ലഖ്നൗ: ഐപിഎല്ലിൽ സൂപ്പർ ഓവർ ജേതാക്കളെ തീരുമാനിച്ച മത്സരത്തിൽ ലഖ്‌നൗ സൂപ്പർ ജയന്റ്‌സിനെ തോൽപ്പിച്ച് കൊൽക്കത്ത നൈറ്റ് റൈഡേഴ്‌സ്. സൂപ്പർ ഓവറിൽ ലഖ്‌നൗ ഉയർത്തിയ രണ്ട് റൺസ് വിജയലക്ഷ്യം നേരിട്ട ആദ്യ പന്തിൽ തന്നെ കൊൽക്കത്ത മറികടന്നു. സൂപ്പർ ഓവറിൽ സുനിൽ നരേന്റെ മികച്ച ബൗളിങ്ങും 51 പന്തിൽ 83 റൺസ് നേടിയ റിങ്കു സിങ്ങിന്റെ ഉജ്വല ബാറ്റിങ്ങുമാണ്‌ കൊൽക്കത്തയ്ക്ക് തുണയായത്. സൂപ്പർ ഓവറിൽ കൊൽക്കത്തയ്ക്കായി വിജയറൺ കുറിച്ചതും റിങ്കുവാണ്.

To advertise here,

നിശ്ചിത 20 ഓവറിൽ ഇരുടീമുകളും 155 റൺസായിരുന്നു സ്‌കോർ ചെയ്തത്. അവസാന പന്തിൽ ജയിക്കാൻ ഏഴ് റൺസ് വേണ്ടിയിരുന്ന ലക്‌നൗവിനായി ഷമി സിക്‌സർ പറത്തിയതോടെയാണ് മത്സരം സൂപ്പർ ഓവറിലേക്ക് നീണ്ടത്. സൂപ്പർ ഓവറിൽ ആദ്യം ബാറ്റ് ചെയ്ത ലക്‌നൗവിനായി നിക്കോളാസ് പൂരനും എയ്ഡൻ മാർക്രമും റണ്ണൊന്നുമെടുക്കാതെ പുറത്തായതോടെ ലക്‌നൗവിന്റെ ഇന്നിങ്‌സ് ഒരു റൺസിൽ അവസാനിക്കുകയായിരുന്നു. മറുപടി ബാറ്റിങ്ങിനിറങ്ങിയ കൊൽക്കത്തയ്ക്കായി നേരിട്ട ആദ്യ പന്ത് തന്നെ ബൗണ്ടറി കടത്തി റിങ്കു സിങ് വിജയത്തിലെത്തിച്ചു. ജയത്തോടെ പോയന്റ് പട്ടികയിൽ കൊൽക്കത്ത എട്ടാം സ്ഥാനത്തേക്ക് കയറി. ലക്‌നൗ പത്താം സ്ഥാനത്തേക്കും വീണു.

നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ കൊൽക്കത്ത നിശ്ചിത 20 ഓവറിൽ ഏഴുവിക്കറ്റ് നഷ്ടത്തിൽ 155 റൺസെടുത്തു. നാലോവറിൽ ഒരു മെയ്ഡനടക്കം 23 റൺസ് മാത്രം വഴങ്ങി അഞ്ച് വിക്കറ്റുകൾ നേടിയ മുഹ്സിൻ ഖാനാണ് കൊൽക്കത്തയെ പിടിച്ചുകെട്ടിയത്. മുൻനിര ബാറ്റർമാർ പരാജയപ്പെട്ടപ്പോൾ റിങ്കു സിങ്ങിന്റെ തകർപ്പൻ പ്രകടനമാണ് കൊൽക്കത്തയെ ഭേദപ്പെട്ട സ്‌കോറിലേക്ക് എത്തിച്ചത്. 51 പന്തിൽ ഏഴ്ഫോറുകളും അഞ്ച് സിക്സുകളും സഹിതം 83 റൺസ് നേടിയ റിങ്കുവാണ് ടീമിന്റെ ടോപ് സ്‌കോറർ. 38 പന്തിൽ 42 റൺസെടുത്ത റിഷഭ് പന്താണ് ലഖ്‌നൗവിന്റെ ടോപ് സ്‌കോറർ. കൊൽക്കത്തയ്ക്കായി വരുൺ ചക്രവർത്തിയും വൈഭവ് അറോറയും രണ്ട് വിക്കറ്റ് വീതം വീഴ്ത്തി.