ഇന്റർനെറ്റ് അതിന്റെ ആവിർഭാവം മുതൽ ഭൂരിഭാഗം സമയത്തും, മാനവരാശിയുടെ ഏറ്റവും വലിയ സ്വപ്നമായ ഒരു പൊതു ആഗോള ഇടത്തെയാണ് പ്രതിനിധാനം ചെയ്തുകൊണ്ടിരിക്കുന്നത്. എന്നാൽ, ആ അടിസ്ഥാനപരമായ ലക്ഷ്യം ഇന്ന് വലിയ പരിവർത്തനത്തിന് വിധേയമായിക്കൊണ്ടിരിക്കുകയാണ്. ആഗോള രാഷ്ട്രീയ പിരിമുറുക്കങ്ങൾ, ഡാറ്റാ പരമാധികാര (Data Sovereignty) ആശങ്കകൾ, ഫ്രോണ്ടിയർ സാങ്കേതികവിദ്യകളിലെ തന്ത്രപരമായ മത്സരം എന്നിവയാൽ ലോകം ക്രമാനുഗതമായി വിഘടിച്ച ഒരു ഡിജിറ്റൽ ഭൂമികയിലേക്ക് നീങ്ങാനുള്ള പ്രവണത കാണിച്ചുകൊണ്ടിരിക്കുന്നു. ഇത് ''സ്പ്ലിന്റർനെറ്റ്'' എന്ന വിശാലമായ പ്രയോഗത്തിലൂടെയാണ് അറിയപ്പെടുന്നത്. ഓരോ രാഷ്ട്രത്തിന്റെയും ദേശീയ താൽപ്പര്യങ്ങൾക്കും നയങ്ങൾക്കും അനുസരിച്ച് നടപ്പാക്കപ്പെടുന്ന ഡിജിറ്റൽ അതിരുകളാണ് ഈ പുതിയ യാഥാർത്ഥ്യത്തെ നിർവചിക്കുന്നത്.

To advertise here,

ഡിജിറ്റൽ പരമാധികാരം: ഇന്റർനെറ്റ് ഭരണത്തിലെ ഭൗമരാഷ്ട്രീയ സ്വാധീനം

ഇന്റർനെറ്റ് ഭരണം (Internet Governance) എന്നത് ഇപ്പോൾ കേവലം സാങ്കേതികപരമായ ഒരു വിഷയമായി ഒതുങ്ങുന്നില്ല. സർക്കാരുകൾ ഡിജിറ്റൽ ഇടത്തെ തങ്ങളുടെ പ്രാദേശിക പരമാധികാരത്തിന്റെ ഭാഗമായി കണക്കാക്കാൻ തുടങ്ങിയിരിക്കുന്നു. ചില രാജ്യങ്ങൾ ഇന്റർനെറ്റിനെ എങ്ങനെ ആഗോള മേധാവിത്വത്തിന് ഉപയോഗിക്കാം എന്ന് ചിന്തിക്കുന്നു. രാജ്യങ്ങളുടെ ഇത്തരം പ്രവണതകൾ ഡാറ്റാ റെഗുലേറ്റ് ചെയ്യാനും ഓൺലൈൻ പ്ലാറ്റ്ഫോമുകളെ നിയന്ത്രിക്കാനും വിവരങ്ങളുടെ ഒഴുക്ക് രൂപപ്പെടുത്താനുമുള്ള ശ്രമങ്ങളിലേക്ക് നയിക്കുന്നു.

ഡാറ്റാ പ്രാദേശികവൽക്കരണ നിയമങ്ങൾ, വിദേശ കമ്പനികളുടെ ഡാറ്റാ രാജ്യത്തിനകത്ത് തന്നെ സൂക്ഷിക്കാൻ നിർബന്ധിക്കുന്നു. ഇത് ഓരോ രാജ്യത്തിനും സ്വന്തമായി ഒരു ഡിജിറ്റൽ അതിർത്തി സൃഷ്ടിക്കാൻ കാരണമാവുകയും ആഗോള ഡാറ്റാ പ്രവാഹത്തെ പരിമിതപ്പെടുത്തുകയും ചെയ്യുന്നു.

