മൻമോഹൻ സിങ്: നേരും നെറിയും | വഴിപോക്കൻ

.

സംഘടിത കൊള്ള, നിയമപരമായ പിടിച്ചുപറി

2013-ൽ കേന്ദ്ര സർക്കാരിന്റെ ഓർഡിനൻസിനെതിരെ രാഹുൽ ഗാന്ധി പരസ്യമായി രംഗത്തുവന്നപ്പോൾ രാജി വെയ്ക്കാൻ സന്നദ്ധനാണെന്ന് മൻമോഹൻ സിങ് കോൺഗ്രസ് നേതൃത്വത്തോട് പറഞ്ഞിരുന്നു. പാർട്ടിയുടെ നിർബ്ബന്ധത്തിന് വഴങ്ങിയാണ് അന്ന് മൻമോഹൻ രാജിയിൽനിന്നു പിന്മാറിയത്. ഈ വിഷയത്തിൽ രാഹുൽ തന്നോട് മാപ്പുപറയുകയുണ്ടായെന്നും മൻമോഹൻ പിന്നീട് വെളിപ്പെടുത്തി. 

എതിരാളികൾ ദുർബ്ബലനെന്ന് കുറ്റപ്പെടുത്തിയ മൻമോഹന്റെ ഏറ്റവും ദൃഢമായ ശബ്ദം കേട്ടത് 2016 നവംബറിൽ നോട്ടുനിരോധന കാലത്താണ്. ''It is a monumental management failure- organised loot and legalised plunder,' എന്ന വാക്യത്തിലൂടെ മൻമോഹൻ മോദി സർക്കാരിന്റെ അവകാശവാദങ്ങൾ നിർദ്ദാക്ഷിണ്യം കീറിയെറിഞ്ഞു. ചുരുങ്ങിയത് രണ്ട് ശതമാനമെങ്കിലും ജി.ഡി.പി. ഇടിയുമെന്ന മുന്നറിയിപ്പ് പ്രവചനപരമായി. ഹ്രസ്വ കാലയളവിൽ വിഷമമുണ്ടായാലും ദീർഘകാലയളവിൽ ഇന്ത്യയ്ക്ക് നോട്ടു നിരോധനം ഗുണം ചെയ്യുമെന്ന വായ്ത്താരിയോട് മൻമോഹൻ പ്രതികരിച്ചത് ഇങ്ങനെയാണ്: ''ജോൺ കെയ്ൻസ് പറഞ്ഞതുപോലെ ദീർഘകാലയളവിൽ നമ്മളെല്ലാം തന്നെ മരിച്ചിരിക്കും.'' 

നോട്ടുനിരോധനം ഇന്ത്യയിലെ സാധാരണക്കാരെയാണ് ഏറ്റവുമധികം പ്രതികൂലമായി ബാധിക്കുകയെന്നും ചെറുകിട വ്യവസായ സംരംഭങ്ങൾ അടങ്ങിയ അനൗപചാരിക മേഖല താറുമാറാകുമെന്നുമുള്ള മൻമോഹന്റെ വാക്കുകൾ അച്ചട്ടായി. മൗനിബാബയെന്ന് അധിക്ഷേപിക്കപ്പെട്ട ഒരാൾ ഉയർത്തിയ ഈ നിശിത വിമർശനത്തിന് നാളിതുവരെ  കേന്ദ്ര സർക്കാരിന്റെ ഭാഗത്തുനിന്നു മറുപടി ഉണ്ടായിട്ടില്ല.

മൻമോഹൻ ഒരു രാഷ്ട്രീയ നേതാവായിരുന്നില്ല എന്ന് പറയുന്നവരുണ്ട്. ഒരർത്ഥത്തിൽ അത് ശരിയാണ്. ജനങ്ങൾ നേരിട്ട് തിരഞ്ഞെടുത്ത നേതാവായിരുന്നില്ല മൻമോഹൻ. ഒരിക്കൽ മാത്രമേ അദ്ദേഹം ലോക്സഭ തിരഞ്ഞെടുപ്പിൽ മത്സരിച്ചിട്ടുള്ളൂ- 1999 ൽ. അന്ന് 29,999 വോട്ടുകൾക്ക് മൻമോഹൻ ബി.ജെ.പിയിലെ വിജയകുമാർ മൽഹോത്രയോട് പരാജയപ്പെട്ടു. കോൺഗ്രസുകാരിൽ ഒരു വിഭാഗം കാലുവാരിയതുകൊണ്ടാണ് മൻമോഹൻ പരാജയപ്പെട്ടതെന്ന ആക്ഷേപം ആ നാളുകളിൽ ശക്തമായിരുന്നു. എന്തായാലും പിന്നീടങ്ങോട്ട് രാജ്യസഭയിലൂടെയാണ് അദ്ദേഹം പാർലമെന്റിലെത്തിയത്. 

