നിലയ്ക്കുന്ന സഹായങ്ങളും മസ്ക്കിന്റെ കടുംവെട്ടും; ഡോജിന് ഇന്ത്യൻ വോട്ടിൽ എന്താണ് കാര്യം?

അതേസമയം, ഡോജിന്റെ സുതാര്യത ഇപ്പോഴും ചോദ്യമുനയിൽ തന്നെയാണ്. ഡെമോക്രാറ്റുകളടക്കമുള്ളവർ ഇത് ഉന്നയിക്കുന്നുമുണ്ട്. സർക്കാർ ചെലവുകളുടെ വിവരങ്ങൾ തെറ്റായി പ്രചരിപ്പിക്കുന്നതും തിരഞ്ഞെടുക്കപ്പെടാത്ത വ്യക്തി എന്ന നിലയിൽ മസ്കിന്റെ അധികാരത്തേയും രാഷ്ട്രീയ എതിരാളികൾ ചോദ്യംചെയ്യുന്നു. യു.എസ് സർക്കാരിന്റെ വിവിധ കരാറുകൾ മസ്കിനുള്ളതിനാൽ അദ്ദേഹത്തിന്റെ താത്പര്യങ്ങളെക്കുറിച്ചും വിമർശനങ്ങളുണ്ട്. ഇതുസംബന്ധിച്ച വിഷയങ്ങളിൽ യു.എസ് കോടതികളിൽ നിയമവ്യവഹാരങ്ങളും നടക്കുന്നുണ്ട്. എന്നാൽ, ഇതിനൊന്നും ചെവികൊടുക്കാൻ ട്രംപിനോ മസ്കിനോ ഉദ്ദേശമില്ല.

യു.എസ്. എയ്ഡിനും വിലക്ക് 
നൂറിലധികം രാജ്യങ്ങൾക്ക് മാനുഷിക സഹായം നൽകിവരുന്ന യു.എസ് എയ്ഡിനേയും(യു.എസ് ഏജൻസി ഫോർ ഇന്റർനാഷണൽ ഡിവലപ്‌മെന്റ്) ട്രംപും മസ്കും വെറുതെവിട്ടില്ല. 60 വർഷത്തോളമായി ജീവകാരുണ്യ പ്രവർത്തനങ്ങളിൽ ഏർപ്പെട്ടിരിക്കുന്ന പ്രസ്ഥാനം ഇപ്പോൾ അടച്ചുപൂട്ടലിന്റെ വക്കിലാണ്. ഏജൻസിയുടെ ചെലവുകളിൽ ഭൂരിഭാ​ഗവും പാഴായതായാണ് ഇരുവരുടേയും വാദം. യു.എസ് എയ്ഡിന്റെ പ്രവർത്തനം നേരിട്ടും അല്ലാതെയും ബാധിക്കുന്ന നൂറിലധികം രാജ്യങ്ങൾ ലോകത്തുണ്ട്. മിക്കവാറും മൂന്നാംലോകരാജ്യകളേയും സമൂഹത്തിന്റെ അടിത്തട്ടിലുള്ളവരേയും ആയിരിക്കും തീരുമാനം നേരിട്ട് ബാധിക്കുകയെന്നതും ആശങ്കാജനകമാണ്. 

യു.എസ് എയ്ഡ്സിന്റെ സുതാര്യതയെ ചോദ്യംചെയ്തുകൊണ്ട് അമേരിക്കൻ മണ്ണിൽ ട്രംപ് സർക്കാർ മുന്നോട്ടുപോകുമ്പോൾ വഴിമുട്ടുന്നത് സാധാരണക്കാരന്റെ ജീവിതമാണ്. മാനുഷികമായ പരി​ഗണന ഈ വിഷയത്തിൽ ആവശ്യമാണെന്ന് ഡെമോക്രാറ്റുകൾ ഇതിനോടകം ആവശ്യം ഉന്നയിച്ചിട്ടുണ്ട്. കൂടാതെ, സർക്കാർ തീരുമാനം ലോകരാജ്യങ്ങൾക്കിടയിൽ ശത്രുരാജ്യങ്ങളുടെ സ്വാധീനം വർധിപ്പിക്കാൻ ഇടയായേക്കുമെന്നും ഇവർ ചൂണ്ടിക്കാട്ടുന്നു. രാജ്യസുരക്ഷ അപകടത്തിലാകുമെന്നുവരെ ഡെമോക്രാറ്റുകൾ ആരോപിച്ചെങ്കിലും തീരുമാനത്തിൽ നിന്ന് ഇരുവരും ഒരടി പിന്നോട്ടില്ലെന്നു തന്നെയാണ് പുറത്തുവരുന്ന റിപ്പോർട്ടുകൾ വ്യക്തമാക്കുന്നത്. 

