റിലീസ് ചെയ്ത് മൂന്നുവർഷം പിന്നിടുമ്പോഴും വാർത്തകളിൽ നിറയുകയാണ് എസ്.എസ് രാജമൗലി സംവിധാനം ചെയ്ത ആർആർആർ. ഓസ്കർ പുരസ്കാരംവരെ നേടിയ ചിത്രത്തിൽ രാംചരൺ തേജയും ജൂനിയർ എൻടിആറുമായിരുന്നു നായകന്മാർ. ചിത്രത്തിലെ ഒരു ​ഗാനരം​ഗത്തിലെ ജൂനിയർ എൻടിആറിന്റെ പ്രകടനത്തെ പുകഴ്ത്തിയിരിക്കുകയാണ് ഇപ്പോൾ രാജമൗലി. ആ ​ഗാനം ചിത്രീകരിക്കുമ്പോൾ ജൂനിയർ എൻടിആർ വേറൊരാളായി മാറിയെന്നും തനിക്ക് ക്യാമറ വെച്ച് പാട്ട് പ്ലേ ചെയ്താൽ മാത്രം മതിയായിരുന്നെന്നും അദ്ദേഹം പറഞ്ഞു.

To advertise here,

ആർആർആറിന്റെ നിർണായകഘട്ടത്തിൽ വരുന്ന കൊമുരം ഭീമുഡോ എന്ന ​ഗാനത്തിലെ ജൂനിയർ എൻടിആറിന്റെ പ്രകടനത്തെക്കുറിച്ചാണ് രാജമൗലി സംസാരിച്ചത്. എൻടിആറിന്റെ പ്രതിബദ്ധതയേയും സംവിധായകൻ വാനോളം പുകഴ്ത്തി.

"ഈ ​ഗാനം ചിത്രീകരിക്കുന്നത് വളരെ എളുപ്പമായിരുന്നു. കാരണം താരക് വേറൊരാളായി മാറിയിരുന്നു. അദ്ദേഹം ഒരു ​ഗംഭീര നടനാണെന്ന് എല്ലാവർക്കും അറിയാം. പക്ഷേ ഈ പാട്ടിന്റെ കാര്യത്തിൽ അദ്ദേഹം പ്രകടനംകൊണ്ട് വേറൊരു തലത്തിലെത്തിയിരുന്നു. നെറ്റിയിലോ താടിയിലോ ഉള്ള ഏറ്റവും ചെറിയ പേശികളുടെ ചലനം ഉൾപ്പെടെ അദ്ദേഹം പ്രകടിപ്പിച്ച ഓരോ ഭാവവും എല്ലാം തികഞ്ഞതായിരുന്നു. എനിക്ക് ക്യാമറ വെച്ച് പാട്ട് പ്ലേ ചെയ്താൽ മതിയായിരുന്നു." രാജമൗലി പറഞ്ഞു.

​ഗാനത്തിന്റെ കോറിയോ​ഗ്രാഫറായ പ്രേംരക്ഷിതിനേക്കുറിച്ചും രാജമൗലി എടുത്തുപറഞ്ഞു.  എൻടിആർ അവതരിപ്പിച്ച കഥാപാത്രത്തെ എങ്ങനെ കെട്ടണം, എങ്ങനെ തൂക്കണം എന്നെല്ലാം ചിട്ടപ്പെടുത്തിയത് പ്രേംരക്ഷിത് ആണ്. അതുകൊണ്ട് അദ്ദേഹത്തിനും ഈ പാട്ടിന്റെ ക്രെഡിറ്റ് താൻ നൽകുമെന്നും രാജമൗലി പറഞ്ഞു.

ഹൃത്വിക് റോഷനൊപ്പമുള്ള വാർ 2 എന്ന ചിത്രത്തിലാണ് ജൂനിയർ എൻടിആർ ഇപ്പോൾ അഭിനയിച്ചുകൊണ്ടിരിക്കുന്നത്. വമ്പൻ ആക്ഷൻ രം​ഗങ്ങളുമായെത്തുന്ന ചിത്രത്തിൽ കിയാര അദ്വാനിയാണ് നായിക. 2025-ലെ ഏറ്റവും പ്രതീക്ഷയോടെ കാത്തിരിക്കുന്ന പാൻ-ഇന്ത്യ റിലീസുകളിൽ ഒന്നായ ഈ ചിത്രം ഓഗസ്റ്റിൽ രജനികാന്തിന്റെ 'കൂലി'യുമായി മത്സരിക്കും. അതേസമയം മഹേഷ് ബാബു, പ്രിയങ്ക ചോപ്ര, പൃഥ്വിരാജ് സുകുമാരൻ എന്നിവർ പ്രധാന വേഷങ്ങളിൽ അഭിനയിക്കുന്ന SSMB29 എന്ന ചിത്രമൊരുക്കുന്ന തിരക്കിലാണ് എസ്.എസ്. രാജമൗലി. പേരിട്ടിട്ടില്ലാത്ത ഈ ചിത്രം കാശിയുടെ പശ്ചാത്തലത്തിലാണ് ഒരുങ്ങുന്നത്. 2027-ലായിരിക്കും റിലീസ് എന്നാണ് റിപ്പോർട്ട്.