വാഷിങ്ടൺ: താൻ ഭാര്യയോട് വഞ്ചന കാണിച്ചുവെന്നും ചൈനീസ് ചാരവനിതയെന്ന് ആരോപിക്കപ്പെടുന്ന വ്യക്തിയുമായി പ്രണയബന്ധത്തിലായിരുന്നുവെന്നും സമ്മതിച്ച് എൻവിഡിയ മേധാവി ജെൻസൻ ഹുവാങ്. കമ്പനി ജീവനക്കാർക്കയച്ച വൈകാരികമായ ഇമെയിൽ സന്ദേശത്തിലാണ് ഹുവാങ് ഈ വെളിപ്പെടുത്തൽ നടത്തിയത്.

To advertise here,

താൻ ചെയ്ത പ്രവൃത്തിക്ക് ന്യായീകരണങ്ങളില്ലെന്നും അത് കുടുംബത്തെയും സഹപ്രവർത്തകരെയും ഏറെ വേദനിപ്പിച്ചുവെന്നും ഹുവാങ് ഇമെയിലിൽ വ്യക്തമാക്കി. കുടുംബത്തോടും എൻവിഡിയ ജീവനക്കാരോടും ഓഹരി ഉടമകളോടും അദ്ദേഹം മാപ്പ് ചോദിക്കുകയും തെറ്റിന്റെ പൂർണ്ണ ഉത്തരവാദിത്തം ഏറ്റെടുക്കുകയും ചെയ്തു.

സിംഗപ്പൂർ ആസ്ഥാനമായുള്ള ഡാറ്റാ സെന്റർ കമ്പനിയായ 'മെഗാസ്പീഡ്' ഉന്നത ഉദ്യോഗസ്ഥയായ അലിസ് ഹുവാങ് ചൈനീസ് രഹസ്യാന്വേഷണ ഏജന്റാണെന്ന് യു.എസ് രഹസ്യാന്വേഷണ ഏജൻസികൾ റിപ്പോർട്ട് ചെയ്തിരുന്നു. ജെൻസൻ ഹുവാങ്ങുമായി അടുത്ത ബന്ധം സ്ഥാപിച്ച ഇവർ എൻവിഡിയയുടെ അത്യാധുനിക എഐ ചിപ്പുകളെക്കുറിച്ചുള്ള വിവരങ്ങൾ ബെയ്ജിംഗിലേക്ക് ചോർത്തിനൽകിയെന്നാണ് ന്യൂയോർക്ക് ടൈംസ് റിപ്പോർട്ട് ചെയ്തത്.

ജെൻസൻ ഹുവാങ് വിദേശ രഹസ്യാന്വേഷണ ശ്രമങ്ങളുടെ ഇരയായെന്ന റിപ്പോർട്ടുകളുടെ പശ്ചാത്തലത്തിൽ എൻവിഡിയ ബോർഡ് ഓഫ് ഡയറക്ടേഴ്സ് ഒരു സ്വതന്ത്ര അന്വേഷണത്തിന് ഉത്തരവിട്ടിട്ടുണ്ട്. ഇതുവരെ കമ്പനിയുടെ വ്യാവസായിക രഹസ്യങ്ങളോ യു.എസ് ദേശീയ സുരക്ഷയോ ലംഘിക്കപ്പെട്ടതായി തെളിവുകളില്ലെന്ന് ബോർഡ് അറിയിച്ചു.

മെഗാസ്പീഡുമായുള്ള കമ്പനിയുടെ ബിസിനസ് ഇടപാടുകൾ സാധാരണ രീതിയിലുള്ളവ മാത്രമായിരുന്നുവെന്നും അലിസ് ഹുവാങ്ങിനെക്കുറിച്ച് യു.എസ് സർക്കാരിന്റെ സംശയങ്ങളെക്കുറിച്ച് തനിക്ക് നേരത്തെ അറിവുണ്ടായിരുന്നില്ലെന്നുമാണ് ജെൻസൻ ഹുവാങ് ഇതിനോട് പ്രതികരിച്ചത്.