ടെൽ അവീവ്: ഇസ്രയേൽ ദേശീയ തിരഞ്ഞെടുപ്പ് വോട്ടെണ്ണൽ അവസാനിച്ചു. സെൻട്രൽ ഇലക്ഷൻ കമ്മിറ്റി അന്തിമ ഫലം വെള്ളിയാഴ്ച പുലർച്ചയോടെ പുറത്തുവിട്ടു. അന്തിമ ഫലം അനുസരിച്ച് പ്രധാനമന്ത്രി ബെഞ്ചമിൻ നെതന്യാഹുവിനെ അനുകൂലിക്കുന്ന വലതുപക്ഷ സഖ്യത്തിന് 53 സീറ്റുകൾ ലഭിച്ചു. ഗാദി ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യത്തിന് 48 സീറ്റും അറബ് പാർട്ടികൾക്ക് 19 സീറ്റും ലഭിച്ചു.

To advertise here,

ഇസ്രയേൽ പാർലമെന്റായ 120 അംഗ നെസറ്റിൽ സർക്കാർ രൂപവത്കരിക്കാൻ 61 സീറ്റുവേണം. ആർക്കും കേവല ഭൂരിപക്ഷമില്ലാത്ത സാഹചര്യത്തിൽ അറബ് പാർട്ടികളുടെ പിന്തുണ പ്രധാനമാണ്. വിദേശ ഇടപെടലുകൾ നടന്നതായും വ്യാപക അട്ടിമറി നടന്നെന്നും നെതന്യാഹു ആരോപിച്ച പശ്ചാത്തലത്തിൽ അന്വേഷണങ്ങൾ പൂർത്തിയാക്കിയശേഷം ബുധനാഴ്ചയാകും ഫലം ഔദ്യോഗികമായി പ്രഖ്യാപിക്കുക.

അതേസമയം വോട്ടെടുപ്പിൽ വ്യാപക അട്ടിമറി നടന്നെന്ന നെതന്യാഹുവിന്റെ ആരോപണം ഇസ്രയേൽ സെൻട്രൽ ഇലക്ഷൻ കമ്മിറ്റി തള്ളിയിട്ടുണ്ട്. 'തിരഞ്ഞെടുപ്പിൽ വ്യാപകമായ കൃത്രിമത്വം നടന്നു എന്നാരോപിച്ചുള്ള വാദങ്ങൾ അടിസ്ഥാനരഹിതമാണ്'ഇലക്ഷൻസ് കമ്മിറ്റി ആക്ടിംഗ് ഡയറക്ടർ ജനറൽ ഡീൻ ലിവ്നെ പറഞ്ഞു. തിരഞ്ഞെടുപ്പിൽ ഖത്തറിന്റെ ഇടപെടൽ നടന്നുവെന്നതടക്കമായിരുന്നു നെതന്യാഹുവിന്റെ വാദം.

എന്നാൽ ഇസ്രയേലിലെ ആഭ്യന്തര രഹസ്യാന്വേഷണ ഏജൻസിയായ ഷിൻ ബെറ്റും നെതന്യാഹുവിന്റെ വാദത്തിൽ കഴമ്പില്ലെന്ന സൂചനകളാണ് നൽകിയത്. വിദേശ ഇടപെടൽ ഉണ്ടായെന്നതിനെക്കുറിച്ചുള്ള തങ്ങളുടെ അന്വേഷണം പരിമിതമാണെന്ന് അറിയിച്ച ഷിൻ ബെറ്റ് വൃത്തങ്ങൾ നവംബർ 4-ന് നിശ്ചയിച്ച പ്രകാരം ഔദ്യോഗിക തിരഞ്ഞെടുപ്പ് ഫലം പ്രസിഡന്റ് ഐസക് ഹെർസോഗിന് സമർപ്പിക്കുന്നതിന് ഈ അന്വേഷണം തടസ്സമാകില്ലെന്നും വ്യക്തമാക്കി.

ഐസൻകോട്ട്-അറബ്പാർട്ടി സർക്കാരിന് സാധ്യത

19 സീറ്റുകൾ നേടി അറബ് പാർട്ടികൾ നിർണായക ശക്തിയായത് പ്രധാനമന്ത്രി ബെഞ്ചമിൻ നെതന്യാഹുവിനും എതിരാളി ഗാദി ഐസൻകോട്ടിനും ഒരുപോലെ തിരിച്ചടിയായിരിക്കുകയാണ്. നെതന്യാഹുവിന്റെ ലികുഡ് പാർട്ടിയും ഐസൻകോട്ടിന്റെ യാഷർ പാർട്ടിയും തിരഞ്ഞെടുപ്പിൽ മുന്നോട്ടുവെച്ച പ്രധാന വാഗ്ദാനങ്ങളിലൊന്നായിരുന്നു അറബ് പാർട്ടികളുമായി കൂട്ടുകൂടുകയില്ല എന്നത്. അറബ് പാർട്ടികളുമായി സഖ്യത്തിനില്ലെന്ന് തറപ്പിച്ച് പറഞ്ഞിട്ടുള്ള നെതന്യാഹുവിന് മുന്നിൽ രണ്ട് വഴികളാണ് ഉള്ളത്. ഒന്നുകിൽ ഐസൻകോട്ടുമായി ചേർന്ന് സഖ്യസർക്കാർ രൂപീകരിക്കുക. അല്ലെങ്കിൽ തിരഞ്ഞെടുപ്പ് അട്ടിമറി ആരോപണങ്ങൾ ഉന്നയിച്ച് വീണ്ടും തിരഞ്ഞെടുപ്പിലേക്കെത്തിക്കുക. ഇതിൽ രണ്ടാമത്തേതിലാണ് അദ്ദേഹമിപ്പോൾ ശ്രദ്ധ കേന്ദ്രീകരിച്ചിരിക്കുന്നത്. ഐസൻകോട്ടിന് മുന്നിലും രണ്ട് വഴികളുണ്ട്. നെതന്യാഹുവുമായി കൂട്ടുകൂടുക, അല്ലെങ്കിൽ അറബ് പാർട്ടികളുമായി ചേർന്ന് സർക്കാർ രൂപീകരിക്കുക. ഇതിൽ ഏത് തിരഞ്ഞെടുത്താലും

സ്വന്തം തിരഞ്ഞെടുപ്പ് വാഗ്ദാനങ്ങളിൽ നിന്ന് പിന്മാറാൻ ഐസൻകോട്ടിനെ നിർബന്ധിതനാക്കും. രണ്ട് പക്ഷത്തും ചേരില്ലെന്നായിരുന്നു അദ്ദേഹത്തിന്റെ വാഗ്ദാനം.

എന്നാൽ വോട്ടെടുപ്പ് അവസാനിച്ചതിന് പിന്നാലെ ഹീബ്രു യൂണിവേഴ്‌സിറ്റിയുടെ അക്കോർഡ് സെന്റർ നടത്തിയ സർവ്വെ പ്രകാരം, ഇസ്രായേലിലെ മാറ്റം ലക്ഷ്യമിടുന്ന പാർട്ടികളുടെ വോട്ടർമാരിൽ ഭൂരിഭാഗവും അറബ് പാർട്ടികളെ ഉൾപ്പെടുത്തി ഐസൻകോട്ടിന്റെ നേതൃത്വത്തിലുള്ള സർക്കാർ വരണമെന്ന് ആഗ്രഹിക്കുന്നവരാണ്.

ഐസൻകോട്ടിന്റെ യാഷർ, നഫ്താലി ബെന്നറ്റിന്റെ ബിയാച്ചദ്, യായർ ഗോലന്റെ ഡെമോക്രാറ്റ്സ്, അവ്വിഗ്ഡോർ ലിബർമാന്റെ ഇസ്രായേൽ ബൈയ്തേനു എന്നീ പാർട്ടികൾ ചേർന്നാണ് ഇസ്രയേലിലെ പ്രധാനപ്രതിപക്ഷ ചേരി. ഈ വോട്ടർമാരിൽ 61% പേരും മൻസൂർ അബ്ബാസിന്റെ 'റാം' പാർട്ടിയുമായി ചേർന്ന് സർക്കാർ രൂപീകരിക്കുന്നതിനെ അനുകൂലിച്ചതായി സർവ്വെ പറയുന്നു. 20 ശതമാനം പേർ വീണ്ടും തിരഞ്ഞെടുപ്പ് വരണമെന്ന് വാദിച്ചപ്പോൾ 12 ശതമാനംപേർ നെതന്യാഹുവുമായി സഖ്യമുണ്ടാക്കണമെന്നാണ് ആവശ്യപ്പെട്ടത്.

ഇതിനിടെ യായർ ഗോലൻ അറബ് പാർട്ടികളുടെ നേതാക്കളുമായി കൂടിക്കാഴ്ച നടത്തിയിട്ടുണ്ട്. അറബ് പാർട്ടി സഖ്യത്തെ ഗോലൻ പിന്തുണയ്ക്കുന്നുണ്ടെങ്കിലും ഐസൻകോട്ട്, നഫ്താലി ബെന്നറ്റ്, ലിബർമാൻ എന്നീ സഖ്യകക്ഷി നേതാക്കൾക്ക് ഇതിനോട് എതിർപ്പാണുള്ളത്. എന്നാൽ പുതിയ സർവ്വേ ഫലങ്ങളുടെ പശ്ചാത്തലത്തിൽ ഇവർ തീരുമാനം മാറ്റുമോയെന്നത് കണ്ടറിയണം.

നെതന്യാഹുവിന്റെ പാർട്ടി ഏറ്റവും വലിയ ഒറ്റക്കക്ഷി

27 സീറ്റുകൾ നേടിയ നെതന്യാഹുവിന്റെ ലികുഡ് പാർട്ടിയാണ് തിരഞ്ഞെടുപ്പിൽ ഏറ്റവും വലിയ ഒറ്റകക്ഷി. 21 സീറ്റുകളുമായി ഐസൻകോട്ടിന്റെ യാഷർ പാർട്ടി രണ്ടാമതാണ്. 11 സീറ്റുകളുള്ള ജോയിന്റ് ലിസ്റ്റും എട്ട് സീറ്റുകളുള്ള റാം പാർട്ടിയും ചേർന്നതാണ് അറബ് പാർട്ടികൾ.