കിഴക്കൻ ചൈനയിലെ ഹാൻഷോ നഗരത്തിൽ തിരക്കേറിയ ഒരു റോഡിൽ ഗതാഗതം നിയന്ത്രിക്കാൻ റോബോട്ടിക് ട്രാഫിക് പോലീസ്. ഹെൽമെറ്റ് ധരിക്കാതെ പോവുന്ന ഇ-ബൈക്ക് റൈഡർമാരെ കണ്ടെത്തി മുന്നറിയിപ്പ് നൽകാനും, ട്രാഫിക് ലൈറ്റുകൾക്കനുസരിച്ച് കൈകൾ ചലിപ്പിക്കാനുമെല്ലാം 6.2 അടി ഉയരമുള്ള ഒരു റോബോട്ടിന് കഴിവുണ്ട്.

To advertise here,

സുപ്കോൺ ഇൻഫർമേഷൻ എന്ന ചൈനീസ് കമ്പനിയാണ് 98 കിലോഗ്രാം ഭാരമുള്ള 'ടി2' എന്ന ഈ റോബോട്ട് വികസിപ്പിച്ചെടുത്തത്. ഗതാഗത നിയന്ത്രണം പോലെ പോലീസുകാർ ദിവസേന ചെയ്യുന്ന ആവർത്തനമുള്ള ചില ജോലികൾ യന്ത്രങ്ങളെ ഏൽപ്പിക്കുക എന്ന ലക്ഷ്യമാണ് ഈ പദ്ധതിക്കു പിന്നിൽ.

ക്യാമറ, റഡാർ, ഓൺബോർഡ് കംപ്യൂട്ടിങ് സംവിധാനങ്ങൾ എന്നിവ ഉപയോഗിച്ചാണ് ഈ റോബോട്ട് ഗതാഗതം നിരീക്ഷിക്കുന്നത്. ഹെൽമെറ്റ് ധരിക്കാത്ത റൈഡർമാരെയും യാത്രക്കാരെ വഹിച്ചുള്ള ഇ-ബൈക്കുകളും, റോഡിലെ അടയാളങ്ങൾക്ക് മേൽ നിർത്തിയിട്ട വാഹനങ്ങളും, സിഗ്നൽ തെറ്റിച്ച് നടക്കുന്ന കാൽനടയാത്രക്കാരെയുമെല്ലാം ഈ റോബോട്ട് പോലീസ് തിരിച്ചറിയും.

ഇതിനോട് വഴിചോദിക്കാനും, പാർക്കിങ്, ട്രാഫിക് നിയമങ്ങൾ എന്നിവ സംബന്ധിച്ച വിവരങ്ങൾ അന്വേഷിക്കാനും സാധിക്കും. അടിയന്തര ഘട്ടങ്ങളിൽ പോലീസിനെ ബന്ധപ്പെടാനും ഇത് ജനങ്ങളെ സഹായിക്കും. ട്രാഫിക് സിഗ്നലിന് അനുസരിച്ച് കൈകൾകൊണ്ട് സിഗ്നൽ കാണിക്കാൻ ഈ റോബോട്ടിന് കഴിവുണ്ട്.

ഈ വർഷം മേയ് മുതൽ 15-ഓളം റോബോട്ടുകളെ സുപ്കോൺ വിന്യസിച്ചിട്ടുണ്ട്. 1,70,000 മുന്നറിയിപ്പുകളും ഇതുവഴി നൽകിയിട്ടുണ്ട്. ഇതുവഴി ഹെൽമെറ്റില്ലാതെ യാത്ര ചെയ്യുന്നവരുടെ എണ്ണം കുറയ്ക്കാൻ സാധിച്ചുവെന്നും സ്റ്റോപ്പ് ലൈനുകൾ മറികടന്ന് വാഹനങ്ങൾ നിർത്തുന്നത് 40 ശതമാനം കുറഞ്ഞുവെന്നും കമ്പനി അവകാശപ്പെടുന്നു.

ഇടവേളയില്ലാതെ പണിയെടുക്കാൻ ഈ റോബോട്ടിന് സാധിക്കുമെന്നതാണ് വലിയൊരു നേട്ടം. വിനോദസഞ്ചാര കേന്ദ്രങ്ങൾ, സ്കൂളുകളുടെ പരിസരങ്ങൾ, വാണിജ്യ നഗരങ്ങൾ ഉൾപ്പെടെ ജനത്തിരക്കേറിയ ഇടങ്ങളിലും വാഹനത്തിരക്കേറിയ സമയങ്ങളിലും ഏത് കാലാവസ്ഥയിലും ജോലി ചെയ്യാൻ ഇതിനാവും.

അതേസമയം വിദേശരാജ്യങ്ങളിലേക്ക് ഈ റോബോട്ടുകളെ എത്തിക്കുന്നതിന് പ്രതിബന്ധങ്ങൾ ഏറെയുണ്ടെന്ന് കമ്പനി പറയുന്നു. അതതു നാടുകളിലെ ഗതാഗത നിയമപാലന സേവനങ്ങളുടെ ഐ.ടി. സംവിധാനങ്ങളെ ഈ റോബോട്ടുകളുമായി ബന്ധിപ്പിക്കേണ്ടിവരും. അതിന് ആവശ്യമായ അനുമതികൾ ലഭിക്കുന്നതും വിവര സംരക്ഷണ നിയമങ്ങൾക്ക് വിധേയമാകുന്നതുമെല്ലാം വലിയ വെല്ലുവിളിയാണ്. പ്രത്യേകിച്ചും, ക്യാമറകൾ ഉപയോഗിച്ച് നിരന്തരം ദൃശ്യങ്ങൾ പകർത്തുന്ന ഉപകരണമാണിത്. ഇതിനുപുറമെ ചൈനീസ് നിർമിത ഉപകരണമാണെന്നത് യു.എസ്. ഉൾപ്പെടെയുള്ള പാശ്ചാത്യരാജ്യങ്ങളിൽ ഈ റോബോട്ടിന് സ്വീകാര്യത ലഭിക്കാൻ തടസ്സമാണ്.