ഒരു മാസ് ലീഡർ എന്നത് മൻമോഹന് പറഞ്ഞിട്ടുള്ളതായിരുന്നില്ല. 2ജി സ്‌പെകട്രം, കൽക്കരി ഖനി, കോമൺവെൽത്ത് കുംഭകോണങ്ങൾ എന്നിവ രണ്ടാം യു.പി.എ. മന്ത്രിസഭയെ വേട്ടയാടിയപ്പോൾ അതിനെ സമർത്ഥമായി പ്രതിരോധിക്കാൻ മൻമോഹനാവാതെ പോയത് ഈ ഒരു കാരണം കൊണ്ടാവാം. അഴിമതി ആരോപണങ്ങൾ നേരിട്ട മന്ത്രി എ. രാജയുടെ രാജി ചോദിച്ചുവാങ്ങാൻ മൻമോഹനായി എന്നത് മറക്കരുത്. നിയമം നിയമത്തിന്റെ വഴിയിൽ മുന്നോട്ടുപോയപ്പോൾ രാജയും കനിമൊഴിയും ഉൾപ്പെടെയുള്ളവർ അറസ്റ്റിലാവുകയും ചെയ്തു. ഐ.പി.എൽ. ഓഹരി ഇടപാടിൽ ശശി തരൂർ പ്രതിക്കൂട്ടിലായപ്പോൾ രാജി അനിവാര്യമാണെന്ന നിലപാടാണ് മൻമോഹൻ എടുത്തത്. 

പ്രതിപക്ഷവും മാദ്ധ്യമങ്ങളും ചെയ്തതുപോലെയല്ല കുറച്ചുകൂടി ദയാപൂർവ്വമായിരിക്കും ചരിത്രം തന്നെ വിധിക്കുകയെന്ന് മൻമോഹൻ പറഞ്ഞിട്ടുണ്ട്. ഏറ്റവും അധികാരമുള്ള സ്ഥാനത്തിരിക്കുമ്പോഴും ലാളിത്യം കൂടപ്പിറപ്പാവുന്നതെങ്ങിനെയാണെന്ന് ആധുനിക ഇന്ത്യയിൽ തെളിയിച്ച നേതാവായിരുന്നു മൻമോഹൻ സിങ്. ചെയ്ത കാര്യങ്ങളുടെ ഉത്തരവാദിത്വം ഏറ്റെടുക്കുന്നതിൽനിന്ന് മൻമോഹൻ ഒരിക്കലും പിന്നാക്കം പോയില്ല. സഖ്യകക്ഷികൾക്ക് അമിത പ്രാധാന്യമുണ്ടായിരുന്ന സർക്കാരുകൾക്കാണ് മൻമോഹൻ നേതൃത്വം നൽകിയത്. അതുകൊണ്ടുതന്നെ വിട്ടുവീഴ്ചകളില്ലാതെ സർക്കാരിന് മുന്നോട്ടുപോകാനാവുമായിരുന്നില്ല. 

പക്ഷേ, ഒരിക്കൽപോലും മൻമോഹന്റെ വ്യക്തിപരമായ ആർജ്ജവവും സുതാര്യതയും ഒരാളും ചോദ്യം ചെയ്തിട്ടില്ല. വിമർശനങ്ങൾ അംഗീകരിക്കാനുള്ള മനസ്സായിരുന്നു മൻമോഹന്റെ സവിശേഷത. മുഖത്ത് നോക്കി വിമർശിച്ചവരോട് പോലും പകയും കന്മഷവുമില്ലാതെ പെരുമാറിയിരുന്ന മൻമോഹനെക്കുറിച്ച് പത്രപ്രവർത്തകനായ ടി.എൻ. നൈനാൻ രണ്ട് ദിവസങ്ങൾക്ക് മുമ്പ് എഴുതിയിരുന്നു. മൻമോഹൻ സിങ് കടന്നുപോവുമ്പോൾ ഇന്ത്യൻ രാഷ്ട്രീയം ശുഷ്‌കമാവുന്നു. നേരും നെറിയും കൈമോശം വന്നിട്ടില്ലാതിരുന്ന ഒരു തലമുറയുടെ ഏറ്റവും പ്രകാശഭരിതമായ പ്രതിനിധിയായിരുന്നു മൻമോഹൻ സിങ്.

വഴിയിൽ കേട്ടത്:  കേരളം മിനി പാക്കിസ്താനായതുകൊണ്ടാണ് രാഹുൽ ഗാന്ധിയും പ്രിയങ്ക ഗാന്ധിയും ലോക്‌സഭയിലേക്ക് ജയിച്ചതെന്ന് മഹാരാഷ്ട്ര മന്ത്രി. അപ്പോൾ ഗോപി അണ്ണൻ തൃശ്ശൂരിൽ ജയിച്ച വിവരം മഹാരാഷ്ട്രയിലേക്ക് ഇനിയും എത്തിയില്ലേ!