ചേർത്തല : ചകിരിയുടെയും കയറിന്റെയും വിലക്കയറ്റവും ഉത്പന്നവില പുതുക്കാത്തതും കയർമേഖലയിൽ ആശങ്കസൃഷ്ടിക്കുന്നു. അസംസ്കൃതവസ്തുക്കളുടെ വിലക്കയറ്റത്തിനനുസരിച്ച്‌ ഉത്പന്നവില ഉയർത്താത്തതിനാൽ ഉത്പാദനം പ്രതിസന്ധിയിലായി. വിഷയത്തിൽ ഇടപെടലുണ്ടായില്ലെങ്കിൽ സമരത്തിനിറങ്ങാനാണ് തീരുമാനം.

To advertise here,

ഇടക്കാലത്തിനുശേഷം ധാരാളം ഓർഡർ കിട്ടുന്ന സമയത്താണു പ്രതിസന്ധി. ചകിരിവില കിലോയ്ക്ക് 25-ൽനിന്ന്‌ 45-ലേക്കും കയർവില 45-ൽനിന്ന്‌ 72-ലേക്കുമാണ് ഉയർന്നത്. ഈ സാഹചര്യത്തിൽ നിലവിലെ വിലയിൽ ഉത്പാദനം നടത്താനാകില്ലെന്ന നിലപാടിലാണ് ചെറുകിട ഉത്പാദകർ. 15 ശതമാനംമുതൽ 25 ശതമാനംവരെ ഉത്പന്നവില വർധനയാണ് ആവശ്യം. പ്രതിസന്ധിയിൽ വലിയ വിഭാഗം ഉത്പാദകരും പ്രവർത്തനം നിർത്തിയിരിക്കുകയാണ്.

വിലനിർണയസമിതി കൂടണം

:ഉത്പന്ന വിലനിർണയത്തിന്‌ കയർ കോർപ്പറേഷൻ ചെയർമാനായ വിലനിർണയസമിതിയാണ് തീരുമാനമെടുക്കേണ്ടത്. ചെയർമാനോ പ്രതിനിധിയോ വിളിച്ചുചേർക്കുന്ന യോഗത്തിൽ ചെറുകിട ഉത്പാദകരുടെയും കയറ്റുമതിക്കാരുടെയും പ്രതിനിധികളും ചേർന്ന്‌ ചർച്ചചെയ്താണ് വില നിശ്ചയിക്കേണ്ടത്. കയർ കോർപ്പറേഷൻ ചെയർമാനില്ലാത്ത സാഹചര്യത്തിൽ കയർവകുപ്പ് ഇടപെടലിൽ മാത്രമേ പരിഹാരമാകുകയുള്ളൂ.

ചകിരിക്ഷാമം നിരീക്ഷിക്കാനും കമ്മിറ്റിയുണ്ട്

:ചകിരിവിലക്കയറ്റത്തിന്റെയും ക്ഷാമത്തിന്റെയും പശ്ചാത്തലത്തിൽ പരിഹാരം കാണാനും കയർഫെഡ് നേതൃത്വത്തിൽ പ്രത്യേക സമതിയുണ്ടെങ്കിലും അതും കൂടുന്നില്ല. സബ്സിഡിയോടെ ചകിരിയെത്തിച്ച്‌ പ്രതിസന്ധി പരിഹരിക്കാനാണ് പ്രത്യേക സമിതി. സർക്കാർ തീരുമാനത്തിലൂടെ മാത്രമേ ഇതിലും തീരുമാനമാകുകയുള്ളൂ.