ലോകത്ത് എവിടെപ്പോയാലും ഇന്ത്യക്കാര്‍ക്ക് മാറ്റാന്‍ കഴിയാത്ത ചില ശീലങ്ങളുണ്ട്. അത്തരമൊരു ശീലത്തെ കുറിച്ചുള്ള വീഡിയോയാണ് സോഷ്യല്‍ മീഡിയയില്‍ വൈറലായത്. ഫ്രാന്‍സില്‍ ഭര്‍ത്താവിനൊപ്പം എത്തിയ യുവതി അവളുടെ വസ്ത്രങ്ങള്‍ കഴുകി ബാല്‍ക്കണിയില്‍ ഉണക്കാനിടുന്നതാണ് വീഡിയോയില്‍ കാണിക്കുന്നത്.

To advertise here,

അയ കെട്ടിയശേഷം നനഞ്ഞ തുണികള്‍ ഓരോന്നായി ഭാര്യ അതില്‍ ഉണക്കാനിടുമ്പോള്‍ ഭര്‍ത്താവ് ഭാര്യയോട് സംസാരിക്കുന്നതും വീഡിയോയില്‍ കാണാം. ഫ്രാന്‍സിലെ ലിയോണിലാണ് ഇവരുടെ വീടുള്ളത്.

ഇത് ഫ്രാന്‍സാണെന്നും ഇവിടെ ഇങ്ങനെ വീടിന് പുറത്ത് വസ്ത്രം ഉണക്കാനിടുന്നത് അനുവദനീയമല്ലെന്നും ഭര്‍ത്താവ് ഭാര്യയോട് പറയുന്നുണ്ട്. ഫ്രാന്‍സില്‍ വസ്ത്രം അലക്കാന്‍ കൊടുക്കുന്നത് ഏറെ ചെലവേറിയ കാര്യമാണെന്നും അതിനാലാണ് താന്‍ വസ്ത്രം സ്വയം അലക്കാന്‍ തീരുമാനിച്ചതെന്നുമാണ് ഭാര്യ ഇതിന് മറുപടി നല്‍കുന്നത്. തുണി അലക്കാന്‍ കൊടുക്കുമ്പോള്‍ നാട്ടിലെ 400 രൂപ വരെ ചെലവ് വരുമെന്നും ആ അധിക ചെലവ് ഒഴിവാക്കാനാണ് താന്‍ ഇത് സ്വയം ചെയ്തതെന്നും ഭാര്യ പറയുന്നു.

ഇത് പിടിക്കപ്പെട്ടാല്‍ രക്ഷപ്പെടാനുള്ള സൂത്രവും അവര്‍ പങ്കുവെയ്ക്കുന്നുണ്ട്. ഇങ്ങനെ തുണി ഉണക്കുന്നതിനെതിരെ സ്വദേശികളായ ആരെങ്കിലും പരാതി പറഞ്ഞാല്‍ അവര്‍ പറഞ്ഞതൊന്നും മനസിലാകാത്ത പോലെ നടിച്ചാല്‍ ഫ്രഞ്ച് ഭാഷ മനസിലാകാത്തതുകൊണ്ടാണ് താന്‍ മിണ്ടാതിരിക്കുന്നതെന്ന് അവര്‍ വിചാരിച്ചോളുമെന്നും യുവതി വീഡിയോയില്‍ പറയുന്നുണ്ട്.

ഭാര്യ തന്നെയാണ് ഈ വീഡിയോ ഇന്‍സ്റ്റഗ്രാമില്‍ പങ്കുവെച്ചത്. 'ഭാര്യയെ വിദേശത്തേക്ക് കൊണ്ടുപോകുന്നതിന് മുമ്പ് നൂറു തവണ ആലോചിക്കണം' എന്ന ക്യാപ്ഷനും വീഡിയോയ്ക്ക് നല്‍കിയിട്ടുണ്ട്. ഒരാഴ്ച മുമ്പ് പങ്കുവെച്ച ഈ വീഡിയോ ഇതുവരെ 16 ലക്ഷം പേരാണ് കണ്ടത്. ഒട്ടേറെപ്പേര്‍ ഇതിന് താഴെ കമന്റും ചെയ്തു. 'നിങ്ങള്‍ക്ക് ഒരു ഇന്ത്യക്കാരനെ ഇന്ത്യയില്‍നിന്ന് പുറത്താക്കാന്‍ കഴിയും. പക്ഷേ ഒരു ഇന്ത്യക്കാരനില്‍നിന്ന് ഒരിക്കലും ഇന്ത്യയെ പുറത്താക്കാന്‍ കഴിയില്ല' എന്നാണ് ഇതില്‍ ഏറ്റവും രസകരമായ കമന്റ്.