കണ്ണൂർ: വിമോചനസമരം തെറ്റായിരുന്നില്ലെന്ന് പറഞ്ഞ കഥാകൃത്ത് ടി. പത്മനാഭന് പരോക്ഷ വിമർശവുമായി സാഹിത്യകാരൻ എം. മുകുന്ദൻ. ജില്ലാ ലൈബ്രറി കൗൺസിൽ സംഘടിപ്പിച്ച മുകുന്ദ മാനസം പരിപാടിയിലായിരുന്നു പേരെടുത്തു പറയാതെയുള്ള വിമർശം. ‘മാതൃഭൂമി’ പത്രത്തിലെ കേരളം-70 എന്ന പംക്തിയിൽ ശനിയാഴ്ചയാണ് വിമോചനസമരത്തെ കുറിച്ചുള്ള പത്മനാഭന്റെ പരാമർശമുണ്ടായിരുന്നത്.

To advertise here,

മുകുന്ദൻ പറഞ്ഞത് ഇങ്ങനെ: ‘‘കർഷകരുടെയും തൊഴിലാളികളുടെയും ജീവിതത്തിൽ ചെറിയ കാലയളവിൽ വലിയ മാറ്റംകൊണ്ടുവന്ന ആദ്യ കമ്യൂണിസ്റ്റ് സർക്കാരിനെതിരേ വിമോചനസമരം നടന്നിരുന്നു. അതിനെത്തുടർന്നാണ് സർക്കാരിനെ പിരിച്ചുവിട്ടത്. വിമോചന സമരത്തെ അംഗീകരിക്കുന്നുവെന്ന് ഇന്ന് ഒരു എഴുത്തുകാരൻ കേരളത്തിൽ നിന്നുകൊണ്ട് പറഞ്ഞതുകേട്ടു. ഇതാണ് നാം സൂക്ഷിക്കേണ്ടത്. ചരിത്രത്തെ തകിടം മറിക്കരുത്.

സത്യസന്ധമായി സംസാരിക്കലാണ് എഴുത്തുകാരന്റെ പ്രാഥമികമായ ധർമം. അത് എഴുത്തുകാരിൽ ചിലർ സൂക്ഷിക്കുന്നുണ്ടോയെന്ന കാര്യത്തിൽ സംശയമുണ്ട്. പലരും അവസരോചിതമായി സംസാരിക്കുകയും പ്രവർത്തിക്കുകയും ചെയ്യുന്നു. എഴുതുകയും പറയുകയും ചെയ്യുമ്പോൾ സത്യസന്ധമായിരിക്കണം. യൂറോപ്പിലെത്തിയാൽ ഇന്ത്യയിൽനിന്നാണ് വരുന്നതെന്ന് പറഞ്ഞാൽ ഭാവവ്യത്യാസമുണ്ടാകില്ല. എന്നാൽ, കേരളത്തിൽ നിന്നാണെന്ന് പറഞ്ഞാൽ സായിപ്പിന്റെ മുഖത്ത് പ്രകാശം കാണാം. ചെറിയ പരാജയത്തിന്റെ പേരിൽ നിരാശാഭരിതരാകരുത്. ക്രിയാത്മകമായി വിമർശിക്കാം’’.