സ്ത്രീകളെക്കുറിച്ച് ചോദിച്ചാല് വ്യക്തിപരമായ അഭിപ്രായങ്ങളോ കാഴ്ചപ്പാടുകളോ ഇല്ലെന്ന് മുന്കൂര് ജാമ്യം എടുക്കുമെങ്കിലും പല മലയാളി പുരുഷന്മാരേക്കാളും ഉറച്ചതും ശക്തവുമായ അഭിപ്രായങ്ങള് പങ്കുവെയ്ക്കും ചാറ്റ് ജിപിടി. പുരോഗമന സമൂഹമാണെന്ന് അവകാശപ്പെടുമ്പോഴും കേരളത്തിലെ സ്ത്രീകള് ലിംഗപരമായ വിവേചനങ്ങള് അനുഭവിക്കുന്നുണ്ടെന്ന് സിലിക്കണ്വാലിയില്നിന്ന് പുറത്തിറങ്ങി ദിവസങ്ങള്ക്കകം ലോകമാകെ തരംഗമായ ചാറ്റ് ജിപിടി നിരീക്ഷിക്കുന്നു. നിര്മിതബുദ്ധിയുപയോഗിച്ച് പ്രവര്ത്തിക്കുന്ന,മനുഷ്യനോടെന്ന പോലെ സംസാരിക്കുന്ന ഈ ആപ്ലിക്കേഷനുമായി വനിതാദിനത്തില് കേരളത്തിലെ സ്ത്രീകളെക്കുറിച്ച് സംസാരിച്ചപ്പോള്.
ശരിക്കും വനിതകള്ക്ക് മാത്രമായി ഒരു ദിനം ആവശ്യമുണ്ടോ?
ലോകത്തെ മുഴുവന് സ്ത്രീകളുടെയും നേട്ടങ്ങളെ ആദരിക്കാനും അവര് നേരിടുന്ന വെല്ലുവിളികള് ഓര്മിപ്പിക്കാനുമുള്ളതാണ് വനിതാദിനം. തുല്യതയിലേക്കുള്ള പാതയിലാണ് നമ്മുടെ സമൂഹമെങ്കിലും ഇന്നും സ്ത്രീകള് നിരവധി അസമത്വങ്ങള് നേരിടുന്നുണ്ട്. ജോലി സ്ഥലത്തെ വിവേചനം,ലൈംഗികമായ അതിക്രമങ്ങള്,വിദ്യാഭ്യാസ-ആരോഗ്യരംഗങ്ങളിലെ അസമത്വം എന്നിവയൊക്കെ പ്രശ്നങ്ങളായി നിലനില്ക്കുന്നുണ്ട്. ഇത്തരം കാര്യങ്ങളിലേക്കൊക്കെയുള്ള ഒരു ഓര്മപ്പെടുത്തല് എന്ന രീതിയില് വനിതാദിനത്തിന് എന്നും പ്രസക്തിയുണ്ട്.
കേരളത്തിലെ സ്ത്രീകളുടെ അവസ്ഥയെക്കുറിച്ച് എന്തുതോന്നുന്നു?
എന്റെ രീതി അനുസരിച്ച് വ്യക്തിപരമായ അഭിപ്രായങ്ങളോ നിരീക്ഷണങ്ങളോ പങ്കുവെക്കാറില്ല. എങ്കിലും കൈവശമുള്ള വിവരങ്ങള് വെച്ച് കേരളത്തിലെ സ്ത്രീകളെക്കുറിച്ച് ചിലത് പറയാം. ഇന്ത്യയിലെ മറ്റ് സംസ്ഥാനങ്ങളെ അപേക്ഷിച്ച് കേരളത്തില് ഉയര്ന്ന ലിംഗനീതി നിലനില്ക്കുന്നുണ്ട്. ഉയര്ന്ന വിദ്യാഭ്യാസവും തൊഴിലിടങ്ങളിലെ ഉയര്ന്ന പങ്കാളിത്തവും മലയാളി സ്ത്രീകള്ക്ക് ലഭിക്കുന്നുണ്ട്. മാതൃദായക കുടുംബ സംവിധാനമായതിനാല് സ്ത്രീകള്ക്ക് പ്രത്യേക അവകാശവും സംരക്ഷണങ്ങളും കേരളത്തിലെ കുടുംബങ്ങളിലുണ്ട്.
