കൂടുതല് നിക്ഷേപിക്കുക, വിപണി വിഹിതം നേടുക, നഷ്ടം സഹിക്കുക, ഒടുവില് ലാഭം നേടുക- എന്ന വിപണി തന്ത്രമാണ് റിലയന്സ് പ്രയോഗിക്കുന്നത്.
ഉപഭോക്തൃ വിപണിയിൽ സാന്നിധ്യമുറപ്പിക്കാനുള്ള എളുപ്പവഴി നിലവിലെ ബ്രാൻഡുകൾ ഏറ്റെടുക്കുകയെന്നതാണ്. ഒരു കാലത്ത് രാജ്യത്തെ സാംസ്ക്കാരത്തിന്റെ ഭാഗമായി കരുതിയിരുന്ന കാംപ, ബിപിഎൽ, കെൽവിനേറ്റർ തുടങ്ങിയ ബ്രാൻഡുകൾ ഏറ്റെടുത്ത് നവീകരിക്കുന്നതിലൂടെ പുതുവിപണന തന്ത്രം സൃഷ്ടിക്കുകയാണ് റിലയൻസ്. ഡിജിറ്റൽ ലോകത്ത് ജിയോ തരംഗമായതിന് പിന്നാലെയാണ് ഉപഭോക്തൃ ഉത്പന്ന മേഖലയിൽ മറ്റൊരു പരീക്ഷണത്തിന് റിലയൻസ് തയ്യാറെടുക്കുന്നത്.
ഗൃഹാതുരതയിൽ നോട്ടമിട്ട്: കാംപ, ബിപിഎൽ, കെൽവിനേറ്റർ തുടങ്ങിയ പഴയ ബ്രാൻഡുകളുമായി ഇന്ത്യൻ ഉപഭോക്താക്കൾക്കുള്ള വൈകാരിക ബന്ധത്തെയാണ് റിലയൻസ് സമർത്ഥമായി ഉപയോഗിക്കുന്നത്. ഈ ബ്രാൻഡുകൾ പഴയ തലമുറയുടെ ഓർമ്മകളിൽ ഇടംപിടിച്ചവയായതുകൊണ്ട് തന്നെ പുതിയതായി വിപണിയിലെത്തുമ്പോൾ ഉപഭോക്താക്കളുമായി വളരെ പെട്ടെന്ന് ബന്ധം സ്ഥാപിക്കാൻ സാധിക്കുന്നു.
വിലകുറച്ച് വിപണി പിടിക്കൽ: എതിരാളികളേക്കാൾ 20-30% വരെ വില കുറച്ച് ഉൽപ്പന്നങ്ങൾ വിപണിയിലെത്തിക്കുക, റീട്ടെയിലർമാരെ ആകർഷിക്കാൻ ഉയർന്ന മാർജിൻ വാഗ്ദാനം ചെയ്യുക, സ്വന്തം റീട്ടെയിൽ ശൃംഖല വഴിയും രാജ്യത്തുടനീളമുള്ള ചെറുകിടക്കാർ വഴിയും വിതരണം അതിവേഗം വ്യാപിപ്പിക്കുക എന്നിവയാണ് റിലയൻസിന്റെ തന്ത്രങ്ങൾ.
ടെലികോം മാതൃകയുടെ ആവർത്തനം: ടെലികോം വിപണി പിടിച്ചടക്കാൻ റിലയൻസ് ഉപയോഗിച്ച അതേ തന്ത്രത്തിന്റെ തനിയാവർത്തനമായി ഇതിനെയും കാണാം. കുറഞ്ഞ വിലയിൽ ഉയർന്ന തോതിൽ വിൽപ്പന എന്ന തന്ത്രം, ഏറ്റെടുത്ത ബ്രാൻഡുകളുടെ നിലവിലുള്ള വിപണി മൂല്യവുമായി സംയോജിപ്പിക്കുമ്പോഴുള്ള നേട്ടം എന്നിവയാണ് ഇതിലൂടെ ലക്ഷ്യമിടുന്നത്. പുതിയതോ നിലവിലുള്ളതോ ആയ എതിരാളികൾക്ക് കഴിയാത്ത കാര്യമാണിത്. ഈ തന്ത്രത്തിന്റെ ആദ്യ പ്രയോഗവും അതിന്റെ വിജയഗാഥയും എഫ്എംസിജി മേഖലയിലാകും.
