ഹൃദയം നിറയ്ക്കുന്ന ഒട്ടേറെ വീഡിയോകൾ സോഷ്യൽ മീഡിയയിൽ പ്രത്യക്ഷപ്പെടാറുണ്ട്. നമ്മുടെ മോശം ദിവസം മികച്ചതാക്കാൻ പോലും ആ വീഡിയോകൾക്ക് ചിലപ്പോൾ കഴിയാറുണ്ട്. അത്തരത്തിൽ ഹൃദയസ്പർശിയായ ഒരു വീഡിയോ പങ്കുവെച്ചിരിക്കുകയാണ് സംരംഭകനും കണ്ടന്റ് കിയേറ്ററുമായ രാകേഷ് കുമാർ.

To advertise here,

തന്റെ ലംബോർഗിനി കാർ ഓടിച്ചുനോക്കാനുള്ള ഒരു ഓട്ടോ ഡ്രൈവറുടെ ആഗ്രഹമാണ് രാകേഷ് സാധിപ്പിച്ചുകൊടുത്തത്. ലംബോർഗിനി ഓടിച്ച് റോഡിലൂടെ പോകുന്നതിനിടയിലാണ് ഓട്ടോ ഡ്രൈവർ രാകേഷിനോട് ആഗ്രഹം പറയുന്നത്. ഇൻസ്റ്റഗ്രാമിൽ പങ്കുവെച്ച ഈ വീഡിയോ ഇതുവരെ 27 മില്ല്യൺ ആളുകൾ കണ്ടു. മൂന്ന് മില്ല്യൺ ആളുകൾ ലൈക്കും ചെയ്തു. 17000 പേരാണ് രാകേഷിനെ അഭിനന്ദിച്ച് കമന്റ് ചെയ്തത്.

ലംബോർഗിനിയിൽ യാത്ര ചെയ്യുന്നതിനിടെ ഗ്ലാസുയർത്തി രാകേഷ് ഓട്ടോ ഡ്രൈവറുടെ അഭിവാദ്യം സ്വീകരിക്കുകയായിരുന്നു. ഇതോടെ തനിക്ക് ആ കാർ ഓടിച്ചുനോക്കാൻ ആഗ്രഹമുണ്ടെന്ന് ഓട്ടോ ഡ്രൈവർ അറിയിച്ചു. ഇതു കേട്ടയുടൻ രാകേഷ് തന്റെ ആഡംബര കാർ റോഡരികിലേക്ക് ഒതുക്കി നിർത്തി. തുടർന്ന് ഇരുവരും പരസ്പരം താക്കോൽ കൈമാറി. രാകേഷ് ഓട്ടോയുടെ സീറ്റിലും ഓട്ടോ ഡ്രൈവർ ലംബോർഗിനിയുടെ സീറ്റിലും കയറി. ശേഷം ഇരുവരും ഈ വാഹനങ്ങളുമായി മുന്നോട്ടുപോകുന്നതോടെയാണ് വീഡിയോ അവസാനിക്കുന്നത്.

ഇതിനൊപ്പം ഒരു കുറിപ്പും രാകേഷ് പങ്കുവെച്ചിട്ടുണ്ട്. 'മറക്കാനാകാത്ത ഒരു നിമിഷത്തിനായി ഞാൻ എന്റെ ലംബോർഗിനി കൊടുത്ത് റിസ്‌ക്കെടുത്തു. സത്യം പറഞ്ഞാൽ ആ ഓട്ടോ ഓടിച്ചപ്പോൾ എന്റെ മനസ് നിറഞ്ഞു. ഓട്ടോ മീറ്ററിലെ പൈസ നൽകാൻപോലും ബുദ്ധിമുട്ടിയിരുന്ന എന്റെ പഴയ കഷ്ടപ്പാട് നിറഞ്ഞ കാലത്തേക്ക് ഇത് എന്നെ കൂട്ടുക്കൊണ്ടുപോയി.'-രാകേഷ് കുറിച്ചു.