ന്യൂയോർക്ക്: ലോകകപ്പ് പ്രീ-ക്വാർട്ടറിൽ ഈജിപ്തിനെതിരായ അർജന്റീനയുടെ നാടകീയ വിജയത്തിനു പിന്നാലെ ഫുട്‌ബോൾ ലോകം രണ്ടു തട്ടിലാണ്. റഫറിയും വാറും അർജന്റീനയ്ക്ക് അനുകൂലമായി പ്രവർത്തിച്ചു എന്ന ആരോപണം ശക്തമായി ഉയർന്നു കഴിഞ്ഞു. ഇതുമായി ബന്ധപ്പെട്ട ചർച്ചകളാണ് ഇപ്പോൾ ഫുട്‌ബോൾ ലോകത്തും സോഷ്യൽ മീഡിയയിലും നടക്കുന്നത്. ഇപ്പോഴിതാ ഈ വിവാദങ്ങൾ കെട്ടടങ്ങും മുമ്പേ മറ്റൊരു വിവാദത്തിനു കൂടി തിരികൊളുത്തിയിരിക്കുകയാണ് ഫിഫ. ഇന്ത്യൻ സമയം വെള്ളിയാഴ്ച പുലർച്ചെ നടക്കാനിരിക്കുന്ന ഫ്രാൻസ് - മൊറോക്കോ ക്വാർട്ടർ ഫൈനൽ മത്സരം നിയന്ത്രിക്കാനുള്ള റഫറിയിങ് പാനലിൽ മുഴുവൻ അർജന്റീനക്കാരെയാണ് ഫിഫ ഉൾപ്പെടുത്തിയിരിക്കുന്നത്.

To advertise here,

ഫിഫയുടെ ഔദ്യോഗിക പ്രഖ്യാപനം വന്നതിനു പിന്നാലെ വീണ്ടും ഒത്തുകളി ആരോപണങ്ങൾ ശക്തമാകുകയാണ്. നിരവധിയാളുകളാണ് ഈ റഫറിയിങ് പാനലിന്റെ ചിത്രം പങ്കുവെച്ച് ഫിഫയ്‌ക്കെതിരേ കടുത്ത ആരോപണങ്ങളുമായി രംഗത്തുവരുന്നത്. ഈ ലോകകപ്പിൽ ഇതുവരെ നടന്ന മത്സരങ്ങളിൽ ആദ്യമായാണ് ഒരു മത്സരത്തിലെ അഞ്ചു റഫറിമാരും ഒരേ രാജ്യത്തു നിന്നുള്ളവരാകുന്നത്. കഴിഞ്ഞ രണ്ട് ലോകകപ്പുകളിലും അർജന്റീനയുടെ കടുത്ത എതിരാളികളായിരുന്നു ഫ്രാൻസ്.

പരിചയസമ്പന്നനായ ഫകുണ്ടോ ടെല്ലോ ആണ് ഈ മത്സരം നിയന്ത്രിക്കുന്നത്. ടെല്ലോയെ സഹായിക്കാൻ അസിസ്റ്റന്റ് റഫറിമാരായി യുവാൻ പാബ്ലോ ബെലാറ്റിയും ഗബ്രിയേൽ ചാഡെയും ഉണ്ടാകും. ഡാരിയോ ഹെരേര നാലാം റഫറിയായും ക്രിസ്റ്റ്യൻ നവാരോ റിസർവ് അസിസ്റ്റന്റ് റഫറിയായും പ്രവർത്തിക്കും.

2022-ലെ ഖത്തർ ലോകകപ്പിൽ മൊറോക്കോ പോർച്ചുഗലിനെ പരാജയപ്പെടുത്തിയ ക്വാർട്ടർ ഫൈനൽ മത്സരം നിയന്ത്രിച്ചതും ഫകുണ്ടോ ടെല്ലോ ആയിരുന്നു. മത്സരം നിയന്ത്രിക്കാൻ അർജന്റീനിയൻ റഫറിമാരെ നിയമിച്ചതിൽ സോഷ്യൽ മീഡിയയിൽ ആരാധകർ അതൃപ്തി പ്രകടിപ്പിക്കുന്നുണ്ട്. എന്നാൽ തങ്ങൾ റഫറിയെക്കുറിച്ചല്ല, മറിച്ച് മത്സരത്തിൽ വിജയിക്കുന്നതിലാണ് ശ്രദ്ധ കേന്ദ്രീകരിക്കുന്നതെന്ന് ഫ്രഞ്ച് പ്രതിരോധ താരം ഡയോട്ട് ഉപമേകാനോ വ്യക്തമാക്കി.

അർജന്റീനയുമായുള്ള പ്രീ-ക്വാർട്ടർ മത്സരത്തിലെ റഫറിയിങ്ങിൽ ഈജിപ്ത് ഫുട്‌ബോൾ അസോസിയേഷൻ ഫിഫയ്ക്ക് പരാതി നൽകിയ പശ്ചാത്തലത്തിലാണ് ഈ പുതിയ നിയമനം ചർച്ചയാകുന്നത്. അന്താരാഷ്ട്ര തലത്തിൽ വലിയ ശ്രദ്ധ നേടിയ ഈ വിഷയം മത്സരത്തിന്റെ നിഷ്പക്ഷതയെക്കുറിച്ചുള്ള ചർച്ചകൾക്ക് തുടക്കമിട്ടിരിക്കുകയാണ്.