ഈ സംഭവവികാസങ്ങൾ സൂചിപ്പിക്കുന്നത്, രാജ്യങ്ങൾ തങ്ങളുടെ ഡിജിറ്റൽ ഇക്കോസിസ്റ്റത്തിൽ കൂടുതൽ അധികാരം തേടുന്നു എന്നാണ്. ഇന്റർനെറ്റ് രാഷ്ട്രീയ, സാമ്പത്തിക, ദേശീയ സുരക്ഷാ കണക്കുകളിൽ അവിഭാജ്യമാകുമ്പോൾ, തടസ്സമില്ലാത്ത അതിർത്തി കടന്നുള്ള ഡാറ്റാ പ്രവാഹത്തിനുള്ള സാധ്യത കുറയുകയാണ്.

ഡാറ്റാ എംബസികളും സൈബർ നയതന്ത്രത്തിന്റെ പുതിയ രീതികളും: ഇന്റർനെറ്റ് സേവനങ്ങളുടെ സുരക്ഷ

ഡാറ്റയുടെ തന്ത്രപരമായ മൂല്യം ഉയർന്നതോടെ, ആഗോള നയതന്ത്ര രംഗത്ത് പുതിയ സ്ഥാപനപരമായ മാറ്റങ്ങൾ ഉണ്ടായി. അതിലൊന്നാണ് ഡാറ്റാ എംബസി എന്ന ആശയം. ഒരു രാജ്യത്തിന്റെ നിർണ്ണായക ഡാറ്റാ വിദേശത്ത് സൂക്ഷിക്കുന്ന ഈ രീതി, ഇന്റർനെറ്റ് സുരക്ഷയുടെയും സേവനങ്ങളുടെ തുടർച്ചയുടെയും കാര്യത്തിൽ നിർണ്ണായകമാണ്.

ഇന്റർനെറ്റ് സുരക്ഷയും സേവനത്തുടർച്ചയും:സൈബർ ആക്രമണങ്ങൾ, പ്രകൃതിദുരന്തങ്ങൾ, അല്ലെങ്കിൽ പ്രാദേശിക ഭൗമരാഷ്ട്രീയ പ്രതിസന്ധികൾ എന്നിവ കാരണം ഒരു രാജ്യത്തിന്റെ പ്രധാന ഡാറ്റാ സെന്ററുകൾക്ക് കേടുപാടുകൾ സംഭവിക്കുമ്പോൾ, ഡാറ്റാ എംബസിയിലുള്ള പകർപ്പ് ഉപയോഗിച്ച് പൗരന്മാർക്ക് വേണ്ടിയുള്ള വെബ് സേവനങ്ങൾ തടസ്സമില്ലാതെ ലഭ്യമാക്കാൻ സർക്കാരിന് സാധിക്കുന്നു.

വിദൂര ഡാറ്റാ നിയന്ത്രണം:എസ്‌തോണിയ ഈ മാതൃകയ്ക്ക് തുടക്കമിട്ടപ്പോൾ, ലക്‌സംബർഗിൽ എംബസിക്ക് തുല്യമായ സംരക്ഷണത്തോടെ ഡാറ്റാ സംഭരിച്ചുകൊണ്ട്, രാജ്യത്തിന് പുറത്തുനിന്നുള്ള വിദൂര ഇന്റർനെറ്റ് നിയന്ത്രണവും വിവരങ്ങൾ മാനേജ് ചെയ്യാനുള്ള സംവിധാനവും സ്ഥാപിച്ചു. ഇത് ഡാറ്റാ സുരക്ഷയെ ദേശീയ പ്രതിരോധശേഷിയുടെയും നയതന്ത്ര തന്ത്രത്തിന്റെയും കേന്ദ്ര ഘടകമായി മാറ്റുന്നു.

