തിരുവനന്തപുരം: കാര്യവട്ടം ഗ്രീൻഫീൽഡ് സ്റ്റേഡിയം വിരാട് കോലിയുടെ വെടിക്കെട്ട് പൂരത്തിനാണ് സാക്ഷ്യം വഹിച്ചത്. വൺഡൗണായി ഇറങ്ങിയ വിരാട് കോലി ക്യാപ്റ്റൻ ഗില്ലുമൊത്ത് വിൻഡീസ് ബൗളർമാരെ അടിച്ചുതകർത്തു. 88 പന്തിൽ നിന്ന് 139 റൺസുമായി ഇന്ത്യയുടെ വിജയറൺസ് കുറിച്ചാണ് കോലി മടങ്ങിയത്. മത്സരത്തിൽ രണ്ട് റെക്കോഡുകൾ കൂടി സ്വന്തമാക്കാൻ കോലിക്കായി.

To advertise here,

ഏകദിനക്രിക്കറ്റിൽ ഏറ്റവും വേഗത്തിൽ 15,000 റൺസ് തികയ്ക്കുന്ന താരമെന്ന നേട്ടം കോലി സ്വന്തമാക്കി. ഏകദിനക്രിക്കറ്റിൽ 15,000 റൺസ് തികയ്ക്കുന്ന രണ്ടാമത്തെ മാത്രം താരമാണ് കോലി. സച്ചിൻ തെണ്ടുൽക്കറാണ് മറ്റൊരു താരം. സച്ചിൻ 377 ഇന്നിങ്‌സുകളിൽ നിന്നാണ് ഈ നേട്ടത്തിലെത്തിയത്. കോലിയാകട്ടെ 303 ഇന്നിങ്‌സുകളിൽ നിന്നു തന്നെ 15,000 റൺസിലെത്തി. അതോടെ ഏറ്റവും വേഗത്തിൽ 15,000 റൺസ് തികയ്ക്കുന്ന താരമായും കോലി മാറി.

ഏകദിനക്രിക്കറ്റിൽ സ്വന്തം മണ്ണിൽ ഏറ്റവും കൂടുതൽ റൺസെടുക്കുന്ന താരമായും കോലി മാറി. സച്ചിന്റെ റെക്കോഡാണ് കോലി മറികടന്നത്. ഇന്ത്യയിൽ കളിച്ച 164 ഏകദിനങ്ങളിൽ നിന്ന് സച്ചിൻ 6,976 റൺസാണ് അടിച്ചെടുത്തത്. 131 മത്സരങ്ങളിൽ നിന്ന് തന്നെ കോലി ഇത് മറികടന്നു. കോലിയുടെ 55-ാം ഏകദിനസെഞ്ചുറിയാണ് വിൻഡീസിനെതിരായത്. അന്താരാഷ്ട്ര ക്രിക്കറ്റിലെ 86-ാം സെഞ്ചുറിയാണിത്.

മത്സരത്തിൽ 88 പന്തിൽ നിന്നാണ് കോലി 139 റൺസ് അടിച്ചെടുത്തത്. 10 ഫോറുകളും 9 സിക്‌സറും അടങ്ങുന്നതായിരുന്നു കോലിയുടെ ഇന്നിങ്‌സ്. ഇന്ത്യൻ ക്യാപ്റ്റൻ ശുഭ്മാൻ ഗിൽ 110 റൺസെടുത്തു. എട്ടുവിക്കറ്റിനാണ് ഇന്ത്യ വിൻഡീസിനെ തകർത്തത്. 296 റൺസ് വിജയലക്ഷ്യവുമായി ബാറ്റിങ്ങിനിറങ്ങിയ ഇന്ത്യ 41.4 ഓവറിൽ രണ്ട് വിക്കറ്റ് നഷ്ടത്തിൽ ലക്ഷ്യത്തിലെത്തി.