ആദ്യ വിജയവുമായി കാംപ
റിലയൻസിന്റെ നൊസ്റ്റാൾജിയ തന്ത്രം പരീക്ഷിക്കുന്നതിനുള്ള ഏറ്റവും അനുയോജ്യമായ മേഖലയായിരുന്നു എഫ്എംസിജി. പെട്ടെന്നുള്ള തീരുമാനത്തിന്റെ പുറത്ത് വാങ്ങുന്ന ഉൽപ്പന്നങ്ങളുടെ വിപണിയിൽ ആദ്യ ഫലങ്ങൾ തന്നെ റിലയൻസിന് കാര്യമായ മുന്നേറ്റം നൽകി.
എഫ്എംസിജിയിലെ വളർച്ചതന്നെ ഇതിന് ഉദാഹരിക്കാം.
- 2024 സാമ്പത്തിക വർഷത്തെ വരുമാനം: 3,000 കോടി
- 2025ലെ വരുമാനം:11,500 കോടി
- 2026 (FY) ജൂലായ്-സെപ്റ്റംബർ പാദത്തിലെ വരുമാനം: 5,400 കോടി
കാംപ കോളയുടെ വിജയമാണ് റിലയൻസിന് ഇതേതന്ത്രത്തിൽ കുതിക്കുന്നതിനുള്ള ഊർജം നൽകിയത്. ഓഗസ്റ്റിൽ നടന്ന കമ്പനിയുടെ വാർഷിക പൊതുയോഗത്തിൽ ഇഷാ അംബാനി ചൂണ്ടിക്കാട്ടിയതുപോലെ: കാംപ-കോള പല സംസ്ഥാനങ്ങളിലും ഇരട്ട അക്ക വിപണി വിഹിതം നേടി. കൊക്ക കോളയുടെയും പെപ്സിയുടെയും 30 വർഷത്തെ കുത്തക തകർത്തു.
മുന്നിലുള്ളത് വൻ പദ്ധതികൾ
എഫ്എംസിജി മേഖലയിൽ റിലയൻസിന് അതിവിപുലമായ പദ്ധതികളാണുള്ളത്.
വിതരണ ശൃംഖല: ഈ സാമ്പത്തിക വർഷം 30 ലക്ഷം ഔട്ട്ലെറ്റുകളിലേക്ക് വിതരണം ഇരട്ടിയാക്കാൻ ലക്ഷ്യമിടുന്നു.
വൻ നിക്ഷേപം: ഏഷ്യയിലെ ഏറ്റവും വലിയ ഫുഡ് പാർക്കുകൾക്കായി മൂന്ന് വർഷത്തിനുള്ളിൽ 40,000 കോടി നിക്ഷേപിക്കാൻ പദ്ധതി.
വരുമാന ലക്ഷ്യം: അഞ്ച് വർഷത്തിനുള്ളിൽ എഫ്എംസിജി വരുമാനം ഒരു ലക്ഷം കോടിയിലെത്തിക്കുകയാണ് ലക്ഷ്യം.
വെല്ലുവിളികൾ
എഫ്എംസിജി മേഖലയിലെ അനായാസ വിജയം പക്ഷേ, കൺസ്യൂമർ ഇലക്ട്രോണിക്സ് രംഗത്ത് ആവർത്തിക്കാൻ കൂടുതൽ വെല്ലുവിളികൾ നേരിടേണ്ടിവരും. ഉയർന്ന വിലയുള്ള ഉൽപ്പന്നങ്ങൾ, വാങ്ങുന്നതിന് മുമ്പുള്ള ദീർഘമായ ആലോചന, ആഗോള ബ്രാൻഡുകളുടെ വിപണിയിലെ ആധിപത്യം എന്നിവയെല്ലാം ഈ മേഖലയെ കൂടുതൽ സങ്കീർണമാക്കുന്നു.
