മസ്കറ്റ്: മുസന്ദം ഗവർണറേറ്റിലെ സുൽത്താൻ ഫൈസൽ ബിൻ തുർക്കി റോഡ് (ദിബ-ലിമ-ഖസബ്) പദ്ധതിയുടെ നിർമ്മാണ പ്രവൃത്തികൾ 76 ശതമാനത്തോളം പൂർത്തിയായതായി ഗതാഗത, വാർത്താവിനിമയ, വിവരസാങ്കേതിക മന്ത്രാലയം അറിയിച്ചു. ഗവർണറേറ്റിലെ വിവിധ വിലായാത്തുകൾ തമ്മിലുള്ള റോഡ് ഗതാഗതബന്ധം കൂടുതൽ ദൃഢമാക്കുന്നതിനായി 151 മില്യൺ ഒമാനി റിയാൽ ചെലവിൽ നടപ്പിലാക്കുന്ന ഏറ്റവും പ്രധാനപ്പെട്ട തന്ത്രപ്രധാനമായ അടിസ്ഥാനസൗകര്യ വികസന പദ്ധതികളിൽ ഒന്നാണിത്.

To advertise here,

ആകെ 72 കിലോ മീറ്റർ ദൈർഘ്യമുള്ള ഈ റോഡ് മൂന്ന് ഘട്ടങ്ങളായാണ് നിർമ്മിക്കുന്നത്. ഖസബ് വിലായാത്തിൽനിന്ന് ലിമ മേഖല വരെയുള്ള 20 കിലോമീറ്ററാണ് ഒന്നാം ഘട്ടം. ലിമക്കുള്ളിലൂടെയുള്ള 8 കിലോ മീറ്ററാണ് രണ്ടാം ഘട്ടം. മൂന്നാം ഘട്ടത്തിൽ ലിമയെ ദിബ വിലായാത്തുമായി ബന്ധിപ്പിക്കുന്ന 44 കിലോമീറ്റർ പാതയും ഉൾപ്പെടുന്നു.
റോഡ് ഗതാഗതത്തിന് തുറന്നുകൊടുക്കുന്നതോടെ യാത്രാസമയം വലിയ തോതിൽ കുറയും. മുൻപ് രണ്ടര മണിക്കൂറോളം സമയമെടുത്തിരുന്ന ഖസബിൽനിന്ന് ദിബയിലേക്കുള്ള യാത്ര ഇനി ഏകദേശം 55 മിനിറ്റുകൊണ്ട് പൂർത്തിയാക്കാം. ലിമയിൽനിന്ന് ഖസബിലേക്കുള്ള യാത്രയ്ക്ക് ഇനി 20 മിനിറ്റ് മാത്രം മതിയാകും.

പദ്ധതി പൂർത്തിയാകുന്നതോടെ മുസന്ദം ഗവർണറേറ്റിലെ പ്രദേശങ്ങൾ തമ്മിലുള്ള യാത്രാസൗകര്യം വർദ്ധിക്കുകയും ട്രാഫിക് തടസ്സങ്ങൾ ഒഴിവാകുകയും ചെയ്യും. കൂടാതെ സാമ്പത്തിക-വിനോദസഞ്ചാര മേഖലകളിൽ വലിയ ഉണർവ് നൽകാനും പ്രാദേശിക വികസനത്തിനും പുതിയ നിക്ഷേപ അവസരങ്ങൾ തുറക്കാനും ഈ പാത വഴിയൊരുക്കും.