യുഎസ്‌-ചൈന ടെക് പോര്: സമാന്തര ഡിജിറ്റൽ ഇക്കോസിസ്റ്റങ്ങളുടെ വളർച്ച

ഇന്റർനെറ്റ് വിഭജനത്തിന്റെ ഏറ്റവും നിർണ്ണായകമായ ഘടകം അമേരിക്കയും ചൈനയും തമ്മിലുള്ള സാങ്കേതികവിദ്യാ മത്സരമാണ്. അഡ്വാൻസ്ഡ് സെമികണ്ടക്ടറുകളുടെ കയറ്റുമതിയിൽ അമേരിക്ക ഏർപ്പെടുത്തിയ നിയന്ത്രണങ്ങൾ ആഗോള വിതരണ ശൃംഖലയെ ബാധിച്ചു. Huawei, ZTE എന്നിവയെ വെസ്റ്റേൺ ടെലികമ്മ്യൂണിക്കേഷൻ നെറ്റ്വർക്കുകളിൽ നിന്ന് ഒഴിവാക്കിയത് ചൈനയുടെ സാങ്കേതിക സ്വാധീനം പരിമിതപ്പെടുത്താനുള്ള ശ്രമങ്ങളുടെ ഭാഗമാണ്.

അതേസമയം, ചൈന ആഗോള ഇന്റർനെറ്റ് പ്ലാറ്റ്ഫോമുകളിൽ നിന്ന് വേറിട്ട് പ്രവർത്തിക്കുന്ന ഒരു സമാന്തര ഡിജിറ്റൽ ഇക്കോസിസ്റ്റം നിർമ്മിച്ചു. ഗ്രേറ്റ് ഫയർവാൾ Google, Facebook പോലുള്ള സേവനങ്ങളെ തടയുകയും പകരം WeChat, Baidu പോലുള്ള തദ്ദേശീയ പ്ലാറ്റ്ഫോമുകൾക്ക് വഴി തുറക്കുകയും ചെയ്തു. 5G, സൈബർ സുരക്ഷാ പ്രോട്ടോക്കോളുകൾ എന്നിവയ്ക്ക് ബദൽ മാനദണ്ഡങ്ങൾ വികസിപ്പിച്ച ചൈന, ഡിജിറ്റൽ സിൽക്ക് റോഡ് സംരംഭത്തിലൂടെ ഈ സാങ്കേതികവിദ്യകൾ മറ്റ് രാജ്യങ്ങളിലേക്ക് കയറ്റുമതി ചെയ്യുന്നു.

ഫ്രോണ്ടിയർ സാങ്കേതികവിദ്യകളും ഇന്റർനെറ്റ് ഭരണത്തിലെ പുതിയ ഭീഷണികളും

AI, ക്വാണ്ടം കമ്പ്യൂട്ടിംഗ് തുടങ്ങിയ ഫ്രോണ്ടിയർ സാങ്കേതികവിദ്യകൾ (Frontier Technologies) ഇന്റർനെറ്റ് ഭരണത്തിന്റെ അടിസ്ഥാന തത്വങ്ങളെയാണ് മാറ്റിമറിക്കുന്നത്.

 AI-യുടെ അൽഗോരിതമിക് അധികാരം: പല രാജ്യങ്ങളും വിദേശ AI മോഡലുകളെ ആശ്രയിക്കുമ്പോൾ, ആൽഗോരിതങ്ങളുടെ യുക്തിയിൽ (Algorithmic Logic) രാജ്യത്തിന് നിയന്ത്രണം നഷ്ടപ്പെടുന്നു. ഇത് ഡിജിറ്റൽ പരമാധികാരത്തിന് ഭീഷണിയാണ്. വിദേശ AI സംവിധാനങ്ങൾ ദുരുപയോഗം ചെയ്യപ്പെടുകയാണെങ്കിൽ, അത് പൗരന്മാരുടെ തീരുമാനങ്ങളെയും പൊതുജനാഭിപ്രായത്തെയും സ്വാധീനിക്കാൻ സാധ്യതയുണ്ട്. ഇന്റർനെറ്റ് ഭരണത്തിൽ സുതാര്യതയും ധാർമ്മികതയും ഉറപ്പാക്കാനുള്ള വെല്ലുവിളികളും AI ഉയർത്തുന്നു.

ക്വാണ്ടം കമ്പ്യൂട്ടിംഗിന്റെ സുരക്ഷാ പ്രത്യാഘാതം: അഡ്വാൻസ്ഡ് ക്വാണ്ടം കമ്പ്യൂട്ടിംഗിന് നിലവിലെ ഇന്റർനെറ്റിലെ സാമ്പത്തിക ഇടപാടുകൾ, സ്വകാര്യ ആശയവിനിമയങ്ങൾ എന്നിവയുടെ എൻക്രിപ്ഷൻ തകർക്കാൻ കഴിയും. ഇത് ഇന്റർനെറ്റിലെ സുരക്ഷയുടെയും വിശ്വാസ്യതയുടെയും ആഗോള അടിത്തറയെ തകർക്കും. ഈ ഭീഷണി നേരിടാൻ, ഇന്റർനെറ്റ് സംവിധാനങ്ങൾ ക്വാണ്ടം-പ്രതിരോധ ക്രിപ്റ്റോഗ്രാഫി സംവിധാനങ്ങളിലേക്ക് മാറേണ്ടത് അനിവാര്യമാണ്.

ഇന്ത്യയുടെ ഡിജിറ്റൽ സ്വയംപര്യാപ്തതാ ലക്ഷ്യം: വെല്ലുവിളികളും സാധ്യതകളും

ഈ മാറുന്ന ലോകക്രമത്തിൽ ഇന്റർനെറ്റിന്റെ തുറന്ന സ്വഭാവം നിലനിർത്തുന്നതിനൊപ്പം ഡിജിറ്റൽ സ്വാതന്ത്ര്യത്തിന് ആവശ്യമായ തദ്ദേശീയമായ സംവിധാനങ്ങൾ നിർമ്മിക്കാനും ഇന്ത്യ ശ്രമിക്കുന്നു. സെമികോൺ ഇന്ത്യ പ്രോഗ്രാം ആഭ്യന്തര സെമികണ്ടക്ടർ ഇക്കോസിസ്റ്റം സ്ഥാപിക്കാനുള്ള രാജ്യത്തിന്റെ പ്രധാന നീക്കമാണ്.

എങ്കിലും, ചിപ്പ് നിർമ്മാണത്തിനാവശ്യമായ വൻകിട മൂലധനം, തടസ്സമില്ലാത്ത വൈദ്യുതി, അൾട്രാ പ്യുവർ വാട്ടർ തുടങ്ങിയ അടിസ്ഥാന സൗകര്യങ്ങളുടെ ലഭ്യത, ഉയർന്ന വൈദഗ്ധ്യമുള്ള തൊഴിലാളികളുടെ ആവശ്യം എന്നിവ ഇന്ത്യയുടെ മുന്നിലുള്ള പ്രധാന വെല്ലുവിളികളാണ്. ഈ തടസ്സങ്ങൾക്കിടയിലും, ഇന്ത്യയുടെ വലിയ ഡിജിറ്റൽ സമ്പദ്വ്യവസ്ഥ, ഡിജിറ്റൽ പൊതു അടിസ്ഥാന സൗകര്യങ്ങളുടെ വികസനം, ആഗോള സാങ്കേതിക പങ്കാളിത്തങ്ങളിലെ വർധിച്ചുവരുന്ന സ്വാധീനം എന്നിവ ഡിജിറ്റൽ പരമാധികാരം പിന്തുടരാൻ രാജ്യത്തിന് ശക്തമായ അടിത്തറ നൽകുന്നു.