ആഗോള ബ്രാൻഡുകളുടെ ആധിപത്യം: എൽജി, സാംസങ്, സോണി തുടങ്ങിയ അന്താരാഷ്ട്ര ഭീമന്മാർ രണ്ട് പതിറ്റാണ്ടിലേറെയായി ഇന്ത്യൻ വിപണിയിലുണ്ട്. ഉപഭോക്താക്കളുടെ മനസ്സിൽ ഇവയ്ക്ക് ശക്തമായ സ്ഥാനമുണ്ട്.
ഉപഭോക്താക്കളുടെ മനോഭാവം: ശീതളപാനീയം വാങ്ങുന്നതുപോലെയല്ല ടിവിയോ ഫ്രിഡ്ജോ വാങ്ങുന്നത്. ഇത് ദീർഘകാലത്തേക്കുള്ള, ഉയർന്ന മൂല്യമുള്ള തീരുമാനമാണ്. അതിനാൽ ബ്രാൻഡ് വിശ്വാസ്യതയ്ക്ക് വലിയ പ്രാധാന്യമുണ്ട്.
പുതിയ തലമുറയെ ആകർഷിക്കൽ: കെൽവിനേറ്റർ, ബിപിഎൽ തുടങ്ങിയ ബ്രാൻഡുകൾക്ക് 20-നും 30-നും ഇടയിൽ പ്രായമുള്ള ജെൻസീ ഉപഭോക്താക്കളുമായി വൈകാരിക ബന്ധമില്ല. ആഗോള ബ്രാൻഡുകളുടെ വലിയ നിര തന്നെ അവർക്ക് മുന്നിലുണ്ട്.
തന്ത്രപരമായ നീക്കം
ഈ വെല്ലുവിളികൾ മറികടക്കാൻ റിലയൻസ് തന്ത്രപരമായ സമീപനമാണ് സ്വീകരിക്കുന്നത്. റിലയൻസിന്റെ ശ്രദ്ധ പ്രധാനമായും ടിയർ 2, ടിയർ 3 നഗരങ്ങളിലാണ്. ഉയർന്ന മാർജിനുള്ള പ്രീമിയം ഉൽപ്പന്നങ്ങളിൽ ശ്രദ്ധിക്കുന്ന സാംസങ്, എൽജി പോലുള്ള ബ്രാൻഡുകൾക്ക് ഈ വിപണികൾ അത്ര പ്രധാനപ്പെട്ടതല്ല. ഈ സാധ്യതയാണ് റിലയൻസ് ലക്ഷ്യമിടുന്നത്. ഇന്ത്യയിൽ ഇലക്ട്രോണിക്സ് ഉൽപ്പന്നങ്ങളുടെ ഉപയോഗം ഇപ്പോഴും കുറവാണ്. ഇത് റിലയൻസിന് വലിയ വളർച്ചാ സാധ്യത നൽകുന്നു.
- ഫ്ലാറ്റ് പാനൽ ടിവി: 15-18%
- ഫ്രിഡ്ജ്: 40%
- വാഷിംഗ് മെഷീൻ: 20%
- എയർ കണ്ടീഷണർ: <10%
ശക്തമായ മൂല്യവും വൈകാരിക ബന്ധവും നൽകി പുനരവതരിപ്പിച്ചാൽ മാത്രമേ പഴയ ബ്രാൻഡുകളുടെ വിജയം സാധ്യമാകൂ. ഇത്തരത്തിൽ റിസ്ക് എടുക്കാൻ റിലയൻസിനെ പ്രാപ്തമാക്കുന്നത് കമ്പനിയുടെ അടിസ്ഥാനപരമായ കരുത്താണ്. അതിൽ പ്രധാനം മൂലധനവും രാജ്യത്തുടനീളമുള്ള റീട്ടെയിൽ ശൃംഖലയുമാണ്.
