മെഡിക്കല് ലാബുകളില് നിന്നുള്ള പരിശോധനാ ഫലങ്ങളോ ഡോക്ടര്മാരുടെ വെളിപ്പെടുത്തലുകളോ പലപ്പോഴും ജീവിതങ്ങള് തന്നെ മാറ്റിമറിക്കും. രോഗികള്ക്കും അവരുടെ കുടുംബങ്ങള്ക്കും വലിയ ആഘാതമായിക്കൊണ്ടാണ് ബ്രെയ്ന് ട്യൂമര് അഥവാ മസ്തിഷ്ക മുഴ എന്ന രോഗബാധയെക്കുറിച്ചുള്ള വിവരങ്ങള് എത്തുന്നത്.
ആഗോളതലത്തില് ബ്രെയിന് ട്യൂമറുകള് ഒരു പ്രധാന ആരോഗ്യ പ്രശ്നമായി മാറിക്കൊണ്ടിരിക്കുന്നതായാണ് സ്ഥിതിവിവരക്കണക്കുകള് വ്യക്തമാക്കുന്നത്. ഇന്ത്യയില്, ഓരോ വര്ഷവും ഏകദേശം 30,000 പുതിയ ബ്രെയിന് ട്യൂമര് കേസുകള് കണ്ടെത്തുന്നതായി കണക്കുകള് പറയുന്നു. ഇന്ത്യയിലെ കാന്സര് കേസുകളില് ഏകദേശം രണ്ടു ശതമാനം ബ്രെയിന് ട്യൂമറുകളാണ്. കേരളത്തില്, ദേശീയ ശരാശരിയുമായി താരതമ്യപ്പെടുത്തുമ്പോള് ബ്രെയിന് ട്യൂമറുകളുടെ നിരക്ക് താരതമ്യേന കൂടുതലാണ്. ഒരു ലക്ഷം ജനസംഖ്യയില് ഏകദേശം ഈ നിരക്ക് 3.4 ആണ്.
ആഗോളതലത്തില്, കുട്ടികളിലും കൗമാരക്കാരിലും ക്യാന്സറുമായി ബന്ധപ്പെട്ട മരണങ്ങളുടെ പ്രധാന കാരണങ്ങളിലൊന്ന് ബ്രെയിന് ട്യൂമറുകളാണ്. പ്രായപൂര്ത്തിയായവരില് രോഗാവസ്ഥയ്ക്കും മരണത്തിനും ഒരു പ്രധാന കാരണവും അവയാണ്. ഓരോ വര്ഷവും, മാരകമായ മസ്തിഷ്ക മുഴകളുടെ 2,50,000-ത്തിലധികം കേസുകള് ലോകമെമ്പാടും റിപ്പോര്ട്ട് ചെയ്യപ്പെടുന്നു, അമേരിക്കയില് മാത്രം ഏകദേശം 70,000 കേസുകളുണ്ട്.
ഈ സ്ഥിതിവിവരക്കണക്കുകള് മസ്തിഷ്ക മുഴകള്ക്കുള്ള അവബോധം, ഗവേഷണം, മെച്ചപ്പെട്ട ചികിത്സാ ഓപ്ഷനുകള് എന്നിവയുടെ അടിയന്തിര ആവശ്യകതയെയാണ് എടുത്തുകാണിക്കുന്നത്. എല്ലാ വര്ഷവും ജൂണ് 8 ന്, ലോക ബ്രെയിന് ട്യൂമര് ദിനം ആചരിക്കുന്നതിലൂടെ മസ്തിഷ്ക മുഴകളും അനുബന്ധ പ്രശ്നങ്ങളും ആഗോള ശ്രദ്ധയിലേക്ക് വരുന്നു എന്നതു നാം കാണാതെ പോകരുത്. മസ്തിഷ്ക മുഴകള്ക്കുള്ള ലക്ഷണങ്ങള്, കാരണങ്ങള്, ലഭ്യമായ ചികിത്സകള് എന്നിവയെക്കുറിച്ച് അവബോധം വളര്ത്തുക, നൂതന ചികിത്സാ മാര്ഗ്ഗങ്ങള് പ്രോത്സാഹിപ്പിക്കുകയും, രോഗ ബാധിതര്ക്ക് സമൂഹത്തിന്റെ പിന്തുണയും ഐക്യദാര്ഢ്യവും നല്കുകയും ചെയ്യുക എന്ന ദൗത്യം കൂടി ഇതിലൂടെ നടപ്പാക്കാനാണ് ദിനാചരണം കൊണ്ട് ലക്ഷ്യമിടുന്നത്.
ബ്രെയിന് ട്യൂമറുകള്
മസ്തിഷ്ക ട്യൂമറുകള് തലച്ചോറിലെ അല്ലെങ്കില് ചുറ്റുമുള്ള കോശങ്ങളുടെ അസാധാരണ വളര്ച്ചയാണ്. അവ ഒന്നുകില് ദോഷകരമോ (അര്ബുദമല്ലാത്തതോ) മാരകമോ (കാന്സര്) ആകാം. ബ്രെയിന് ട്യൂമറുകളുടെ കൃത്യമായ കാരണങ്ങള് പൂര്ണ്ണമായി മനസ്സിലായിട്ടില്ലെങ്കിലും, ജനിതക കാരണങ്ങള്, റേഡിയേഷന് എക്സ്പോഷര്, പാരമ്പര്യ അവസ്ഥകള് തുടങ്ങിയ ചില ഘടകങ്ങള് അപകടസാധ്യത വര്ധിപ്പിക്കും. ബ്രെയിന് ട്യൂമറുകള് കുട്ടികള് മുതല് മുതിര്ന്നവര് വരെ എല്ലാ പ്രായത്തിലുമുള്ള വ്യക്തികളെയും ബാധിക്കും.
രോഗലക്ഷണങ്ങള് തിരിച്ചറിയുക, നേരത്തെ കണ്ടെത്തുക
ലോക ബ്രെയിന് ട്യൂമര് ദിനത്തിന്റെ പ്രാഥമിക ലക്ഷ്യങ്ങളിലൊന്ന് ബ്രെയിന് ട്യൂമറുമായി ബന്ധപ്പെട്ട ലക്ഷണങ്ങളെക്കുറിച്ചുള്ള അവബോധം വര്ധിപ്പിക്കുക എന്നതാണ്. ഈ ലക്ഷണങ്ങള് തിരിച്ചറിയുന്നത് നേരത്തെ രോഗം കണ്ടെത്തുന്നതിനും സമയബന്ധിതമായ മെഡിക്കല് ഇടപെടലുകള്ക്കും നിര്ണായകമാണ്. മുഴയുടെ സ്ഥാനത്തെയും വലുപ്പത്തെയും ആശ്രയിച്ച് ലക്ഷണങ്ങള് വ്യത്യാസപ്പെടാം, എന്നാല് നിരന്തരമായ തലവേദന, അപസ്മാരം, വൈജ്ഞാനിക കഴിവുകളിലെ മാറ്റങ്ങള്, വൈകാരികമായ അസ്വസ്ഥതകള്, ബാലന്സ് പ്രശ്നങ്ങള്, വ്യക്തിത്വ മാറ്റങ്ങള് എന്നിവ ലക്ഷണങ്ങളില് ഉള്പ്പെടാം. ഇതില് എന്തെങ്കിലും ഉണ്ടായാല് ഉടന് വൈദ്യസഹായം തേടേണ്ടത് പ്രധാനമാണ്.
പരമ്പരാഗത ചികിത്സകളും മുന്കരുതലുകളും
മസ്തിഷ്ക മുഴകള്ക്കുള്ള ചികിത്സാ മാര്ഗ്ഗങ്ങള് മുഴയുടെ തരം, വലിപ്പം, സ്ഥാനം എന്നിവ ഉള്പ്പെടെ വിവിധ ഘടകങ്ങളെ ആശ്രയിച്ചിരിക്കുന്നു. ശസ്ത്രക്രിയ, റേഡിയേഷന് തെറാപ്പി, കീമോതെറാപ്പി എന്നിവ പരമ്പരാഗത സമീപനങ്ങളില് ഉള്പ്പെടുന്നു. ട്യൂമര് പരമാവധി നീക്കം ചെയ്യുക എന്നതാണ് ശസ്ത്രക്രിയയുടെ ലക്ഷ്യം. ശേഷിക്കുന്ന ക്യാന്സര് കോശങ്ങളെ നശിപ്പിക്കുന്നതിനായാണ് റേഡിയേഷന് തെറാപ്പിയും കീമോതെറാപ്പിയും ചെയ്യുന്നത്. എന്നിരുന്നാലും, ഈ ചികിത്സകളുമായി ബന്ധപ്പെട്ടുണ്ടാകുന്ന പാര്ശ്വഫലങ്ങളെക്കുറിച്ചും നമ്മള് ബോധവാന്മാരാകേണ്ടതുണ്ട്.
മെഡിക്കല് സയന്സിലെ ആധുനികനേട്ടങ്ങളുടെ ഭാഗമായി നൂതനമായ ചികിത്സാരീതികള് നിലവില് വന്നു. മിനിമലി ഇന്വേസീവ് ശസ്ത്രക്രിയാ സാങ്കേതികതകളും നൂതന ഇമേജിംഗ് സാങ്കേതികവിദ്യകളും ശസ്ത്രക്രിയയുടെ കൃത്യത മെച്ചപ്പെടുത്തിയിട്ടുണ്ട്, ഇത് രോഗികള്ക്ക് മികച്ച ഫലം ലഭ്യമാക്കാന് സഹായിക്കുന്നു.
ടാര്ഗെറ്റഡ് തെറാപ്പികളും ഇമ്യൂണോതെറാപ്പിയും ചില രോഗികളില് നല്ല ഫലങ്ങള് കാണിക്കുന്നു. പ്രത്യേക മരുന്നുകള് ഉപയോഗിക്കുകയോ അല്ലെങ്കില് ശരീരത്തിന്റെ പ്രതിരോധ സംവിധാനത്തെ കൂടുതല് ഫലപ്രദമായി കാന്സര് കോശങ്ങളെ ലക്ഷ്യം വയ്ക്കുകയോ ചെയ്യുന്ന ചികിത്സാ രീതികളിലൂടെ ആരോഗ്യകരമായ മസ്തിഷ്ക കോശങ്ങളുടെ കേടുപാടുകള് കുറയ്ക്കുന്നു.
പിന്തുണയും ശാക്തീകരണവും
ഒരാള്ക്ക് ബ്രെയിന് ട്യൂമര് ആണെന്ന് തിരിച്ചറിഞ്ഞാല് രോഗികള്ക്കും അവരുടെ പ്രിയപ്പെട്ടവര്ക്കും വൈകാരികമായും ശാരീരികമായും വെല്ലുവിളി നിറഞ്ഞ സാഹചര്യമാണ് അന്നു മുതല് സൃഷ്ടിക്കപ്പെടുന്നത്. ലോക ബ്രെയിന് ട്യൂമര് ദിനം പിന്തുണയുടെയും ശാക്തീകരണത്തിന്റെയും പ്രാധാന്യം ഊന്നിപ്പറയുന്നു. മാര്ഗനിര്ദേശം, ജീവിതശൈലീ മാറ്റങ്ങള് എന്നിവ നല്കുന്നതില് രോഗികളുടെ സപ്പോര്ട്ട് ഗ്രൂപ്പുകള്, കൗണ്സിലിംഗ് സേവനങ്ങള് എന്നിവയുടെ പങ്ക് പ്രധാനമാണ്. ജീവിതത്തില് മുന്നോട്ടുള്ള യാത്ര മനസ്സിലാക്കുന്ന മറ്റുള്ളവരുമായി ബന്ധപ്പെടുന്നത് വലിയ ആശ്വാസവും ശക്തിയും പ്രദാനം ചെയ്യും. ശാസ്ത്രജ്ഞര്, ഡോക്ടര്മാര്, രോഗികള്, ഫണ്ടിംഗ് ഓര്ഗനൈസേഷനുകള് എന്നിവയ്ക്കിടയിലുള്ള സഹകരണം ശാസ്ത്രീയ മുന്നേറ്റത്തിന് അത്യന്താപേക്ഷിതമാണ്. ഫണ്ട് സ്വരൂപിക്കുന്നതിലൂടെയും ക്ലിനിക്കല് ട്രയലുകള്ക്ക് പിന്തുണ നല്കുന്നതിലൂടെയും ഗവേഷണ ശ്രമങ്ങളെ പ്രോത്സാഹിപ്പിക്കുന്നതിലൂടെയും ബ്രെയിന് ട്യൂമറുകളെക്കുറിച്ചുള്ള നമ്മുടെ ധാരണ വര്ധിപ്പിക്കാനും ശോഭനമായ ഭാവിക്ക് പ്രതീക്ഷ നല്കാനും നമുക്ക് കഴിയും.
രോഗത്തെക്കുറിച്ച് ജനങ്ങള്ക്കുള്ള അവബോധം വര്ധിപ്പിക്കുന്നതിലൂടെ, മസ്തിഷ്ക മുഴകളെ നേരത്തെ തന്നെ കണ്ടുപിടിക്കാനും അവയുടെ ആഘാതം കുറയ്ക്കുന്നതിനും രോഗികള്ക്ക് ഫലങ്ങള് മെച്ചപ്പെടുത്തുന്നതിനും കൂടുതല് ഫലപ്രദമായ ചികിത്സകള് കണ്ടെത്തുന്നതിനും ആത്യന്തികമായി ഒരു രോഗശമനം കണ്ടെത്തുന്നതിനും നമുക്ക് പരിശ്രമിക്കാം.
കോഴിക്കോട് മേയ്ത്ര ഹോസ്പിറ്റലിൽ സെന്റര് ഫോര് ന്യൂറോസയന്സസ് വിഭാഗം കണ്സല്ട്ടന്റ് ആണ് ലേഖകൻ
Content Highlights: Brain tumor Symptoms and causes, World Brain Tumor Day
Published: 08 Jun 2023, 10:10 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented