മുംബൈ: ബോളിവുഡ് താരം ടൈഗർ ഷ്രോഫിന് നേരെയുണ്ടായ ആക്രമണത്തിന് മുൻപ് നടൻ സൽമാൻ ഖാനെ വെടിവച്ചു വീഴ്ത്താനായിരുന്നു ലോറൻസ് ബിഷ്ണോയ് ഗാങ് അംഗങ്ങൾ പദ്ധതിയിട്ടിരുന്നതെന്ന് റിപ്പോർട്ട്. ആക്രമണം നടത്തിയ മൂന്ന് പേർക്ക് പുറമേ ഗൂഢാലോചനയുമായി ബന്ധപ്പെട്ട് രണ്ടു സ്ത്രീകൾ ഉൾപ്പെടെ നാലുപേരെ ഡൽഹി പോലീസ് സ്പെഷ്യൽ സെൽ അറസ്റ്റ് ചെയ്തിരുന്നു. ഡൽഹിയിൽ പിടിയിലായ പ്രതികൾ ചോദ്യം ചെയ്യലിൽ ഇക്കാര്യം വെളിപ്പെടുത്തിയതായി ന്യൂസ് 18 റിപ്പോർട്ട് ചെയ്തു.

To advertise here,

സൽമാൻ ഖാനെ അദ്ദേഹത്തിന്റെ മുംബൈയിലെ വസതിക്ക് മുന്നിൽ വെച്ച് വെടിവെച്ചു വീഴ്ത്താനായിരുന്നു അക്രമികൾ പദ്ധതിയിട്ടിരുന്നത്. എന്നാൽ സൽമാൻ ഖാന്റെ ബാന്ദ്രയിലുള്ള ‘ഗാലക്സി അപ്പാർട്ട്മെന്റിന്' മുന്നിൽ കനത്ത പോലീസ് സുരക്ഷയും ബാന്ദ്ര പോലീസ് സ്റ്റേഷന്റെ പട്രോളിങ് വാനും ബുള്ളറ്റ് പ്രൂഫ് ജാക്കറ്റ് ധരിച്ച പോലീസുകാരെയും കണ്ടതിനെ തുടർന്ന് ഇവർ പദ്ധതി ഉപേക്ഷിച്ച് മടങ്ങുകയായിരുന്നു. പുതിയ വെളിപ്പെടുത്തലുകളുടെ പശ്ചാത്തലത്തിൽ ഗാലക്സി അപ്പാർട്ട്മെന്റിന് മുന്നിലും റോഡിന്റെ ഇരുവശങ്ങളിലുമായി പോലീസ് സുരക്ഷ കർശനമാക്കിയിട്ടുണ്ട്.

ഒക്ടോബർ 18 ഞായറാഴ്ച വൈകുന്നേരം ഏഴ് മണിയോടെ മുംബൈ ജൂഹുവിലെ ഫുട്ബോൾ ക്ലബ്ബിൽനിന്ന് മടങ്ങുകയായിരുന്ന ടൈഗർ ഷ്രോഫിന്റെ കാറിന് നേരെ പ്രതികൾ ഏഴ് റൗണ്ട് വെടിയുതിർക്കുകയായിരുന്നു. തോക്ക് ജാം ആയതിനാൽ കൂടുതൽ വെടിയുതിർക്കാൻ സാധിക്കാതെ പ്രതികൾ ഓടി രക്ഷപ്പെട്ടു. ആക്രമണത്തിൽ കാറിന്റെ ഗ്ലാസ് കഷണങ്ങളും വെടിമരുന്നും തട്ടി ടൈഗറിന്റെ ഇടതുകൈക്കും കാർ ഡ്രൈവർക്കും പരിക്കേറ്റിരുന്നു. ടൈഗർ ഷ്രോഫിന്റെ പതിവ് ഫുട്ബോൾ ക്ലബ്ബ് സന്ദർശന സമയങ്ങളും ആരാധകർ പോസ്റ്റ് ചെയ്ത ഇൻസ്റ്റാഗ്രാം റീലുകളിൽനിന്ന് അദ്ദേഹത്തിന് പോലീസ് സുരക്ഷയില്ലെന്ന വിവരവും മനസ്സിലാക്കിയ ശേഷമാണ് പ്രതികൾ ആക്രമണം ആസൂത്രണം ചെയ്തത്.

ആക്രമണത്തിനായി അക്രമികൾക്ക് അഡ്വാൻസ് തുകയായി 50,000 രൂപ ലഭിച്ചിരുന്നതായും, വെടിവെപ്പിനുശേഷം വിദേശത്ത് ജോലിയും കൂടുതൽ പണവും വാഗ്ദാനം ചെയ്തിരുന്നതായും വെളിപ്പെട്ടിട്ടുണ്ട്. വെടിവെപ്പിനുശേഷം എസ്‌.വി. റോഡ് വഴി വിലെ പാർലെ, അന്ധേരി എന്നീ സ്ഥലങ്ങളിലൂടെ രക്ഷപ്പെട്ട പ്രതികൾ, അന്ധേരി വെസ്റ്റ് റെയിൽവേ സ്റ്റേഷന് സമീപം ബൈക്ക് ഉപേക്ഷിച്ച് ബോറിവിലി ഭാഗത്തേക്കുള്ള ട്രെയിനിൽ കയറുകയായിരുന്നു. ഡൽഹിയിൽ വെച്ച് അറസ്റ്റിലായ പ്രതികളെ മുംബൈ പോലീസിന് കൈമാറാൻ കോട്ട കോടതി 48 മണിക്കൂർ ട്രാൻസിറ്റ് റിമാൻഡ് അനുവദിച്ചിട്ടുണ്ട്.