ഇസ്രയേൽ തിരഞ്ഞെടുപ്പിൽ കേവലഭൂരിപക്ഷം നഷ്ടപ്പെട്ടതിന് തൊട്ടുപിന്നാലെ, തിരഞ്ഞെടുപ്പ് പ്രക്രിയയുടെ സുതാര്യത ചോദ്യംചെയ്ത് പ്രധാനമന്ത്രി ബെഞ്ചമിൻ നെതന്യാഹുവും അദ്ദേഹത്തിന്റെ ലിക്കുഡ് പാർട്ടിയും രംഗത്ത്. പാർലമെന്റിൽ മേൽക്കൈ നഷ്ടമായതോടെ, പ്രതിപക്ഷം പുതിയ സർക്കാർ രൂപവത്കരിക്കുന്നതും പുതിയ സ്പീക്കറെ തിരഞ്ഞെടുക്കുന്നതും തടയുകയാണ് നെതന്യാഹുവിന്റെ പ്രധാന ലക്ഷ്യം.

To advertise here,

തിരഞ്ഞെടുപ്പിൽ പരാജയപ്പെട്ടാൽ 2020-ലെ അമേരിക്കൻ പ്രസിഡൻറ് തിരഞ്ഞെടുപ്പിൽ ഡൊണാൾഡ് ട്രംപ് 'വോട്ട് മോഷണം' ആരോപിച്ചത് പോലെ നെതന്യാഹുവിന്റെ ലികുഡ് പാർട്ടിയും മുൻകൂട്ടി പദ്ധതി തയ്യാറാക്കിയിരുന്നതായി റിപ്പോർട്ടുകളുണ്ട്. തിരഞ്ഞെടുപ്പിൽ ജോ ബൈഡനോട് പരാജയപ്പെട്ടതിന് പിന്നാലെ, വോട്ട് മോഷ്ടിക്കപ്പെട്ടുവെന്നും വ്യാപകമായ ക്രമക്കേടുകൾ നടന്നുവെന്നുമാണ് ഡൊണാൾഡ് ട്രംപ് ആരോപിച്ചത്. ട്രംപും അനുകൂലികളും വിവിധ സംസ്ഥാനങ്ങളിലായി അറുപതിലധികം കേസുകൾ നൽകിയെങ്കിലും തെളിവുകളുടെ അഭാവത്തിൽ സുപ്രീം കോടതി ഈ വാദങ്ങളെല്ലാം തള്ളിക്കളയുകയായിരുന്നു.

അമേരിക്കൻ മോഡൽ ആരോപണം ഉന്നയിക്കാനുള്ള തയ്യാറെടുപ്പിന്‍റെ ഭാഗമായി ഉയർന്ന പ്രതിഫലം നൽകി ലിക്കുഡ് പാർട്ടി പ്രത്യേക നിരീക്ഷണ സംഘങ്ങളെ ചുമതലപ്പെടുത്തിയിരുന്നു. അറബ് ഭൂരിപക്ഷ പ്രദേശങ്ങളിലെ പോളിങ് ബൂത്തുകൾക്ക് പുറത്ത് നിലയുറപ്പിച്ച് വോട്ടർമാരെ നിരീക്ഷിക്കാനും വിവരങ്ങൾ ഉടൻതന്നെ പാർട്ടി കേന്ദ്രത്തിലേക്ക് കൈമാറാനുമായിരുന്നു ഈ സ്വകാര്യ സംഘങ്ങൾക്ക് നൽകിയ നിർദേശമെന്ന് ടൈംസ് ഓഫ് ഇസ്രയേൽ റിപ്പോർട്ട് ചെയ്തു.

വോട്ടർമാർക്കിടയിൽ ആശങ്ക പടർത്താനും പിന്നീട് വോട്ട് തട്ടിപ്പ് ആരോപണങ്ങൾ ഉയർത്തുന്നതിനാവശ്യമായ തെളിവുകൾ ശേഖരിക്കാനുമായിരുന്നു ഇവരുടെ ശ്രമം. ബുർഖ ധരിച്ചെത്തുന്ന സ്ത്രീകൾ ആവർത്തിച്ചു വോട്ട് രേഖപ്പെടുത്തുന്നുണ്ടോ എന്ന് നിരീക്ഷിക്കുന്നത് ഉൾപ്പെടെയുള്ള മാർഗങ്ങളാണ് ഈ സംഘം സ്വീകരിച്ചതെന്ന് ലിക്കുഡ് പാർട്ടി വൃത്തങ്ങൾ ഇസ്രയേലി മാധ്യമങ്ങളോട് വെളിപ്പെടുത്തി.

120 അംഗ നെസ്സറ്റിൽ നെതന്യാഹുവിന്റെ സഖ്യത്തിന് 53 സീറ്റുകളും പ്രതിപക്ഷ സഖ്യത്തിന് 48 സീറ്റുകളുമാണ് ലഭിച്ചത്. കേവലഭൂരിപക്ഷത്തിന് 61 സീറ്റുകൾ വേണമെന്നിരിക്കെ, 19 സീറ്റുകൾ നേടിയ റാ'അം, ജോയിന്റ് ലിസ്റ്റ് എന്നീ അറബ് പാർട്ടികളുടെ പിന്തുണയോടെ പ്രതിപക്ഷത്തിന് പുതിയ സ്പീക്കറെ തിരഞ്ഞെടുക്കാനും മുൻ സർക്കാരിന്റെ നിയമപരിഷ്കാരങ്ങൾ റദ്ദാക്കാനും സാധിക്കും. ഇതു തടയാനായി അറബ് പാർട്ടികളുമായുള്ള രാഷ്ട്രീയ സഹകരണത്തെ നിയമവിരുദ്ധമായി ചിത്രീകരിക്കാനും രാജ്യത്തെ വീണ്ടുമൊരു തിരഞ്ഞെടുപ്പിലേക്കു നയിക്കാനുമായി നെതന്യാഹു മുന്നോട്ടുവക്കുന്ന ആരോപണം വോട്ട് തട്ടിപ്പാണ്.

ആരോപണങ്ങൾ തള്ളി തിരഞ്ഞെടുപ്പ് കമ്മിഷൻ

നെതന്യാഹുവും അനുകൂല മാധ്യമങ്ങളും വ്യാപകമായ വോട്ട് തട്ടിപ്പ് ആരോപിക്കുമ്പോഴും, തിരഞ്ഞെടുപ്പ് നിയമപരവും സുതാര്യവുമായിരുന്നുവെന്ന് കേന്ദ്ര തിരഞ്ഞെടുപ്പ് കമ്മിഷൻ വ്യക്തമാക്കി. പോളിങ് സ്റ്റേഷനുകളിൽ ക്രമക്കേട് നടന്നതിന് യാതൊരു തെളിവുമില്ലെന്ന് കമ്മിഷൻ ആക്ടിങ് ഡയറക്ടർ ജനറൽ ഡീൻ ലിവ്നെ പറഞ്ഞു. കൂടാതെ, ഇസ്രയേൽ നിയമപ്രകാരം തിരഞ്ഞെടുപ്പ് ഫലത്തിനെതിരായ ഹർജികൾ നിലവിലുണ്ടെങ്കിലും നെസ്സറ്റിന്റെ പ്രവർത്തനങ്ങളോ തീരുമാനങ്ങളോ വൈകിപ്പിക്കില്ലെന്നും കമ്മിഷൻ വ്യക്തമാക്കി.

ആരോപണങ്ങൾക്കു പിന്നിൽ പ്രധാനമന്ത്രിയുടെ ഓഫീസ്; അന്വേഷണത്തിൽ ഷിൻ ബെറ്റും മൊസാദും

ഖത്തറും തുർക്കിയും തിരഞ്ഞെടുപ്പിൽ ഇടപെട്ടെന്നും അറബ് വോട്ടർമാർക്ക് ലക്ഷക്കണക്കിന് ഷെക്കലുകൾ വിതരണം ചെയ്തെന്നുമാണ് പ്രധാന ആരോപണം. എന്നാൽ, ഈ വാദങ്ങൾ ദോഹയും അങ്കാറയും തള്ളി. ആഭ്യന്തര സുരക്ഷാ ഏജൻസിയായ ഷിൻ ബെറ്റിന്റെ തലവൻ ഡേവിഡ് സിനിയുടെ അഭ്യർഥനപ്രകാരം വിദേശ രഹസ്യാന്വേഷണ ഏജൻസിയായ മൊസാദും അന്വേഷണത്തിൽ പങ്കുചേർന്നതായി റിപ്പോർട്ടുകളുണ്ട്.

അറബ് വോട്ടർമാർക്കു പണം നൽകിയെന്ന സംശയത്തിൽ മൂന്ന് റാ'അം പ്രവർത്തകരെ പോലീസ് അറസ്റ്റ് ചെയ്തെങ്കിലും, ഇവരുടെ വീടുകളിലോ ഫോണുകളിലോ കൈക്കൂലി നൽകിയതിന് യാതൊരു തെളിവുകളും കണ്ടെത്താനായില്ല. വാറന്റില്ലാതെ നടത്തിയ അറസ്റ്റിനുശേഷം, തെളിവുകളില്ലാത്തതിനാൽ ഇവരെ ഉടൻ വിട്ടയയ്ക്കുമെന്നാണു വിവരം. പ്രധാനമന്ത്രിയുടെ ഓഫീസാണ് കേസിന്റെ ചുക്കാൻ പിടിക്കുന്നത്, നെതന്യാഹുവിന്റെ ചീഫ് ഓഫ് സ്റ്റാഫ് ഇദോ നോർഡൻ നൽകിയ വിവരത്തിന്റെ അടിസ്ഥാനത്തിലാണ് പോലീസ് അന്വേഷണം ആരംഭിച്ചതെന്നും സൂചനയുണ്ട്.

ഇതിനുപിന്നാലെയാണ് തിരഞ്ഞെടുപ്പ് 'മോഷ്ടിക്കപ്പെട്ടു' എന്ന വാദവുമായി നെതന്യാഹു രംഗത്തെത്തിയത്. എന്നാൽ, തിരഞ്ഞെടുപ്പ് ദിനത്തിൽ അപൂർവം ചില ഒറ്റപ്പെട്ട സംഭവങ്ങൾ മാത്രമാണുണ്ടായതെന്നും വോട്ട് മോഷ്ടിക്കപ്പെട്ടു എന്ന വാദത്തിന് യാതൊരു തെളിവുമില്ലെന്നും പോലീസ് വ്യക്തമാക്കി. അന്വേഷണം ഏതെങ്കിലും പ്രത്യേക വിഭാഗത്തെ സംശയനിഴലിൽ നിർത്താൻ ഉദ്ദേശിച്ചുള്ളതല്ലെന്ന് ഷിൻ ബെറ്റും വ്യക്തമാക്കി.

പ്രതിപക്ഷ നേതാക്കളുടെ പ്രതികരണം

തോൽവിയിൽനിന്ന് ശ്രദ്ധതിരിക്കാനുള്ള തന്ത്രം മാത്രമാണ് നെതന്യാഹുവിന്റെ ആരോപണങ്ങളെന്ന് അറബ്, ഇടത് പാർട്ടികൾ ചൂണ്ടിക്കാട്ടി. പുതിയ സ്പീക്കറെ തിരഞ്ഞെടുക്കുന്നത് തടയാനും ജൂത-അറബ് പാർട്ടികൾ തമ്മിലുള്ള രാഷ്ട്രീയ സഹകരണം ഇല്ലാതാക്കാനുമാണ് ഇത്തരം നാടകങ്ങൾ കളിക്കുന്നതെന്നും അവർ ആരോപിച്ചു. പാർലമെന്ററി ഭൂരിപക്ഷം നഷ്ടപ്പെട്ടതിനുപിന്നാലെ ജനാധിപത്യ പ്രക്രിയയെയും തിരഞ്ഞെടുപ്പ് ഫലത്തെയും അട്ടിമറിക്കാൻ നെതന്യാഹു ശ്രമിക്കുകയാണെന്ന് പ്രമുഖ ജൂത പ്രതിപക്ഷ നേതാക്കളും പ്രതികരിച്ചു.

പ്രതിപക്ഷ നേതാവ് ഗാഡി ഐസൻകോട്ട് ഉൾപ്പെടെയുള്ളവരെ ഷിൻ ബെറ്റ് മേധാവി സ്ഥിതിഗതികൾ ധരിപ്പിച്ചിട്ടുണ്ട്. മുൻപ് പ്രചാരണവേളയിൽ അറബ് പാർട്ടികളുമായി സഖ്യമുണ്ടാക്കില്ലെന്ന് പ്രതിപക്ഷ പാർട്ടികൾ പ്രഖ്യാപിച്ചിരുന്നെങ്കിലും, ഇവർ ഒന്നിക്കുന്നത് തന്റെ അധികാരം നഷ്ടപ്പെടുത്തുമെന്ന ഭയമാണ് നെതന്യാഹുവിനെ നയിക്കുന്നത്.