യു.എസ് എയ്ഡിന്റെ കാര്യങ്ങൾ മാത്രമല്ല ഡോജ് പ്രതിസന്ധിയിലാക്കുന്നത്. യു.എസ്. പ്രതിരോധവിഭാഗത്തിന്റെ ആസ്ഥാനമായ പെന്റഗണിന്റെ കാര്യവും കഷ്ടത്തിലാണ്. പെന്റഗണിന്റെ ചെലവ് പരിശോധിക്കാൻ ഇലോൺ മസ്കിനോട് ട്രംപ് ആവശ്യപ്പെട്ടത് വലിയ വിവാദങ്ങൾക്ക് വഴിവെച്ചിരുന്നു. ഇതോടെ, മസ്കിന്റെ ചെലവുചുരുക്കൽ പദ്ധതിയിൽ യു.എസിന്റെ അഭിമാനമായ പ്രതിരോധവും ഉൾപ്പെടുമോ എന്ന ചോദ്യം പലയിടങ്ങളിൽ നിന്നുമുയർന്നു.

ഇന്ത്യയും ഡോജും
ഇന്ത്യയെ സംബന്ധിച്ച് അത്ര വലിയ പ്രശ്നമുള്ള കാര്യമല്ല യു.എസ്. എയ്ഡും ഡോജും. എന്നിരുന്നാലും ആ​ഗോളതലത്തിലുണ്ടാകുന്ന മാറ്റങ്ങൾ ഒരുപക്ഷേ ഇന്ത്യൻ മാർക്കറ്റിലും പ്രതിഫലിച്ചേക്കാം. ഇന്ത്യയിലെ തിരഞ്ഞെടുപ്പിൽ ജനപ്രാതിനിധ്യം ഉറപ്പാക്കാൻ യു.എസ്. സർക്കാർ നീക്കിവെച്ച 182 കോടി ഡോളർ ഡോജ് റദ്ദാക്കിയതായി യു.എസ് അധികൃതർ വ്യക്തമാക്കിയിരുന്നു. ഇതുസംബന്ധിച്ച വാർത്തകൾ പുറത്തുവന്നതോടെയാണ് ഇന്ത്യക്കാർ ഡോജിനെ പറ്റി കൂടുതൽ അന്വേഷിക്കുന്നതും അറിയുന്നതും. പ്രധാനമന്ത്രി നരേന്ദ്രമോദിയുടെ യു.എസ്. സന്ദർശനത്തിനു തൊട്ടുപിന്നാലെയുണ്ടായ പ്രഖ്യാപനത്തെ, പക്ഷേ, കേന്ദ്ര സർക്കാർ മറ്റൊരു ദിശയിലേക്ക് വഴിതിരിച്ചുവിട്ടു. ഇത്തരം ഫണ്ട് ഇന്ത്യയുടെ ഇന്ത്യയുടെ തിരഞ്ഞെടുപ്പ് പ്രക്രിയയിൽ ഇടപെടുന്നതിന് തുല്യമാണെന്നാണ് ബി.ജെ.പി.യുടെ വാദം. ഭരിക്കുന്ന പാർട്ടിയല്ല ഇത്തരം നീക്കങ്ങളിൽ നിന്ന് നേട്ടം കൊയ്യുന്നതെന്നും അവർ തറപ്പിച്ചുപറയുന്നു.

മനുഷ്യചരിത്രത്തിലെ ഏറ്റവും വലിയ കുംഭകോണമെന്നാണ് പ്രധാനമന്ത്രിയുടെ ഉപദേശകൻ സഞ്ജീവ് സന്യാൽ യു.എസ് എയ്ഡ്സിനെ വിശേഷിപ്പിച്ചത്. ഇന്ത്യയിലെ തിരഞ്ഞെടുപ്പിൽ ജനപ്രാതിനിധ്യം ഉറപ്പാക്കാൻ യു.എസ്. നൽകിയ പണം ആർക്കാണ് ലഭിച്ചതെന്നും അദ്ദേഹം ചോദിച്ചു. ഇക്കാര്യത്തിലൊന്നും ഇതുവരെ ഒരു വ്യക്തത വരുത്താൻ യു.എസ് തയ്യാറായിട്ടില്ല. 

ബം​ഗ്ലാദേശിനോടും യുക്രൈനോടും കടുംവെട്ട്
ട്രംപ് സർക്കാർ അധികാരത്തിലേറി അധികംവൈകാതെ തന്നെ മുഹമ്മദ് യൂനുസിന്റെ കീഴിലുള്ള ഇടക്കാല സർക്കാർ റിപ്പബ്ലിക്കൻ നയങ്ങളുടെ ചൂടറിഞ്ഞു. കലാപകലുഷിതമായ അന്തരീക്ഷത്തിൽ നിന്ന് കരകയറാനുതകുന്ന ഒരു സഹായവും തങ്ങളിൽ നിന്ന് പ്രതീക്ഷിക്കേണ്ടതില്ല എന്ന് പറയാതെ പറയുകയായിരുന്നു ട്രംപ്. ബം​ഗ്ലാദേശിനുള്ള കരാറുകളും ​ഗ്രാന്റുകളും ഉൾപ്പെടെ എല്ലാ സാമ്പത്തിക സഹായങ്ങളും നിർത്തലാക്കാൻ ട്രംപ് ഭരണകൂടം തീരുമാനിച്ചു. രാജ്യത്തെ രാഷ്ട്രീയഭൂമിക ശക്തിപ്പെടുത്തുന്നതിന് യു.എസ്. എയ്ഡ് നൽകിയിരുന്ന 250 കോടി രൂപയുടെ ധനസഹായം പിൻവലിച്ചതാണ് ഏറ്റവും അവസാനം ബം​ഗ്ലാദേശ് സർക്കാരിനെതിരേ യു.എസ് കൈക്കൊണ്ട നടപടി. ഷെയ്ഖ് ഹസീന സർക്കാരിനെ അട്ടിമറിച്ചതിന് പിന്നിൽ യു.എസ്സിനു യാതൊരു പങ്കുമില്ലെന്ന് ട്രംപ് വ്യക്തമാക്കിയതിന് തൊട്ടുപിന്നാലെയായിരുന്നു ഈ നടപടി.

രാജ്യത്തിന്റെ പുതിയ വിദേശനയങ്ങളുമായി പൊരുത്തപ്പെടുന്ന സാമ്പത്തികസഹായം മാത്രം തുടർന്നാൽ മതിയെന്ന യു.എസ് നയത്തിന്റെ സൂചകമാണ് യുക്രൈനെതിരായ നടപടി. റഷ്യ-യുക്രൈൻ യുദ്ധം തുടർന്നുപോകുന്നതിന് കാരണക്കാരൻ വൊളോദിമിർ സെലെൻസ്‌കിയാണെന്ന് തുറന്നടിച്ച് നയം വ്യക്തമാക്കിയ ട്രംപ് രാജ്യത്തിനുള്ള സാമ്പത്തികസഹായവും മരവിച്ചു. തന്നെക്കാൾ വലുതും ശക്തരുമായ റഷ്യയോട് യുദ്ധത്തിനുപോകാൻ പാടില്ലായിരുന്നെന്ന് പറയുന്നിടത്ത് ട്രംപിന്റെ പക്ഷം ഒരുമറയുമില്ലാതെ ജനങ്ങൾക്കുമുന്നിൽ വ്യക്തമാകുകയാണ്. ശരി തെറ്റുകൾക്കപ്പുറം ശക്തർക്കെതിരേ ശബ്ദമുയർത്തരുത് എന്ന ഒരു സ്വേച്ഛാധിപതിയുടെ വാക്കുകളാണ് ട്രംപിൽ നിന്ന് മുഴങ്ങുന്നത്. അതേസമയം, യുക്രൈനോടുള്ളതുപോലെ ഒരു പ്രശ്നവും ഇസ്രായേലിനോടും ഈജിപ്തിനോടും യു.എസ്സിനില്ല. ഇവർക്കുള്ള സൈനിക സഹായം ഇനിയും യു.എസ്സിൽ നിന്നുമെത്തും. 

അധികാരത്തിലേറിയിട്ട് ദിവസങ്ങൾ കഴിഞ്ഞിട്ടും പ്രത്യാശിക്കാനുതകുന്നതൊന്നും ലോകരാജ്യങ്ങൾക്കോ അമേരിക്കൻ ജനതയ്ക്കോ ട്രംപ് നൽകുന്നില്ല. ലോകരാജ്യങ്ങൾക്കും ജീവകാരുണ്യ സംഘടനകൾക്കുമുള്ള സാമ്പത്തികസഹായമെല്ലാം നിർത്തലാക്കി പഴയപോലെ ലോകപോലീസ് ചമയാൻ ഇനിയും യു.എസ്സിന് സാധിക്കുമോ എന്നത് കണ്ടുതന്നെ അറിയണം....