കോണ്‍ഗ്രസ് ദേശീയ അധ്യക്ഷന്‍ മല്ലികാര്‍ജുന്‍ ഖാര്‍ഗെയെ രാഹുല്‍ ഗാന്ധി സീറ്റില്‍ നിന്ന് എഴുന്നേല്‍പ്പിച്ച് വിട്ടുവെന്ന രീതിയില്‍ ഒരു വീഡിയോ ഇപ്പോള്‍ സോഷ്യല്‍ മീഡിയയില്‍
വൈറലാണ്. സോണിയ ഗാന്ധിയുടെ സമീപം ഇരിക്കുന്ന മല്ലികാര്‍ജുന്‍ ഖാര്‍ഗെ എഴുന്നേല്‍ക്കുന്നതും കസേരകള്‍ക്ക് പിന്നിലൂടെ നടന്നു നീങ്ങുന്നതും 23 സെക്കന്റ് ദൈര്‍ഘ്യമുള്ള ദൃശ്യങ്ങളില്‍ കാണാം. ഖാര്‍ഗെ എഴുന്നേല്‍ക്കുമ്പോള്‍ രാഹുല്‍ഗാന്ധി സമീപത്തേയ്ക്ക് വന്ന് കസേര നീക്കുന്നുണ്ട്.
''എ ഐ സി സി പ്രസിഡന്റിന്റെ ഗതികേട് നോക്കണേ ?? അടുത്തു വേറെ കസേരകളുണ്ട് .എന്നാലും, അച്ഛനേക്കാള്‍ പ്രായമുള്ളയാളെ എഴുന്നേല്‍പ്പിച്ചിട്ടുതന്നെ ആ കസേരയില്‍ത്തന്നെ ഇരിക്കണം . അപമാനിതനായ ആ വൃദ്ധന്‍ അടുത്തു മറ്റൊരു സീറ്റുണ്ടായിട്ടും അതിലേക്ക് മാറിയിരിക്കാതെ പ്രാഞ്ചി പ്രാഞ്ചി വേദി വിടുന്നത് കണ്ടോ?'' എന്നാണ് പ്രചരിക്കുന്ന പോസ്റ്റിനൊപ്പമുള്ള കുറിപ്പില്‍ പറയുന്നത്.
https://www.facebook.com/abhilash.gnair.7/videos/1540012170639496
എന്നാല്‍, പ്രചരിക്കുന്ന പോസ്റ്റുകള്‍ തെറ്റിദ്ധരിപ്പിക്കുന്നതാണെന്ന് അന്വേഷണത്തില്‍ കണ്ടെത്തി.
അന്വേഷണം
വൈറല്‍ വീഡിയോയുടെ കീഫ്രെയ്മുകള്‍ റിവേഴ്‌സ് ഇമേജില്‍ സെര്‍ച്ച് ചെയ്തപ്പോള്‍ സമാന പശ്ചാത്തലത്തിലുള്ള ചിത്രം മാധ്യമങ്ങളില്‍ പങ്കുവച്ചിട്ടുള്ളതായി കണ്ടെത്തി.റിപ്പോര്‍ട്ടുകളില്‍ നിന്ന് കോണ്‍ഗ്രസിന്റെ പുതിയ ആസ്ഥാന മന്ദിരമായ ഇന്ദിരാ ഭവന്‍ ഉദ്ഘാടന ചടങ്ങില്‍ നിന്നുള്ള ദൃശ്യമാണിത് എന്ന് വ്യക്തമായി. ഡല്‍ഹിയിലെ കോട്‌ല റോഡിലുള്ള കോണ്‍ഗ്രസിന്റെ പുതിയ ആസ്ഥാന മന്ദിരം ജനുവരി 15ന് സോണിയ ഗാന്ധിയാണ് ഉദ്ഘാടനം ചെയ്തത്.
ഈ സൂചന ഉപയോഗിച്ച് തിരഞ്ഞപ്പോള്‍ ഇന്ദിരാ ഭവന്‍ ഉദ്ഘാടന ചടങ്ങിന്റെ ദൈര്‍ഘ്യമേറിയ വീഡിയോകള്‍ ലഭ്യമായി. ന്യൂസ് 9 ലെവ് പങ്കുവച്ച തത്സമയ വീഡിയോ പരിശോധിച്ചപ്പോള്‍ വൈറല്‍ പോസ്റ്റില്‍ ഉപയോഗിച്ചിട്ടുള്ള ക്ലിപ്പ് കണ്ടെത്താനായി. ഔപചാരികമായ ഉദ്ഘാടന ചടങ്ങ് കഴിഞ്ഞ് സമ്മേളനം നടക്കുന്ന വേദിയില്‍ ആദ്യം സംസാരിക്കുന്നത് രാഹുല്‍ ഗാന്ധിയാണ്. തുടര്‍ന്ന് എഐസിസി അധ്യക്ഷന്‍ മല്ലികാര്‍ജുന്‍ ഖാര്‍ഗെയെ പ്രസംഗത്തിനായി ക്ഷണിക്കുന്നതും കാണാം. ഈ സമയത്താണ് അദ്ദേഹം കസേരയില്‍ നിന്ന് എഴുന്നേല്‍ക്കുന്നത്. ഖാര്‍ഗെയെ സീറ്റില്‍ നിന്ന് എഴുന്നേല്‍ക്കാന്‍ രാഹുല്‍ ഗാന്ധി സഹായിക്കുന്നുണ്ട്. തുടര്‍ന്ന് ഖാര്‍ഗെ പോഡിയത്തിലേക്ക് പോയി സംസാരിക്കുന്നു.
ഏകദേശം 15 മിനിറ്റ് നേരം നേരം ഖാര്‍ഗെ സദസിനെ അഭിസംബോധന ചെയ്ത് സംസാരിക്കുന്നുണ്ട്. ശേഷം അദ്ദേഹം ആദ്യം ഇരുന്ന സ്ഥലത്ത് (സോണിയ ഗാന്ധിയുടെ സമീപമുള്ള കസേരയില്‍) തിരികെ വന്നിരിക്കുന്നതും വീഡിയോയില്‍ കാണാം ഇന്ത്യന്‍ നാഷണല്‍ കോണ്‍ഗ്രസിന്റെ ഔദ്യോഗിക യുട്യൂബ് പേജിലും ഈ വീഡിയോ പങ്കുവച്ചിട്ടുണ്ട്. ഈ വീഡിയോയിലും രാഹുല്‍ ഗാന്ധി ഇരിക്കുന്നത് മല്ലികാര്‍ജുന്‍ ഖാര്‍ഗെയ്ക്കും കെസി വേണുഗോപാലിനും മധ്യത്തിലാണെന്ന് വ്യക്തമാണ്. ലഭ്യമായ വിവരങ്ങളില്‍ നിന്ന് മല്ലികാര്‍ജുന്‍ ഖാര്‍ഗെയെ എഴുന്നേല്‍പ്പിച്ച് വിട്ട ശേഷം രാഹുല്‍ ഗാന്ധി അവിടെയിരുന്നുവെന്നും അപമാനിതനായ ഖാര്‍ഗെ വേിദിവിട്ട് പോയെന്നുമുള്ള പ്രചാരണം തെറ്റിദ്ധരിപ്പിക്കുന്നതാണെന്ന് വ്യക്തമായി.
കോണ്‍ഗ്രസിന്റെ ഡല്‍ഹിയിലെ പുതിയ ആസ്ഥാന മന്ദിരം ഉദ്ഘാടനം ചെയ്യുന്ന ചടങ്ങില്‍ പ്രസംഗിക്കാനായി മല്ലികാര്‍ജുന്‍ ഖാര്‍ഗെ സീറ്റില്‍ നിന്ന് എഴുന്നേല്‍ക്കുന്നതിന്‍റെ ദൃശ്യങ്ങളാണ് തെറ്റായി പ്രചരിക്കുന്നത്. ഖാര്‍ഗെയെ എഴുന്നേല്‍ക്കാന്‍ സഹായിക്കുകയായിരുന്നു രാഹുല്‍ ഗാന്ധി.
( വ്യാജ പ്രചാരണങ്ങൾ തടയാൻ രൂപീകരിച്ച ശക്തി കളക്ടീവിന്റെ ( https://projectshakti.in/ ഭാഗമായി ഇന്ത്യടുഡേ ( https://malayalam.indiatoday.in/fact-check/story/fact-check-no-rahul-gandhi-did-not-insult-kharge-the-viral-video-was-clipped-1157096-2025-01-19 പ്രസിദ്ധീകരിച്ച ഫാക്ട് ചെക്ക്.)
Content Highlights: Viral Video of Kharge & Rahul Gandhi: Fact Check
Published: 22 Jan 2025, 08:22 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented