വാഷിങ്ടൺ: വോട്ടർപട്ടികാ പരിഷ്‌കരണത്തിന്റെ പേരിൽ ഇന്ത്യ മതന്യൂനപക്ഷങ്ങളെ ലക്ഷ്യമിടുകയാണെന്ന ആരോപണവുമായി യുഎസ് മതസ്വാതന്ത്ര്യ കമ്മിഷൻ (യുഎസ്‍സിഐആർഎഫ്). രാജ്യത്തുടനീളം കോടിക്കണക്കിന് ആളുകളെ വോട്ടർപട്ടികയിൽനിന്ന് ഒഴിവാക്കിയ നടപടി പ്രധാനമായും ബാധിച്ചത് മുസ്‌ലിങ്ങളെയാണെന്നും കമ്മിഷൻ ആരോപിച്ചു. വോട്ടർപട്ടികയിൽനിന്ന് പേരുകൾ നീക്കം ചെയ്യുന്നതിനൊപ്പം മുസ്‌ലിം പൗരന്മാരെ വിദേശികളായി മുദ്രകുത്തുകയും നിയമവിരുദ്ധമായി നാടുകടത്തുകയും ചെയ്യുന്നുവെന്നും കമ്മിഷൻ ആരോപിച്ചു. പ്രസ്താവനയിലൂടെയാണ് യുഎസ്സിഐആർഎഫ് ഇക്കാര്യങ്ങൾ പറഞ്ഞത്.

To advertise here,

വോട്ടർപട്ടികയിൽ നിന്ന് 13 കോടിയിലേറെ പേരെയാണ് ഇന്ത്യയിൽ നീക്കം ചെയ്തത്. രാജ്യത്തിന്റെ ചരിത്രത്തിലെ ഏറ്റവും വലിയ ഒഴിവാക്കൽ നടപടിയാണ് ഇത്. മെക്‌സിക്കോയിലെ ജനസംഖ്യയ്ക്ക് തുല്യമായ എണ്ണം ആളുകളെയാണ് പട്ടികയിൽ നിന്ന് പുറത്താക്കിയത്. ഇന്ത്യയിലെ ഏറ്റവും വലിയ ന്യൂനപക്ഷ വിഭാഗമായ മുസ്‌ലിങ്ങളെ ഈ നടപടി ബാധിച്ചെന്ന് പുറത്തുവന്ന കണക്കുകൾ വ്യക്തമാക്കുന്നതായി അവകാശസംഘടനകൾ ചൂണ്ടിക്കാട്ടുന്നു. 

ഇന്ത്യയിലെ മുസ്‌ലിം പൗരന്മാരെ വോട്ടർപട്ടികയിൽനിന്ന് നീക്കം ചെയ്ത് വിദേശികളെന്ന് വിളിക്കുകയാണെന്ന് യുഎസ് മതസ്വാതന്ത്ര്യ കമ്മിഷൻ അധ്യക്ഷൻ ആസിഫ് മഹ്‌മൂദ് പറഞ്ഞു. സ്വന്തം പൗരന്മാരെ മതവിശ്വാസത്തിന്റെ പേരിൽ പുറത്താക്കുന്നത് ഞെട്ടിക്കുന്ന നടപടിയാണെന്ന് കമ്മിഷണർ ജീൻ മിൽസും പ്രതികരിച്ചു. ഇന്ത്യയെ മതസ്വാതന്ത്ര്യത്തിന്റെ കാര്യത്തിൽ പ്രത്യേക ആശങ്കയുള്ള രാജ്യമായി പ്രഖ്യാപിക്കണമെന്ന് (കൺട്രി ഓഫ് പാർട്ടിക്കുലർ കൺസേൺ) യുഎസ് സ്റ്റേറ്റ് ഡിപ്പാർട്ട്മെന്റിനോട് മിൽസ് ആവശ്യപ്പെട്ടു.

അതേസമയം, അർഹതയില്ലാത്തവരുടെ പേരുകൾ ഒഴിവാക്കുന്നതിനുള്ള നടപടിയാണ് വോട്ടർപട്ടിക പരിഷ്‌കരണമെന്നാണ് ഇന്ത്യൻ തിരഞ്ഞെടുപ്പ് കമ്മിഷൻ പറയുന്നത്. ഇരട്ടപ്പേരുകൾ, മരിച്ചവർ, താമസം മാറിയവർ, മറ്റ് കാരണങ്ങളാൽ വോട്ടർപട്ടികയിൽ തുടരാൻ അർഹതയില്ലാത്തവർ എന്നിവരുടെ പേരുകളാണ് ഒഴിവാക്കുന്നത്. തെറ്റായി പേര് നീക്കം ചെയ്യപ്പെട്ടവർക്ക് അപ്പീൽ നൽകാനും അവസരമുണ്ടെന്നും തിരഞ്ഞെടുപ്പ് കമ്മിഷൻ ചൂണ്ടിക്കാട്ടുന്നു.

ഇന്ത്യയിലെ ആഭ്യന്തര കാര്യങ്ങളിൽ ഇടപെടുന്നുവെന്ന് ആരോപിച്ച് യുഎസ് മതസ്വാതന്ത്ര്യ കമ്മിഷന്റെ നിലപാടുകളെ വിദേശകാര്യ മന്ത്രാലയം നേരത്തേ തള്ളിയിട്ടുണ്ട്. കമ്മിഷൻ പക്ഷപാതപരമായാണ് പെരുമാറുന്നതെന്നാണ് ഇന്ത്യയുടെ നിലപാട്. പുതിയ ആരോപണത്തിൽ വാഷിങ്ടണിലെ ഇന്ത്യൻ എംബസി ഇതുവരെ പ്രതികരിച്ചിട്ടില്ല.

യുഎസ് സർക്കാരിന്റെ ഭാഗമായ ഉഭയകക്ഷി സംവിധാനമാണ് യുഎസ് മതസ്വാതന്ത്ര്യ കമ്മിഷൻ. ലോകത്തിന്റെ വിവിധ ഭാഗങ്ങളിലെ മതസ്വാതന്ത്ര്യ സാഹചര്യം നിരീക്ഷിക്കുകയും യുഎസ് സർക്കാരിന് നയപരമായ നിർദേശങ്ങൾ നൽകുകയുമാണ് ഇതിന്റെ ചുമതല. എന്നാൽ, കമ്മിഷന്റെ നിർദേശങ്ങൾ സർക്കാർ നിർബന്ധമായും നടപ്പാക്കേണ്ടതില്ല. ഇന്ത്യയെ സംബന്ധിച്ച കമ്മിഷന്റെ സമീപകാല ശുപാർശകളിൽ ഒന്നിലും യുഎസ് സർക്കാർ ഇതുവരെ നടപടിയെടുത്തിട്ടില്ല.