യൂറോപ്പിന്റെ അവകാശങ്ങളെ അടിസ്ഥാനമാക്കിയുള്ള ഡിജിറ്റൽ ചട്ടക്കൂട്: സ്വകാര്യതയുടെ ജനാധിപത്യ മൂല്യം

ഇന്റർനെറ്റിന്റെ ഭാവിയോട് യൂറോപ്പ് സ്വീകരിച്ചിരിക്കുന്നത് തികച്ചും വ്യത്യസ്തമായ സമീപനമാണ്. പൗരാവകാശങ്ങൾ, സുതാര്യത, വിപണിയിലെ നീതി എന്നിവയുടെ സംരക്ഷണത്തിൽ യൂറോപ്പിന്റെ മാതൃക അടിയുറച്ചതാണ്. ജനറൽ ഡാറ്റാ പ്രൊട്ടക്ഷൻ റെഗുലേഷൻ (GDPR) സ്വകാര്യതാ നിയമനിർമ്മാണത്തിൽ ഒരു ആഗോള മാനദണ്ഡം സ്ഥാപിച്ചു.

ഡിജിറ്റൽ സർവീസസ് ആക്ട് (DSA), ഡിജിറ്റൽ മാർക്കറ്റ്‌സ് ആക്ട് (DMA) എന്നിവ വ്യാജ വിവരങ്ങൾ തടയാനും മത്സരവിരുദ്ധ പ്രവർത്തനങ്ങൾ ഒഴിവാക്കാനും ഓൺലൈൻ പ്ലാറ്റ്ഫോമുകൾക്ക് പുതിയ ഉത്തരവാദിത്തങ്ങൾ നൽകിക്കൊണ്ട് യൂറോപ്പിന്റെ നിയന്ത്രണ സംവിധാനത്തെ ശക്തിപ്പെടുത്തുന്നു.

ഗ്ലോബൽ സൗത്തും ആഴം കൂടുന്ന ഡിജിറ്റൽ വിടവും

ഇന്റർനെറ്റ് വിഘടനത്തിന്റെ പ്രത്യാഘാതങ്ങൾ ഗ്ലോബൽ സൗത്ത് (ആഫ്രിക്ക, ലാറ്റിനമേരിക്ക, ഏഷ്യയുടെ ഭാഗങ്ങൾ) രാജ്യങ്ങൾക്ക് ഏറെയാണ്. ഈ രാജ്യങ്ങളിൽ പലതിനും മതിയായ ഡിജിറ്റൽ അടിസ്ഥാന സൗകര്യങ്ങൾ ഇല്ല, അവർ ചൈനീസ് ഹാർഡ്വെയറുകളെയോ പാശ്ചാത്യ ക്ലൗഡ് സേവനങ്ങളെയോ ആശ്രയിക്കുന്നു. ഈ ആശ്രിതത്വം പരിമിതികൾ സൃഷ്ടിക്കുകയും സ്വതന്ത്രമായ ഡിജിറ്റൽ തന്ത്രങ്ങൾ ആസൂത്രണം ചെയ്യാനുള്ള അവരുടെ കഴിവിനെ പരിമിതപ്പെടുത്തുകയും ചെയ്യുന്നു.

പുതിയതും ചെലവേറിയതുമായ സാങ്കേതിക നിലവാരങ്ങൾ സ്വീകരിക്കുന്നത് ഡിജിറ്റൽ വിഭജനം (Digital Divide) വർദ്ധിപ്പിക്കാൻ സാധ്യതയുണ്ട്. ഗ്ലോബൽ ടെക് കമ്പനികളുടെ സ്വാധീനം ആഭ്യന്തര നയരൂപീകരണത്തെ മറികടക്കാം. ആപ്പിൾ, ഗൂഗിൾ, ആമസോൺ, ഫേസ്ബുക്, മൈക്രോസോഫ്റ്റ് തുടങ്ങിയ ആഗോള ടെക് ഭീമന്മാർ വികസ്വര, അവികിസിത രാജ്യങ്ങളുടെ ഡിജിറ്റൽ നയരൂപീകരണത്തിൽ ചെലുത്തുന്ന സ്വാധീനം ചെറുതല്ല.

രൂപം കൊള്ളുന്ന സ്പ്ലിന്റർനെറ്റിന്റെ ഘടനയും പ്രത്യാഘാതങ്ങളും

ലോകം ക്രമേണ, സാർവത്രിക സാങ്കേതിക തത്വങ്ങളേക്കാൾ പ്രാദേശിക ബ്ലോക്കുകളാൽ നിർവചിക്കപ്പെടുന്ന ഒരു ഇന്റർനെറ്റിലേക്ക് നീങ്ങുകയാണ്. ചൈനയുടെ സ്റ്റേറ്റ്-റെഗുലേറ്റഡ് മോഡൽ; യൂറോപ്പിന്റെ അവകാശങ്ങളെ അടിസ്ഥാനമാക്കിയുള്ള ചട്ടക്കൂട്; അമേരിക്കയുടെ ഓപ്പൺ-ഇന്നവേഷൻ ഇക്കോസിസ്റ്റം; റഷ്യയുടെ സുരക്ഷാ കേന്ദ്രീകൃതമായ ഇന്റർനെറ്റ് സാങ്കേതിക ഘടന; ഗ്ലോബൽ സൗത്തിന്റെ സമ്മിശ്ര സംവിധാനങ്ങൾ-ഇവയെല്ലാം ഒരു വിഘടിച്ച ഡിജിറ്റൽ ഭാവിയുടെ രൂപരേഖയെ പ്രതിഫലിപ്പിക്കുന്നു. ഈ വിഘടനം ഇന്റർനെറ്റ് ഒരു ഏകീകൃത ആഗോള ശൃംഖലയാണെന്ന ആശയത്തെ ശക്തമായി ചോദ്യം ചെയ്യുന്നു.

വിഭജിക്കപ്പെടുന്ന ഡിജിറ്റൽ യുഗത്തിൽ തുറന്ന സമീപനം എങ്ങനെ നിലനിർത്താം?

സ്പ്ലിന്റർനെറ്റിലേക്കുള്ള ഈ പോക്ക് ആഗോള സഹകരണം, സാമ്പത്തിക വിനിമയം, ജനാധിപത്യപരമായ ഭരണം എന്നിവയുടെ ഭാവിയെക്കുറിച്ച് നിർണ്ണായകമായ ചോദ്യങ്ങൾ ഉയർത്തുന്നു. ഈ വെല്ലുവിളി മറികടക്കുന്നതിന്, സാങ്കേതിക നിലവാരങ്ങൾ വികസിപ്പിക്കാനും, AI, ക്വാണ്ടം സുരക്ഷാ ഭീഷണികൾ നേരിടാനായി ഇന്റർനെറ്റ് ഭരണത്തിൽ പുതിയ നിയമങ്ങൾ കൊണ്ടുവരാനും അന്താരാഷ്ട്ര തലത്തിൽ പുതിയ ശ്രമങ്ങൾ ആവശ്യമാണ്.

ഇന്റർനെറ്റിനെ പരിവർത്തനപരമാക്കിയ തുറന്ന സമീപനം സംരക്ഷിക്കുന്നതിന്റെ ആവശ്യകതയും നിയമപരമായ ദേശീയ താൽപ്പര്യങ്ങളും തമ്മിൽ ഒരു സന്തുലിതാവസ്ഥ കണ്ടെത്തുക എന്നതാണ് ഇന്നത്തെ പ്രധാന വെല്ലുവിളി.

 

(ലീഡർഷിപ് കോച്ചും എഡ്യൂക്കേഷൻ സ്ട്രേറ്റജിസ്റ്റും ടെക്‌നോളജി എഡ്യൂക്കേറ്ററുമാണ് ലേഖകൻ)