മുതൽമുടക്ക്
കൂടുതൽ നിക്ഷേപിക്കുക, വിപണി വിഹിതം നേടുക, നഷ്ടം സഹിക്കുക, ഒടുവിൽ ലാഭം നേടുക- എന്ന സ്റ്റാർട്ടപ്പ് ശൈലി പിന്തുടരാനുള്ള സാമ്പത്തിക ശേഷി കമ്പനിക്കുണ്ട്. ഹ്രസ്വകാല ലാഭത്തേക്കാൾ ദീർഘകാല വിപണി ആധിപത്യത്തിന് മുൻഗണന നൽകാൻ ഇത് സഹായിക്കുന്നു. പല എതിരാളികൾക്കും ഇതിന് കഴിവില്ല.
വിപണിയിലെ സാന്നിധ്യം
രാജ്യത്തുടനീളമുള്ള റിലയൻസ് റീട്ടെയിൽ സ്റ്റോറുകളുടെ വിപുലമായ ശൃംഖല വിതരണത്തിന് വലിയ മുതൽക്കൂട്ടാണ്.
പുനഃസംഘടന
റിലയൻസിന്റെ എഫ്എംസിജി ബിസിനസ്സിന്റെ വിഭാഗമായ റിലയൻസ് കൺസ്യൂമർ പ്രൊഡക്ട്സിനെ (RCPL), റിലയൻസ് റീട്ടെയിൽ വെൻച്വേഴ്സിൽ നിന്ന് മാറ്റി റിലയൻസ് ഇൻഡസ്ട്രീസിന്റെ നേരിട്ടുള്ള സബ്സിഡിയറിയാക്കി. ഈ നീക്കം കമ്പനിക്ക് സ്വതന്ത്രമായി ഫണ്ട് സ്വരൂപിക്കാൻ സഹായിക്കുമെന്നും ഭാവിയിൽ ഐപിഒയ്ക്ക് വഴിയൊരുക്കുമെന്നും വിലയിരുത്തലുണ്ട്. ഈ മേഖലയോടുള്ള റിലയൻസിന്റെ ദീർഘകാലവും ഉറച്ചതുമായ പ്രതിബദ്ധതയുടെ വ്യക്തമായ സൂചനയാണിത്.
ലോകത്തെ മികച്ച 20 കമ്പനികളിലൊന്നായി മാറാനുള്ള റിലയൻസ് ഇൻഡസ്ട്രീസിന്റെ നീക്കമാണ് ഈ ഏറ്റെടുക്കലുകൾക്ക് പിന്നിലുള്ളത്. എണ്ണശുദ്ധീകരണം, പെട്രോളിയം ഉത്പന്നങ്ങൾ എന്നിവയ്ക്കൊപ്പം റിലയൻസ് ജിയോയും റിലയൻസ് റീട്ടെയിലും ഈ ലക്ഷം കൈവരിക്കുന്നതിൽ നിർണായക പങ്ക് വഹിക്കുമെന്ന് പ്രതീക്ഷിക്കുന്നു.
വിവിധ മേഖലയിലെ നിക്ഷേപ മൂല്യം
- മീഡിയയും വിദ്യാഭ്യാസവും: 56.6 കോടി ഡോളർ
- റീട്ടെയിൽ: 19.4 കോടി ഡോളർ
- ടെലികോം, ഇന്റർനെറ്റ്: 1.2 ബില്യൺ ഡോളർ
- ഡിജിറ്റൽ കമ്പനികൾ: 10 കോടി ഡോളർ
- കെമിക്കൽ, ഊർജം: 39.1 കോടി ഡോളർ
വിപണി വിലയിരുത്തൽ
റിലയൻസിന്റെ വരവ് പുതിയ എതിരാളിയുടെ രംഗപ്രവേശനമായിട്ടല്ല വിപണി കാണുന്നത്. മറിച്ച് നിലവിലുള്ള കളിക്കാരെ അവരുടെ തന്ത്രങ്ങൾ പുനഃപരിശോധിക്കാൻ നിർബന്ധിതരാക്കുന്ന ഒന്നായാണ്. ടാറ്റ കൺസ്യൂമർ പ്രൊഡക്ട്സ്, ഡാബർ, വരുൺ ബിവറേജസ് തുടങ്ങിയ എതിരാളികൾ റിലയൻസ് സൃഷ്ടിച്ച ചലനങ്ങൾ സൂക്ഷ്മമായി നിരീക്ഷിച്ചുവരികയാണ്.
