വൈറ്റ്ഹൗസില് അമേരിക്കന് പ്രസിഡന്റ് ഡൊണാള്ഡ് ട്രംപുമായി കൂടിക്കാഴ്ച നടത്തുന്ന പാകിസ്താന് പ്രധാനമന്ത്രി ഷഹ്ബാസ് ഷരീഫും സൈനികമേധാവി അസിം മുനീറും | ഫോട്ടോ: പി.ടി.ഐ
ഇസ്ലാമാബാദ്: അറബിക്കടലില് തുറമുഖം നിര്മിക്കാന് അമേരിക്കയെ പാകിസ്താന് ക്ഷണിച്ചതായി റിപ്പോര്ട്ട്. പാക് സൈനിക മേധാവി അസിം മുനീറിന്റെ ഉപദേഷ്ടാക്കള് ഈ ആവശ്യംകാട്ടി അമേരിക്കന് അധികൃതരെ സമീപിച്ചതായി ഫിനാന്ഷ്യല് ടൈംസ് റിപ്പോര്ട്ട് ചെയ്തു.
തുറമുഖം നിര്മിക്കാനും നടത്തിപ്പിനുമുള്ള അവകാശവും അമേരിക്കയ്ക്ക് തന്നെ നല്കിയേക്കുമെന്നാണ് സൂചന. പാകിസ്താനിലെ നിര്ണായക ധാതുക്കളുള്ള പസ്നി പട്ടണത്തിലേക്ക് അമേരിക്കന് നിക്ഷേപകര്ക്ക് കൂടി പ്രവേശനം നല്കുന്നതാണ് പദ്ധതി. ബലൂചിസ്ഥാന് പ്രവിശ്യയിലെ ഗ്വാദര് ജില്ലയിലുള്ള ഒരു തുറമുഖ നഗരം കൂടിയാണ് പസ്നി.
യുഎസ് സൈനികതാവളം സംബന്ധിച്ച് ആവശ്യങ്ങള്ക്ക് തുറമുഖം ഉപയോഗിച്ചേക്കില്ല. ധാതുക്കള് നിറഞ്ഞ പടിഞ്ഞാറന് പ്രവിശ്യയുമായി തുറമുഖത്തെ ബന്ധിപ്പിക്കുന്ന ഒരു റെയില് ഗതാഗതത്തിന് സാമ്പത്തിക സഹായം തേടുന്നത് പദ്ധതിയുടെ ലക്ഷ്യങ്ങളിലൊന്നാണ്.
കഴിഞ്ഞ സെപ്റ്റംബറില് വൈറ്റ്ഹൗസില് പാകിസ്താന് പ്രധാനമന്ത്രി ഷഹ്ബാസ് ഷരീഫുമായും സൈനികമേധാവി അസിം മുനീറുമായും അമേരിക്കന് പ്രസിഡന്റ് ഡൊണാള്ഡ് ട്രംപ് കൂടിക്കാഴ്ച നടത്തിയതിനുപിന്നാലെയാണ് പാകിസ്താന്റെ പുതിയ നീക്കം. കൂടിക്കാഴ്ചയില് കൃഷി, സാങ്കേതികവിദ്യ, ഖനനം, ഊര്ജം എന്നീ മേഖലകളില് അമേരിക്കന് നിക്ഷേപം പാകിസ്താന് തേടിയിരുന്നു.
Published: 04 Oct 2025, 04:56 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented