ടിൽ ഇംഗ്ലണ്ടിനായി കളിക്കുകയാണോ എന്ന് എനിക്കറിയില്ല! ഇത്രയും ഒഴുക്കോടെ ബാറ്റ് ചെയ്യുക എന്നത് എളുപ്പമുള്ള കാര്യമല്ല. അദ്ദേഹം ബാറ്റ് ചെയ്യുന്ന രീതി ശരിക്കും ശ്രദ്ധേയവും അത്ഭുതകരവുമാണ്. 2027-ന് ശേഷം കളിക്കാനുള്ള സാധ്യതയും വളരെ കുറവാണ്.'-അശ്വിൻ വ്യക്തമാക്കി.

വെറും 88 പന്തിൽ പുറത്താകാതെ 139 റൺസാണ് കോലി അടിച്ചെടുത്തത്. തന്റെ മനോഹരമായ ഷോട്ടുകളിലൂടെ ആരാധകരെ കീഴടക്കിയ താരത്തിന്റെ ഇന്നിങ്സിൽ 10 ഫോറുകളും ഒമ്പത് സിക്‌സുകളും ഉൾപ്പെടുന്നു. കരിയറിന്റെ അവസാന ഘട്ടത്തിലും തകർപ്പൻ ഫോം തുടരുന്ന കോലിയുടെ 55-ാമത് ഏകദിന സെഞ്ചുറിയും 86-ാമത് രാജ്യാന്തര സെഞ്ചുറിയുമാണിത്.

നേരത്തെ തന്റെ ഭാവി പ്ലാനുകളെക്കുറിച്ച് അടുത്തിടെ കോലി തുറന്നുപറഞ്ഞിരുന്നു. 2027-ലെ ഏകദിന ലോകകപ്പാണ് തന്റെ ലക്ഷ്യമെന്നും ടൂർണമെന്റിന് ശേഷം കരിയർ അവസാനിപ്പിച്ചേക്കാമെന്നും അദ്ദേഹം സൂചിപ്പിച്ചു. കോലിയുടെ പ്രായവും അദ്ദേഹം ഇപ്പോൾ ഏകദിന ഫോർമാറ്റിൽ മാത്രമാണ് സജീവമെന്ന യാഥാർത്ഥ്യവും കണക്കിലെടുക്കുമ്പോൾ താരത്തിന്റെ ഈ നിലപാടിൽ അതിശയമില്ലെന്ന് അശ്വിൻ പറഞ്ഞു.

'അറിയാമല്ലോ, എലൈറ്റ് ലെവലിൽ ഫിറ്റ്നസ് നിലനിർത്താനും ബാറ്റിങ് ഫോം നിലനിർത്താനും വലിയ പ്രയത്നം ആവശ്യമാണ്. നമ്മൾ കാണാത്ത, അടച്ചിട്ട മുറികൾക്കുള്ളിൽ അദ്ദേഹം കഠിനാധ്വാനം ചെയ്യുന്നുണ്ടെന്ന് എനിക്ക് ഉറപ്പാണ്. അതിനാൽ വർഷങ്ങളോളം ഇത് തുടരുക എന്നത് എളുപ്പമല്ല.'-അശ്വിൻ വ്യക്തമാക്കി.