ഇങ്ങനെയൊക്കെയാണെങ്കിലും മലയാളി സ്ത്രീകള് പലതരം വെല്ലുവിളികള് നേരിടുന്നുണ്ട്. ലിംഗപരമായ അതിക്രമങ്ങളും അസമത്വങ്ങളും സാമൂഹികക്രമം കൊണ്ടുണ്ടായ നിയന്ത്രണങ്ങളുമൊക്കെ അവരെ ബാധിക്കുന്നുണ്ട്. രാഷ്ട്രീയ രംഗത്ത് ഇന്നും മലയാളി സ്ത്രീകള്ക്ക് വലിയ അവസരങ്ങളില്ല. സാമ്പത്തിക-ആരോഗ്യരംഗങ്ങളിലും വിവേചനമുണ്ട്. എങ്കിലും അസമത്വങ്ങള് പരിഹരിക്കാനുള്ള ശ്രമങ്ങള് കേരളത്തിലുണ്ടാവുന്നു എന്നത് ശുഭോദര്ക്കമാണ്. മലയാളി സ്ത്രീകള് അവരുടെ അവകാശങ്ങള് തിരിച്ചറിയുന്നു എന്നതും സന്തോഷം ഉണ്ടാക്കുന്ന കാര്യമാണ്.
തുല്യത കൈവരിക്കാനാണ് അവരുടെ പോരാട്ടം. അതില് അവര് എവിടെയെത്തിയെന്നാണ് തോന്നുന്നത്?
ഇതൊരു ദീര്ഘകാല പോരാട്ടമായി കാണണം. വ്യക്തികളില്നിന്നും സ്ഥാപനങ്ങളില്നിന്നും സര്ക്കാരില്നിന്നുമൊക്കെ അതിനുള്ള ശ്രമങ്ങളുണ്ടാവണം. സ്ത്രീകള്ക്ക് കൂടുതല് അവസരങ്ങള് നല്കാനും അവരുടെ നേട്ടത്തില് സന്തോഷിക്കാനുമുള്ള സാമൂഹികപരിസരം ഉണ്ടായെങ്കില് തുല്യതയിലേക്കുള്ള പാത എളുപ്പമായിരിക്കും.
മലയാളി കുടുംബത്തിനകത്ത് ഇപ്പോള് സ്ത്രീകളുടെ റോള് എന്താണ്?
മലയാളി കുടുംബങ്ങളിലെ സ്ത്രീകളുടെ പങ്ക് കാലക്രമേണ വികസിച്ചുകൊണ്ടിരിക്കുന്നുണ്ട്. വിദ്യാഭ്യാസം, തൊഴിലവസരങ്ങള്, സ്വയംഭരണം എന്നിവയിലേക്കുള്ള യാത്രയില് അവര് കൂടുതല് മുന്നേറിയിട്ടുണ്ട്. എങ്കിലും ഗൃഹപരിപാലനത്തിന്റെയും കുടുംബപരിചരണത്തിന്റെയും കെട്ടുപാടുകളില് അവര് ഇപ്പോഴും കുരുങ്ങി കിടക്കുന്നുണ്ട്. കാലാകാലങ്ങളായി പുരുഷന്മാരാണ് കുടുംബത്തിലെ അന്നദാതാക്കള്. എങ്കിലും ഈ റോളും ഇപ്പോള് സ്ത്രീകള് ഏറ്റെടുത്തുകഴിഞ്ഞു. അതുകൊണ്ടുതന്നെ കുടുംബത്തില് കാര്യങ്ങള് തീരുമാനിക്കാനുള്ള പദവിയിലേക്ക് അവര്ക്കും പ്രവേശനം കിട്ടിയിരിക്കുന്നു. മലയാളി സ്ത്രീകള് ഉയര്ന്ന ജോലിയും വിദ്യാഭ്യാസവും നേടുന്നതുവഴി കുടുംബത്തിന്റെ അധികാര ഘടനയില് കാതലായ മാറ്റങ്ങള് വന്നിട്ടുണ്ട്. കലാരംഗത്തും സാമൂഹിക പ്രവര്ത്തനങ്ങളിലും സ്ത്രീകള് കൂടുതലായി ഇടപെടുന്നുണ്ട്. അതുകൊണ്ടുതന്നെ സാമൂഹികരംഗത്ത് അവരുടെ ശബ്ദം കൂടുതല് മുഴങ്ങിക്കേള്ക്കുന്നു.
