ബെംഗളൂരു : ഐ.ടി. നഗരമായ ബെംഗളൂരുവിനെയും വിനോദസഞ്ചാരകേന്ദ്രമായ ഗോവയെയും തമ്മിൽ ബന്ധിപ്പിക്കുന്ന വന്ദേഭാരത് തീവണ്ടി സർവീസിന്റെ ഉദ്ഘാടനം വെള്ളിയാഴ്ച നടക്കും. ഉച്ചയ്ക്ക് 12-ന് എസ്.എം.വി.ടി. സ്റ്റേഷനിൽ നടക്കുന്ന ചടങ്ങിൽ പ്രധാനമന്ത്രി നരേന്ദ്രമോദി ഫ്ളാഗ് ഓഫ് നിർവഹിക്കും. ആദ്യ ദിവസം എസ്.എം.വി.ടി.യിൽനിന്ന് മഡ്ഗാവിലേക്കും മംഗളൂരുവിൽനിന്ന് ബെംഗളൂരുവിലേക്കും പ്രത്യേക സർവീസ് നടത്തും. സ്ഥിരംസർവീസ് ഞായറാഴ്ചയാണ് ആരംഭിക്കുന്നത്.

To advertise here,

എസ്.എം.വി.ടി.-മഡ്ഗാവ് വന്ദേഭാരത് ഉദ്ഘാടന പ്രത്യേക തീവണ്ടി (06512) വെള്ളിയാഴ്ച ഉച്ചയ്ക്ക് 1.30-ന് പുറപ്പെട്ട് അടുത്തദിവസം പുലർച്ചെ 2.55-ന് മഡ്ഗാവിൽ എത്തും. മംഗളൂരു-ബെംഗളൂരു പ്രത്യേക സർവീസ് (06213) വെള്ളിയാഴ്ച ഉച്ചയ്ക്ക് 1.30-ന് മംഗളൂരുവിൽനിന്ന് പുറപ്പെട്ട് അന്നുരാത്രി ഒൻപതിന് എസ്.എം.വി.ടിയിൽ എത്തും.

ബെംഗളൂരുവിൽനിന്ന് മഡ്ഗാവിലേക്ക് ബുധനാഴ്ച ഒഴികെ ആഴ്ചയിൽ ആറുദിവസവും വന്ദേഭാരത് സർവീസുണ്ടായിരിക്കും. മടക്ക സർവീസ് വ്യാഴാഴ്ച ഒഴികെയുള്ള ദിവസങ്ങളിൽ നടത്തും.

ബെംഗളൂരു-മഡ്ഗാവ് വന്ദേഭാരത് എക്സ്പ്രസ് (26655) രാവിലെ 7.35-ന് യശ്വന്തപുരയിൽനിന്ന് പുറപ്പെട്ട് വൈകീട്ട് 3.05-ന് മംഗളൂരുവിൽ എത്തിയതിനുശേഷം രാത്രി 8.55-ന് മഡ്ഗാവിൽ എത്തിച്ചേരും.

മടക്ക തീവണ്ടി (26656) രാവിലെ 8.20-ന് മഡ്ഗാവുനിന്ന് പുറപ്പെട്ട്് 1.50-ന് മംഗളൂരുവിൽ എത്തിയതിനുശേഷം രാത്രി 21.15-ന് യശ്വന്തപുരയിൽ എത്തിച്ചേരും.

നേരത്തെയുള്ള മംഗളൂരു-മഡ്ഗാവ് വന്ദേഭാരത് എക്സ് പ്രസിന് (20645/20646) പകരമാണ് ഇപ്പോൾ ബെംഗളൂരു-മംഗളൂരു-മഡ്ഗാവ് വന്ദേഭാരത് എക്സ്‌പ്രസ് ആരംഭിക്കുന്നത്.

ബെംഗളൂരുവിൽനിന്ന് ഗോവയിലേക്കുള്ള രാത്രിതീവണ്ടി(17309) 12 മണിക്കൂറിൽ ഗോവയിൽ എത്തുമ്പോൾ വന്ദേഭാരതിന്റെ യാത്രാ സമയം 13.20 മണിക്കൂറാണ്.

13 മണിക്കൂറിലേറെ ഇരുന്ന് യാത്രചെയ്യേണ്ടിവരുന്നത് വന്ദേഭാരതിന്റെ വലിയൊരു കുറവായി ചൂണ്ടിക്കാട്ടപ്പെടുന്നു.

ഇതേ സമയം, ഈ തീവണ്ടിയിൽ ബെംഗളൂരുവിൽനിന്ന് മംഗളൂരുവിലേക്കുള്ള യാത്രാസമയം കുറവാണ്.

മറ്റ് എക്സ്പ്രസ് തീവണ്ടികളിൽ ബെംഗളൂരുവിൽനിന്ന് മംഗളൂരുവിൽ എത്തിച്ചേരാൻ 9.30 മണിക്കൂറിൽ കൂടുതൽ വേണ്ടിവരുമ്പോൾ പുതിയ വന്ദേഭാരതിൽ 7.30 മണിക്കൂർ മതിയാകും.

അതിനാൽ കാസർകോട്, കണ്ണൂർ എന്നിവിടങ്ങളിലുള്ള മലയാളികൾക്ക് ഈ സർവീസ് ഗുണകരമാണ്.