കഴിഞ്ഞ ദിവസങ്ങളിലായിരുന്നു സുരേഷ് ഗോപിയുടെ മകള്‍ ഭാഗ്യ സുരേഷിന്റെ വിവാഹവും റിസപ്ഷനും. ഗുരുവായൂരില്‍ നടന്ന വിവാഹത്തിന് ശേഷം കൊച്ചിയിലും തിരുവനന്തപുരത്തും വിവാഹ റിസപ്ഷനും നടന്നു. സിനിമാ മേഖലയിലെ താരങ്ങള്‍ ഉള്‍പ്പെടെ നിരവധി സെലിബ്രിറ്റികളാണ് വിവാഹത്തിന്റെ ഭാഗമായത്. 

To advertise here,

വിവാഹത്തില്‍ എല്ലാവരും പങ്കെടുത്തതില്‍ സന്തോഷമുണ്ടെന്നും ആളുകള്‍ കുറച്ച് അധികമായിപ്പോയതിന്റെ തിക്കും തിരക്കുമുണ്ടായിരുന്നെന്നും ഭാഗ്യ റിസപ്ഷന് ശേഷം പ്രതികരിച്ചു. തിരുവനന്തപുരത്തെ വിവാഹസത്കാരം കഴിഞ്ഞ് മാധ്യമങ്ങളോട് പ്രതികരിക്കുകയായിരുന്നു അവര്‍.

'ഒന്നും പറയാനില്ല. എല്ലാവരും വന്നതില്‍ സന്തോഷം. കുറച്ചധികം ആളുകളായിപ്പോയി. അതിന്റെ ഒരു ബഹളവും തിരക്കുമുണ്ടായിരുന്നു. നന്ദിയുണ്ട്. ഇത്രയും വലിയ സ്‌കെയിലില്‍ പോകുമെന്ന് ഒരിക്കലും വിചാരിച്ചില്ല. കൂടുതലൊന്നും പറയാനില്ല.'-ഭാഗ്യ പറഞ്ഞു.

വിവാഹത്തിന് ഓറഞ്ച് സാരി തിരഞ്ഞെടുത്ത ഭാഗ്യ കൊച്ചിയിലെ റിസപ്ഷന് വെള്ള ലെഹങ്കയും തിരുവനന്തപുരത്തെ സത്കാരത്തിന് പിങ്ക് സാരിയുമാണ് ധരിച്ചത്. ഫുള്‍സ്ലീവ് ബ്ലൗസുള്ള പിങ്ക് സാരിയായിരുന്നു ഭാഗ്യയെ കൂടുതല്‍ സുന്ദരിയാക്കിയതെന്നാണ് ആരാധകര്‍ പറയുന്നത്. ഇതിനൊപ്പം സംഗീത് പരിപാടിക്ക് ഭാഗ്യ ധരിച്ച പച്ച ലെഹങ്കയും വിവാഹത്തിന്റെ തലേദിവസം ധരിച്ച സെറ്റ് ദാവണിയും ഏറെ ചര്‍ച്ചയായിരുന്നു. 

പ്രധാനമന്ത്രി നരേന്ദ്ര മോദി ഉള്‍പ്പെടെയുള്ളവര്‍ പങ്കെടുത്ത വിവാഹം ഏറ്റവും വലിയ താരവിവാഹങ്ങളിലൊന്നായിരുന്നു. ഗുരുവായൂര്‍ ക്ഷേത്രത്തില്‍ നടന്ന വിവാഹത്തില്‍ പ്രധാനമന്ത്രി നേരിട്ടെത്തി വധൂവരന്‍മാരെ ആശിര്‍വദിച്ചിരുന്നു. ഗുരുവായൂര്‍ ക്ഷേത്രത്തിലെ വിവാഹത്തിനും വിവാഹസത്കാരത്തിനും മമ്മൂട്ടിയും മോഹന്‍ലാലും കുടുംബസമേതമാണ് എത്തിയത്. വിവാഹത്തിന് പിന്നാലെ തൃശ്ശൂരിലെ ഗോകുലം കണ്‍വെന്‍ഷന്‍ സെന്ററില്‍ നടന്ന റിസപ്ഷനിലും ഇരുവരും പങ്കെടുത്തിരുന്നു. 

ജനുവരി 19-നായിരുന്നു കൊച്ചിയിലെ റിസപ്ഷന്‍. ജനുവരി 20-നായിരുന്നു തിരുവനന്തപുരത്തെ സത്കാരം. മമ്മൂട്ടി ഭാര്യ സുല്‍ഫത്ത്, മക്കളായ സുറുമി, ദുല്‍ഖര്‍ സല്‍മാന്‍, മരുമകള്‍ അമാല്‍ എന്നിവര്‍ക്കൊപ്പമാണ് കൊച്ചിയിലെ വിവാഹ സത്കാരത്തിനെത്തിയത്. മോഹന്‍ലാല്‍ ഭാര്യ സുചിത്രയ്‌ക്കൊപ്പം തിരുവനന്തപുരത്തെ സത്കാരത്തില്‍ പങ്കെടുത്തു. ജഗതി ശ്രീകുമാര്‍, ജയറാം, ദിലീപ്, ടൊവിനോ തോമസ്, കുഞ്ചാക്കോ ബോബന്‍, ബിജു മേനോന്‍, ശ്രീനിവാസന്‍, ഇന്ദ്രന്‍സ് തുടങ്ങിയവരെല്ലാം റിസപ്ഷനെത്തി.