വളർച്ചയുടെ ഉത്തേജകം
റിലയൻസിന്റെ വരവ് മൊത്തത്തിൽ വിപണിയെ വികസിപ്പിക്കാൻ സഹായിക്കുമെന്നും ഒരു വിഭാഗം കരുതുന്നു. ഇന്ത്യയിലെ പ്രതിശീർഷ ഉപഭോഗം വളരെ കുറവാണെന്നും അഞ്ചോ പത്തോ വർഷത്തിനുള്ളിൽ മൂന്നിരട്ടിയാകാൻ സാധ്യതയുണ്ടെന്നുമാണ് വിലയിരുത്തൽ. അതുകൊണ്ടുതന്നെ മറ്റുള്ളവർക്കും വളരാൻ വിപണിയിൽ ഇടമുണ്ട്. യഥാർത്ഥ പോരാട്ടം ഇനിയും ആരംഭിച്ചിട്ടില്ലെന്ന സൂചനയാണ് വിപണിയിൽനിന്ന് ലഭിക്കുന്നത്.
പ്രധാന ഏറ്റെടുക്കലുകൾ:
എഡ്ടെക്, ഡിജിറ്റൽ പ്ലാറ്റ്ഫോമുകൾ
| കമ്പനി | ഏറ്റെടുത്ത ഓഹരി | നിക്ഷേപം | സ്ഥാപകർ | പ്രധാന വിവരങ്ങൾ |
|---|---|---|---|---|
| Embibe | 72.69% | $180 ദശലക്ഷം | അദിതി അവസ്തി | ഡാറ്റാ അനലിറ്റിക്സ് ഉപയോഗിച്ച് വിദ്യാർത്ഥികൾക്ക് പഠനാനുഭവം നൽകുന്ന എഡ്ടെക് പ്ലാറ്റ്ഫോം. ഇന്ത്യയിലെ 19 ലക്ഷം സ്കൂളുകളുമായും 58,000 സർവകലാശാലകളുമായും ബന്ധപ്പെടാൻ ലക്ഷ്യമിടുന്നു. |
| Haptik | 87% | 700 കോടി രൂപ | ആകൃത് വൈഷ്, സ്വപൻ രാജ്ദേവ് | ലോകത്തിലെ ഏറ്റവും വലിയ സംഭാഷണ AI പ്ലാറ്റ്ഫോമുകളിലൊന്ന്. ഗൂഗിൾ അസിസ്റ്റന്റ്, ആമസോൺ അലക്സ എന്നിവയോട് മത്സരിക്കാൻ ലക്ഷ്യമിടുന്നു. |
| Reverie | 83.3% | 190 കോടി രൂപ | അരവിന്ദ് പാനി, സചിന്ദ്ര കെ മൊഹന്തി, വിവേകാനന്ദ പാനി | 12 ഇന്ത്യൻ ഭാഷകളിൽ വോയിസ് സ്യൂട്ട് നൽകുന്നു. RIL-ന്റെ ഡിജിറ്റൽ പ്ലാറ്റ്ഫോമുകളുമായി സംയോജിപ്പിക്കാൻ ലക്ഷ്യമിടുന്നു. |
| NowFloats | 85% | 141.63 കോടി രൂപ | ജസ്മിന്ദർ സിംഗ് ഗുലാത്തി | ചെറുകിട, ഇടത്തരം സംരംഭങ്ങൾക്ക് (SMEs) ഡിജിറ്റൽ സാന്നിധ്യം നൽകുന്ന SaaS സൊല്യൂഷനുകൾ വാഗ്ദാനം ചെയ്യുന്നു. |
| C-Square Info | 82% | ലഭ്യമല്ല | സജിത്ത് തലത്തിൽ, ശ്രീപാൽ ബച്ചാവത്ത് | ഫാർമസ്യൂട്ടിക്കൽ വ്യവസായത്തിനായുള്ള എന്റർപ്രൈസ് റിസോഴ്സ് പ്ലാനിംഗ്, അനലിറ്റിക്സ് സോഫ്റ്റ്വെയർ കമ്പനി. |