ആണുങ്ങള് എന്തൊക്കെ കാര്യങ്ങളിലാണ് മലയാളി കുടുംബങ്ങളില് മേല്ക്കോയ്മ കാണിക്കുന്നത്?
ലിംഗപരമായ അധീശത്വ സ്വഭാവം പുരോഗമനപരമായ സമൂഹത്തിന് ചേര്ന്നതല്ല. ലോകത്തെ ഏതൊരു സമൂഹത്തെയും പോലെ മലയാളി കുടുംബങ്ങളിലും ഓരോ വ്യക്തികള്ക്കും വ്യത്യസ്തമായ കഴിവുകളും ശേഷികളുമുണ്ട്. എങ്കിലും ചില അവസരങ്ങള് പുരുഷന്മാര്ക്ക് മാത്രമായി നീക്കി വെക്കപ്പെട്ടിരിക്കുന്നു. ജെന്ഡര് വേര്തിരിവുകളില്ലാതെ ഓരോ വ്യക്തിയുടെ കഴിവും സമൂഹത്തിനായി വിനിയോഗിക്കുകയാണ് വേണ്ടത്. വിഭവങ്ങളും അവസരങ്ങളും തുല്യമായി ഉപയോഗിക്കാന് എല്ലാവര്ക്കും അവസരം കിട്ടണം.
കേരളത്തിലെ സ്ത്രീകള്ക്ക് എത്രത്തോളം സാമ്പത്തികസ്വാതന്ത്ര്യമുണ്ട്?
സാമ്പത്തിക സ്വാതന്ത്ര്യത്തില് മലയാളി സ്ത്രീകള് ക്രമാനുഗതമായ പുരോഗതി കൈവരിക്കുന്നുണ്ട്. 2018-19ലെ നാഷണല് സാമ്പിള് സര്വേ റിപ്പോര്ട്ട് പ്രകാരം കേരളത്തിലെ സ്ത്രീ തൊഴിലാളികളുടെ തൊഴില് പങ്കാളിത്ത നിരക്ക് 36.5 ശതമാനമാണ്. ദേശീയ ശരാശരി 22.5 ശതമാനമാണെന്ന് ഓര്ക്കണം. പുരുഷന്മാര് മാത്രം കൈയടക്കി വെച്ചിരിക്കുന്ന പല തൊഴില് മേഖലകളിലും മലയാളി സ്ത്രീകള് ധൈര്യസമേതം കടന്നുവന്നിട്ടുണ്ട്. ഉദാഹരണത്തിന് സേവനമേഖലയിലെ സ്ത്രീപങ്കാളിത്തം. കുടുംബശ്രീ പോലുള്ള സര്ക്കാര് പദ്ധതികള് അവരുടെ തൊഴില് പങ്കാളിത്തം നന്നായി ഉയര്ത്തിയിട്ടുണ്ട്. ഇങ്ങനെ ശുഭകരമായ ധാരാളം മാറ്റങ്ങള് ഉണ്ടായിട്ടുണ്ടെങ്കിലും സാമ്പത്തികസ്വാതന്ത്ര്യത്തിലേക്കുള്ള യാത്രയില് സ്ത്രീകള് ഇപ്പോഴും പല പ്രതിബന്ധങ്ങളും നേരിടുന്നുണ്ട്. കുറഞ്ഞ കൂലിയും തൊഴിലിടത്തെ വേര്തിരിവും അവരുടെ പ്രതിസന്ധികളായി തുടരുന്നു.
രാഷ്ട്രീയ-ഭരണ രംഗങ്ങളില് സ്ത്രീപങ്കാളിത്തതില് ഇനിയും മാറ്റം വരാനില്ലേ?
