ഹൂതികളെ തകര്‍ത്ത് ഇറാനെ വരുതിയിലാക്കാനുള്ള ട്രംപിന്റെ തന്ത്രം ഫലിക്കുമോ?

.

ട്രംപിന് ഇറാനെ വരുതിയിലാക്കാനാവുമോ?

ഇറാനെ ആണവപരിപാടികള്‍ ഉപേക്ഷിക്കാന്‍ നിര്‍ബന്ധിതമാക്കാനുള്ള ട്രംപിന്റെ തന്ത്രങ്ങളുടെ ഭാഗമായാണ് എണ്ണത്തുറമുഖത്തെ ആക്രമിച്ചത്. പരമാവധി സമ്മര്‍ദം എന്ന രീതിയാണ് ട്രംപ് ഇക്കാര്യത്തില്‍ സ്വീകരിച്ചിട്ടുള്ളത്. സൈനികവും സാമ്പത്തികവും നയതന്ത്രപരവുമായ സമ്മര്‍ദ നടപടികളിലൂടെ ഇറാനെ ചര്‍ച്ചയ്ക്ക് നിര്‍ബന്ധിതമാക്കുക. ഇറാന്റെ ആണവനിരായുധീകരണം സംബന്ധിച്ച 2015-ലെ സംയുക്ത സമഗ്ര കര്‍മ്മപദ്ധതിയില്‍ നിന്നും ട്രംപ് 2018-ല്‍, തന്റെ  ആദ്യപ്രസിഡന്‍സി കാലത്ത്, പിന്‍മാറിയിരുന്നു. ഇറാന്റെ ബാലിസ്റ്റിക് മിസൈല്‍ പദ്ധതി ഉള്‍പ്പെടാത്തതിനാല്‍ അത് മോശം കരാറാണെന്ന് ട്രംപ് അന്ന് വിമര്‍ശിച്ചിരുന്നു.

ആണവനിരായുധീകരണത്തിന് വഴങ്ങിയില്ലെങ്കില്‍ ഇറാനെതിരേ തന്നെ നടപടികള്‍ കടുപ്പിക്കാനാണ് അമേരിക്കന്‍ ഉദ്ദേശ്യം. പുതിയ ആണവകരാറിന് സന്നദ്ധമായില്ലെങ്കില്‍ ഇറാനില്‍ ബോംബ് വര്‍ഷിക്കുമെന്ന് ഈ മാസമാദ്യം ട്രംപ് ഭീഷണിപ്പെടുത്തിയിരുന്നു. ഇറാന്റെ എണ്ണ കയറ്റുമതിയെ ശ്വാസംമുട്ടിക്കാന്‍ അമേരിക്ക ഉപരോധങ്ങള്‍ ശക്തിപ്പെടുത്തിയിട്ടുണ്ട്. പ്രത്യേകിച്ച്, ഇറാനില്‍ നിന്ന് എണ്ണ വാങ്ങുന്ന പ്രധാനപ്പെട്ട രാജ്യങ്ങളില്‍ ഒന്നായ ചൈനയിലേക്കുള്ള കയറ്റുമതിക്ക്. ഇറാന് സഹായം നല്‍കുന്നതായി ആരോപിക്കപ്പെടുന്ന റഷ്യ, യു.എ.ഇ, തുടങ്ങിയ രാജ്യങ്ങളിലെ കമ്പനികളെയും അമേരിക്കന്‍ ട്രഷറി ഡിപ്പാര്‍ട്ട്‌മെന്റ് ലക്ഷ്യം വച്ചിട്ടുണ്ട്.

ഇറാന്റെ ആണവപദ്ധതി തുടര്‍ന്നു കൊണ്ടുപോകുന്നതിന് ആവശ്യമായ സാമ്പത്തിക സ്രോതസ്സുകള്‍ അടയ്ക്കുക, പ്രോക്‌സി ശൃംഖലകളെ ഇല്ലാതാക്കുക, ഇറാന്റെ ആണവ പ്രവര്‍ത്തനങ്ങള്‍ക്ക് ശാശ്വതനിയന്ത്രണങ്ങള്‍ ഏര്‍പ്പെടുത്തുന്ന പുതിയ ആണവ കരാര്‍ ഉണ്ടാക്കുക- ട്രംപ് ലക്ഷ്യംവെക്കുന്നത് ഇവയാണ്. ബാലിസ്റ്റിക് മിസൈല്‍ പദ്ധതികളെയും നിയന്ത്രിക്കാന്‍ കൂടി ഉദ്ദേശിച്ചുള്ളതാണ് ട്രംപിന്റെ മനസ്സിലുള്ള കരാര്‍. ഒമാനില്‍ ഏപ്രില്‍ മാസം തുടങ്ങിയ ആദ്യഘട്ട മാധ്യസ്ഥ ചര്‍ച്ചകളില്‍ കാര്യമായ പുരോഗതി ഉണ്ടായില്ല. നേരിട്ട് ചര്‍ച്ച ചെയ്യാമെന്ന് ട്രംപ് നിര്‍ദ്ദേശിക്കുമ്പോള്‍ ഇടനിലക്കാര്‍ വഴി പരോക്ഷ ചര്‍ച്ചകള്‍ മതി എന്നാണ് ഇറാന്റെ പക്ഷം. 2015-ലെ കരാര്‍ ഉപേക്ഷിച്ചത് പോലെ പുതുതായി ഉണ്ടാക്കുന്ന കരാര്‍ ഉപേക്ഷിക്കില്ലെന്ന് ഉറപ്പു വേണമെന്ന് ഇറാന്‍ ആവശ്യപ്പെടുന്നു.

രണ്ടുമാസത്തിനകം കരാര്‍ ഉണ്ടാക്കണമെന്ന അന്ത്യശാസനമാണ് ട്രംപ് നല്‍കിയിരിക്കുന്നതെങ്കിലും ഇറാന്‍ കുലുങ്ങുമെന്നു തോന്നുന്നില്ല. യുറേനിയം സമ്പുഷ്ടീകരിക്കുന്ന കാര്യത്തില്‍ വിട്ടുവീഴ്ചയില്ലെന്നും മിസൈല്‍ പദ്ധതിയില്‍ നിയന്ത്രണത്തിനു തയ്യാറല്ലെന്നും പരമോന്നത ആത്മീയ നേതാവ് ആയത്തൊള്ള ഖമേനി  വ്യക്തമാക്കിയിരുന്നു. ഇറാനെതിരായ ആക്രമണത്തെ പിന്തുണയ്ക്കുന്നത് രാജ്യത്തിനെതിരായ നീക്കമായി കാണുമെന്ന് വിദേശമന്ത്രി അബ്ബാസ് അരാഗ്ച്ചി അയല്‍രാജ്യങ്ങള്‍ക്ക് മുന്നറിയിപ്പു നല്‍കിയിട്ടുണ്ട്. ഇറാന്‍ സ്വന്തമായി അണ്വായുധം നിര്‍മിക്കുന്നതിന് അടുത്തെത്തിയിരിക്കുകയാണ് എന്ന സൂചനകള്‍ അമേരിക്കയെ കൂടുതല്‍ സമ്മര്‍ദത്തിലാഴ്ത്തുന്നു. മധ്യസ്ഥ ചര്‍ച്ചകള്‍ പരാജയപ്പെട്ടാല്‍ കാര്യങ്ങള്‍ കൈവിട്ടു പോകാനുള്ള സാധ്യത കൂടുതലാണ്.

ഇന്ത്യയ്ക്കും തലവേദന

എണ്ണ ഇറക്കുമതിയെ വലിയതോതില്‍ ആശ്രയിക്കുന്ന രാജ്യമാണ് ഇന്ത്യ. ഇന്ത്യന്‍ മഹാസമുദ്രവുമായി ബന്ധപ്പെട്ടു കിടക്കുന്ന ചെങ്കടലിലെ കപ്പലുകള്‍ക്കു നേരെ ഹൂതികള്‍ ആക്രമണം നടത്താന്‍ തുടങ്ങിയതോടെ എണ്ണ ടാങ്കറുകളടക്കമുള്ള കപ്പലുകള്‍ ആഫ്രിക്കയിലെ പ്രത്യാശാ മുനമ്പുവഴി തിരിച്ചുവിടേണ്ടി വന്നു. അവ യൂറോപ്പിലെത്താന്‍ പത്തു പതിന്നാലു ദിവസം കൂടുതലെടുക്കും. സമയനഷ്ടവും സാമ്പത്തികനഷ്ടവും. നമുക്കാവശ്യമുള്ള എണ്ണയുടെ 60 ശതമാനവും വാങ്ങുന്നത് മേഖലയിലെ സൗദി അറേബ്യ, യു.എ.ഇ തുടങ്ങിയ രാജ്യങ്ങളില്‍ നിന്നാണ്. അതുപോലെ, യൂറോപ്പിലേക്ക് ഇന്ത്യ അയക്കുന്ന സംസ്‌കരിച്ച പെട്രോളിയവും കൂടിയ വിലയ്ക്ക് വില്‍ക്കേണ്ടി വരും.

മറ്റൊന്ന് ഇന്ത്യയും ഇറാനും ആയുള്ള സാമ്പത്തികവും നയതന്ത്രപരവുമായ ബന്ധമാണ്. കടുത്ത പാശ്ചാത്യസമ്മര്‍ദ്ദമുണ്ടായിട്ടും ഇറാനുമായി ഇന്ത്യ ബന്ധം വിച്ഛേദിച്ചില്ല. ഇന്ത്യയെ അഫ്ഗാനിസ്താനും മധ്യേഷ്യയുമായി ബന്ധിപ്പിക്കാനുദ്ദേശിച്ചുള്ള ചബഹാര്‍ തുറമുഖം ഉദാഹരണം. മധ്യപൂര്‍വേഷ്യ യുദ്ധത്തിലേക്കു നീങ്ങിയാല്‍ അത് ഇന്ത്യയുടെ നയതന്ത്രസന്തുലനത്തെ ബാധിക്കും. ചെങ്കടല്‍ മേഖലയിലെ തടസ്സങ്ങള്‍ ഗള്‍ഫ് രാജ്യങ്ങളിലെ ഇന്ത്യന്‍ പ്രവാസികളെയും ബാധിക്കും. ഈ മേഖലയിലെ വാണിജ്യകപ്പലുകളെ സംരക്ഷിക്കാന്‍ പടക്കപ്പലുകളെ നിയോഗിച്ചിരിക്കുന്നത് ഇന്ത്യയുടെ ദേശീയ താല്‍പര്യത്തിന് അത് എത്ര പ്രധാനപ്പെട്ടതാണെന്നതിന്റെ സൂചനയാണ്.