ഒമ്പത് വർഷമായി ജയിലിൽ, എന്നിട്ടും കുറ്റകൃത്യങ്ങൾ അവസാനിക്കുന്നില്ല; ഇരുമ്പഴികൾക്കുള്ളിൽനിന്ന് ഒരു ഗുണ്ടാസാമ്രാജ്യം

മുംബൈ: ടൈഗർ ഷ്‌റോഫിന് നേരേ വെടിയുതിർത്തതിന്റെ ഉത്തരവാദിത്വം ഏറ്റെടുത്ത് ലോറൻസ് ബിഷ്‌ണോയ് സംഘത്തിന്റെ പേരിൽ ഒരു പോസ്റ്റ് പ്രത്യക്ഷപ്പെട്ടത് വീണ്ടും ചോദ്യം ഉയർത്തുന്നു. ഒൻപത് വർഷത്തിലേറെയായി ജയിലിലുള്ള ഒരാൾക്ക് എങ്ങനെയാണ് ഇത്ര വലിയ ശൃംഖല നിയന്ത്രിക്കാൻ കഴിയുന്നത്? ടൈഗർ കേസുമായി ബിഷ്‌ണോയ് സംഘത്തിനുള്ള ബന്ധം പോലീസ് ഇതുവരെ സ്ഥിരീകരിച്ചിട്ടില്ല. എന്നാൽ, അന്വേഷണ ഏജൻസികളുടെ കുറ്റപത്രങ്ങളിൽ ഈ സംഘത്തിന്റെ പ്രവർത്തനരീതിയെക്കുറിച്ച് വിശദമായ ആരോപണങ്ങളുണ്ട്.

2015 മുതൽ തടവിലുള്ള ബിഷ്‌ണോയ് പല ജയിലുകളിലേക്ക് മാറ്റപ്പെട്ട ശേഷം ഇപ്പോൾ ഗുജറാത്തിലെ സാബർമതി ജയിലിലാണ്. ഇന്ത്യൻ കുറ്റപത്രത്തിൽ, ജയിലിനുള്ളിൽനിന്ന് മുഴുവൻ പ്രവർത്തനങ്ങളും നിയന്ത്രിക്കുന്നതിൽ ബിഷ്‌ണോയ് വിദഗ്ധനാണെന്ന് പറയുന്നു. കടത്തിക്കൊണ്ടുവന്ന മൊബൈൽ ഫോണുകൾ ഉപയോഗിച്ച് ഇന്ത്യ, കാനഡ, യു.എസ്, യൂറോപ്പ്, ഓസ്‌ട്രേലിയ എന്നിവിടങ്ങളിലെ ആയിരക്കണക്കിന് അംഗങ്ങളുള്ള ശൃംഖലയിലേക്ക് ഉത്തരവുകൾ കൈമാറിയെന്ന് യു.എസ്. കുറ്റപത്രം ആരോപിക്കുന്നു.

ഇവ ആരോപണങ്ങൾ മാത്രമാണ്. കോടതി തീർപ്പുണ്ടായിട്ടില്ലെന്നത് മറ്റൊരു കാര്യം. 2023 മാർച്ചിൽ ഒരു സ്വകാര്യ ചാനൽ ബിഷ്‌ണോയിയുടെ രണ്ടഭിമുഖങ്ങൾ സംപ്രേഷണം ചെയ്തതോടെയാണ് ഈ വിഷയം പൊതുചർച്ചയായത്. അഭിമുഖത്തിൽ ജയിലിനുള്ളിലേക്ക് പുറത്തുനിന്ന് മൊബൈൽ ഫോണുകൾ എറിഞ്ഞുകൊടുക്കാറുണ്ടെന്ന് ബിഷ്‌ണോയ് പറഞ്ഞതായി പരാമർശമുണ്ട്.

പഞ്ചാബ് ഹരിയാണ ഹൈക്കോടതിയുടെ നിർദേശപ്രകാരമുള്ള പ്രത്യേക അന്വേഷണ സംഘത്തിന്റെ (എസ്.ഐ.ടി.) റിപ്പോർട്ടിൽ ഗൗരവമുള്ള കണ്ടെത്തലുകളുണ്ടായിരുന്നു. ഒരഭിമുഖം മൊഹാലിയിലെ ഖരാർ പോലീസ് കസ്റ്റഡിയിൽ വെച്ചും, രണ്ടാമത്തേത് രാജസ്ഥാനിലും വെച്ച് നടന്നതായി എസ്.ഐ.ടി. കണ്ടെത്തി.

ഇതിനെത്തുടർന്ന് രണ്ട് ഡി.എസ്.പി.മാർ ഉൾപ്പെടെ ഏഴ് പഞ്ചാബ് പോലീസുകാരെ സസ്‌പെൻഡ് ചെയ്തു. പോലീസുദ്യോഗസ്ഥർ ഇലക്ട്രോണിക് ഉപകരണങ്ങൾ ഉപയോഗിക്കാൻ അനുവദിക്കുക മാത്രമല്ല, സ്റ്റുഡിയോ പോലുള്ള സാഹചര്യം ഒരുക്കുകയും ചെയ്തെന്ന് 2024 നവംബറിൽ ഹൈക്കോടതി നിരീക്ഷിച്ചു. ഒരു മാധ്യമപ്രവർത്തകന് ജയിലിൽ എങ്ങനെ പ്രവേശനം ലഭിച്ചു എന്ന് സുപ്രീംകോടതിയും ചോദിച്ചു. അഭിമുഖം ജയിലിൽ നടന്നതല്ലെന്നായിരുന്നു പഞ്ചാബ് ഡി.ജി.പി.യുടെ ആദ്യ നിലപാട്. പ്രത്യേക അന്വേഷണസംഘത്തിന്റെ കണ്ടെത്തലുകൾ അതിന് വിരുദ്ധമായിരുന്നു.

ഗോൾഡി ബ്രാർ, അൻമോൽ ബിഷ്‌ണോയ് തുടങ്ങിയ അനുയായികളിലൂടെയാണ് ഈ സംഘത്തിന്റെ വിദേശ പ്രവർത്തനമെന്ന് മുംബൈ പോലീസ് വൃത്തങ്ങൾ ആരോപിക്കുന്നു. കാനഡയിൽ നിന്ന് പ്രവർത്തിക്കുന്ന ബ്രാർ വടക്കേ അമേരിക്കയിലെ ദൈനംദിന പ്രവർത്തനങ്ങൾ നിയന്ത്രിച്ചെന്ന് യു.എസ്. പ്രോസിക്യൂട്ടർമാർ ആരോപിക്കുന്നു. ‘ഓപ്പറേഷൻ ഹാർഡ് ബോൾ’ പ്രകാരം ലോകമെമ്പാടും 24 പേർ അറസ്റ്റിലായി. ബ്രാറിനെ പിടികൂടാൻ സഹായിക്കുന്ന വിവരത്തിന് 50,000 ഡോളർ പാരിതോഷികം യു.എസ്. പ്രഖ്യാപിച്ചു.

യു.എസിൽ നിന്ന് ഭീകരഗുണ്ടാ ശൃംഖലയ്ക്ക് നേതൃത്വം നൽകിയെന്ന് എൻ.ഐ.എ. ആരോപിക്കുന്ന അൻമോൽ ബിഷ്‌ണോയിയെ നാടുകടത്തിയതിനെത്തുടർന്ന് അറസ്റ്റ് ചെയ്തു. കാനഡ ബിഷ്‌ണോയ് സംഘത്തെ ഭീകര സംഘടനയായി പ്രഖ്യാപിച്ചതോടെ ആസ്തികൾ മരവിപ്പിക്കാനും ഭീകരവിരുദ്ധ നിയമപ്രകാരം പ്രോസിക്യൂഷൻ നടത്താനും സാധിക്കും.

എന്നാൽ, സംഘാംഗങ്ങളെ വിട്ടുതരണമെന്ന രണ്ട് ഡസനിലേറെ അഭ്യർഥനകൾ കാനഡ അവഗണിച്ചെന്നാണ് ഇന്ത്യയുടെ ആരോപണം. ഇന്ത്യൻ ഏജൻസികളെ ബിഷ്‌ണോയ് സംഘവുമായി ബന്ധിപ്പിക്കുന്ന കനേഡിയൻ ആരോപണങ്ങൾ ഇന്ത്യ തള്ളിയിട്ടുണ്ട്; അതിനാൽ നയതന്ത്ര തർക്കവും ഈ വിഷയത്തിലുണ്ട്.

ഗുണ്ടാത്തലവൻ ലോറൻസ് ബിഷ്‌ണോയിയുടെ ഇളയ സഹോദരനായ അൻമോളിനെ 2025 നവംബറിൽ അമേരിക്ക ഇന്ത്യയിലേക്ക് നാടുകടത്തി; ഡൽഹിയിലെത്തിയ ഉടൻ എൻ.ഐ.എ. അറസ്റ്റ് ചെയ്തു.

മുൻ മഹാരാഷ്ട്ര മന്ത്രി ബാബ സിദ്ദിഖി വധം, നടൻ സൽമാൻ ഖാന്റെ വീടിനു നേരെയുള്ള വെടിവെപ്പ്, ഗായകൻ സിദ്ദു മൂസേവാല വധം തുടങ്ങിയ കേസുകളിൽ ഇയാളെ അന്വേഷണ ഏജൻസികൾ തേടിയിരുന്നു. ഇന്ത്യയിൽ ഇയാൾക്കെതിരേ കുറഞ്ഞത് 18 ക്രിമിനൽ കേസുകളുണ്ടെന്ന് മുംബൈ പോലീസ് പറയുന്നു.

അറസ്റ്റിനു ശേഷം എൻ.ഐ.എ. കസ്റ്റഡി ആദ്യം 11 ദിവസത്തേക്കും പിന്നീട് ഡിസംബർ അഞ്ച് വരെയും നീട്ടി നൽകി. ഇയാൾ ഇപ്പോൾ ഡൽഹിയിലെ തിഹാർ ജയിലിലാണ്. 2025 ഡിസംബർ അഞ്ചുമുതൽ ഒരുവർഷത്തേക്ക് ജയിലിന് പുറത്തേക്കുള്ള നീക്കം കേന്ദ്ര ആഭ്യന്തര മന്ത്രാലയം വിലക്കിയിട്ടുണ്ട്. ഈ ഉത്തരവ് ചൂണ്ടിക്കാട്ടി, ബാബ സിദ്ദിഖി വധക്കേസിൽ ചോദ്യംചെയ്യാൻ കസ്റ്റഡി വേണമെന്ന മുംബൈ പോലീസിന്റെ ആവശ്യം 2026 ജൂലായിൽ പ്രത്യേക എൻ.ഐ.എ കോടതി തള്ളി.

ബോളിവുഡിലേക്ക് ഈ സംഘത്തിന്റെ നിഴൽ വീണത് 

സൽമാൻ ഖാനും പിതാവിനും ബിഷ്‌ണോയ് സംഘത്തിന്റെ ഭീഷണിക്കത്ത് ലഭിച്ചത് പഞ്ചാബി ഗായകൻ സിദ്ദു മൂസേവാലയുടെ കൊലയ്ക്ക് ദിവസങ്ങൾക്കകമാണ്. 2024 ഏപ്രിലിലെ സൽമാൻ ഖാന്റെ വീടിനുമുന്നിലെ വെടിവെപ്പിൽ അറസ്റ്റിലായവർക്ക് ബിഷ്‌ണോയ് സംഘവുമായി ബന്ധമുണ്ടെന്നായിരുന്നു പ്രാഥമികാന്വേഷണത്തിലെ കണ്ടെത്തൽ. രോഹിത് ഷെട്ടിയുടെ വീടിനുനേരേയുള്ള വെടിവെപ്പിനുശേഷം, ഇത് ‘ചെറിയ ട്രെയിലർ’മാത്രമെന്ന് പറയുന്ന പോസ്റ്റ് സംഘാംഗങ്ങളുടേതെന്ന പേരിൽ പ്രചരിച്ചു.

ആ പോസ്റ്റിന്റെ ആധികാരികത പോലീസ് പരിശോധിച്ചുവരുകയായിരുന്നു. ഈ പശ്ചാത്തലത്തിലാണ് ടൈഗർ ഷ്‌റോഫ് വെടിവെപ്പിനു പിന്നാലെ, ഇതേ സംഘത്തിന്റെ പേരിൽ വീണ്ടും അവകാശവാദ പോസ്റ്റ് വന്നത്. ആരാണ് യഥാർഥത്തിൽ വെടിയുതിർത്തത് എന്നും സംഘത്തിന് നേരിട്ട് ബന്ധമുണ്ടോ എന്നും വ്യക്തമാകാൻ ഇനിയും അന്വേഷണം പൂർത്തിയാകണം.