സൂര്യഗ്രഹണം കാരണം ഇന്ന് (ഓഗസ്റ്റ് രണ്ടിന്) ലോകം മുഴുവന്‍ ആറ് മിനിട്ട് നേരം ഇരുട്ടിലാകുമെന്ന തരത്തില്‍ ഓണ്‍ലൈനില്‍ നടന്ന വ്യാജ പ്രചാരണം തള്ളി വിദഗ്ധര്‍. വളരെ അപൂര്‍വമായ പ്രതിഭാസമാണ് നടക്കാനിരിക്കുന്നതെന്നും ഒരു നൂറ്റാണ്ടുകാലം ഇനി ഇത്തരത്തില്‍ സംഭവിക്കില്ലെന്നും സോഷ്യല്‍ മീഡിയയിലെ ചില പോസ്റ്റുകള്‍ വ്യാജ അവകാശവാദം ഉന്നയിച്ചിരുന്നു. ഇത് ജനങ്ങളില്‍ കൗതുകവും ഭയവും സൃഷ്ടിച്ചതിന് പിന്നാലെയാണ് ഇത് ഒരു വ്യാജവാര്‍ത്തയാണെന്ന സ്ഥിരീകരണം വരുന്നത്. 2025-ല്‍ ലോകം മുഴുവന്‍ ഇരുട്ടിലാകുന്ന ഒരു സാഹചര്യമില്ല. നാസയുടെ ജ്യോതിശാസ്ത്ര രേഖകള്‍ പ്രകാരം അടുത്ത പൂര്‍ണ്ണ സൂര്യഗ്രഹണം 2025-ല്‍ അല്ല, 2027 ഓഗസ്റ്റ് 2-നാണ് നടക്കാനിരിക്കുന്നത്.
2025 ഓഗസ്റ്റ് രണ്ടിന് സൂര്യഗ്രഹണം ഉണ്ടാകില്ലെന്നാണ് നാസയുടെ രേഖകള്‍ വ്യക്തമാക്കുന്നത്. 2027 ഓഗസ്റ്റ് 2-ന് വരാനിരിക്കുന്ന അടുത്ത പൂര്‍ണ്ണ സൂര്യഗ്രഹണം ഒരു പ്രധാനപ്പെട്ട ആകാശ പ്രതിഭാസമായിരിക്കുമെങ്കിലും അത് ലോകം മുഴുവന്‍ ഇരുട്ടിലാക്കില്ല. ഈ ഗ്രഹണം യൂറോപ്പ്, വടക്കേ ആഫ്രിക്ക, മിഡില്‍ ഈസ്റ്റ് എന്നിവിടങ്ങളിലെ ചില ഭാഗങ്ങളില്‍ ചന്ദ്രന്റെ നിഴല്‍ വീഴ്ത്തും. ഇത് മനോഹരവും എന്നാല്‍ പ്രാദേശികവുമായ ഒരു കാഴ്ചയായിരിക്കും. വടക്കേ അമേരിക്കയും ഏഷ്യയുടെ വലിയൊരു ഭാഗവും ഉള്‍പ്പെടെ ലോകത്തിന്റെ മറ്റു ഭാഗങ്ങളില്‍ ഈ ഗ്രഹണം ദൃശ്യമാകില്ല.
2027 ഓഗസ്റ്റ് 2-ലെ പൂര്‍ണ്ണ സൂര്യഗ്രഹണത്തെ 'നൂറ്റാണ്ടിന്റെ ഗ്രഹണം' എന്ന് വിളിക്കുന്നു. കാരണം ഇത് 21-ാം നൂറ്റാണ്ടില്‍ കരയില്‍ ഏറ്റവും കൂടുതല്‍ നേരം പൂര്‍ണ്ണമായി ദൃശ്യമാകുന്ന ഗ്രഹണമായിരിക്കും. 1991ന് ശേഷമുള്ള ഏറ്റവും ദൈര്‍ഘ്യമേറിയതും. 6 മിനിറ്റും 22 സെക്കന്‍ഡും വരെ ഇത് നീണ്ടുനില്‍ക്കും. സൂര്യന്‍ പൂര്‍ണ്ണമായും മറയ്ക്കപ്പെടുന്ന പൂര്‍ണഗ്രഹണ പാതയ്ക്ക് ഏകദേശം 160 മൈല്‍ (258 കിലോമീറ്റര്‍) വീതിയും 9,462 മൈല്‍ (15,227 കിലോമീറ്റര്‍) നീളവുമുണ്ടാകും. ഇത് സ്‌പെയിന്‍, ജിബ്രാള്‍ട്ടര്‍, മൊറോക്കോ, അള്‍ജീരിയ, ടുണീഷ്യ, ലിബിയ, ഈജിപ്ത്, സുഡാന്‍, സൗദി അറേബ്യ, യെമന്‍, സൊമാലിയ എന്നിവയുള്‍പ്പെടെ 11 രാജ്യങ്ങളിലൂടെ കടന്നുപോകും. ഈ പാതയ്ക്കുള്ളിലുള്ളവര്‍ക്ക് പട്ടാപ്പകല്‍ ആകാശം അല്‍പ്പനേരത്തേക്ക് ഇരുണ്ടുപോവുകയും ഒരു നാടകീയമായ സന്ധ്യാപ്രതീതി സൃഷ്ടിക്കുകയും ചെയ്യും. ഈ പാതയ്ക്ക് പുറത്തുള്ള പ്രദേശങ്ങളില്‍ ഭാഗിക ഗ്രഹണം കാണാമെങ്കിലും, പൂര്‍ണ്ണമായി ഇരുട്ടിലാകില്ല.
ഭൂമിക്കും സൂര്യനും ഇടയില്‍ ചന്ദ്രന്‍ നേര്‍രേഖയില്‍ വരുമ്പോഴാണ് പൂര്‍ണ്ണ സൂര്യഗ്രഹണം സംഭവിക്കുന്നത്. ഇതിന്റെ ഫലമായി, സൂര്യരശ്മി തടയപ്പെടുകയും ഭൂമിയുടെ ചില ഭാഗങ്ങളില്‍ നിഴല്‍ വീഴുകയും ചെയ്യുന്നു. ഗ്രഹണം പൂര്‍ണ്ണമാകുമ്പോള്‍, സാധാരണയായി സൂര്യന്റെ പ്രഭ കാരണം കാണാന്‍ കഴിയാത്ത അതിന്റെ ബാഹ്യ അന്തരീക്ഷമായ കൊറോണ കാണാനാകും. പൂര്‍ണ്ണ സൂര്യഗ്രഹണങ്ങള്‍ ഭൂമിയുടെ ഒരു ചെറിയ ഭാഗത്ത് നിന്ന് മാത്രമേ ദൃശ്യമാകൂ, അവയുടെ ദൈര്‍ഘ്യം സാധാരണയായി കുറച്ച് മിനിറ്റുകള്‍ മാത്രമായിരിക്കും. 2025-ല്‍ പൂര്‍ണ സൂര്യഗ്രഹണം ഇല്ലെങ്കിലും 2025 സെപ്റ്റംബര്‍ 21-ന് ഒരു ഭാഗിക സൂര്യഗ്രഹണം പ്രതീക്ഷിക്കുന്നുണ്ട്. ഈ സമയത്ത് ചന്ദ്രന്‍ സൂര്യനെ ഭാഗികമായി മറയ്ക്കും. ഈ ഭാഗിക ഗ്രഹണം ഇരുട്ട് ഉണ്ടാക്കുകയോ ലോകമെമ്പാടും ദൃശ്യമാകുകയോ ചെയ്യില്ല.
Content Highlights: Viral claims of a 6-minute global blackout due to a solar eclipse today are false. NASA confirms
Published: 02 Aug 2025, 04:37 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented