അമേരിക്ക അതിന്റെ രാഷ്ട്രീയ ചരിത്രത്തിലെ, പ്രത്യേകിച്ച് രണ്ടാം ലോകയുദ്ധത്തിനുശേഷമുള്ള രാഷ്ട്രീയചരിത്രത്തിലെ, ഏറ്റവും വലിയ യു ടേണ്‍ എടുക്കുന്ന ദിവസങ്ങളിലൂടെയാണ് നാം കടന്നുപോകുന്നത്. ആഗോള മുതലാളിത്തരാഷ്ട്രീയത്തിന്റേയും അത് ഉദാത്തമെന്ന് കരുതി പറഞ്ഞുപോരാറുള്ള ലിബറല്‍-ജനാധിപത്യമൂല്യങ്ങളുടെ സമ്പന്ന പശ്ചാത്യഭാഷ്യത്തിന്റെയും നേതാവ് എന്ന പച്ചവേഷവും അതിന്റെ കിരീടവും അമേരിക്ക അഴിച്ചുവെക്കുന്നു. പകരം ലോകമാകമാനം അലയടിക്കുന്ന വലതുപക്ഷ ദേശവാദ രാഷ്ട്രീയക്കാറ്റിന്റെ ചുഴലിക്കണ്ണായി അമേരിക്ക മാറുന്നതായിട്ടാണ് നമുക്കനുഭവപ്പെടുന്നത്. അമേരിക്കയ്ക്ക് എന്നും അമേരിക്കയായിരുന്നു വലുത്. ഇപ്പോള്‍ 'എന്തിനും മീതേ അമേരിക്ക' (America First ) എന്നത് ഡൊണാള്‍ഡ് ട്രംപ് ഒരു നയമാക്കുമ്പോള്‍ അത് കയ്യൊഴിയുന്നത് രണ്ടാം ലോകയുദ്ധത്തിനുശേഷം അമേരിക്കയെ നിതാന്തബന്ധുവായി കരുതി ജീവിച്ചുപോന്ന പടിഞ്ഞാറന്‍ യൂറോപ്പിനേയും ഇംഗ്ലണ്ടിനേയുമാണ്. അതുണ്ടാക്കുന്ന ആഗോളസാഹചര്യമാണ് അമേരിക്കയുടെ യു ടേണ്‍ കൊണ്ട് അനാച്ഛാദിതമാകുന്ന ആദ്യപരിണിതി. ആ പരിണിതിയാകട്ടേ, ലോകത്തെയാകമാനം ബാധിക്കുന്നതുമാണ്.
അമേരിക്കന്‍ രാഷ്ട്രീയത്തിന്റെ മുഖ്യധാരയിലെ വകതിരിവാണ് ബെണി സാന്‍ഡേഴ്സ് (Bernie Sanders). ആ ശബ്ദം അമേരിക്ക പതിറ്റാണ്ടുകളായി കേട്ടുകൊണ്ടിരിക്കുന്നു. എന്നാല്‍ അത് അമേരിക്ക പ്രതിനിധാനം ചെയ്യുന്ന ലോകാധികാരത്തിന്റെ ശബ്ദമായി ആളുകള്‍ ഒരിക്കലും തെറ്റിദ്ധരിക്കുന്നുമില്ല. തെറ്റുവരുമ്പോള്‍ തിരുത്താന്‍ അദ്ധ്യാപകനെ നോക്കുന്ന കുട്ടിയെപ്പോലെ അമേരിക്കന്‍ പൊതുരാഷ്ട്രീയ മണ്ഡലം സാന്‍ഡേഴ്സിന്റെ പ്രതികരണത്തിനായി കാതോര്‍ത്തുവരുന്നു. പൂന്താനം പണ്ട് മലയാളത്തില്‍ എഴുതിയ വരികളില്ലേ, 'സത്തുകള്‍ കണ്ടു ശിക്ഷിച്ചു ചൊല്ലുമ്പോള്‍ ശത്രുവെപ്പോലെ ക്രുദ്ധിക്കുന്നു ചിലര്‍' എന്ന്. ട്രംപിന്റെ കത്തിവേഷത്തിലെ ക്രോധത്തിന്റെ ചരിത്രാതീത സാധുതയെക്കുറിച്ചാണ് കവി പതിനേഴാം നൂറ്റാണ്ടില്‍ കീഴാറ്റൂരെ പൂന്താനം ഇല്ലത്തിരുന്ന് പാടിയത്.
യു.എസ്. കോണ്‍ഗ്രസ്സിന്റെ ചരിത്രത്തില്‍ ഏറ്റവും കൂടുതല്‍ കാലം ജനപ്രതിനിധിസഭയില്‍ സ്വതന്ത്രനായി തുടരുന്ന പുരോഗമനരാഷ്ട്രീയവക്താവായ ബെണി സാന്‍ഡേഴ്സ് ഫെബ്രുവരി പത്തൊന്‍പതാം തീയതി എഴുതി: 'വാഷിങ്ടണ്‍ ചുറ്റുവഴികളിലെ രാഷ്ട്രീയക്കാരെക്കൊണ്ടല്ല ട്രംപിസം പരാജയപ്പെടാന്‍ പോകുന്നത്. ദശലക്ഷക്കണക്കിനു വരുന്ന അമേരിക്കക്കാരാണ് അതിനെ പരാജയപ്പെടുത്താന്‍ പോകുന്നത്. അമേരിക്കയിലെ എല്ലാ സംസ്ഥാനങ്ങളിലും അത് സംഭവിക്കും. താഴെക്കിടയില്‍ നിന്നും ശക്തമായ ഒരു ജനമുന്നേറ്റം ഉയര്‍ന്നുവരും, ഏകാധിപത്യത്തിനെതിരെ, പ്രഭുത്വത്തിനെതിരെ, പൊതുമുതല്‍ മോഷ്ടാക്കള്‍ക്കെതിരേ, സാമൂഹ്യപദ്ധതികള്‍ക്കുള്ള പണം വെട്ടിക്കുറയ്ക്കുന്നതിനെതിരേ, അതിസമ്പന്നര്‍ക്കുള്ള നികുതിയാനുകൂല്യങ്ങള്‍ക്കെതിരെ. അതാണ് വരും നാളുകളില്‍ അമേരിക്ക കാണാനിരിക്കുന്നത്'.
ബെണി സാന്‍ഡേഴ്സിനെക്കുറിച്ച് നാം പറഞ്ഞുകൊണ്ടിരിക്കേണ്ട ഒരു കാലമാണിത്. ഹിന്ദി കവിയായിരുന്ന മുക്തിബോധ് എഴുതിയ ഒരു വരിയുണ്ട്,
जो नहीं हो सके पूर्ण–काम
मैं उनको करता हूँ प्रणाम ।
(പാതിവഴി മുടങ്ങിപ്പോയവര്‍ക്കാണ് എന്റെ പ്രണാമം)
ബെണി സാന്‍ഡേഴ്സിന്റെ ബന്ധുക്കളില്‍ പലരും ജര്‍മ്മന്‍ അധിനിവേശ പോളണ്ടിലെ തടങ്കല്‍ പാളയങ്ങളില്‍ 1940 കളില്‍ കൊല്ലപ്പെട്ടവരാണ്. ശാന്തിയും സമാധാനവും സര്‍വോപരി ജീവന്‍ തന്നെയുമാഗ്രഹിച്ച് അമേരിക്കന്‍ വന്‍കരയിലേക്ക് കുടിയേറിയ ജൂതകുടുംബത്തിലെ അംഗമാണ് ഇപ്പോള്‍ 83 വയസ്സുള്ള സാന്‍ഡേഴ്സ്. കുടിയേറ്റക്കാര്‍ക്കെതിരേ പുതിയരാഷ്ട്രീയം അമേരിക്കയില്‍ തിളയ്ക്കുമ്പോള്‍ അദ്ദേഹം എഴുതി:
ഈ രാജ്യം കുടിയേറ്റക്കാരുടെ രാജ്യമാണ്. തദ്ദേശീയരായ അമേരിക്കക്കാരെ (ഇപ്പോള്‍ 'അമേരിന്ത്യക്കാര്‍' എന്നാരും പറയാറില്ല, Native Americans എന്നേ പറയാറുള്ളൂ) മാറ്റിനിര്‍ത്തിയാല്‍ അമേരിക്കയിലെ എല്ലാവരും മറ്റെവിടെനിന്നോ വന്നവരാണ്. ചിലര്‍ ജീവിക്കുവാന്‍ സമ്പത്തും മറ്റിടങ്ങളുമുണ്ടായിട്ടും ഇങ്ങോട്ടേയ്ക്കു വന്നവര്‍, മറ്റുചിലര്‍ ഗത്യന്തരമില്ലാതെ, മറ്റു ചിലര്‍ ചങ്ങലകളിലാണ് വന്നത്. ഇവരെല്ലാവരും കൂടി ഉണ്ടാക്കിയതാണ് അമേരിക്ക.' ബെണി സാന്‍ഡേഴ്സ് ഒരിക്കലും അമേരിക്കന്‍ മുഖ്യധാരയുടെ ശബ്ദമാകില്ല. 2003 ല്‍ അമേരിക്ക ഇറാഖിനെ ആക്രമിച്ചപ്പോള്‍ സാന്‍ഡേഴ്സ് അതിശക്തമായി എതിര്‍ത്തു. 