| Addverb Tech | 55% | $132 ദശലക്ഷം | സംഗീത് കുമാർ, മറ്റുള്ളവർ | റോബോട്ടിക്സ്, ഓട്ടോമേറ്റഡ് സ്റ്റോറേജ്, സോഫ്റ്റ്വെയർ തുടങ്ങിയ മേഖലകളിൽ പ്രവർത്തിക്കുന്ന റോബോട്ടിക്സ് സ്ഥാപനം. |
റീട്ടെയിലും ഇ-കൊമേഴ്സും
| കമ്പനി | ഏറ്റെടുത്ത ഓഹരി | നിക്ഷേപം | സ്ഥാപകർ | പ്രധാന വിവരങ്ങൾ |
|---|---|---|---|---|
| Fynd | 87.6% | 295.25 കോടി രൂപ | ഫാറൂഖ് ആദം, ഹർഷ് ഷാ, ശ്രീരാമൻ എം.ജി | ഓഫ്ലൈൻ-ടു-ഓൺലൈൻ (O2O) മോഡലിൽ പ്രവർത്തിക്കുന്ന ഫാഷൻ ഇ-കൊമേഴ്സ് പ്ലാറ്റ്ഫോം. റിലയൻസിന്റെ ഡിജിറ്റൽ, ന്യൂ കൊമേഴ്സ് സംരംഭങ്ങളെ ശക്തിപ്പെടുത്തുന്നു. |
| Grab | 83% | $14.9 ദശലക്ഷം | ജിഗ്നേഷ് പട്ടേൽ, നിശാന്ത് വോറ, പ്രതിഷ് സംഘ്വി | ഓൺ-ഡിമാൻഡ്, റിവേഴ്സ്, ഫസ്റ്റ്-മൈൽ, ലാസ്റ്റ്-മൈൽ ലോജിസ്റ്റിക്സ് സേവനങ്ങൾ നൽകുന്നു. ആമസോൺ, ഫ്ലിപ്കാർട്ട് എന്നിവയ്ക്ക് വെല്ലുവിളി ഉയർത്താൻ സഹായിക്കും. |
| Netmeds | 60% | $83 ദശലക്ഷം | പ്രദീപ് ദാദ | ഇന്ത്യയിലെ പ്രമുഖ ഓൺലൈൻ ഫാർമസികളിലൊന്ന്. ആരോഗ്യ സംരക്ഷണ ഉൽപ്പന്നങ്ങൾ വിപുലമായി ലഭ്യമാക്കാൻ റിലയൻസ് റീട്ടെയിലിനെ സഹായിക്കുന്നു. |
| Hamleys | 100% | 620 കോടി രൂപ | വില്യം ഹാംലി | ലോകത്തിലെ ഏറ്റവും പഴയ കളിപ്പാട്ട റീട്ടെയിലർമാരിൽ ഒരാളായ ബ്രിട്ടീഷ് ബ്രാൻഡ്. ആഗോള കളിപ്പാട്ട റീട്ടെയിൽ വ്യവസായത്തിൽ പ്രബല ശക്തിയാകാൻ റിലയൻസിനെ സഹായിക്കുന്നു. |
| Urban Ladder | 96% | 182 കോടി രൂപ | ആശിഷ് ഗോയൽ, രാജീവ് ശ്രീവാസ്തവ | ഫർണിച്ചർ, ഡെക്കോർ റീട്ടെയിലർ. |
| JustDial | 40.95% | 5,710 കോടി രൂപ | വി.എസ്.എസ്. മണി | ഇന്ത്യയിലെ ഏറ്റവും പഴയ പ്രാദേശിക സെർച്ച് സർവീസ് പ്ലാറ്റ്ഫോമുകളിലൊന്ന്. |
| Milkbasket | 96.49% | $40 ദശലക്ഷം | അനന്ത് ഗോയൽ, മറ്റുള്ളവർ | ഇന്ത്യയിലെ ആദ്യത്തെ സബ്സ്ക്രിപ്ഷൻ അധിഷ്ഠിത മൈക്രോ-ഡെലിവറി സേവനം. |
| Dunzo | 25.8% | $240 ദശലക്ഷം | കബീർ ബിശ്വാസ്, മറ്റുള്ളവർ | ബാംഗ്ലൂർ ആസ്ഥാനമായുള്ള പ്രശസ്ത ഡെലിവറി സേവന പ്ലാറ്റ്ഫോം. |
| Shri Kannan | 100% | 152.5 കോടി രൂപ | ടി. തനുഷ്കരൻ | കോയമ്പത്തൂർ ആസ്ഥാനമായുള്ള 20 വർഷത്തിലേറെ പഴക്കമുള്ള റീട്ടെയിൽ ബ്രാൻഡ്. |
ഫാഷനും ലൈഫ്സ്റ്റൈലും
| കമ്പനി | ഏറ്റെടുത്ത ഓഹരി | നിക്ഷേപം | സ്ഥാപകർ | പ്രധാന വിവരങ്ങൾ |
|---|---|---|---|---|
| Clovia | 89% | 950 കോടി രൂപ | പങ്കജ് വെർമാനി, നേഹ കാന്ത്, സുമൻ ചൗധരി | സ്ത്രീകളുടെ ഉൾവസ്ത്രങ്ങൾ, ലോഞ്ച്വെയർ എന്നിവയുടെ നിർമ്മാതാക്കളും ഓൺലൈൻ റീട്ടെയിലറുമാണ്. |
| Ritu Kumar | 52% | ലഭ്യമല്ല | റിതു കുമാർ | ഇന്ത്യയിലെ ഏറ്റവും പഴയ ഫാഷൻ ഹൗസുകളിലൊന്നായ റിതിക പ്രൈവറ്റ് ലിമിറ്റഡിന്റെ ഭൂരിപക്ഷ ഓഹരി. |
| Manish Malhotra | 40% | ലഭ്യമല്ല | മനീഷ് മൽഹോത്ര | പ്രശസ്ത ഇന്ത്യൻ ഫാഷൻ ഡിസൈനറുടെ പേരിലുള്ള ബ്രാൻഡിൽ നിക്ഷേപം. |
| Amante | 100% | ലഭ്യമല്ല | അജയ് അമലീൻ | MAS ഹോൾഡിംഗ്സിന്റെ ഭാഗമായ ഉൾവസ്ത്ര ബ്രാൻഡ്. |
| Rahul Mishra | 60% | ലഭ്യമല്ല | രാഹുൽ മിശ്ര | പാരീസ് ഹോട് കോച്ചർ വീക്കിൽ പങ്കെടുത്ത ആദ്യ ഇന്ത്യൻ ഡിസൈനറുമായി 60:40 സംയുക്ത സംരംഭം. |
| Zivame | 15% | ലഭ്യമല്ല | റിച്ച കർ | സ്ത്രീകളുടെ ഉൾവസ്ത്രങ്ങൾക്കായുള്ള പ്രമുഖ ഓൺലൈൻ ബ്രാൻഡിൽ ന്യൂനപക്ഷ ഓഹരി. |
മീഡിയയും എന്റർടൈൻമെന്റും
| കമ്പനി | ഏറ്റെടുത്ത ഓഹരി | നിക്ഷേപം | പ്രധാന വിവരങ്ങൾ |
|---|---|---|---|
| Saavn | 75-80% | $1 ബില്യൺ (സംയോജിത മൂല്യം) | ഡിജിറ്റൽ മ്യൂസിക് സേവനമായ ജിയോ മ്യൂസിക്കുമായി ലയിപ്പിച്ചു. 15 ഭാഷകളിലായി 40 ദശലക്ഷം സൗണ്ട്ട്രാക്കുകൾ ലഭ്യമാണ്. |
| Den Networks | 66% | 2,045 കോടി രൂപ | കേബിൾ, ബ്രോഡ്ബാൻഡ് വിപണിയിലെ പ്രധാനികളിലൊന്ന്. ജിയോ ഗിഗാ ഫൈബറിന്റെ വ്യാപനത്തിന് സഹായിക്കുന്നു. |
