കെയ്‌റോ: ചൈനയും ഈജിപ്തും തമ്മിൽ നടത്തുന്ന സംയുക്ത സൈനിക അഭ്യാസത്തിൽ ഫ്രഞ്ച് നിർമ്മിത റഫാൽ യുദ്ധവിമാനങ്ങളും ചൈനീസ് നിർമ്മിത ജെ16 വിമാനങ്ങളും ആദ്യമായി നേർക്കുനേർ ഏറ്റുമുട്ടുന്നു. 'ഈഗിൾസ് ഓഫ് സിവിലൈസേഷൻ' എന്ന് പേരിട്ടിരിക്കുന്ന ഈ യുദ്ധാഭ്യാസത്തെ പ്രതിരോധ മേഖലയിലെ സുപ്രധാന നീക്കമായി കണ്ട് ഇന്ത്യ അതീവതാല്പര്യത്തോടെയാണ് നിരീക്ഷിക്കുന്നത്. പടിഞ്ഞാറൻ രാജ്യങ്ങളുടെ യുദ്ധവിമാന സാങ്കേതികവിദ്യയ്ക്കെതിരെ തങ്ങളുടെ വിമാനങ്ങളുടെ ശേഷി പരിശോധിക്കാൻ ചൈനീസ് പൈലറ്റുമാർക്ക് ലഭിക്കുന്ന അപൂർവ്വ അവസരം കൂടിയാണിത്.

To advertise here,

ഓഗസ്റ്റ് 22-ന് ആരംഭിച്ച സംയുക്ത വ്യോമാഭ്യാസത്തിന്റെ ഭാഗമായി, ചൈനയുടെ ജെ16 വിമാനങ്ങളും റഫാലും തമ്മിൽ വൺ-ഓൺ-വൺ (ഒറ്റയ്‌ക്കൊറ്റയ്ക്കുള്ള) വ്യോമാഭ്യാസ പ്രകടനങ്ങളിൽ ഏർപ്പെട്ടു.

യഥാർത്ഥ യുദ്ധസമാനമായ സാഹചര്യങ്ങളിലായിരുന്നു പൈലറ്റുമാരുടെ കടുത്ത പോരാട്ടം. ഈജിപ്തിന്റെ മിഗ്29 വിമാനങ്ങളും അഭ്യാസത്തിൽ പങ്കെടുത്തു. ചൈനീസ് പീപ്പിൾസ് ലിബറേഷൻ ആർമി പുറത്തുവിട്ട ദൃശ്യങ്ങളിൽ, ജെ16 വിമാനത്തിന് തൊട്ടടുത്തായി റഫാൽ പറന്ന് അഭ്യാസങ്ങൾ നടത്തുന്നത് കാണാം. റഫാലും ജെ16-ഉം ആധുനിക റഡാറുകളും ഇലക്ട്രോണിക് വാർഫെയർ സംവിധാനങ്ങളുമുള്ള 4.5 ജനറേഷൻ വിഭാഗത്തിൽപ്പെടുന്ന അത്യാധുനിക യുദ്ധവിമാനങ്ങളാണ്.

ഈ വ്യോമാഭ്യാസം ഇന്ത്യയെ സംബന്ധിച്ചിടത്തോളം കേവലം ഒരു സാധാരണ പരിശീലന പരിപാടിയല്ല. കഴിഞ്ഞ വർഷം നടന്ന ഓപ്പറേഷൻ സിന്ദൂർ സൈനിക ഏറ്റുമുട്ടലിൽ ഇന്ത്യൻ വ്യോമസേനയുടെ റഫാൽ വിമാനങ്ങളും പാകിസ്താന്റെ ചൈനീസ് നിർമ്മിത ജെ10 വിമാനങ്ങളും തമ്മിൽ വ്യോമാതിർത്തിയിൽ സംഘർഷമുണ്ടായിരുന്നു. റഫാലിനെതിരെ ചൈനീസ് വിമാനങ്ങൾ എങ്ങനെ പ്രവർത്തിക്കുന്നു എന്ന് വിലയിരുത്താൻ ഇന്ത്യൻ വ്യോമസേനയ്ക്ക് ഈ പരിശീലനം മികച്ച പാഠങ്ങൾ നൽകും.

കൂടാതെ, പാകിസ്താൻ നിലവിൽ ചൈനീസ് ജെ10സി വിമാനങ്ങളും ജെഎഫ്17 വിമാനങ്ങളും ഉപയോഗിക്കുന്നുണ്ട്. ഇതോടൊപ്പം ഇലക്ട്രോണിക് വാർഫെയർ ശേഷിയുള്ള ചൈനയുടെ കരുത്തുറ്റ ജെ16 വിമാനങ്ങൾ കൂടി സ്വന്തമാക്കാൻ പാകിസ്താൻ താല്പര്യം പ്രകടിപ്പിച്ചിട്ടുണ്ട്. ഇത് പ്രതിരോധ രംഗത്ത് ഇന്ത്യയ്ക്ക് നിർണായകമാണ്. എന്നാൽ, ഇന്ത്യൻ വ്യോമസേന ഉപയോഗിക്കുന്ന റഫാൽ വിമാനങ്ങളിൽ ഇന്ത്യയുടെ തനതായ ആവശ്യങ്ങൾക്കനുസരിച്ച് വരുത്തിയ അത്യാധുനിക മാറ്റങ്ങളുണ്ട് ഇത് ഈജിപ്ത് ഉപയോഗിക്കുന്ന റഫാലുകളിൽനിന്നു വ്യത്യസ്തമാണ്.

'ഹിഡൻ ഡ്രാഗൺ' എന്ന വിളിപ്പേരുള്ള ജെ16 ചൈനയിലെ ഏവിയേഷൻ ഇൻഡസ്ട്രി കോർപ്പറേഷൻ വികസിപ്പിച്ചെടുത്ത ഇരട്ട എൻജിനുള്ള മൾട്ടി റോൾ യുദ്ധവിമാനമാണ്. ദീർഘദൂര ദൗത്യങ്ങൾക്കായി രൂപകൽപ്പന ചെയ്ത ഈ വിമാനത്തിന് ജെ10 ശ്രേണിയിലേതിനേക്കാൾ കൂടുതൽ ആയുധങ്ങൾ വഹിക്കാനും കൂടുതൽ വെടിയുതിർക്കാനുമുള്ള ശേഷിയുണ്ട്. റഫാലിനേക്കാൾ സമഗ്രമായ യുദ്ധശേഷി ജെ16-ന് ഉണ്ടെന്നാണ് ചൈനീസ് വ്യോമയാന വിദഗ്ധരുടെ അവകാശവാദം. ഈ അവകാശവാദങ്ങളെ പരീക്ഷിക്കാനായി ഇന്ത്യയ്ക്ക് ലഭിച്ച സവിശേഷ അവസരമാണിത്.