മരുഭൂമിയിലെ അലച്ചില്‍

ഇസ്രയേലിന് ജക്കാര്‍ത്തയില്‍ പ്രവേശനം നിഷേധിച്ചതിനെ വിമര്‍ശിച്ചതിന്റെ പേരിലാണ് ഗുരുദത്ത് സോന്ധി ഇന്‍ഡൊനീഷ്യക്കാര്‍ക്ക് അനഭിമതനായത്. 64-ലെ ഏഷ്യാ കപ്പില്‍ നിന്ന് അറബ് മുസ്ലിം രാജ്യങ്ങള്‍ വിട്ടുനിന്നതോടെ ടൂര്‍ണമെന്റ് നാലു ടീമുകള്‍ മാത്രമായി ഒതുങ്ങി. 1974-ല്‍ ഇസ്രയേലിനെ ഏഷ്യന്‍ ഫുട്ബോള്‍ കോണ്‍ഫെഡറേഷന്‍ (എ.എഫ്.സി) പുറംതള്ളി. 1994-ല്‍ യൂറോപ്യന്‍ ഫുട്ബോള്‍ അസോസിയേഷനില്‍ അംഗത്വം നേടും വരെ ഇസ്രയേലിന് അലഞ്ഞു തിരിയേണ്ടിവന്നു. 1964-ല്‍ ജയിച്ച ടീം അമേച്വര്‍മാരുടെ സംഘമായിരുന്നു. അന്ന് ജാഫയിലെ ബ്ലൂംഫീല്‍ഡ് സ്റ്റേഡിയത്തില്‍ ഇന്ത്യക്കെതിരെ ഗോളടിച്ച അവരുടെ മോര്‍ദഹായി സ്പീഗ്ലര്‍ പിഎസ്ജിക്കും പിന്നീട് പെലെയ്ക്കൊപ്പം ന്യൂയോര്‍ക്ക് കോസ്മോസിനും കളിക്കുന്നുണ്ട്. സ്പീഗ്ലര്‍ 1970-ലെ ലോകകപ്പിലും കളിച്ചു.

ഇസ്രയേലിന്റെ ഏഷ്യന്‍ ഫുട്ബോള്‍ ബന്ധം ഇന്ന് വിദൂരസ്മരണയാണ്. 64-ലെ വിജയം അക്കാലത്ത് കളിച്ചവര്‍ 50 വര്‍ഷത്തിനു ശേഷം ഓര്‍മിച്ചു എന്നതൊഴിച്ചാല്‍ ആഘോഷമൊന്നുമുണ്ടായിരുന്നില്ല. 1960-ലെ ഏഷ്യന്‍ നേഷന്‍സ് കപ്പിന്റെ യോഗ്യതാ നിര്‍ണയ മത്സരത്തില്‍ എറണാകുളം മഹാരാജാസ് കോളേജ് സ്റ്റേഡിയം വേദിയായി. ഇന്ത്യക്കു പുറമെ ഇറാന്‍, ഇസ്രയേല്‍, പാകിസ്താന്‍ എന്നിവരായിരുന്നു പശ്ചിമ മേഖലയിലെ നാലു ടീമുകള്‍.

ഇതിന്റെ ഫലങ്ങള്‍ ഇപ്പോള്‍ നോക്കുമ്പോള്‍ രസകരമാണ്. ഡിസംബര്‍ 5 മുതല്‍ 18 വരെയായിരുന്നു കളികള്‍. ഇരു പാദ മത്സരമായിരുന്നു. ആദ്യ പാദത്തില്‍ ഇന്ത്യ പാകിസ്താനെയും (1-0) ഇറാനെയും (3-1) തോല്‍പ്പിക്കുന്നുണ്ട്. എന്നാല്‍ ഇസ്രയേലിനോട് 3-1 ന് തോറ്റു. രണ്ടാം പാദത്തില്‍ ഇന്ത്യ എല്ലാ കളിയും തോറ്റു. പാകിസ്താന്‍ (0-1), ഇസ്രയേല്‍ (1-2), ഇറാന്‍ (1-2) എന്നിങ്ങനെയാണ് ഇന്ത്യയുടെ കളിയുടെ സ്‌കോര്‍ നില. എട്ടു പോയന്റുമായി ഇസ്രായേല്‍ യോഗ്യത നേടിയപ്പോള്‍ ഇന്ത്യ നാലു പോയന്റോടെ അവസാന സ്ഥാനത്തായിരുന്നു. പാകിസ്താന്‍ ഇസ്രയേലിനോട് ഒരു തവണ സമനില പിടിക്കുന്നു. ഇറാനെ മറ്റൊരിക്കല്‍ 4-1 ന് തറപറ്റിക്കുന്നു. എന്നാല്‍ ഇതേ സ്‌കോറിന് ഇറാന്‍ പാകിസ്താന് രണ്ടാം പാദത്തില്‍ മറുപടി നല്‍കുന്നുമുണ്ട്.

തെക്കന്‍ കൊറിയയിലെ സോളില്‍ നടന്ന ഫൈനല്‍ ടൂര്‍ണമെന്റില്‍ ആതിഥേയര്‍ ചാമ്പ്യന്‍മാരാവുകയും ഇസ്രയേല്‍ രണ്ടാം സ്ഥാനക്കാരാവുകയും ചെയ്തു. ഇറാന്‍ ഒഴിച്ച് മറ്റ് പശ്ചിമേഷ്യന്‍ രാജ്യങ്ങള്‍ ഇക്കാലയളവില്‍ ഫുട്ബോളില്‍ പിന്‍നിരയിലായിരുന്നു എന്നതാണ് ഈ ഫലങ്ങള്‍ നല്‍കുന്ന സൂചന. ജപ്പാന്റെ നിലവാരം അത്ര ഉയര്‍ന്നതായിരുന്നില്ല എന്നു മനസ്സിലാക്കാം. അതേ സമയം ഇറാനും ഇസ്രയേലും തെക്കന്‍ കൊറിയയും മുമ്പേ തന്നെ ഫുട്ബോളില്‍ ശ്രദ്ധിച്ചു തുടങ്ങിയിട്ടുണ്ട് എന്നും കാണാം. പാകിസ്താനും അവരുടെ കളിക്കാരും ഒരിക്കല്‍ ഇന്ത്യയില്‍ ശ്രദ്ധയാകര്‍ഷിച്ചിരുന്നു. ആ ചരിത്രം എന്നാണ് വിസ്മൃതമായത്.

1970-ലെ ബാങ്കോക്ക് ഏഷ്യന്‍ ഗെയിംസില്‍ ജപ്പാനെ തോല്‍പ്പിച്ചാണ് ഇന്ത്യ വെങ്കല മെഡല്‍ നേടിയത്. ജപ്പാനെതിരെ അടിച്ച ഏക ഗോള്‍ അമര്‍ ബഹാദൂറിന്റെ വകയായിരുന്നു. കുറെക്കാലം അത് മഞ്ചിത് സിങിന്റെ പേരിലാണ് രേഖപ്പെടുത്തപ്പെട്ടത്. ഇപ്പോള്‍ അത് തിരുത്തപ്പെട്ടിരിക്കുന്നു.

Content Highlights: 1960 asian nations cup