1985 ല്‍ ബെര്‍ലിങ്ടണ്‍ നഗരത്തിലെ ടൗണ്‍ ഹാളില്‍ സാന്‍ഡേഴ്സ് ദാര്‍ശനികന്‍ നോം ചോംസ്‌കിയെ പ്രസംഗിക്കാന്‍ കൊണ്ടുവന്നു, ചോംസ്‌കിയെക്കുറിച്ച് സാന്‍ഡേഴ്സ് പറഞ്ഞു, 'അമേരിക്കന്‍ ധൈഷണിക മരുഭൂമിയിലെ സുപ്രധാന ശബ്ദം'. മുക്തിബോധ് എഴുതിയതുപോലെ പാതിവഴിയില്‍ മുടങ്ങിപ്പോയ നന്മകളാണ് മനുഷ്യചരിത്രത്തെ മുന്നോട്ടുകൊണ്ടുപോയത്, ഏകാധിപതികളുടെ ഛത്രവും ചാമരവുമല്ല. അമേരിക്കയിലെ അറുപതു ശതമാനം ജനങ്ങള്‍ കിട്ടുന്ന പണം കൊണ്ട് കഷ്ടിച്ചു ജീവിക്കുന്നവരാണ്. അവര്‍ക്ക് സമ്പാദ്യമൊന്നുമില്ല. അമേരിക്കന്‍ ഇംഗ്‌ളീഷില്‍ ആ ജീവിതത്തെ 'Paycheck to paycheck' ജീവിതമെന്നു പറയും. ജീവിക്കാന്‍ ഉതകുന്ന വരുമാനമില്ലാത്തവരും ഒട്ടനവധിയാണ്. 85 ദശലക്ഷം ആളുകളും ജീവിതത്തിന് യാതൊരു ഇന്‍ഷുറന്‍സ് പരിരക്ഷയുമില്ലാത്തവരാണ്. ദാരിദ്ര്യമനുഭവിക്കുന്ന കുട്ടികള്‍ ഏറ്റവും കൂടുതലുള്ള ബൃഹദ് രാജ്യം അമേരിക്കയാണ്. ഇത്തരമൊരു രാജ്യത്തെയാണ് സമ്പത്തും വംശീയതയും ഉന്മത്തമാക്കിയ ഒരാള്‍ ഏകാധിപത്യത്തിലേക്ക് നയിക്കുന്നതും 'അമേരിക്ക' എന്ന ദേശാഭിമാന മുദ്രാവാക്യത്തില്‍ ആളെ മയക്കിക്കൊണ്ടിരിക്കുന്നതും.
1987 ല്‍ ബെണി സാന്‍ഡേഴ്സ് ഒരു സംഗീത ആല്‍ബം പുറത്തിറക്കി, We Shall Overcome, നമ്മള്‍ അതിജീവിക്കും. ഓരോ സംഗീതഖണ്ഡത്തിനും വികാരതീവ്രമായി ആമുഖവാചകങ്ങള്‍ പറഞ്ഞത് അദ്ദേഹമാണ്. അത് കേള്‍ക്കുവാനുള്ള ലിങ്ക് നല്‍കിക്കൊണ്ട് ഈ ലക്കം ആഴ്ചപ്പാടുകള്‍ അവസാനിക്കുന്നു.
Content Highlights: Bernie Sanders Elon Musk American Oligarchy Democracy Politics US Politics Inequality Wealth Gap
Published: 22 Feb 2025, 11:45 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented