വാഷിങ്ടൺ/ടെഹ്റാൻ: അമേരിക്ക, ഇസ്രയേൽ, ഇറാൻ രാജ്യങ്ങൾ തമ്മിലുള്ള സംഘർഷം അതീവ ഗുരുതരമായ ഘട്ടത്തിലേക്ക് കടന്നതോടെ, യുദ്ധം എങ്ങനെ അവസാനിക്കുമെന്നതിൽ ആശങ്ക തുടരുന്നു. കഴിഞ്ഞ 48 മണിക്കൂറിനുള്ളിൽ പുറത്തുവന്ന ഇറാൻ പ്രസിഡന്റ് മസൂദ് പെസെഷ്കിയന്റെയും അമേരിക്കൻ പ്രസിഡന്റ് ഡൊണാൾഡ് ട്രംപിന്റെയും പ്രസ്താവനകൾ യുദ്ധത്തിന്റെ അന്ത്യത്തെക്കുറിച്ച് തികച്ചും വ്യത്യസ്തമായ കാഴ്ചപ്പാടുകളാണ് മുന്നോട്ടുവെക്കുന്നത്. ഒരു വശത്ത് സമാധാനത്തിനായുള്ള ചർച്ചകൾ നടക്കുമ്പോഴും മറുവശത്ത് യുദ്ധം തുടരാനുള്ള നീക്കങ്ങൾ സജീവമാകുന്നതായാണ് സൂചനകൾ.

To advertise here,

അമേരിക്ക ഇതിനോടകം തന്നെ യുദ്ധത്തിൽ നിർണ്ണായകമായ സൈനിക വിജയം നേടിയെന്നാണ് ഡൊണാൾഡ് ട്രംപ് അവകാശപ്പെടുന്നത്. കെന്റക്കിയിലെ ഹെബ്രോണിൽ നടന്ന റാലിയിൽ സംസാരിക്കവെ, ആദ്യ മണിക്കൂറിൽ തന്നെ തങ്ങൾ ജയിച്ചു കഴിഞ്ഞു എന്ന് ട്രംപ് പറഞ്ഞു. അമേരിക്കൻ സൈന്യം ഡസൻ കണക്കിന് ഇറാനിയൻ നാവിക കപ്പലുകൾ നശിപ്പിക്കുകയും ഇറാന്റെ സൈനിക അടിസ്ഥാന സൗകര്യങ്ങൾ തകർക്കുകയും ചെയ്തതിലൂടെ രാജ്യത്തിന്റെ സൈനിക ശേഷിയെ ഏതാണ്ട് പൂർണ്ണമായും ഇല്ലാതാക്കിയതായി ട്രംപ് അവകാശപ്പെടുന്നു.

യുദ്ധത്തിൽ മേൽക്കൈ ലഭിച്ചുവെന്ന് വിശ്വസിക്കുമ്പോഴും, ദൗത്യം പൂർത്തിയാക്കാൻ സൈനിക നടപടികൾ തുടരുമെന്ന സൂചനയാണ് അമേരിക്ക നൽകുന്നത്. ദൗത്യം പൂർത്തിയാക്കേണ്ടതുണ്ട്, അതിനാൽ നേരത്തെ മടങ്ങാൻ ആഗ്രഹിക്കുന്നില്ല എന്ന് ട്രംപ് പറഞ്ഞു. താൻ ആഗ്രഹിക്കുന്ന ഏതു സമയത്തും ഈ യുദ്ധം അവസാനിപ്പിക്കാൻ സാധിക്കുമെന്നും ഇനി ഇറാനിൽ ആക്രമിക്കാൻ ലക്ഷ്യങ്ങളൊന്നും അവശേഷിക്കുന്നില്ലെന്നും അദ്ദേഹം കൂട്ടിചേർത്തു. ഇറാന്റെ സൈനിക ശേഷി പൂർണ്ണമായും തകർത്തെന്ന് ഉറപ്പാക്കിയ ശേഷമേ യുദ്ധം അവസാനിപ്പിക്കൂ എന്നതിന്റെ സൂചനകളാണിതെന്നാണ് വിദഗ്ധർ വിലയിരുത്തുന്നത്.

ഇറാൻ പ്രസിഡന്റ് മസൂദ് പെസെഷ്കിയൻ സമാധാനത്തിന് തയ്യാറാണെന്ന് അറിയിച്ചെങ്കിലും അതിനായി മൂന്ന് കർശനമായ നിബന്ധനകൾ മുന്നോട്ടുവെച്ചിട്ടുണ്ട്. ഇറാന്റെ നിയമപരമായ അവകാശങ്ങൾ അംഗീകരിക്കുക, യുദ്ധം വരുത്തിവെച്ച നാശനഷ്ടങ്ങൾക്ക് നഷ്ടപരിഹാരം നൽകുക, ഭാവിയിൽ അമേരിക്കയുടെയോ ഇസ്രയേലിന്റെയോ ഭാഗത്തുനിന്ന് ആക്രമണങ്ങൾ ഉണ്ടാകില്ലെന്ന അന്താരാഷ്ട്ര ഉറപ്പ് നൽകുക എന്നിവയാണവ. വെറും സൈനിക വെടിനിർത്തലിന് പകരം രാഷ്ട്രീയമായ വിട്ടുവീഴ്ചകളിലൂടെ മാത്രമേ യുദ്ധം അവസാനിപ്പിക്കാനാവൂ എന്നാണ് ഇറാന്റെ നിലപാട്.

യുദ്ധത്തിന്റെ അന്ത്യം അമേരിക്കയ്ക്ക് ഏകപക്ഷീയമായി തീരുമാനിക്കാനാവില്ലെന്ന് ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർ (ഐആർജിസി) വ്യക്തമാക്കി. യുദ്ധത്തിന്റെ അന്ത്യം നിശ്ചയിക്കുന്നത് തങ്ങളാണെന്നും മേഖലയിലെ ഭാവി സമവാക്യങ്ങൾ ഇപ്പോൾ ഇറാൻ സായുധ സേനയുടെ കൈകളിലാണെന്നും ഐആർജിസി അവകാശപ്പെടുന്നു. അമേരിക്ക ആഗ്രഹിക്കുമ്പോൾ യുദ്ധം അവസാനിപ്പിക്കാമെന്ന ട്രംപിന്റെ അവകാശവാദത്തെ ഇറാൻ പൂർണ്ണമായും തള്ളിക്കളയുകയും ദീർഘകാല പോരാട്ടത്തിന് തങ്ങൾ സജ്ജമാണെന്ന സൂചന നൽകുകയും ചെയ്യുന്നതാണ് ഐആർജിസിയുടെ നിലപാട്.

അതേസമയം, ഇസ്രയേൽ യുദ്ധം അവസാനിപ്പിക്കുന്നതിനായുള്ള കൃത്യമായ സമയപരിധികളെക്കുറിച്ച് ഇതുവരെ പ്രതികരിച്ചിട്ടില്ല. ഇറാന്റെ സൈനിക ശേഷിയും മേഖലയിലെ സ്വാധീനവും പൂർണ്ണമായും തകർക്കുന്നത് വരെ പോരാട്ടം തുടരുമെന്നാണ് ബെഞ്ചമിൻ നെതന്യാഹുവിന്റെ നിലപാട്. അമേരിക്ക വിജയപ്രഖ്യാപനം നടത്തുമ്പോഴും, ഇസ്രയേൽ ലക്ഷ്യങ്ങൾ പൂർത്തിയാകുന്നതുവരെ പോരാട്ടം തുടരാനാണ് ആഗ്രഹിക്കുന്നത്. മൂന്ന് രാജ്യങ്ങളും വ്യത്യസ്തമായ നിലപാടുകളിൽ ഉറച്ചുനിൽക്കുന്നതിനാൽ, സംഘർഷത്തിന്റെ അന്ത്യം അതിന്റെ തുടക്കം പോലെ തന്നെ പ്രവചനാതീതമായി തുടരുകയാണ്.