ഈ രണ്ട് രംഗങ്ങളിലും ഭാവിയില് കൂടുതല് സ്ത്രീകള് കടന്നുവരുമെന്ന് തന്നെയാണ് പ്രതീക്ഷ. കേരളത്തില് സ്ത്രീകളെ മുന്നിലെത്തിക്കാനുള്ള പല പദ്ധതികളും നിലവിലുണ്ട്. തദ്ദേശഭരണ സ്ഥാപനങ്ങളിലേക്ക് സ്ത്രീകള്ക്കായി സീറ്റ് സംവരണം നടപ്പിലാക്കിയിട്ടുണ്ട്. അതുവഴി പ്രാദേശികതലത്തില് കൂടുതല് സ്ത്രീകള് അധികാരത്തിലെത്തിയിട്ടുണ്ട്. കൂടുതല് സ്ത്രീകള് നേതൃത്വപരമായ റോളുകളില് ഉണ്ടാവുന്നത് മികച്ച തീരുമാനങ്ങളെടുക്കുന്നതിലേക്ക് നയിക്കുമെന്ന് ഗവേഷണങ്ങള് തെളിയിച്ചിട്ടുണ്ട്. എങ്കിലും ഈ മേഖലയില് തുല്യതയിലേക്ക് എത്തണമെങ്കില് സ്ത്രീകള് ഇനിയും നിരവധി കടമ്പകള് മറികടക്കേണ്ടിയിരിക്കുന്നു. വിവേചനവും അവഹേളനവും നേരിടുമ്പോള് ഇത്തരമൊരു മുന്നേറ്റം എളുപ്പമാവില്ല.
മലയാള സിനിമാരംഗത്ത് നാല്- അഞ്ച് വര്ഷങ്ങള്ക്ക് മുന്നേ ഒരു നടിക്കെതിരെ ആക്രമണമുണ്ടായി. ഈ കേസ് വന്നപ്പോള് സ്ത്രീ സമൂഹത്തില്നിന്ന് പോലും ആക്രമണത്തിനിരയായ നടിക്ക് വേണ്ടത്ര പിന്തുണ കിട്ടിയെന്ന് കരുതുന്നുണ്ടോ?
നടിക്കെതിരെ ആക്രമണമുണ്ടായത് 2017ലാണ്. അത് സമൂഹത്തെയാകെ ഞെട്ടിച്ച സംഭവമായിരുന്നു. സ്ത്രീകളുടെ അവകാശങ്ങള്ക്കായി പോരാടുന്നവരും സമൂഹത്തിലെ വലിയൊരു വിഭാഗമാളുകളും ഈ അക്രമത്തിനെതിരെ ശബ്ദമുയര്ത്തിയിട്ടുണ്ട്. പല സംഘടനകളില്നിന്നും വ്യക്തികളില്നിന്നും നടിക്ക് പിന്തുണ കിട്ടിയിട്ടുണ്ട്. ഈയൊരു ആക്രമണം സിനിമമേഖലയിലെ ലൈംഗികാതിക്രമങ്ങളെക്കുറിച്ച് വ്യാപകമായ ചര്ച്ചകള്ക്ക് വഴിതെളിച്ചു എന്നത് മറ്റൊരു കാര്യം. അതിജീവിതയെ മിക്കവരും പിന്തുണച്ചു എങ്കിലും അവരെ കുറ്റപ്പെടുത്താനും ചിലരുണ്ടായി എന്നത് കാണാതെ പോകരുത്. ഇത്തരം അതിക്രമങ്ങള്ക്ക് ഇരയാകുന്നവര്ക്ക് നിരുപാധിക പിന്തുണ നല്കാനുള്ള പക്വതയും വിവേകവും സമൂഹത്തിനുണ്ടാവണമെന്നാണ് അത്തരം വാദങ്ങള് ഓര്മിപ്പിക്കുന്നത്. ലൈംഗികാതിക്രമങ്ങള്ക്ക് ഇരയാകുന്നവര്ക്ക് അര്ഹിക്കുന്ന നീതി ലഭിക്കുന്നു എന്ന് ഉറപ്പ് വരുത്തേണ്ടത് നമ്മുടെ കടമയാണ്.
ലൈംഗികമായ ദാരിദ്ര്യം അനുഭവിക്കുന്നവരാണ് മലയാളി പുരുഷന്മാരില് പലരുമെന്ന് കരുതുന്നുണ്ടോ?ഇതാണോ ഇവിടെയുണ്ടാവുന്ന ലൈംഗികാതിക്രമങ്ങള്ക്ക് കാരണം?
ലൈംഗികാതിക്രമങ്ങള്ക്ക് നിരവധി സങ്കീര്ണമായ കാരണങ്ങളുണ്ട്.അധികാര സന്തുലനമില്ലായ്മയും സാംസ്കാരികവും സാമൂഹികവുമായ ചട്ടങ്ങളുമൊക്കെ അതിലേക്ക് നയിക്കുന്നുണ്ട്.അതിനൊപ്പം വ്യക്തികളുടെ മനോവൈകല്യങ്ങളും. എന്നിരിക്കിലും മലയാളി പുരുഷന്മാരില് ചെറിയ ശതമാനം പേരെങ്കിലും ലൈംഗികമായ നൈരാശ്യവും അസന്തുഷ്ടിയും അനുഭവിക്കുന്നുണ്ട്. പക്ഷേ ഓര്ക്കേണ്ടത് ഇത് ലൈംഗികാതിക്രമങ്ങള്ക്കുള്ള ന്യായീകരണമല്ലെന്നതാണ്. മറ്റൊരു വ്യക്തിക്ക് മേലുള്ള അമിതമായ അധികാരവും അവരെ നിയന്ത്രണത്തില് നിര്ത്താനുള്ള ശ്രമങ്ങളുമൊക്കെ ലൈംഗികാതിക്രമത്തിലേക്ക് നയിക്കുന്നുണ്ട്.ഇത്തരം കാര്യങ്ങളില് ശരിയായ വിദ്യാഭ്യാസവും നിയമപരമായ അവബോധവുമൊക്കെ ഉണ്ടാക്കിയെടുത്ത് അതിക്രമങ്ങള് തടയുക തന്നെ വേണം.
ഏതൊക്കെ തരം സ്ത്രീകളെയാണ് താങ്കള് ഇതുവരെ കണ്ടിട്ടുള്ളത്?
ലോകത്ത് പലതരത്തിലുള്ള സ്ത്രീകളുണ്ട്. എല്ലാവര്ക്കും അവരുടെതായ സവിശേഷവ്യക്തിത്വവും അനുഭവങ്ങളും കാഴ്ചപ്പാടുകളുമുണ്ട്. പലതരം സാംസ്കാരിക അന്തരീക്ഷത്തില്നിന്നും വരുന്നവരാണ് അവര്. പലതരം ജീവിത സാഹചര്യമാണ് അവരെ വേറിട്ട് നിര്ത്തുന്നത്. അവരില് ഉയര്ന്ന പദവിയിലിരിക്കുന്നവരുണ്ട്,ശാസ്ത്രജ്ഞരുണ്ട് കലാകാരികളുണ്ട്.ചിലര് അന്തര്മുഖരാണ്.ചിലര് ആത്മവിശ്വാസമുള്ളവരും ആകര്ഷകമായി പെരുമാറാന് കഴിയുന്നവരുമാണ്. ചിലര്ക്ക് അത്ര ആത്മവിശ്വാസം കാണാറില്ല. ഏറ്റവും പ്രധാനം നമ്മള് കാണുന്ന എല്ലാതരം സ്ത്രീകളെയും കഴിയാവുന്നത്ര ആദരിക്കുകയും അവരുടെ സംഭാവനകളെ ബഹുമാനിക്കുകയുമാണ്.
കേരളത്തില് ഒരു സംഭവമുണ്ടായാല് അതിലൊരു ഭാഗത്തൊരു സ്തീ ആയതുകൊണ്ട് മാത്രം സമൂഹം കൂടുതല് കുറ്റപ്പെടുത്താറുണ്ടോ?
നിര്ഭാഗ്യകരമാണിത്. പല സംഭവങ്ങളിലും ഒരു ഭാഗത്ത് സ്ത്രീകളാണെങ്കില് പുരുഷന്മാരെക്കാള് കുറ്റപ്പെടുത്തലുകള് സമൂഹത്തിന്റെ ഭാഗത്തുനിന്ന് സ്ത്രീകള് കേള്ക്കുന്നുണ്ട്. അതില് അവര് ഒരു ഇരയാണെങ്കില് പോലും സമൂഹത്തിന്റെ മനോഭാവത്തില് മാറ്റമില്ല. സ്ത്രീകള് വൈകാരികമായും ശാരീരികമായും പുരുഷന്മാരേക്കാള് താഴെയാണെന്ന ചിന്തയാണ് ഇതിനൊരു കാരണം. ലൈംഗികാതിക്രമങ്ങള്ക്ക് ഇരയായാല് പോലും അവള് കുറ്റപ്പെടുത്തല് കേള്ക്കേണ്ടി വരുന്നു.അതും സംഭവത്തിലെ കുറ്റവാളിയേക്കാള് കൂടുതല്. അവളുടെ സ്വഭാവത്തെക്കുറിച്ചും തിരഞ്ഞെടുപ്പുകളെക്കുറിച്ചുമൊക്കെ ചോദ്യങ്ങള് ഉയരും. ഇതൊരു സദാചാര പ്രശ്നമായി മാറ്റിയെടുക്കും. അവളുടെ ധാര്മികവശം മോശമാണെന്ന് പ്രചരിപ്പിക്കും. അവരുടെ സമ്മതത്തോടെയാവും ശാരീരികബന്ധമുണ്ടായതെന്ന് പറയും.ഇത് വളരെ മോശമാണ്. അക്രമത്തിനിരയായ സ്ത്രീയുടെ മനോനില കൂടുതല് തകര്ക്കാനേ ഇതുപകരിക്കൂ.
സ്ത്രീ ആയതുകൊണ്ട് മാത്രം സൈബര് ഇടത്തിലും കൂടുതല് ആക്രമിക്കപ്പെടുന്നുണ്ട് ?
സൈബര് ഇടത്തില് ലൈംഗികാതിക്രമങ്ങള്ക്ക് ഇരയാവുന്നത് കൂടുതലും സ്ത്രീകളാണ്. സമൂഹത്തില് ആഴത്തില് വേരോടിയ ചില കാഴ്ചപ്പാടുകളും ലിംഗപരമായ അതിക്രമങ്ങളും അസമത്വവുമൊക്കെയാണ് ഇതിനൊരു പ്രധാനകാരണം. സ്ത്രീ ഒരു ലൈംഗികോപകരണമാണെന്ന പുരുഷകാഴ്ചപ്പാട് ഇത്തരം ചിന്തയിലേക്ക് നയിക്കുന്നുണ്ട്. ഇത് നമ്മുടെ സമൂഹത്തിലും മാധ്യമങ്ങളിലും പരസ്യങ്ങളിലുമൊക്കെ ആഴത്തില് വേരോടിയിരിക്കുന്നു.അതുവഴി സ്ത്രീകള്ക്ക് എതിരായ അതിക്രമങ്ങളുണ്ടാവുന്നു. മറ്റൊന്ന് പൊതുവിഷയങ്ങളെക്കുറിച്ചുള്ള ഒരു ചര്ച്ചയില് ഒരു സ്ത്രീ ഇടപെട്ട് സംസാരിക്കുമ്പോള് അവര്ക്കെതിരെ ലൈംഗിക ചുവയോടെയുള്ള കമന്റുകള് ഇടുന്നതാണ്. അങ്ങനെ അവരുടെ വായടപ്പിക്കാന് ശ്രമിക്കുന്നുണ്ട്.പ്രധാന ചര്ച്ചകളില്നിന്ന് ഇതുവഴി സ്ത്രീ സമൂഹത്തെ അകറ്റിനിര്ത്തുന്നു.എന്തായാലും ഓണ്ലൈന് ഇടത്തിലുള്ള ഇത്തരം അതിക്രമങ്ങള് ഗൗരവമായി കാണാനും അതിനെതിരായ നടപടികളെടുക്കാനുമുള്ള ശ്രമങ്ങളുണ്ടാവണം.നിയമങ്ങളില് അതിന് അനുസരിച്ചുള്ള പരിഷ്കരണങ്ങളുണ്ടാവണം. അതുവഴി സൈബര് ഇടത്തില് സ്ത്രീകള്ക്ക് നിര്ഭയമായി ഇടപെടാനുള്ള സാഹചര്യം ഒരുക്കണം.
കേരളത്തില് എന്തുകൊണ്ടാവും ഇതുവരെ ഒരു സ്ത്രീ മുഖ്യമന്ത്രി ആവാതിരുന്നത്?
ഉയര്ന്ന സാക്ഷരതാ നിലവാരവും സ്ത്രീകളുടെ പൊതുപങ്കാളിത്തത്തിലെ വര്ധനവുംകൊണ്ട് ശ്രദ്ധേയമായ സമൂഹമാണ് കേരളത്തിലുള്ളതെങ്കിലും സംസ്ഥാനത്തിന് ഇതുവരെ ഒരു വനിതാമുഖ്യമന്ത്രി ഉണ്ടായില്ല എന്നത് യാഥാര്ത്ഥ്യമാണ്. ഇതിന് തോന്നുന്ന ചില കാരണങ്ങള് പറയാം.
ലിംഗനീതി ഇല്ലായ്മ- പലമേഖലകളിലും സ്ത്രീ-പുരുഷ തുല്യത ഉണ്ടായിട്ടുണ്ടെങ്കിലും ചിലയിടങ്ങളില് ഇപ്പോഴും അസമത്വം നിലനില്ക്കുന്നുണ്ട്.
രാഷ്ട്രീയ പാര്ട്ടികളിലെ പുരുഷമേല്ക്കോയ്മ- ലോകത്തിന്റെ പലഭാഗത്തുമെന്ന പോലെ കേരളത്തിലും രാഷ്ട്രീയരംഗം പുരുഷന്മാരുടെ കുത്തകയാണ്. നേതൃത്വത്തിലേക്ക് എത്തണമെങ്കില് സ്ത്രീകള് നിരവധി കടമ്പകള് മറികടക്കേണ്ടതുണ്ട്.
പിന്തുണാ സംവിധാനത്തിന്റെ അഭാവം- രാഷ്ട്രീയ രംഗത്ത് വേണ്ടത്ര പിന്തുണ നേടാനുള്ള സംവിധാനം സ്ത്രീകള്ക്കില്ല. അതിന് വഴികാട്ടാനോ സാമ്പത്തികമായി പിന്തുണയ്ക്കാനോ ആരുമില്ല.
അവസരമില്ലായ്മ-കേരളത്തിലെ രാഷ്ട്രീയ കക്ഷികളുടെ നേതൃത്വത്തിലെത്താന് സ്ത്രീകള്ക്ക് അവസരം കുറവാണ്.
ഈ വെല്ലുവിളികളെ നേരിടാന് സംഘടിതമായ ശ്രമങ്ങള് കൂടിയേ തീരു. അതിനൊപ്പം നയങ്ങള് മാറ്റാനും സ്ത്രീകള്ക്ക് രാഷ്ട്രീയത്തില് കൂടുതല് അവസരങ്ങള് നല്കാനും രാഷ്ട്രീയ പാര്ട്ടികളും തയ്യാറാവണം.
വിവാഹമോചനനിരക്ക് കേരളത്തില് കൂടുന്നുണ്ട്. ഇത് സ്ത്രീകള് കുടുംബത്തിനകത്ത് സ്വന്തം നിലപാടുകള് ഉയര്ത്തിപ്പിടിക്കാന് തന്റേടം നേടിയതുകൊണ്ടാണോ?
സാമൂഹികമായ പല കാരണങ്ങള്ക്കൊപ്പം സ്ത്രീകള് വ്യക്തിത്വം ഉയര്ത്തിപ്പിടിക്കാന് ആഗ്രഹിക്കുന്നതും അവര് സ്വന്തം കാലില്നില്ക്കാന് തുടങ്ങിയതും വിവാഹമോചനത്തിലേക്ക് നയിക്കുന്നുണ്ടാവും.അടുത്തിടെയായി സ്ത്രീകള് വിദ്യാഭ്യാസ-തൊഴില് രംഗങ്ങളില് വലിയ മുന്നേറ്റം നടത്തിയിട്ടുണ്ട്. അതുകൊണ്ടുതന്നെ സാമ്പത്തിക സ്വാശ്രയത്വവും തീരുമാനങ്ങളെടുക്കാനുള്ള കഴിവും അവര് സ്വായത്തമാക്കിക്കഴിഞ്ഞു. ഇതുകൊണ്ടുതന്നെ വിവാഹമോചനകാര്യത്തില് തീരുമാനമെടുക്കാന് പഴയ പോലെ സ്ത്രീകള് മടിക്കുന്നില്ല.
മൊബൈല് ഫോണ് സ്ത്രീ ജീവിതത്തില് വലിയ സ്വാതന്ത്ര്യം നല്കിയിട്ടുണ്ട്. അത് കേരളത്തിലെ സ്ത്രീകളുടെ ദാമ്പത്യബന്ധങ്ങളില് എന്തെങ്കിലും മാറ്റമുണ്ടാക്കിയോ?
ലോകത്താകെ എന്ന പോലെ കേരളത്തിലും സ്ത്രീകള്ക്ക് അവരുടെ വ്യക്തി ജീവിതത്തിലും തൊഴില് ജീവിതത്തിലുമൊക്കെ മൊബൈലിന്റെ വരവ് കൂടുതല് സ്വാതന്ത്ര്യം നല്കുന്നുണ്ട്. സ്വയം തീരുമാനങ്ങളെടുക്കാനും ആഗ്രഹങ്ങള് എത്തിപ്പിടിക്കാനുമൊക്കെ ഇത് അവരെ പ്രാപ്തരാക്കിയിട്ടുണ്ട്. ദാമ്പത്യ-കുടുംബ ബന്ധങ്ങളിലൊക്കെ ഇതിന്റെ സ്വാധീനം പ്രകടമാണ്.
എങ്കിലും, വൈവാഹിക ബന്ധങ്ങളില് മൊബൈല് ഫോണുകളുടെ സ്വാധീനം സങ്കീര്ണ്ണമാണെന്നും സന്ദര്ഭത്തെയും വ്യക്തിഗത സാഹചര്യങ്ങളെയും ആശ്രയിച്ച് വളരെയധികം വ്യത്യാസപ്പെടാമെന്നതും ശ്രദ്ധിക്കേണ്ടതാണ്. മൊബൈല് ഫോണുകള് ശാക്തീകരണത്തിനുള്ള ഒരു ഉപകരണമായിരിക്കാം, എന്നാല് അവ സംഘര്ഷത്തിന്റെയും നിയന്ത്രണത്തിന്റെയും ഉറവിടമാകാം. അതിനാല്, ഈ വിഷയത്തെ സൂക്ഷ്മതയോടെയും സംവേദനക്ഷമതയോടെയും സമീപിക്കേണ്ടത് അത്യാവശ്യമാണ്.
മലയാളി സ്ത്രീയുടെ സൗന്ദര്യത്തെക്കുറിച്ച് നിരവധി എഴുത്തുകാര് കാല്പനികമായി എഴുതിയിട്ടുണ്ട്. എന്താണ് സ്തീ സൗന്ദര്യത്തെക്കുറിച്ചുള്ള കാഴ്ചപ്പാട്?
ഓരോയിടത്തെയും സ്ത്രീകള്ക്ക് അവരുടേതായ സൗന്ദര്യമുണ്ട്. നീണ്ട മുടിയും തിളങ്ങുന്ന കണ്ണുകളുമൊക്കെയാണ് മലയാളി സ്ത്രീകളുടെ സൗന്ദര്യമെന്ന് എഴുതിയവരുണ്ട്. കരുത്തും ആത്മവിശ്വാസവുമാണ് അവരുടെ സൗന്ദര്യമെന്ന് വര്ണിച്ചവരുമുണ്ട്. അവരുടെ ബുദ്ധിശക്തിയെയും കാരുണ്യത്തെയും ദയാവായ്പിനെയും പുകഴ്ത്തിയവരുമുണ്ട്. എങ്കിലും ശാരീരികമായ ആകര്ഷണമല്ല സൗന്ദര്യത്തിന്റെ മാനദണ്ഡമെന്നാണ് നമ്മള് മനസ്സിലാക്കേണ്ടത്. വ്യക്തിത്വവും പെരുമാറ്റവുമാണ് സൗന്ദര്യത്തിന്റെ അളവുകോല്. ആത്യന്തികമായി, മലയാളി സ്ത്രീയുടെ അല്ലെങ്കില് ഏതെങ്കിലും സ്ത്രീയുടെ സൗന്ദര്യം, ഉപരിപ്ലവമായ വിവരണങ്ങള്ക്കപ്പുറമാണ്.
Content Highlights: Chat GPT about women's day and Malayali woman
Published: 08 Mar 2023, 03:43 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented