മുംബൈ: ബോളിവുഡ് താരം ടൈഗർ ഷ്റോഫിനുനേരെ മുംബൈയിൽ നടന്ന വെടിവെപ്പിന് പിന്നിലെ പ്രധാന സൂത്രധാരൻ അനിൽ പണ്ഡിറ്റാണെന്ന് രാജസ്ഥാൻ പോലീസ്. കേസിൽ ഉൾപ്പെട്ട പ്രതിക്ക് അനിൽ പണ്ഡിറ്റ് 2.5 ലക്ഷം രൂപ മുൻകൂറായി നൽകിയെന്നും ആക്രമണം നടത്താൻ പ്രതിയായ റെഹാന് 34,000 രൂപ വാഗ്ദാനം ചെയ്തതായും വിവരമുണ്ട്. കൊലപാതകത്തിനുശേഷം പ്രതികളെ വിദേശത്തേക്ക് അയക്കാമെന്നും ഇയാൾ ഉറപ്പുനൽകിയിരുന്നുവെന്നും രാജസ്ഥാൻ പോലീസ് വൃത്തങ്ങളെ ഉദ്ധരിച്ച് ന്യൂസ് 18 റിപ്പോർട്ട് ചെയ്തു.

To advertise here,

കാലിഫോർണിയയിലിരുന്നാണ് അനിൽ പണ്ഡിറ്റ് ആപ്പ് വഴി പ്രതികളെ തത്സമയം ബന്ധപ്പെടുകയും ആക്രമണത്തിന് നിർദേശങ്ങൾ നൽകുകയും ചെയ്തത്. ആക്രമണത്തിന് ഉപയോഗിച്ച ആയുധങ്ങൾ നൽകിയത് പണ്ഡിറ്റാണെന്നും പോലീസ് സംശയിക്കുന്നു. ഇയാളും അക്രമികളും തമ്മിലുള്ള സാമ്പത്തിക ഇടപാടുകളും ആശയവിനിമയങ്ങളും അന്വേഷണസംഘം വിശദമായി പരിശോധിച്ചുവരികയാണ്. പ്രതികൾക്ക് ചെലവുകൾക്കായി 5,000 മുതൽ 10,000 രൂപവരെ പണ്ഡിറ്റ് ദിവസവും ഓൺലൈനായി അയച്ചു നൽകിയിരുന്നുവെന്നാണ് വിവരം.

ആക്രമണത്തിന് മുന്നോടിയായി പ്രതികൾ ഒരു മാസത്തോളം മുംബൈയിലെ ഒരു ഹോട്ടലിലാണ് താമസിച്ചിരുന്നത്. ഈ സമയത്ത് ഇവർ കടക്കാർക്ക് ഓൺലൈനായി പണം നൽകി പകരം പണം കൈപ്പറ്റിയിരുന്നതായി പോലീസ് പറയുന്നു. സംഘത്തിലെ മറ്റൊരു പ്രതിയായ ഹൃതിക്കാണ് ടൈഗർ ഷ്റോഫിന്റെ യാത്രാവിവരങ്ങൾ നിരീക്ഷിച്ച് വിവരങ്ങൾ ശേഖരിച്ചത്. നടന്റെ ദിനചര്യകൾ പ്രതികൾ നിരീക്ഷിച്ചിരുന്നോ എന്നും ലക്ഷ്യസ്ഥാനത്തെ നീക്കങ്ങൾ എങ്ങനെ പിന്തുടർന്നുവെന്നും അന്വേഷണ സംഘം പരിശോധിക്കുന്നുണ്ട്.

ആക്രമണത്തിനുശേഷം മുംബൈയിൽനിന്ന് പുറത്തുകടക്കാനായി പ്രതികൾ തങ്ങളുടെ വേഷവും രൂപവും മാറ്റിയിരുന്നു. സംഭവസമയത്ത് റെഹാനും പ്രായപൂർത്തിയാകാത്ത പ്രതിക്കും നീളമുള്ള മുടിയുണ്ടായിരുന്നുവെങ്കിലും ട്രെയിൻ യാത്രയ്ക്കിടെ ഇവർ മുടി വെട്ടുകയും വസ്ത്രം മാറുകയും ചെയ്തു. സംശയം ഒഴിവാക്കാനായി മൂവരും ട്രെയിനിലെ വെവ്വേറെ ഭാഗങ്ങളിലാണ് ഇരുന്നത്. എത്രയും വേഗം ഡൽഹിയിലെത്താനും അവിടെനിന്ന് നേപ്പാളിലേക്ക് കടക്കാനുമായിരുന്നു അനിൽ പണ്ഡിറ്റ് ഇവർക്ക് നൽകിയ നിർദേശം.

ഒക്ടോബർ 18-നാണ് മുംബൈയിലെ ജൂഹുവിൽവെച്ച് ബൈക്കിലെത്തിയ അക്രമികൾ ടൈഗർ ഷ്റോഫിന്റെ കാറിനുനേരെ വെടിയുതിർത്തത്. നടൻ കാര്യമായ പരിക്കേൽക്കാതെ രക്ഷപ്പെട്ടെങ്കിലും ഡ്രൈവർക്കും സമീപത്തുണ്ടായിരുന്ന വഴിയാത്രക്കാരനും പരിക്കേറ്റു. പ്രാഥമിക വിവരമനുസരിച്ച് ആകെ ഏഴ് റൗണ്ട് വെടിയുതിർത്തതിൽ അഞ്ചെണ്ണം കാറിൽ കൊള്ളുകയും രണ്ടെണ്ണം ലക്ഷ്യം തെറ്റുകയുമായിരുന്നു.