| Hathway | 51.3% | 2,940 കോടി രൂപ | കേബിൾ, ബ്രോഡ്ബാൻഡ് വിപണിയിലെ മറ്റൊരു പ്രമുഖ കമ്പനി. |
| Balaji Telefilms | 24.9% | 413.28 കോടി രൂപ | ALTBalaji-യുടെ മാതൃ കമ്പനി. ഓൺലൈൻ വീഡിയോ ഉള്ളടക്കത്തിലേക്കുള്ള പ്രവേശനം ഉറപ്പാക്കുന്നു. |
| Eros International | 5% | $48.75 ദശലക്ഷം | ഫിലിം എന്റർടൈൻമെന്റ് കമ്പനി. ഓൺലൈൻ വീഡിയോ ഉള്ളടക്കത്തിനായുള്ള ഡിമാൻഡ് മുതലെടുക്കാൻ ലക്ഷ്യമിടുന്നു. |
ഊർജ്ജം, സാങ്കേതികവിദ്യ, മറ്റ് മേഖലകൾ
| കമ്പനി | ഏറ്റെടുത്ത ഓഹരി | നിക്ഷേപം | മേഖല | പ്രധാന വിവരങ്ങൾ |
|---|---|---|---|---|
| Tesseract | 92.7% | ലഭ്യമല്ല | ഹൈടെക് (AR/VR) | ഇന്ത്യയിലെ ആദ്യത്തെ AR ഹെഡ്സെറ്റായ 'ഹോളോബോർഡ്' വികസിപ്പിച്ചു. |
| Radisys | 100% | $74 ദശലക്ഷം | ടെലികോം | 5G, IoT എന്നിവയിൽ ജിയോയുടെ സാന്നിധ്യം വർദ്ധിപ്പിക്കാൻ സഹായിക്കുന്നു. |
| Lithium Werks | 100% | $61 ദശലക്ഷം | എനർജി ടെക് | കോബാൾട്ട് രഹിത ലിഥിയം അയൺ ഫോസ്ഫേറ്റ് ബാറ്ററികളുടെ നിർമ്മാതാക്കൾ. ഇന്ത്യയിലെ പുനരുപയോഗ ഊർജ്ജ ആവാസവ്യവസ്ഥ കെട്ടിപ്പടുക്കാനുള്ള ലക്ഷ്യത്തിന്റെ ഭാഗം. |
| Asteria | 51.78% | 23.12 കോടി രൂപ | ഹൈടെക് (ഡ്രോൺ) | സൈനിക, വ്യാവസായിക ആവശ്യങ്ങൾക്കായി ഡ്രോൺ അധിഷ്ഠിത പരിഹാരങ്ങൾ വികസിപ്പിക്കുന്നു. |
| Faradion | ലഭ്യമല്ല | $10.1M (ഇക്വിറ്റി) | എനർജി ടെക് | യുണൈറ്റഡ് കിംഗ്ഡം ആസ്ഥാനമായുള്ള എനർജി ടെക് കമ്പനി. |
Content Highlights: Reliance buys legacy brands like Campa, BPL, Kelvinator to win the consumer market. Learn their strategy of nostalgia, low prices, and wide distribution.
Published: 10 Jan 2026, 11:21 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented