'നസിയുടെ നില്‍പ്പില്‍ എന്തോ പന്തികേടുള്ളത് പോലെ എനിക്ക് തോന്നി. ഭയങ്കരമായ ഒരു രഹസ്യം പറയാനെന്നപോലെ അവള്‍ നാലുപാടും നോക്കുന്നുമുണ്ട്. ഇനി ഇവള് മറ്റേതെങ്കിലും പ്രേമത്തില്‍ അകപ്പെട്ടിട്ടുണ്ടാകുമോ. എനിക്ക് സംശയമായി. എന്റെ സംശയത്തെ സാധൂകരിക്കുന്നത് പോലെ പെട്ടന്ന് ഞങ്ങളുടെ പിന്നില്‍ നിന്നും ഒരു സൈക്കിളിന്റെ ബെല്ലടി ശബ്ദം കേട്ടു. തോല് സലീമാണ്. കഴുത്തില്‍ വട്ടം ചുറ്റിയിട്ടിരുന്ന സ്‌കാര്‍ഫിന്റെ തുമ്പെടുത്ത് മുഖം തുടച്ച് കൊണ്ട് സലീം കടന്നുപോകാനായി നസി കാത്തുനിന്നു. എന്നാല്‍ ചവുട്ടിയിട്ടും മുന്നോട്ട് പോകാത്തത് പോലെ സൈക്കിളിന്റെ ഹാന്‍ഡില്‍ വെട്ടിച്ച് സലിം ഞങ്ങളുടെ മുന്നില്‍ നിന്ന് പമ്മിക്കളിച്ചു. അപ്പോള്‍ നസിയുടെ വീടിന് മുന്‍പിലെ ആത്ത മരത്തിന്റെ കൊമ്പിലൊരു കൂവിവിളി കേട്ടു. ഏതോ കുയില്‍ സമയം തെറ്റി പാടുകയാണ്. കുയിലിന്റെ കൂവലിന്റെ തുടര്‍ച്ചപോലെ സൈക്കിളില്‍ കാല് കുത്തിനിന്ന സലീമും കൂവാന്‍ തുടങ്ങി. കൂവി കൂവി സലീമും കുയിലും ഒരു പോലെ തോറ്റതായി എനിക്ക് തോന്നി. ഇതൊക്കെ കണ്ടും കേട്ടും നിന്ന നസി ഇവനിത് എന്തോത്തിന്റെ സോക്കേടാന്ന് അരിശംപൂണ്ടു. ഒടുവില്‍ എടീ നീയിങ്ങോട്ട് വന്നേന്നും പറഞ്ഞ് എന്റെ കൈക്ക് പിടിച്ച് വീടിന്റെ അടുക്കളവശത്തേക്ക് കുട്ടിക്കൊണ്ടുപോയി അടക്കിപിടിച്ചുവച്ച രഹസ്യത്തിന്റെ ചുരുള്‍ തുറന്നു.
'പിന്നെ നാളെ ഞാനും നിന്റെ കൂടെ കോളേജില് വരുന്ന്'. രഹസ്യഭാരം ഒഴിഞ്ഞ് നസി നിശ്വസിച്ചു. ഒന്‍പതാം ക്ലാസില്‍ പഠിത്തം നിര്‍ത്തി അടുക്കളഭരണം ഏറ്റെടുത്ത നസി കോളേജില് വരികയോ? ഇവള് എന്തൊക്കെയാണ് പറയുന്നത്? ഞാന്‍ നസിക്ക് മുന്നില്‍ യാതൊന്നും പിടികിട്ടാത്തത് പോലെ വായും പൊളിച്ച് നിന്നു. 'എന്തുവാടീ നീയിങ്ങനെ മിഴിച്ച് നോക്കുന്നത്. ഞാന്‍ കോളേജില് വരുന്നെന്നല്ലിയോ പറഞ്ഞത്, കള്ളുഷാപ്പിലേക്കല്ലല്ലോ'. നസിയുടെ ചോദ്യത്തില്‍ ന്യായമുണ്ട്. കായംകുളം എം.എസ്.എം കോളേജില് ലൈനടിക്കാനായി മാത്രം പുറത്ത് നിന്നും വരുന്ന ആണ്‍കുട്ടികള്‍ കാമ്പസിലെ സ്ഥിരം കാഴ്ച്ചയാണ്. അവളുടെ വരവിന് അങ്ങനെയുള്ള ദുരുദ്ദേശ്യമൊന്നുമില്ലല്ലോ? പിന്നെ വന്നാലെന്ത് എന്ന് ഞാന്‍ ആലോചിച്ചു. അത് തന്നെയുമല്ല, ആഗ്രഹങ്ങള്‍ക്ക് ആണും പെണ്ണും എന്ന വ്യത്യാസം അനീതി തന്നെയാണ്. ആഗ്രഹങ്ങളുടെ തടാകത്തില്‍ നീന്തി അവളും യഥേഷ്ടം ഉല്ലസിക്കട്ടെ. ഇങ്ങനെയൊക്കെ പലതും ഞാന്‍ ചിന്തിച്ച് നില്‍ക്കുന്നത് കണ്ട് നസിയുടെ മുഖം വാടി. കാരണം, എന്നില്‍ നിന്നും ആവേശപൂര്‍ണമായ ഒരു സ്വീകരണമായിരുന്നു അവള്‍ പ്രതീക്ഷിച്ചിരുന്നത്. 'നീ വീട്ടീ പറഞ്ഞോ' ഞാനവളോട് ചോദിച്ചു.
'ഇല്ലടീ നാളെ വീട്ടീന്ന് എല്ലാരും കൊല്ലത്ത് പോകുവാ. ആ സമയത്ത് നമ്മുക്ക് പോകാം, ഇവിടാരും അറിയണ്ട'. അപ്പോള്‍ കാര്യങ്ങളുടെ കിടപ്പ് ആകെ കുഴപ്പത്തിലാണ്. സംഗതി പുലിവാലാകുമോ എന്ന ശങ്ക തോന്നിയെങ്കിലും അതൊന്നും പുറമേ പ്രകടിപ്പിക്കാതെ കോളേജില് കൂട്ടിക്കൊണ്ട് പോകാമെന്ന് വാക്ക് നല്‍കിയപ്പോള്‍ അവളുടെ മുഖം താമരപ്പൂവ് പോലെ വിടര്‍ന്നു. ദുര്‍ബല മനസ്സാണങ്കിലും ചില കാര്യങ്ങളില്‍ അവള്‍ക്ക് അസാമാന്യമായ ധൈര്യമാണ്. അതുപോലെ വിധിയിലും വിധി നിശ്ചയത്തിലുമൊക്കെ അവള്‍ക്ക് വളരെയധികം വിശ്വാസവുമുണ്ട്. ആവശ്യമുള്ളിടത്തും ഇല്ലാത്തിടത്തുമൊക്കെ വെറുതെ വിധിയെ പിടിച്ചിടും. അതാണ് അവളുടെ രീതി.'
പിറ്റേ ദിവസം രാവിലെ മുതല്‍ നസിയെ കാമ്പസിലേക്ക് കൊണ്ട് പോകാനുള്ള ഒരുക്കങ്ങള്‍ തുടങ്ങി. എന്റെ കടുംപച്ച നിറത്തിലുള്ള ചുരിദാര്‍ ധരിപ്പിച്ച് നടപ്പും ഭാവവും കൊണ്ട് എങ്ങനെ ഒരു കോളേജ് കുമാരിയാകാം എന്ന പരിശീലനം ആദ്യം നല്‍കി. പാവാടയും ഉടുപ്പും എന്നതില്‍ നിന്നും മാറി ഫ്രില്ലുകള്‍ ചേര്‍ത്ത് തയ്‌ച്ചെടുത്ത പച്ച ചുരിദാര്‍ അണിഞ്ഞപ്പോള്‍ അവളുടെ കണ്ണുകളില്‍ അതിശയത്തിളക്കം ഞാന്‍ കണ്ടു. തുണി കഴുകാനായി ഉപയോഗിച്ചിരുന്ന അഞ്ഞൂറ്റിയൊന്നിന്റെ ബാർസോപ്പാണ് അവള്‍ കുളിക്കാനും ഉപയോഗിച്ചിരുന്നത്. തലേ ദിവസം ഞാന്‍ നല്‍കിയ നിര്‍ദ്ദേശമനുസരിച്ച് മുടി കഴുകി ഉണക്കി പറത്തിയിട്ടപ്പോള്‍ വെളിച്ചണ്ണമണവും ബാര്‍സോപ്പിന്റെ മണവും കൂടി കലര്‍ന്ന് സുഖകരമല്ലാത്തൊരു ഗന്ധം അവളെ ചൂഴ്ന്ന് നിന്നു. അത് മറയ്ക്കാനായി അവള്‍ ഉപ്പ തുണിപ്പെട്ടിയില്‍ സൂക്ഷിച്ച് വെച്ചിരുന്ന അത്തറെടുത്ത് തലയിലും ദേഹത്തുമെല്ലാം തേച്ച് പിടിപ്പിച്ചു. ഐ ലൈനര്‍ കൊണ്ട് കണ്ണെഴുതിക്കൊടുത്തപ്പോള്‍ കരിമാത്രം എഴുതി ശീലിച്ച കണ്ണുകള്‍ നീരുറവയായി. ബീറ്റ്‌റൂട്ടിന്റെ ചെറിയ കഷണമെടുത്ത് ചുണ്ടില്‍ തേച്ചുപിടിപ്പിച്ച് കളറ് കൂട്ടി. ഒരുക്കമെല്ലാം പൂര്‍ത്തിയായി പുറത്ത് വന്ന നസിയുടെ മേക്ക് ഓവര്‍ കണ്ട് അയലത്തെ പെണ്ണുങ്ങള്‍ വാ പൊളിച്ചു നിന്നു. 'യ്യോ ഇപ്പോ ഇവള് സിനിമാനടി പാര്‍വതിയെ പോലെയുണ്ട്'. ചിലര്‍ അതിശയം കൂറി. അത് കേട്ട് അവളുടെ ഉണ്ടക്കണ്ണുകള്‍ തിളങ്ങി. അവളെയും കൂട്ടി കാമ്പസിലേക്ക് പോകുമ്പോള്‍ ഒരു സൗന്ദര്യധാമം ഒപ്പമുണ്ട് എന്ന അഭിമാനബോധത്താല്‍ എന്റെ തല ഉയര്‍ന്നു നിന്നു.
രണ്ടാകുറ്റിയില്‍ നിന്ന് കായംകുളത്തേക്ക് ബസ്സ് കയറിയതും കണ്ടക്ടറുടെ ശ്രദ്ധ അവളിലായി. പല പ്രാവശ്യം അവള്‍ക്കരികിലൂടെ മുട്ടിയുരുമ്മി നടന്നു. ബസ്സിറങ്ങിയതും സ്റ്റോപ്പില്‍ നിന്ന പൂവാലന്‍മാര്‍ ഞങ്ങളുടെ പിന്നാലെ കൂടി. ചിലര്‍ അവളോട് പേര് ചോദിച്ചു. പഠിക്കുന്നതിനെക്കുറിച്ച് ചോദിച്ചു. എല്ലാ ചോദ്യങ്ങള്‍ക്കും മറുപടിയായി എല്ലാവരേയും അവള്‍ ചിരിച്ച് കാണിച്ചു. കാമ്പസിലെത്തുന്നതിന് മുന്‍പ് അഭിമുഖീകരിക്കേണ്ടിവരുന്ന കുറച്ച് ചോദ്യങ്ങള്‍ നേരിടാന്‍ ഇതിനിടെ അവളെ ഞാന്‍ പരിശീലിപ്പിച്ചു. 'കാമ്പസില്‍ ആര് ചോദിച്ചാലും ഞാന്‍ നിന്റെ അനിയത്തിയാണന്ന് പറഞ്ഞേക്കണം. എന്തിന് പഠിക്കുന്നു എന്ന് ചോദ്യം വന്നാല്‍ കൊല്ലത്ത് എസ്എന്‍ കോളേജില് ഡിഗ്രിക്ക് പഠിക്കുന്നു എന്ന് പറയണം, ബാക്കിയൊക്കെ ഞാന്‍ പറഞ്ഞോളം കേട്ടോ'. ഞാന്‍ പറഞ്ഞതെല്ലാം അവള്‍ സമ്മതിച്ചു.
Content Highlights: memories jaseena rahim, friend, college
Published: 30 Mar 2025, 11:00 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented